Batali bami bahamba e-Estonia ngesikhatsi kuneMphi Yelive Yesibili futsi baya eJalimane lapho ngatalelwa khona. Ngemuva kwaloko sahamba saya eCanada. Safike sahlala ngase-Ottawa, eCanada, futsi besihlala endlini lencane lebeyihlala tinkhukhu. Beseswele kakhulu, kodvwa lokumnandzi kutsi besidla emacandza ekuseni.

Ngalelinye lilanga, BoFakazi BaJehova bafundzela make Sembulo 21:3, 4. Kwamtsintsa kakhulu loko lakufundza kangangekutsi waze wakhala. Inhlanyelo yeliciniso yakhula, futsi ngekushesha make nababe batfutfuka baze babhajatiswa.

Batali bami bebangasati kahle siNgisi, kodvwa bebalitsandza liciniso. NgeMigcibelo, babe bekavame kuhamba nami nasisi wami Sylvia emsebentini wekushumayela, nanobe bekasebente kamatima busuku bonkhe enkampaneni yekuncibilikisa i-nickel lebeyiseSudbury, e-Ontario. Njalo ngeliviki besidadisha Sicongosekulindza singumndeni. Bomake nababe bangifundzisa kutsandza Nkulunkulu. Loko kwangenta nganikela kuphila kwami kuJehova nga-1956 ngineminyaka lengu-10. Indlela bebamtsandza ngayo Jehova beyisolo ingikhutsata kutsi ngichubeke ngimkhonta.

Ngemuva kwekucedza esikolweni, kukhonta Jehova kwabese akuseti kucala ekuphileni kwami. Bengicabanga kutsi nangiba lihlahlandlela bengingeke ngibe nemali leyenele yekufeza liphupho lami lekugibela indiza futsi ngibone umhlaba. Ngatfola umsebenti kulomunye umsakato, futsi bengisebenta kudlala umculo lorekhodiwe, bengiwutsandza lomsebenti wami. Kodvwa bengisebenta nasebusuku; ngako bengihle ngingabi khona emihlanganweni yelibandla futsi bengitihlanganisa nebantfu labangamtsandzi Nkulunkulu. Ekugcineni, nembeza wami loceceshwe liBhayibheli wangibangela kutsi ngente lushintjo.

Ngatfutsela e-Oshawa, e-Ontario. Lapho, ngahlangana naRay Norman nasisi wakhe Lesli, kanye nalamanye emahlahlandlela. Bonkhe banginaka. Kubona indlela lebebajabule ngayo kwangenta ngaphindze ngacabanga ngemigomo yami. Bangikhutsata kutsi ngibe lihlahlandlela, futsi loko ngakwenta ngaSeptember 1966. Bengijabulile, futsi kuphila bekumnandzi. Nobe kunjalo, bekusetakwenteka tintfo letimangalisako ekuphileni kwami.

Nangisebangeni leliphakeme, ngafaka sicelo sekuyosebenta eBethel leseToronto, eCanada. Ngemuva kwaloko nasengilihlahlandlela, ngacelwa kutsi ngiyosebenta eBethel iminyaka lemine. Kodvwa bengimtsandza mbamba Lesli, futsi bengesaba kutsi nangiya eBethel angeke ngiphindze ngimbone. Ngemuva kwesikhatsi ngithantaza ngalokujulile, ngahamba ngayosebenta eBethel futsi ngavalelisa Lesli ngibuhlungu.

EBethel ngafike ngasebenta lakuwashwa khona timphahla futsi ngekuhamba kwesikhatsi ngaba ngumabhalane. Ngaleso sikhatsi, Lesli waba lihlahlandlela lelikhetsekile eGatineau, eQuebec. Bengivame kutibuta kutsi Lesli wentani nje nyalo, nekutsi ngente sincumo lesikahle yini. Kwabese kwenteka intfo lemangalisako leyangijabulisa kakhulu. Ray, longubhuti waLesli wacelwa kutsi atosebenta eBethel, futsi sahlala endlini yinye. Loko kwenta kutsi ngiphindze ngichumane naLesli. Sashada ngaFebruary 27, 1971, lebekulilanga lami lekugcina kuleminyaka lemine ngisebenta eBethel.

Mine naLesli sacelwa kutsi siye ebandleni lelikhuluma siFrench eQuebec. Ngemuva kweminyaka lembalwa, ngamangala nasicelwa kutsi sibe semsebentini wekujikeleta ngineminyaka lengu-28. Ngabona ngatsi ngimncane kakhulu, nekutsi lesabelo besingetulu kwemandla ami, kodvwa ngakhutsatwa ngemavi lakuJeremiya 1:7, 8. Lesli bekatfole ingoti yemoto emahlandla futsi bekangakhoni kulala kahle. Ngako satibuta kutsi sitawukhona yini kwenta lomsebenti wekujikeleta? Nobe kunjalo, Lesli watsi: “Nangabe Jehova asicela kutsi sente lokutsite, kufanele setame kukwenta.” Sasemukela lesabelo, futsi kwaphela iminyaka lengu-17 sijabulela kusenta.

Bengimatasatasa kakhulu ngesikhatsi ngijikeleta futsi bengivame kuba bete sikhatsi lesenele naLesli. Ngafundza lesinye sifundvo. Ngalelinye lilanga kunguMsombuluko ekuseni, kwaba khona lonconcotsa emnyango. Kodvwa nasivula bekute muntfu, bekunabhasikidi lonendvwangu, cheese, sinkhwa, libhodlela leliwayini, tingilazi kanye nemlayeto lotsi: “Hamba uyongcebeleka nemkakho.” Belilihle, libalele. Kodvwa ngachazela Lesli kutsi bekufanele ngilungiselele tinkhulumo ngako bengingeke ngikhone kuhamba. Wasicondza simo sami kodvwa weva buhlungu. Njengobe bengihleti, ngadliwa ngunembeza. Ngacabanga ngembhalo waKubase-Efesu 5:25, 28. Ngacabanga kutsi lelivesi bekuyindlela Jehova lebekangikhumbuta ngayo kutsi nginake indlela umkami lativa ngayo. Ngemuva kwekuthantaza ngatsi kuLesli: “Asihambe,” futsi wajabula kakhulu. Saya endzaweni lengasemfuleni, safike sendlala lendvwangu futsi saba nesikhatsi lesimnandzi kakhulu ndzawonye. Ngetulu kwaloko, ngakhona kulungiselela tinkhulumo tami.

 Umsebenti wekujikeleta bewumnandzi futsi ungumsebenti lomkhulu, besisuka eBritish Columbia siye eNewfoundland. Sifiso sami sekuvakasha safezeka. Bengikile ngacabanga ngeSikolwa saseGileyadi, kodvwa bengite sifiso sekuba sitfunywa selivangeli kulelinye live. Bengibona ngatsi kwebantfu labakhetsekile futsi bengibona ngatsi akungifaneli. Ngetulu kwaloko, bengesaba kutsi singahle siyiswe eveni lelise-Africa lelihlaselwe tifo netimphi. Bengijabula labengikhona khona.

Nga-1992, BoFakazi BaJehova besebangashumayela kulamanye emave lebekabuswe yiSoviet Union. Ngako bazalwane basicela kutsi sibe titfunywa telivangeli e-Estonia. Samangala kakhulu, futsi sathantaza. Saphindze sacabanga satsi: ‘Nangabe Jehova asicela kutsi sente lokutsite, kufanele setame kukwenta.’ Sasemukela lesicelo, futsi satsi: ‘Kuncono ngobe asiyi e-Africa.’

Ngekushesha sacala kufundza si-Estonia. Ngemuva kwetinyanga sikulelive, sacelwa kutsi sente umsebenti wekujikeleta. Bekufanele sivakashele emabandla langu-46 nemacembu lase-Estonia, eLatvia, naseLithuania, nalaseKaliningrad, eRussia. Loko bekusho kutsi kufanele sifundze siLatvia, siLithuania nesiRussia. Bekumatima. Kodvwa bazalwane nabodzadze bebajabula kutsi siyetama kufundza letilwimi, futsi bebasisita. Nga-1999, kwaba nelihhovisi leligatja e-Estonia, futsi ngacelwa kutsi ngibe lilunga lekomidi yeligatja nginaToomas Edur, naLembit Reile, naTommi Kauko.

Sati boFakazi labanyenti lebebayiswe eSiberia eminyakeni leyendlulile. Nanobe bebaphetfwe kabi kakhulu ngesikhatsi basejele futsi behlukanisiwe nemindeni yabo, abazange batfukutsele. Bachubeka bajabulile futsi banemdlandla wekwenta umsebenti wekushumayela. Sibonelo sabo sasikhombisa kutsi natsi singatibeketelela timo letimatima sibe sijabulile.

Kwaphela iminyaka leminyenti sisebenta kamatima futsi singaphumuli ngalokwenele, ngako Lesli wacala kutiva adzinwe kakhulu. Ekucaleni besingati kutsi unesifo lesenta umuntfu adzinwe, lokutsiwa yi-fibromyalgia. Ngako sabona ngatsi kufanele sibuyele eCanada. Ngesikhatsi simenywa esikolweni semalunga emakomidi eligatja ePatterson, eNew York, eMelika, bengingacabangi kutsi sitawukhona kuya. Nanobe kunjalo, sathantaza ngalokujulile ngalendzaba futsi sasemukela lesimemo. Jehova wasibusisa ngalesincumo lesasenta. Ngesikhatsi sikulesikolwa, Lesli wakhona kubonana nabodokotela. Ngenca yaloko, sabese siyakhona kuchubeka nemsebenti wetfu ngendlela levamile.

Ngalelinye lilanga ntsambama nga-2008, sise-Estonia, satfola lucingo loluchamuka endlunkhulu lusibuta kutsi singaya yini kuyokhonta eCongo. Ngamangala kakhulu, ikakhulukati ngobe bebadzinga imphendvulo ngakusasa. Ekucaleni angimtjelanga Lesli ngobe bengati kutsi ngeke alale. Kodvwa ngimi lengingazange ngilale, ngithantaza kuJehova ngaloko lokungikhatsatako ngekuya e-Africa.

 Ngakusasa nangitjela Lesli, sacabanga satsi: “Jehova usicela kutsi siye e-Africa. Sati njani kutsi ngeke sikhone kukwenta loko nekutsi ngeke sikujabulele nangabe singakwetami?” Ngako ngemuva kweminyaka lengu-16 sise-Estonia, sahamba saya eKinshasa, eCongo. Leligatja belinetimbali letinhle letiluhlata futsi lithulile. Intfo yekucala Lesli layikhipha nasifika endlini yetfu bekulikhadi lebekaligcine kusukela sesuka eCanada. Belinemagama latsi: “Jabula nobe ngukuphi lawukhona khona.” Ngemuva kwekubona bazalwane, nekuchuba tifundvo teliBhayibheli, nekuva injabulo yekuba titfunywa telivangeli, injabulo yetfu yakhula. Ngemuva kwesikhatsi sanikwa umsebenti wekuvashela emagatja langaba ngu-13 e-Africa. Loko kwenta sabona bantfu labehlukahlukene futsi labajabulisako. Kwesaba kwami kwasekucaleni kwaphela, futsi sambonga Jehova ngekusitfumela e-Africa.

ECongo, safike sadla kudla lesingakwati, lokufaka ekhatsi tilokatana lebesingacabangi kutsi singatidla. Kodvwa nasibona bazalwane betfu bajabula nabatidla, natsi setama kutidla futsi satitsandza.

Saya emphumalanga yalelive kuze sikhutsate bazalwane betfu futsi sibanikete tintfo labatidzingako. Kuletindzawo bekunemacembu lebekahlasela bantfu futsi aphatsa kabi besifazane nebantfwana. Linyenti lebazalwane betfu beleswele. Kodvwa belicinile litsemba labo lekutsi labafile batawuvuka, bebamtsandza kakhulu Jehova futsi kwetsembeka kwabo enhlanganweni yakhe kwasitsintsa tinhlitiyo. Sibonelo sabo sasenta saphindze sacabanga ngesizatfu setfu sekukhonta Jehova futsi sacinisa kukholwa kwetfu kuye. Labanye kulabazalwane bebalahlekelwe ngemakhaya abo naloko bebakulimile. Loko kwangikhumbuta kutsi tintfo lesinato tisheshe tiphele, kodvwa intfo lebaluleke kakhulu buhlobo betfu naJehova. Nanobe labazalwane bebabhekene nebumatima lobukhulu, kodvwa bebangakhononi. Simo sabo sengcondvo sasisita kuze sibe nesibindzi sekubhekana netinkinga tetfu kanye netemphilo.

Kwaba nalokunye futsi lokwasimangalisa. Sacelwa kutsi sitfutsele egatjeni leliseHong Kong. Besingazange sesicabange kutsi siyoke sihlale e-Asia!  Kodvwa ngemuva kwekubona indlela Jehova lasisite ngayo etabelweni tetfu, sasemukela lesicelo. Nga-2013, sashiya bangani betfu kanye nebuhle base-Africa sigcwele tinyembeti emehlweni etfu, singati kutsi yini letawenteka phambili.

Bekulushintjo lolukhulu kuyohlala eHong Kong, ngobe lidolobha lelikhulu leliphitsitelako. Bekumatima kufundza siShayina. Kodvwa bazalwane basemukela ngetandla letifutfumele futsi besikutsandza kudla kwakhona. Umsebenti lebewentiwa egatjeni bewuchubeka wandza, kodvwa ngesikhatsi lesifanako bekuya kudula kakhulu kutsenga tindzawo. Ngako Sigungu Lesibusako sancuma kutsengisa tindzawo letinyenti taleligatja. Ngekushesha ngemuva kwaloko, nga-2015 satfutsela eSouth Korea lasikhona khona nyalo. Kudzingeke kutsi sifundze lolunye lulwimi lolulukhuni, futsi nanobe sisengakakhoni kusikhuluma kahle siKorea, kodvwa bazalwane nabodzadze bayasikhutsata ngekutsi batsi siyatfutfuka endleleni lesilukhuluma ngayo lolulwimi.

Akuhlali kumelula kwakha bangani, kodvwa sabona kutsi kumema bantfu kutsi basivakashele kwenta kutsi sisheshe sibati. Sibonile nekutsi kunyenti bazalwane betfu nabodzadze labafana ngako kunalabangafani ngako, nekutsi Jehova usente ngendlela lemangalisako yekutsi sikhone kuvula tinhlitiyo tetfu futsi sitsandze bantfu labanyenti.​—2 Khor. 6:11.

Sibonile kutsi kufanele semukele bantfu ngendlela Jehova labemukela ngayo, nekutsi kufanele sibuke tintfo letikhombisa kutsi Jehova uyasitsandza futsi uyasicondzisa. Nobe nini nasidvumatekile nobe nasitibuta kutsi labanye bayasemukela yini, sifundza emakhadi kanye netincwadzi lesatibhalelwa bangani betfu. Siyibonile indlela Jehova laphendvule ngayo imithantazo yetfu, lasicinisekisa ngayo nalasicinisa ngayo.

Kuyo yonkhe leminyaka, mine naLesli sifundze kubaluleka kwekwakha sikhatsi sekuba ndzawonye, ngisho nobe simatasatasa kanganani. Siphindze sabona kutsi kukahle kutihleka, ikakhulukati nawetama kufundza lolunye lulwimi. Njalo ebusuku, setama kucabanga tintfo lesitijabulele lesingambonga ngato Jehova.

Ecinisweni, bengingacabangi kutsi ngiyoke ngibe sitfunywa selivangeli nobe ngihlale kulamanye emave. Kodvwa ngijabule kakhulu kubona kutsi konkhe kuyenteka nawusitwa nguJehova. Loko kungikhumbuta emavi emphrofethi Jeremiya latsi: “Awu Jehova, ungimangalisile.” (Jer. 20:7) Jehova usimangalise ngetindlela letinyenti letijabulisako futsi wasibusisa ngetindlela lesingakase saticabanga, uze wafeza nesifiso sami sekugibela indiza. Siye etindzaweni letinyenti lengingazange sengiticabange ngisengumfana, ngavakashela emagatja emavekatini lasihlanu. Ngijabula kakhulu ngekutsi Lesli bekasolo angisekela kuto tonkhe tabelo tami.

Sihlale sitikhumbuta kutsi sitentela bani tonkhe letintfo, nekutsi sitentelani. Tibusiso lesititfolako lamuhla tisikhombisa kutsi kuphila kutawuba njani nasesiphila phakadze, lapho Jehova ‘avula sandla sakhe, anika tonkhe tintfo letiphilako loko letikufisako.’​—Hla. 145:16