1-2. Yini levame kwenteka nakubhajatiswa bantfu, futsi yini lesitawucoca ngayo?

 UKE walibona yini licembu lalabo labayobhajatiswa? Uva kuciniseka kwabo njengobe baphendvula lemibuto lemibili ngaphambi kwekutsi babhajatiswe. Ubona emalunga emindeni yabo nebangani bagcwele injabulo. Nabavumbuka emantini laba lababhajatiswako, uva kushaywa tandla futsi ubone injabulo legcwele ebusweni babo. Ngekwesilinganiso, kubhajatiswa tinkhulungwane tebantfu njalo ngeliviki babe BoFakazi BaJehova Nkulunkulu labatinikele.

² Kutsiwani ngawe? Nangabe ucabanga kubhajatiswa, ungumuntfu lokhetseke kakhulu kulelive lelibi ngobe ‘ufuna Jehova.’ (Hla. 14:1, 2) Lesihloko sentelwe wena ngisho nobe umncane nobe sewukhulile. Kodvwa natsi tsine lesibhajatisiwe siyafuna kuchubeka sitimisela kakhulu kukhonta Jehova kuze kube phakadze. Ngako nyalo asesicoce ngaletinye tizatfu letintsatfu letenta sikhonte Jehova.

3. Yini leyenta bantfu baJehova batsandze liciniso nekulunga? (Tihlabelelo 119:128, 163)

³ Jehova watjela bantfu bakhe kutsi ‘batsandze liciniso.’ (Zak. 8:19) Jesu watjela balandzeli bakhe kutsi bafune kulunga. (Mat. 5:6) Loku kusho kutsi umuntfu kufanele abe nesifiso lesikhulu sekwenta lokulungile, nalokuhle futsi abe ngumuntfu lohlantekile embikwaNkulunkulu. Uyalitsandza yini liciniso nekulunga? Siyaciniseka kutsi uyakutsandza. Uyawenyanya emanga nako konkhe lokubi. (Fundza Tihlabelelo 119:128, 163.) Umuntfu lonemanga ulingisa Sathane, longumbusi walelive. (Joh. 8:44; 12:31) Lomunye wemigomo yaSathane kuhlambalata  libito laNkulunkulu lelingcwele. Sathane bekasolo asakata emanga ngaNkulunkulu wetfu kusukela kwacala kuvukela e-Edeni. Wetame kwenta bantfu kutsi bacabange kutsi Jehova unguMbusi loticabangela yena, longaketsembeki futsi logodlela bantfu tintfo letinhle. (Gen. 3:1, 4, 5) Sathane uyachubeka nekukhohlisa bantfu kuze bacabange tintfo letimbi ngaJehova. Nakwenteka bantfu bakhetsa ‘kungalitsandzi liciniso,’ Sathane angabenta kutsi bente tonkhe tinhlobo tekungalungi kanye netintfo letimbi.​—Rom. 1:25-31.

4. Jehova ukhombise njani kutsi ‘unguNkulunkulu weliciniso’? (Buka nesitfombe.)

⁴ Jehova ‘unguNkulunkulu weliciniso’ futsi ubafundzisa liciniso labo labamtsandzako. (Hla. 31:5, umbhalo longentasi) Ngekwenta njalo uyabakhulula emangeni aSathane. Jehova uphindze afundzise tikhonti takhe kutsi tetsembeke futsi tibe bantfu labalungile. Ngaleyondlela titiva tihloniphekile futsi tinekuthula. (Taga 13:5, 6) Ukubonile yini loku kwenteka kuwe kusukela wacala kudadisha liBhayibheli? Ufundzile kutsi tindlela taJehova tikahle kubo bonkhe bantfu futsi nawe utibonele. (Hla. 77:13) Ngako ufuna kwenta loko Nkulunkulu latsi kulungile. (Mat. 6:33) Ufuna kumelela liciniso futsi ukhombise kutsi loko Sathane lakusho ngaJehova Nkulunkulu wetfu kungemanga. Ungakwenta njani loko?

5. Ungalisekela njani liciniso nekulunga?

⁵ Ungaphila ngendlela lekhombisa kutsi usekela Jehova, kube ngatsi utsi: “Ngiyawenyanya emanga aSathane, futsi ngiyalitsandza liciniso. Ngifuna kube nguJehova uMbusi wami, futsi ngifuna kwenta loko latsi kulungile.” Ungakwenta njani loko? Thantaza kuJehova futsi utinikele kuye, bese loko ukukhombisa ngekubhajatiswa. Kutsandza liciniso nalokulungile kungakukhutsata kakhulu kutsi ukhetse kubhajatiswa.

6. Ngutiphi tizatfu letikuTihlabelelo 45:4 letenta kutsi umtsandze Jesu Khristu?

⁶ Yini lekwenta umtsandze Jesu Khristu? Naka nati letinye tizatfu letinhle letitfolakala kuTihlabelelo 45:4. (Fundza.) Jesu uyalitsandza liciniso, kutfobeka nekulunga. Nangabe ulitsandza liciniso nekulunga, loko kusho kutsi uyamtsandza naJesu Khristu. Cabanga ngendlela Jesu lalimelela ngayo ngesibindzi liciniso nekulunga. (Joh. 18:37) Kodvwa yini lekhombisa kutsi uyakutsandza kutfobeka?

7. Yini lekujabulisako ngekutfobeka kwaJesu?

 ⁷ Jesu ukhombise ngesibonelo sakhe kutsi utfobekile. Sibonelo nje, lonkhe ludvumo uluyisa kuBabe wakhe, akwenteki atidvumise yena. (Mak. 10:17, 18; Joh. 5:19) Utiva njani ngekutfobeka kwaJesu? Akukwenti yini kutsi uyitsandze leNdvodzana yaNkulunkulu futsi ufune kuba ngumlandzeli wayo? Siyaciniseka kutsi kunjalo. Yini leyenta Jesu atfobeke? Kungobe ulingisa Babe wakhe lotfobekile futsi uyamtsandza. (Hla. 18:35; Heb. 1:3) Loku akukwenti yini usondzelane naJesu lobuveta kahle buntfu baJehova?

8. Njengobe Jesu ayiNkhosi yetfu, yini leyenta simtsandze?

⁸ Njengobe Jesu ayiNkhosi yetfu, siyamtsandza ngobe unguMbusi lokahle kakhulu. NguJehova matfupha lowacecesha iNdvodzana yakhe futsi wayikhetsa kutsi ibe yiNkhosi. (Isa. 50:4, 5) Cabanga nangekutidzela kwaJesu kuze akhombise kutsi uyasitsandza. (Joh. 13:1) Njengobe Jesu ayiNkhosi yakho, kufanele kutsi umtsandze. Wachaza kutsi labo labamtsandza mbamba, lokungulabo lababita ngekutsi bangani bakhe, bakhombisa kutsi bayamtsandza ngekutsi balalele imiyalo yakhe. (Joh. 14:15; 15:14, 15) Kuyintfo lenhle kakhulu kuba ngumngani weNdvodzana yaJehova!

9. Kubhajatiswa kwemaKhristu kufana njani nekubhajatiswa kwaKhristu?

⁹ Lomunye wemiyalo yaJesu ukutsi balandzeli bakhe babhajatiswe. (Mat. 28:19, 20) Wababekela sibonelo kuloko. Nobe kunjalo, kubhajatiswa kwakhe kwehlukile kunekubhajatiswa kwebalandzeli bakhe. (Buka libhokisi lelitsi “ Kubhajatiswa KwaJesu Kwehluke Njani Kunekubhajatiswa Kwebalandzeli Bakhe.”) Kodvwa ngandlela tsite kuyafana. Ngesikhatsi Jesu abhajatiswa, watinikela kuBabe wakhe kutsi utawenta intsandvo yakhe. (Heb. 10:7) Ngendlela lefanako, balandzeli baKhristu bayabhajatiswa kuze bakhombise labanye kutsi batinikele kuJehova Nkulunkulu. Intfo leta kucala ekuphileni kwabo kwenta intsandvo yakhe, hhayi loko labakufunako. Ngako balingisa iNkhosi yabo.

10. Kutsandza Jesu kungakwenta njani kutsi ufune kubhajatiswa?

¹⁰ Uyakholelwa kutsi Jesu uyiNdvodzana yaNkulunkulu nekutsi uyiNkhosi lekhetfwe nguNkulunkulu kutsi isibuse. Uyati kutsi utfobekile nekutsi umlingisa ncamashi Babe wakhe. Ufundzile kutsi wabapha kudla labalambile, wadvudvuta lebebacindzetelekile futsi waze welapha ngisho nalabagulako. (Mat. 14:14-21) Uyibonile indlela lacondzisa ngayo libandla lamuhla. (Mat. 23:10) Uyati nekutsi utawukwenta tintfo letinyenti esikhatsini lesitako njengobe ayiNkhosi yeMbuso waNkulunkulu. Ungakhombisa njani kutsi uyamtsandza Jesu? Ngekutsi ulingise sibonelo sakhe. (Joh. 14:21) Ungacala kukwenta loku ngekutsi utinikele kuJehova futsi ubhajatiswe.

11. Ngusiphi sizatfu lesihamba embili sekubhajatiswa, futsi sisho ngani?

¹¹ Ngusiphi sizatfu lesihamba embili sekubhajatiswa? Jesu waveta kutsi ngumuphi umyalo waNkulunkulu lobaluleke kakhulu nakatsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Mak. 12:30) Umtsandza ngalendlela yini nawe Nkulunkulu?

12. Yini lekwenta umtsandze Jehova? (Buka nesitfombe.)

¹² Tinyenti tizatfu letenta simtsandze Jehova. Sibonelo nje, sewufundzile kutsi ‘ungumtfombo wekuphila’ futsi ungumuphi wato “tonkhe tipho letinhle naletiphelele.” (Hla. 36:9; Jak. 1:17) Tonkhe tintfo letinhle lonato  tivela kuNkulunkulu wetfu lositsandzako futsi lowephanako.

13. Yini leyenta inhlawulo ibe sipho lesihle kakhulu?

¹³ Inhlawulo isipho lesihle kakhulu lesisiphiwe nguJehova. Sisho ngani? Cabanga ngebudlelwane lobuhle lobukhona emkhatsini waJehova neNdvodzana yakhe. Jesu watsi: ‘Babe uyangitsandza’ futsi “ngiyamtsandza Babe.” (Joh. 10:17; 14:31) Budlelwane babo bacina kakhulu ngesikhatsi bacitsa tigidzigidzi teminyaka bandzawonye. (Taga 8:22, 23, 30) Ngako cabanga ngekutsi Nkulunkulu weva buhlungu lobungakanani ngekuvumela iNdvodzana yakhe kutsi ihlupheke futsi ife. Jehova ubatsandza kakhulu bantfu, lokufaka ekhatsi nawe, kangangekutsi waze wanikela ngeNdvodzana yakhe layitsandzako kuze ibe ngumhlatjelo lowenta kutsi wena kanye nalabanye bantfu nibe nelitsemba lekuphila kuze kube phakadze. (Joh. 3:16; Gal. 2:20) Lesi sizatfu lesihamba embili lesenta simtsandze Nkulunkulu.

14. Ngumuphi umgomo loncono kakhulu longatibekela wona ekuphileni kwakho?

¹⁴ Indlela lomtsandza ngayo Jehova seyikhulile njengobe sewufundze lokunyenti ngaye. Uyafuna kusondzelana naye nyalo nekusondzelana naye kuze kube phakadze. Loko kungenteka. Ngemusa uyakukhutsata kutsi wente inhlitiyo yakhe ijabule. (Taga 23:15, 16) Loko ungakwenta ngaloko lokushoko  nangaloko lokwentako. Indlela lophila ngayo nyalo itawukhombisa kutsi umtsandza mbamba Jehova. (1 Joh. 5:3) Loyo ngumgomo loncono kakhulu longatibekela wona ekuphileni kwakho.

15. Ungakhombisa njani kutsi uyamtsandza Jehova?

¹⁵ Ungakhombisa njani kutsi uyamtsandza Jehova? Kwekucala, thantaza utinikele kuNkulunkulu weliciniso. (Hla. 40:8) Ngemuva kwaloko, khombisa nalabanye kutsi utinikele kuye ngekutsi ubhajatiswe. Njengobe sifundzile ekucaleni kwalesihloko, kubhajatiswa kwakho kusikhatsi lesijabulisa kakhulu nalesibalulekile ekuphileni kwakho. Ucala imphilo lensha, ungasatiphileli wena kodvwa uphilele Jehova. (Rom. 14:8; 1 Phet. 4:1, 2) Leso sincumo lesikhulu. Sikuvulela litfuba lekuphila imphilo lencono kakhulu. Kanjani?

16. Tihlabelelo 41:12 titsi Jehova utawubentela ini labo labasebentisa kuphila kwabo kuze bamkhonte?

¹⁶ Jehova wephana kakhulu. Kunobe yini longamupha yona, yena utawuhlale akubuyisela ngalokungetulu kakhulu kwaloko lomuphe kona. (Mak. 10:29, 30) Utakunika imphilo lejabulisako, lenhle nalekwenetisako ngisho nanyalo kulelive lelibi. Kodvwa leso kutawube nje kusicalo. Imphilo yakho lensha lecala ngemuva kwekubhajatiswa angeke iphele. Ungachubeka ukhonta Babe wakho lomtsandzako kuze kube phakadze. Lutsandvo lolukhona emkhatsini wakho naBabe wakho lutawuchubeka lukhula. Ngetulu kwaloko, nangabe nje asaphila, nawe utawuchubeka uphila kuze kube phakadze.​—Fundza Tihlabelelo 41:12.

17. Yini longayinika Jehova lete yona?

¹⁷ Nawutinikela kuNkulunkulu futsi ubhajatiswa, usuke unelitfuba lelihle lekumnika intfo leligugu kakhulu. Ukunikete tintfo letinyenti letinhle, waba netikhatsi letijabulisako. Ngako unganika uMnikati wemazulu nemhlaba intfo lete yona, lokukumkhonta ngekwetsembeka ngobe ufuna. (Jobe 1:8; 41:11; Taga 27:11) Yini nje lenye lencono longabuye uyente ngekuphila kwakho? Siyaciniseka kutsi indlela lomtsandza ngayo Jehova isizatfu lesihamba embili lesingakwenta ubhajatiswe.

18. Ngumiphi imibuto longatibuta yona?

¹⁸ Ungawuphendvula njani-ke lombuto lotsi: Utawubhajatiswa yini? Nguwe kuphela longaphendvula lombuto. Kodvwa kungakusita nekutibuta: ‘Ngimeleni?’ (Imis. 8:36) Khumbula letizatfu letintsatfu lesesicoce ngato. Sekucala, uyalitsandza liciniso nalokulungile. Tibute: ‘Ngiyafuna yini kubona sikhatsi lapho khona bonkhe bantfu sebakhuluma liciniso futsi benta lokulungile?’ Kwesibili, uyamtsandza Jesu Khristu. Tibute: ‘Ngiyafuna yini kutsi iNdvodzana yaNkulunkulu ibe yiNkhosi yami, futsi ngiyafuna yini kulingisa sibonelo sayo?’ Kwesitsatfu, nalokubaluleke kakhulu, uyamtsandza Jehova. Tibute: ‘Ngiyafuna yini kwenta inhlitiyo yaJehova ijabule ngekutsi ngimkhonte abe nguNkulunkulu wami?’ Nangabe lemibuto uyiphendvula ngayebo, yini lekwenta ungabhajatiswa? Umeleni?​—Imis. 16:33.

19. Yini leyenta kungadzingeki kutsi uhudvule tinyawo kuze ubhajatiswe? Fanekisa. (Johane 4:34)

¹⁹ Nangabe uhudvula tinyawo kuze ubhajatiswe, cabanga nganangu umfanekiso lowashiwo nguJesu. (Fundza Johane 4:34.) Naka kutsi Jesu wafananisa kwenta intsandvo yaBabe wakhe nekudla. Leni? Ngobe kudla kuyasisita. Jesu bekati kutsi nobe yini Jehova lacela kutsi siyente, isita tsine. Jehova akasiceli kutsi sente intfo letasilimata. Jehova ufuna kutsi ubhajatiswe yini? Yebo. (Imis. 2:38) Ngako ungaciniseka kutsi kulalela lomyalo wekutsi ubhajatiswe kutakusita. Nangabe ungahudvuli tinyawo nakutsiwa kunekudla lokumnandzi, utihudvulelani-ke nasekufanele ubhajatiswe?

20. Yini lesitawucoca ngayo esihlokweni lesilandzelako?

²⁰ Umeleni? Labanyenti bangaphendvula lombuto ngekutsi batsi: “Ngisengakakulungeli kubhajatiswa.” Kuliciniso kutsi sincumo sekutinikela kuJehova futsi ubhajatiswe sincumo lesibaluleke kakhulu kunato tonkhe lotawutenta ekuphileni kwakho. Ngako kuze ukulungele kubhajatiswa, kutawudzingeka utinike sikhatsi, ucabangisise ngako futsi wente imetamo. Kodvwa nangabe unesifiso lesikhulu sekubhajatiswa, yini longayenta kuze utilungiselele? Sitawucoca ngemphendvulo yalombuto esihlokweni lesilandzelako.