Yini leyente incenye yekucala yeTihlabelelo 12:7 yahunyushwa ngekutsi “utabanakekela,” lokusho bantfu “labahluphekile” lokukhulunywa ngabo kuvesi 5 hhayi “emavi aJehova” lokukhulunywa ngawo kuvesi 6?

Nasifundza yonkhe lendzaba siyabona kutsi lamavi asho kubantfu.

KuTihlabelelo 12:1-4, Davide ucale utsi bantfu “labetsembekile sebaphelile emhlabeni.” Nyalo naka lokushiwo Tihlabelelo 12:5-7, lokungemavesi latasisita kutsi sitfole imphendvulo yalombuto.

Vesi 5 ukhuluma ngaloko Nkulunkulu latawukwentela labahluphekile, utawubasindzisa.

Vesi 6 uchubeka atsi “emavi aJehova amsulwa,” ‘afanana nelisiliva lelicwengiwe.’ EmaKhristu latinikele ayavumelana nalamavi.—Hla. 18:30; 119:140.

Nyalo naka loko lokushiwo livesi lelilandzelako, Tihlabelelo 12:7 titsi: “Awu Jehova, wena utabanakekela labahluphekile; utawubavikela kusukela kulesitukulwane kuze kube phakadze.” Sati njani kutsi lamavi ekucala esiHebheru kufanele ahunyushwe ngekutsi “labahluphekile” hhayi “emavi aJehova”?

Ngenca yekutsi vesi 7 ulandzela loko lokushiwo nguvesi 6 mayelana ‘nemavi aJehova,’ labanye bangahle baphetse ngekutsi Nkulunkulu ‘uvikela’ emavi akhe. Siyati kutsi Nkulunkulu walivikela liBhayibheli nanobe baphikisi betama kanyenti kulicotfula.—Isa. 40:8; 1 Phet. 1:25.

Nobe kunjalo, kuliciniso nekutsi Jehova uyabavikela nebantfu lokukhulunywa ngabo kuvesi 5. Bekasolo abasita futsi abasindzisa “labahluphekile” ‘nalabacindzetelwako,’ futsi utawuchubeka enta njalo.—Jobe 36:15; Hla. 6:4; 31:1, 2; 54:7; 145:20.

Ngako yini leyenta sephetse ngekutsi vesi 7 usho bantfu?

Loko sikutfola nasifundza lesihlabelelo.

Tihlabelelo 12:1 tikhuluma ngebantfu “labetsembekile” labakhulunyelwa emanga. Ngemuva kwaloko kubese kukhulunywa ngekutsi Jehova utawujuba lulwimi lwalabo labalusebentisa kabi. Lesihlabelelo siyasicinisekisa kutsi singetsemba kutsi Nkulunkulu utawubasita bantfu bakhe ngobe emavi akhe amsulwa.

Ngako vesi 7 utsi Jehova utawubavikela futsi abanakekele labo labahluphekile labaphatfwa kabi bantfu lababi.

Lihumusho letfu liveta loko bekusemakhophini letsenjwako emiBhalo yesiHebheru. Imibhalo yekucala leyahunyushwa ngesiGriki isuselwa elulwimi lwesiHebheru ikhombisa kutsi laba ngulabetsembekile labahlushwako futsi labacindzetelwako. Ekugcineni, vesi 7 utsi labetsembekile ‘batawuvikelwa kulesitukulwane,’ bavikelwe kubantfu lababi labakhutsata kwenta tintfo letimbi. (Hla. 12:7, 8) Kuvesi 7, lihumusho lesi-Aramu lelisuselwa elulwimini lwesiHebheru litsi: “Wena Nkhosi utawuvikela labalungile, utawubavikela kulesitukulwane lesibi kuze kube phakadze.” Loku kusinika lobunye bufakazi bekutsi Tihlabelelo 12:7 atikhulumi ngemavi aNkulunkulu.

Ngako lelivesi libanika litsemba ‘bantfu labetsembekile,’ Nkulunkulu utawubasita.