1. Yini bantfu labayinakako nabefika kwekucala emihlanganweni yelibandla? (Buka nesitfombe.)

 CABANGA ngalabashadene labaya eHholweni leMbuso laBoFakazi BaJehova kwekucala ngca! Bayajabula nababona indlela bazalwane nabodzadze labanebungani ngayo nendlela labatsandzana ngayo. Nasebabuyela ekhaya, lomake utsi endvodzeni yakhe: ‘BoFakazi BaJehova behlukile, futsi ngiyakutsandza kuba nabo.’

2. Yini leyente labanye bayekela kukhonta Jehova?

² Lutsandvo lolusemkhatsini webantfu baJehova luyamangalisa. Kuliciniso kutsi BoFakazi BaJehova banesono. (1 Joh. 1:8) Ngako nasichubeka sibati kancono bazalwane betfu nabodzadze ebandleni, manyenti ematfuba ekutsi sibone emaphutsa abo. (Rom. 3:23) Lokubuhlungu kutsi labanye bavumele lamaphutsa abenta bayekela kukhonta Jehova.

3. Babonakala ngani balandzeli baJesu beliciniso? (Johane 13:34, 35)

³ Asewuphindze ubuke umbhalo lokusekelwe kuwo lesihloko. (Fundza Johane 13:34, 35.) Bebatawubonakala ngani balandzeli baKhristu beliciniso? Bebatawubonakala ngelutsandvo, hhayi ngekungawenti emaphutsa. Naka nekutsi Jesu akazange atsi: Ngaloku, ‘nitawukwati kutsi nibafundzi bami.’ Kodvwa watsi: Ngaloku, “bonkhe batawukwati kutsi nibafundzi bami.” Ngalamavi, Jesu waveta kutsi bekungasibo nje balandzeli bakhe kuphela lebebatawubona, kodvwa nalabo  lebebangesiwo emaKhristu bebatawubabona balandzeli bakhe sibili nelutsandvo lolukhona emkhatsini wabo.

4. Yini labanye lokungenteka bafune kuyati ngemaKhristu eliciniso?

⁴ Labanye bantfu labangesibo BoFakazi BaJehova bangahle batibute: ‘Lutsandvo lusisita njani kutsi sibone balandzeli baJesu beliciniso? Jesu walukhombisa njani lutsandvo kubaphostoli bakhe? Singakhona yini tsine lamuhla kulingisa sibonelo saJesu?’ BoFakazi benta kahle ngekucabanga ngetimphendvulo talemibuto. Kwenta njalo kutasisita kutsi sibatsandze kakhulu labanye, ikakhulukati nangabe bente emaphutsa.​—Ef. 5:2.

5. Chaza emavi aJesu lakuJohane 15:12, 13.

⁵ Jesu wachaza kutsi balandzeli bakhe bebatawutsandzana ngendlela lemangalisako. (Fundza Johane 15:12, 13.) Naka kutsi wabanika umyalo lotsi: “Nitsandzane njengobe nami nginitsandzile.” Kusho kutsini loku? Njengobe Jesu achaza, lolu lutsandvo lwekutidzela, lokulutsandvo lolungenta kutsi umKhristu afele umzalwane wakhe nobe dzadze nangabe kudzingekile. b

6. LiVi laNkulunkulu likhombisa njani kutsi lutsandvo lubalulekile?

⁶ LiVi laNkulunkulu lisifundzisa kutsi lutsandvo lubaluleke kakhulu. Bantfu labanyenti batsandza emavesi latsi: “Nkulunkulu ulutsandvo.” (1 Joh. 4:8) “Kufanele utsandze makhelwane wakho njengobe utitsandza wena.” (Mat. 22:39) “Lutsandvo lumbonya tono letinyenti.” (1 Phet. 4:8) “Lutsandvo angeke luphele nanini.” (1 Khor. 13:8) Lamavesi nalamanye akhombisa ngalokucacile kutsi kubalulekile kuba nelutsandvo nekulukhombisa labanye.

7. Yini leyenta Sathane angakhoni kwenta bantfu kutsi batsandzane mbamba?

 ⁷ Bantfu labanyenti batsi: ‘Ngingayibona njani inkholo yeliciniso? Tonkhe tinkholo titsi tifundzisa liciniso, kodvwa tonkhe tifundzisa tintfo letingafani ngaNkulunkulu.’ Sathane wente kutsi kube netinkholo letinyenti temanga, futsi loko kwente kutsi kube matima ngebantfu kutsi babone inkholo yeliciniso. Kodvwa angeke aze akhone kuhlanganisa bonkhe bantfu emhlabeni wonkhe kuze batsandzane. NguJehova kuphela longakwenta loko. Loku kungenca yekutsi lutsandvo sibili luvela kuJehova. Ngulabo labanemoya waJehova nalababusiswa nguye labanelutsandvo emkhatsini wabo. (1 Joh. 4:7) Ngako asimangali ngekutsi Jesu watsi balandzeli bakhe beliciniso bebatawubonakala ngelutsandvo sibili.

8-9. Lubatsintse njani labanyenti lutsandvo labalubona emkhatsini waBoFakazi BaJehova?

⁸ Njengobe Jesu asho, bantfu labanyenti bakhonile kubona balandzeli bakhe beliciniso ngenca yelutsandvo lolukhona emkhatsini wabo. Sibonelo nje, lomunye umzalwane lokutsiwa ngu-Ian, ukhumbula umhlangano wesifundza wekucala laya kuwo, lobewusenkhundleni yetemidlalo lebeyiseceleni kwelikhaya lakhe. Ian bekake waya kulenkhundla etinyangeni letimbalwa lebetingaphambi kwalomhlangano kuze ayobukela imidlalo. Utsi: “Ngabona umehluko lomkhulu nangikulomhlangano kunangalesikhatsi ngite kutobukela imidlalo. LaboFakazi bebanemusa futsi bagcoke kahle, ngisho nebantfwana babo bebahlonipha.” Wengeta utsi: “Labantfu bebabonakala benetisekile futsi banekuthula, lokuyintfo lebengiyifuna kakhulu ekuphileni kwami. Angisatikhumbuli tinkhulumo tangalelo langa, kodvwa ngisayikhumbula indlela laboFakazi lebebenta ngayo tintfo.” c Kutiphatsa lokunjalo kuyakhombisa kutsi sitsandzana mbamba. Ngenca yekutsi siyabatsandza bazalwane betfu nabodzadze, sibaphatsa ngemusa nangenhlonipho.

⁹ Lomunye umzalwane lokutsiwa nguJohn wativa ngendlela lefanako nakacala kuya emihlanganweni yelibandla. Utsi: “Kwangijabulisa kubona kutsi bonkhe lebebalapho bebanebungani, bekungatsi abawenti emaphutsa. Lutsandvo lwabo sibili lwangenta ngaciniseka kutsi ngiyitfolile inkholo yeliciniso.” d Tindzaba letinjena naletinye, tiyakhombisa kutsi bantfu baJehova bangemaKhristu sibili.

10. Kunini lapho singatfola khona litfuba lekukhombisa lutsandvo lwebuKhristu? (Buka nembhalo longentasi.)

¹⁰ Njengobe kuvetiwe ekucaleni kwalesihloko, bonkhe bazalwane betfu nabodzadze banesono. Ngalesinye sikhatsi, batawusho tintfo letisivisa buhlungu nobe bente tintfo letisiphatsa kabi. e (Jak. 3:2) Nakwenteka loko, sitawuba nelitfuba lekukhombisa lutsandvo lwebuKhristu ngaloko lesikushoko nangaloko lesikwentako. Sicabanga ngaloko, yini lesingayifundza esibonelweni saJesu?​—Joh. 13:15.

11. Ngubuphi buntfu lobubi lobakhonjiswa nguJakobe naJohane? (Buka nesitfombe.)

¹¹ Jesu bekangalindzeli kutsi balandzeli bakhe bangawenti emaphutsa. Kunaloko, wabasita  kutsi balungise buntfu babo lobubi kuze bemukelwe nguJehova. Ngalelinye lilanga, baphostoli bakhe lababili, lokunguJakobe naJohane bacela make wabo kutsi ayobacelela kuJesu tikhundla letisetulu eMbusweni. (Mat. 20:20, 21) Loko lokwentiwa nguJakobe naJohane kwakhombisa kutsi bebatigcabha futsi bebafuna kuba ncono kunalabanye.​—Taga 16:18.

12. NguJakobe naJohane kuphela yini labakhombisa buntfu lobubi? Chaza.

¹² Akusuye Jakobe naJohane kuphela labakhombisa buntfu lobubi ngalelo langa. Naka loko lokwentiwa ngulalabanye baphostoli: “Laba labanye labangu-10 batsi nabeva ngaloko, babatfukutselela laba lababili.” (Mat. 20:24) Singawacabanga nje emavi lahlabako lebekaphuma kuJakobe, Johane nakulalabanye baphostoli. Mhlawumbe lalabanye bebatsi: ‘Nicabanga kutsi nibobani nje nine kutsi ningacela tikhundla letisetulu eMbusweni? Akusini kuphela lenisebente kamatima naJesu. Natsi tiyasifanela letikhundla letisetulu!’ Kunobe ngukuphi, labaphostoli bakhohlwa kwesikhashana kukhombisana lutsandvo kanye nemusa.

13. Yini Jesu layenta nakabona emaphutsa ebaphostoli bakhe? (Matewu 20:25-28)

¹³ Yini Jesu layenta? Akazange atfukutsele. Akazange atsi utawufuna lamanye emadvodza lancono kutsi abe baphostoli bakhe, emadvodza latfobeke kakhudlwana  nalatawuhlale akhombisana lutsandvo. Kunaloko, wabaphatsa kahle ngobe bekati kutsi bayafuna kwenta lokulungile. (Fundza Matewu 20:25-28.) Wachubeka abakhombisa lutsandvo nanobe bekungasiko kwekucala baphikisana ngekutsi ngubani lomkhulu emkhatsini wabo futsi bekungasiko kwekugcina.​—Mak. 9:34; Luk. 22:24.

14. Bakhulela endzaweni lenjani baphostoli baJesu?

¹⁴ Kusebaleni kutsi Jesu bekakhumbula kutsi baphostoli bakhe bebakhulele endzaweni lenjani. (Joh. 2:24, 25) Bebakhulele endzaweni lapho khona baholi benkholo bebafundzisa kutsi umuntfu ubalulekile nangabe asesikhundleni lesisetulu. (Mat. 23:6; catsanisa nesihloko lesitsi “Isinagoge—Indawo UJesu Nabafundi Bakhe Ababeshumayela Kuyo,” ku-Sicongosekulindza sa-April 1, 2010, emakh. 16-18, lesitfolakala ngesiZulu.) Ngisho nabo baholi bemaJuda bebatibona bancono kunalabanye. f (Luk. 18:9-12) Jesu bekati kutsi lendlela yekucabanga beyiyitsintsa indlela labatibona ngayo nendlela lebebabuka ngayo labanye. (Taga 19:11) Bekangakalindzeli kutsi bangawenti emaphutsa futsi bekababeketelela nakwenteka bawenta. Bekati kutsi banetinhlitiyo letinhle, ngako ngesineke wabasita kutsi bancobe kutigcabha nekufuna kuba ncono kunalabanye futsi esikhundleni sako babe nelutsandvo.

15. Yini lesiyifundza endzabeni yaJakobe naJohane?

¹⁵ Kunyenti lesingakufundza endzabeni yaJakobe naJohane. Benta kabi ngekucela tikhundla letisetulu eMbusweni. Kodvwa nalalabanye baphostoli benta kabi ngekuvumela lesimo kutsi siphazamise kuthula kwabo. Nanobe kunjalo, Jesu wabaphatsa ngemusa nangelutsandvo bonkhe baphostoli bakhe. Yini lesiyifundzako? Lokubalulekile akusiko nje kuphela loko labanye bantfu labakwentako kodvwa ibalulekile nendlela lesenta ngayo nangabe bente emaphutsa. Yini lengasisita? Nangabe siphatseke kabi ngenca yaloko lokwentiwe ngumzalwane nobe dzadze singatibuta: ‘Yini lelengiphetse kabi ngaloku lokwentiwe ngulomzalwane nobe dzadze? Indlela lengenta ngayo ikhombisa buntfu lobubi yini lokufanele ngibulungise? Kungenteka yini kutsi lomzalwane nobe lodzadze ubhekene netinkinga? Ngisho nobe nginesizatfu lesivakalako sekutfukutsela, ngingalukhombisa yini lutsandvo ngekutsi ngingakunaki loku lakwentile?’ Nasichubeka sibakhombisa lutsandvo labanye, sitawube sikhombisa kutsi sibalandzeli baJesu beliciniso.

16. Yini lenye lesingayifundza esibonelweni saJesu?

¹⁶ Sibonelo saJesu sisifundzisa nekutsi kufanele setame kubati kahle bazalwane betfu nabodzadze. (Taga 20:5) Kuliciniso kutsi Jesu uyakhona kufundza tinhlitiyo, tsine asikhoni. Kodvwa singakhona kuwabeketelela emaphutsa ebazalwane betfu nabodzadze. (Ef. 4:1, 2; 1 Phet. 3:8) Kungaba melula kukwenta loko nangabe sati indlela labakhule ngayo. Cabanga nganasi sibonelo.

17. Kwamsita njani lomunye umbonisi lojikeletako kwati lomunye umzalwane kancono?

¹⁷ Lomunye umbonisi lojikeletako emphumalanga ye-Africa ukhumbula lomunye umzalwane wakulelinye libandla lebekambona ngatsi ute umusa. Wenta njani lombonisi lojikeletako? Utsi: “Kunekutsi ngimbalekele lomzalwane, ngancuma kutsi ngimati kancono.”  Kwenta njalo, kwamsita wati indlela lomzalwane lebekakhule ngayo nekutsi loko bekuyitsintsa njani indlela labaphatsa ngayo labanye. Lombonisi uyachubeka utsi: “Ngesikhatsi ngitfola kutsi bekumatima kangakanani ngalomzalwane kwenta lushintjo kuze aphilisane nalabanye bantfu nekutsi besekashintje kangakanani, ngamtsandza. Saba bangani.” Nasetama kubati kancono bazalwane betfu nabodzadze, kuyavama kuba melula kubatsandza.

18. Ngumiphi imibuto lesingatibuta yona nangabe umzalwane nobe dzadze asiphetse kabi? (Taga 26:20)

¹⁸ Ngalesinye sikhatsi singahle sibone ngatsi kufanele siyokhuluma nemzalwane nobe dzadze losiphetse kabi. Kodvwa ngaphambi kwekutsi sente njalo, kufanele sicale sitibute imibuto lenjengaletsi: ‘Nginawo onkhe yini emaciniso endzaba?’ (Taga 18:13) ‘Kusenekwenteka yini kutsi bekangakahlosi kungivisa buhlungu?’ (Shu. 7:20) ‘Ngikile yini nami ngalenta liphutsa lelifanako?’ (Shu. 7:21, 22) ‘Nangingetama kukhuluma naye, kusenekwenteka yini lenkinga ibe yinkhulu kakhulu?’ (Fundza Taga 26:20.) Nasitinika sikhatsi sekucabanga ngalemibuto, singahle sibone kutsi indlela lesimtsandza ngayo umzalwane wetfu nobe dzadze yenta singakunaki loku lokwentekile.

19. Yini lotimisele kuyenta?

¹⁹ BoFakazi BaJehova bayakhombisa kutsi babafundzi baJesu sibili. Nguloyo naloyo kitsi uyakhombisa kutsi sibalandzeli baJesu nasibatsandza bazalwane betfu nabodzadze ngisho benta emaphutsa. Nasikhombisa lolutsandvo, labanye bangakhona kuyibona inkholo yeliciniso futsi bakhonte Jehova Nkulunkulu welutsandvo kanye natsi. Shengatsi singatimisela kuchubeka sikhombisa lutsandvo labonakala ngalo emaKhristu eliciniso.