1-2. Ngusiphi simemo Jehova lasinika tikhonti takhe letetsembekile?

 NANGABE lotsite bekangakubuta atsi: ‘Ungubani Jehova kuwe?’ Kungenteka bewungatsi: ‘Jehova unguBabe wami, unguNkulunkulu wami neMngani wami.’ Akhona nalamanye emagama longawasebentisa kuze uchaze Jehova. Kodvwa bewungasho yini utsi: ‘Ngisivakashi sakhe?’

² INkhosi Davide yafananisa bungani lobusemkhatsini waJehova kanye netikhonti takhe letetsembekile nebudlelwane lobubakhona emkhatsini wesivakashi naloyo losimemile. Davide wabuta watsi: “Awu Jehova, ngubani longamvumela kutsi angene ethendeni lakho? Ngubani longahlala entsabeni yakho lengcwele?” (Hla. 15:1) Lamavi laphefumulelwe ayasikhombisa kutsi singaba tivakashi taJehova, lokusho kuba bangani bakhe. Lesi simemo lesikhulu lesivela kuJehova.

JEHOVA UFUNA KUTSI SIBE TIVAKASHI TAKHE

3. Bekungubani sivakashi saJehova sekucala, futsi Jehova nalesivakashi sakhe bativa njani?

³ Jehova bekayedvwana ngaphambi kwekutsi acale kudala. Kodvwa ngekuhamba kwesikhatsi, wemukela iNdvodzana yakhe lelitibulo ethendeni lakhe lelingumfanekiso. Jehova wajabula kakhulu ngendzima yakhe lensha yekuba netivakashi.  LiBhayibheli litsi Jehova “bekajabula kakhulu” ngeNdvodzana yakhe. Nalesivakashi sekucala ‘besijabula embikwaJehova ngaso sonkhe sikhatsi.’​—Taga 8:30.

4. Bobani labanye lababa tivakashi taJehova?

⁴ Jehova wabese udala tingilosi, nato watimema kutsi tibe tivakashi takhe. Letingilosi tibitwa ngekutsi ‘ngemadvodzana aNkulunkulu’ futsi kutsiwa tiyajabula ngekuba naJehova. (Jobe 38:7; Dan. 7:10) Kwaphela sikhatsi bangani baNkulunkulu kungulabo labasezulwini, lapho ahlala khona. Ngekuhamba kwesikhatsi, wadala bantfu futsi nabo bebangaba tivakashi takhe. Labanye lababa tivakashi takhe bekungu-Enoki, Nowa, Abrahama naJobe. Labantfu labetsembekile kutsiwa bangani baNkulunkulu nobe kutsiwe bahamba “naNkulunkulu weliciniso.”​—Gen. 5:24; 6:9; Jobe 29:4; Isa. 41:8.

5. Yini lesingayifundza esiphrofethweni lesikuHezekeli 37:26, 27?

⁵ Kuyo yonkhe leminyaka, Jehova bekasolo amema bangani bakhe kutsi babe tivakashi takhe. (Fundza Hezekeli 37:26, 27.) Sibonelo nje, esiphrofethweni saHezekeli sifundza kutsi Nkulunkulu ufuna tikhonti takhe letetsembekile tibe nebuhlobo lobuhle naye. Wetsembisa kwenta ‘sivumelwano sekuthula nato.’ Lesiphrofetho sikhuluma ngesikhatsi lapho labanelitsemba lekuphila ezulwini kanye nalabo labanelitsemba lekuphila emhlabeni batawuba ndzawonye ethendeni lakhe, babe “ngumhlambi munye.” (Joh. 10:16) Nyalo sengiso lesikhatsi!

NKULUNKULU UYASINAKEKELA NOBE NGABE SIKUPHI

6. Umuntfu uba nini sivakashi ethendeni laJehova, futsi lelithende lakhe lingatfolakala kuphi?

⁶ Ngetikhatsi tekubhalwa kweliBhayibheli, umuntfu bekangena ethendeni lakhe kuze aphumule futsi avikeleke esimeni selitulu. Sivakashi lebesingena kulelothende besingalindzela kuphatfwa kahle. Nasinikela kuphila kwetfu kuJehova, siba tivakashi ethendeni lakhe lelingumfanekiso. (Hla. 61:4) Sitfola konkhe lesikudzingako kuze sihlale sinebuhlobo lobucinile naJehova futsi sibe bangani balabo labativakashi takhe. Kodvwa lelithende lelingumfanekiso alitfolakali endzaweni yinye. Kungenteka uke wavakasha kulelinye live, mhlawumbe kuze uye emhlanganweni lokhetsekile, futsi wahlangana nalabanye labajabulako ngekuba kulelithende laNkulunkulu. Lelithende litfolakala nobe ngukuphi lapho tikhonti takhe letetsembekile tikhona khona.​—Semb. 21:3.

7. Yini leyenta sitsi tikhonti taNkulunkulu letetsembekile lesetifile solo titivakashi ethendeni laJehova? (Buka nesitfombe.)

 ⁷ Kutsiwani ngetikhonti taNkulunkulu letetsembekile lesetifile? Singasho yini kutsi solo titivakashi ethendeni laJehova? Yebo! Yini lesenta sisho njalo? Kungenca yekutsi solo basekhona enkhumbulweni yaJehova. Jesu watsi: “Endzabeni yesihlahla lesivutsako, ngisho naMosi waveta kutsi labafile batawuvuswa, ngesikhatsi abita Jehova ngekutsi ‘nguNkulunkulu wa-Abrahama, wa-Isaka newaJakobe.’ Yena unguNkulunkulu walabaphilako, hhayi walabafile, ngobe ngekwembono wakhe bonkhe bayaphila.”​—Luk. 20:37, 38.

KUNALESIKUTFOLAKO NALOKUFANELE SIKWENTE

8. Yini labayitfolako labo labativakashi taJehova ngekuba sethendeni lakhe?

⁸ Njengobe lithende liyindzawo lapho umuntfu angaphumula khona futsi avikeleke, lithende laJehova livikela labo labativakashi takhe kunobe ngabe yini lengalimata buhlobo babo naye futsi ibente babe bete litsemba ngelikusasa. Nasihlale sisondzelene naJehova, kute Sathane langakwenta lokungasilimata kuze kube phakadze. (Hla. 31:23; 1 Joh. 3:8) Eveni lelisha, Jehova utawuchubeka avikela bangani bakhe labetsembekile kunobe yini lengalimata buhlobo babo naye futsi bangasafi.​—Semb. 21:4.

9. Yini Jehova lalindzele kutsi tivakashi takhe tiyente?

⁹ Kuyintfo lekhetseke kakhulu kutsi sibe tivakashi ethendeni laJehova, lokusho kuba nebuhlobo lobuhle naye futsi sibe bangani bakhe kuze kube phakadze. Kufanele sitiphatse njani nangabe sifuna kuchubeka sitivakashi takhe? Nangabe bewungamenywa ekhaya lalotsite, bewungafuna kwati kutsi yini layilindzele kuwe. Sibonelo nje, kungenteka ulindzele kutsi ukhumule ticatfulo nawungena endlini, futsi loko bewungakwenta ngaphandle kwenkinga. Ngendlela lefanako, natsi sifuna kwati kutsi yini Jehova layilindzele kulabo labafuna kuchubeka bativakashi ethendeni lakhe. Indlela lesimtsandza ngayo Jehova yenta kutsi sente konkhe lesingakwenta kuze ‘simjabulise ngalokuphelele.’ (Khol. 1:10) Kuliciniso kutsi Jehova unguMngani wetfu, kodvwa uphindze abe nguNkulunkulu wetfu naBabe wetfu lokufanele simhloniphe. (Hla. 25:14) Ngako kufanele simhloniphe ngalokujulile, singakhohlwa kutsi ungubani. Loko kutasisita kutsi singatenti tintfo langatitsandzi. Ngako sifuna kuhlala ‘sitfobekile nasihamba naNkulunkulu’ wetfu.​—Mik. 6:8.

JEHOVA WAKHOMBISA KUTSI AKAKHETSI EHLANE

10-11. Indlela Jehova lawaphatsa ngayo ema-Israyeli ngesikhatsi asehlane laseSinayi ikhombisa njani kutsi akakhetsi?

¹⁰ Jehova utiphatsa ngendlela lefanako tivakashi takhe. (Rom. 2:11) Loku sikubona endleleni laphatsa ngayo ema-Israyeli ngesikhatsi asehlane laseSinayi.

¹¹ Ngemuva kwekutsi Jehova akhulule bantfu bakhe ekugcilatweni eGibhithe, wakhetsa baphristi kuze basebente ethendeni lekukhontela. EmaLevi anikwa naleminye imisebenti lebekufanele ayente ethendeni lekukhontela. Labo lebebasebenta ethendeni lekukhontela nobe labo lebebamise emathende abo dvutane nalo bebanakekelwa nguJehova ngendlela lencono yini kunalabanye? Cha! Jehova akakhetsi.

12. Jehova wakhombisa njani kutsi akakhetsi endleleni laphatsa ngayo sive sakhe lesisha? (Eksodusi 40:38) (Buka nesitfombe.)

¹² Bonkhe lebebakulenkambu bebanematfuba  lafanako ekuba nebuhlobo lobuhle naJehova, ngisho nobe bebenta imisebenti lekhetsekile nobe cha, nobe ngisho bebahlala dvutane nobe khashane nelithende lekukhontela. Sibonelo nje, Jehova wenta kutsi sonkhe lesive sikhone kubona insika yelifu kanye nensika yemlilo lebekuba ngetulu kwelithende lekukhontela. (Fundza Eksodusi 40:38.) Lelifu nalisuka liya kulenye indzawo, ngisho nalabo lebebakhashane nelithende lekukhontela bebalibona, bapakishe tintfo tabo, badzilite emathende abo futsi bahambe naso sonkhe lesive. (Num. 9:15-23) Bonkhe bebawuva umsindvo lomkhulu wemacilongo lamabili elisiliva lebewusho kutsi sekufanele kuhanjwe. (Num. 10:2) Kusebaleni kutsi kuhlala dvutane nelithende lekukhontela bekungasho kutsi umuntfu unebuhlobo lobuhle naJehova. Kunaloko, bonkhe lebebayincenye yalesive lesisha bebangaba tivakashi takhe, abacondzise futsi abavikele. Ngendlela lefanako lamuhla, ngisho nobe sihlala kuphi emhlabeni, Jehova uyasitsandza, uyasinakekela futsi uyasivikela.

TIBONELO TALAMUHLA LETIKHOMBISA KUTSI JEHOVA AKAKHETSI

13. Nguyiphi lenye indlela Jehova lakhombisa ngayo kutsi akakhetsi lamuhla?

¹³ Letinye tikhonti taNkulunkulu lamuhla tihlala dvute nendlunkhulu yaBoFakazi BaJehova nobe dvute nelihhovisi leligatja. Labanye basebenta kuto letakhiwo. Ngenca yaloko, benta imisebenti leminyenti leyentiwa kuletindzawo futsi bacitsa sikhatsi nalabo labaholako. Labanye bababonisi betigodzi nobe benta leminye imisebenti yasikhatsi sonkhe. Nangabe ungulomunye walabanyenti labangakhoni kwenta lemisebenti, ciniseka kutsi Jehova lokumemile utitsandza tonkhe tivakashi takhe, futsi tonkhe uyatinakekela. (1 Phet. 5:7) Bonkhe bantfu baNkulunkulu batfola imfundvo levela kuye, uyabacondzisa futsi uyabavikela.

14. Ngusiphi lesinye sibonelo lesikhombisa kutsi Jehova utiphatsa ngendlela lefanako tivakashi takhe?

 ¹⁴ Lesinye sibonelo lesikhombisa kutsi Jehova utiphatsa ngendlela lefanako tivakashi takhe kutsi wente kutsi bonkhe bantfu bakhone kutfola liBhayibheli emhlabeni lamuhla. Ekucaleni ImiBhalo Lengcwele beyibhalwe ngetilwimi letintsatfu: siHebheru, si-Aramu nesiGriki. Labo labakhona kufundza liBhayibheli ngaletilwimi banebuhlobo lobuncono yini naJehova kunalabo labangakhoni? Cha.​—Mat. 11:25.

15. Ngubuphi bufakazi lobukhombisa kutsi Jehova akakhetsi? (Buka nesitfombe.)

¹⁵ Kuze Jehova asimeme kutsi sibe bangani bakhe, akuyi ngekutsi sifundze kakhulu yini nobe sati tilwimi tekucala liBhayibheli lelabhalwa ngato. Kunaloko, kunekutsi anikete tifundziswa kuphela kuhlakanipha kwakhe, Jehova ukunike bonkhe bantfu emhlabeni ngisho nobe bafundze kakhulu nobe cha. LiVi lakhe leliphefumulelwe liBhayibheli, lihunyushwe ngetinkhulungwane tetilwimi, ngako bantfu emhlabeni wonkhe bangazuza kuloko lelikufundzisako, futsi bangafundza kutsi yini lokufanele bayente kuze babe bangani bakhe.​—2 Thim. 3:16, 17.

HLALE ‘WEMUKELEKA’ KUJEHOVA

16. Ngekusho kweMisebenti 10:34, 35, yini lesingayenta kuze sihlale semukeleka kuJehova?

¹⁶ Kuyintfo lenhle kakhulu kwemukelwa nguJehova kutsi ube sivakashi sakhe ethendeni lakhe lelingumfanekiso. Kute umuntfu lonemusa etivakashini takhe njengaye, lotitsandza njengaye futsi lotiphatsa kahle njengaye. Ngetulu kwaloko, akakhetsi, ubemukela bonkhe bantfu ngisho nobe bahlala kuphi, bakhuliswe njani, bafundze kangakanani, banaliphi libala lesikhumba, basive sini, bangakanani ngeminyaka nobe babulili buni. Kodvwa Jehova wemukela kuphela labo labamlalelako kutsi babe tivakashi takhe.​—Fundza Imisebenti 10:34, 35.

17. Sitayitfolaphi leminye imininingwane lemayelana nekuba tivakashi ethendeni laJehova?

¹⁷ Njengobe kubhalwe KuTihlabelelo 15:1, Davide wabuta nayi imibuto: “Awu Jehova, ngubani longamvumela kutsi angene ethendeni lakho? Ngubani longahlala entsabeni yakho lengcwele?” Umhlabeleli waphefumulelwa kutsi ayiphendvule lemibuto. Sihloko lesilandzelako sitawucoca ngaletinye tintfo lokufanele sitente kuze sihlale semukeleka kuJehova.