1. Yini batali lababafisela yona bantfwana babo?

 BATALI, siyati kutsi niyafuna kusita bantfwana benu kutsi bamati Jehova futsi bamtsandze. Kodvwa Nkulunkulu akabonakali. Ningabasita njani bantfwana benu kutsi bamtsatse njengeMuntfu mbamba futsi basondzelane naye?​—Jak. 4:8.

2. Batali bangabafundzisa njani bantfwana babo ngebuntfu baJehova?

² Indlela lehamba embili yekusita bantfwana kutsi basondzelane naJehova kutsi nidadishe nabo liBhayibheli. (2 Thim. 3:14-17) Nobe kunjalo, liBhayibheli liveta lenye indlela bantfwana labangafundza ngayo ngaJehova. Encwadzini yeTaga, kukhulunywa ngalomunye babe lokhumbuta indvodzana yakhe kutsi ingabukhohlwa buntfu baJehova lobubonakala endalweni. (Taga 3:19-21) Kulesihloko, sitawucoca ngaletinye tindlela batali labangasita ngato bantfwana babo kutsi bafundze ngebuntfu baJehova.

3. Batali bangabasita njani bantfwana babo?

³ LiBhayibheli litsi “nanobe Nkulunkulu angabonakali, kepha . . .bantfu bakhonile kuwabona emandla akhe langapheli . . . ngobe loku kuyabonakala etintfweni latidalile.” (Rom. 1:20) Batali, kungenteka niyatsandza kucitsa sikhatsi nebantfwana benu ngephandle. Sebentisani leso sikhatsi kuze nibasite babone kuhlobana emkhatsini ‘wetintfo letidaliwe’  kanye nebuntfu baJehova lobuhle. Nyalo ase sibone kutsi yini batali labangayifundza endleleni Jesu lafundzisa ngayo.

4. Jesu wayisebentisa njani indalo kuze afundzise bafundzi bakhe? (Lukha 12:24, 27-30)

⁴ Naka kutsi Jesu wayisebentisa njani indalo kuze afundzise. Ngalelinye lilanga, watjela bafundzi bakhe kutsi babuke emahhwabayi netimbali. (Fundza Lukha 12:24, 27-30.) Bekangakhetsa kusebentisa lesinye silwane nobe lesinye sitjalo, kodvwa wakhetsa kusebentisa inyoni nembali lebebakwati kahle. Kusenekwenteka labafundzi bebawabona emahhwabayi andiza batibona netimbali tichakazile esigangeni. Mbone ngeliso lengcondvo Jesu atikhomba njengobe akhuluma ngato. Yini labese uyayenta ngemuva kwekukhuluma ngato? Wabafundzisa sifundvo lesibalulekile sekutsi Babe wabo wasezulwini uyephana futsi unemusa: Jehova utawubapha kudla abanike nekwekwembatsa bantfu bakhe labetsembekile njengobe nje enta kulamahhwabayi nakuletimbali.

5. Ngutiphi letinye tintfo letidaliwe batali labangatisebentisa kuze bafundzise bantfwana babo ngaJehova?

⁵ Batali, ningamlingisa njani Jesu nanifundzisa bantfwana benu? Ungase utjele umntfwana wakho mayelana nendalo loyitsandzako, kungaba silwane lositsandzako nobe sitjalo lositsandzako. Njengobe ukwenta loko, mchazele kutsi letintfo tivetani ngaJehova. Ungabese uyambuta kutsi ngusiphi silwane nobe sitjalo lasitsandzako. Nawukhuluma ngentfo layitsandzako, angahle akulalele nawukhuluma ngaJehova.

6. Yini lesingayifundza kumake waChristopher?

⁶ Batali kufanele bacitse sikhatsi lesinyenti yini bacwaninga ngesilwane lesitsite nobe ngesitjalo lesitsite ngaphambi kwekutsi bacoce nebantfwana babo ngekutsi kubafundzisani ngaJehova? Cha. Jesu akazange achaze kutsi emahhwabayi adla kanjani nobe kutsi timbali tikhula kanjani. Ngisho nobe kungenteka kutsi umntfwanakho uyatsandza kufundza ngetintfo letinyenti Jehova latidalile, ngalesinye sikhatsi kusho intfo lemelula nobe kumbuta umbuto kwenele. Naka naku lokukhunjulwa ngulomunye umzalwane lokutsiwa nguChristopher lokwenteka ngesikhatsi asemncane, utsi: “Make bekavame kusho tintfo letimelula kuze asisite siyitsandze indalo. Sibonelo nje, nasiseceleni kwetintsaba, bekavame kutsi: ‘Bukani kutsi lentsaba yinkhulu kangakanani nekutsi yinhle kwani! Ayisifundzisi yini kutsi Jehova muhle?’ Nobe nasiseceleni kwelwandle bekatsi: ‘Bukani kutsi lamagagasi anemandla kangakanani! Awasifundzisi yini kutsi Nkulunkulu unemandla?’” Christopher utsi: “Lamavi lamelula kodvwa lanengcondvo asitsintsa kakhulu.”

7. Ungabacecesha njani bantfwana bakho kutsi bacabange ngendalo?

⁷ Njengobe bantfwana bakho bakhula, ungabacecesha kutsi bacabange kakhulu ngendalo nekutsi bafundze ngaJehova. Ungakhetsa kukhuluma ngentfo yinye ledalwe nguJehova, bese uyababuta utsi: “Loku kukufundzisani ngaJehova?” Ungamangala futsi ujabule nawuva loko bantfwana bakho labakucabangako.​—Mat. 21:16.

8. Nguliphi litfuba belitfolwa batali labangema-Israyeli ‘nabasahamba endleleni’?

⁸ Batali labangema-Israyeli batjelwa kutsi bafundzise bantfwana babo ngemitsetfo yaJehova ‘nabahamba endleleni.’ (Dut. 11:19) Tindlela betihamba tize tifike etindzaweni letisemakhaya ka-Israyeli. Nabasahamba bebangabona tilwane, tinyoni netimbali. Nabahamba kuletindlela, batali labangema-Israyeli  bebavulekelwa litfuba lekucoca nebantfwana babo ngetintfo letidalwe nguJehova. Nani batali kusenekwenteka ninematfuba lafanako ekufundzisa bantfwana benu nisebentisa indalo. Ase sicoce ngekutsi labanye batali bakwente njani loko.

9. Yini longayifundza kuPunitha nakuKatya?

⁹ Lomunye make lokutsiwa nguPunitha, lohlala kulelinye lidolobha lelikhulu eNdiya utsi: “Nasivakashela tihlobo tetfu letisendzaweni yasemakhaya, lelo kuba litfuba letfu lekufundzisa bantfwana betfu ngendalo yaJehova lenhle. Ngibona ngatsi bantfwabami bayicondza kancono indalo nabangekho edolobheni lakuphitsitela khona.” Batali, kusenekwenteka bantfwana benu angeke basikhohlwe sikhatsi lenibe naso endzaweni lenhle. Lomunye dzadze waseMoldova lokutsiwa nguKatya, utsi: “Tikhatsi lengitikhumbula kahle ngisengumtfwana tikhatsi lengaba nato nebatali bami sisendzaweni yasemakhaya. Ngibonga kakhulu kutsi bangifundzisa ngisemncane kutsi ngime, nginakisise loko Jehova lakudalile futsi ngifundze ngaye kuko.”

10. Yini batali labangayenta nangabe kumatima kuphuma edolobheni bavakashe? (Buka libhokisi lelitsi “ Lokungasita Batali.”)

¹⁰ Kutsiwani nangabe ungakhoni kuvakasha etindzaweni letisemakhaya? Amol naye lohlala eNdiya utsi: “Langihlala khona, batali basebenta ema-awa lamanyenti, futsi kuvakasha etindzaweni letisemakhaya kuyadula. Kodvwa ungayibona indalo yaJehova futsi ukhulume ngebuntfu bakhe nawuse-park lencane nobe nawusetulu endlini yakho.” Nawungabukisisa, kusenekwenteka utfole tintfo letinyenti letidaliwe longatikhombisa bantfwana bakho eceleni kwelikhaya lakho. (Hla. 104:24) Kusenekwenteka ubone tinyoni, tilokatane, titjalo nalokunye lokunyenti. Karina waseJalimane utsi: “Make uyatitsandza timbali, ngesikhatsi ngisemncane  bekangikhombisa timbali letinhle njalo nasihamba silula tinyawo.” Batali, ningasebentisa ema-video lamanyenti netincwadzi lesilungiselwa kona yinhlangano lokukhuluma ngendalo kuze nifundzise bantfwana benu. Kunobe ngusiphi simo lokuso, ungabafundzisa bantfwana bakho kutsi banakisise loko Nkulunkulu lakudalile. Nyalo ase sicoce ngalobunye buntfu baJehova longafundzisa ngabo bantfwana bakho.

11. Batali bangabasita njani bantfwana babo kutsi babone lutsandvo lwaJehova?

¹¹ Kuze usite bantfwana bakho babone kutsi Jehova unelutsandvo, ungabatjela ngendlela tilwane letinyenti letinakekela ngayo bantfwana bato ngelutsandvo. (Mat. 23:37) Ungaphindze ubakhombise nendalo leyehlukahlukene lesiyijabulelako. Karina lesike sakhuluma ngaye utsi: “Nasilula tinyawo namake, bekangikhutsata kutsi ngime futsi ngibukisise kutsi imbali ngayinye yehluke njani kuletinye nekutsi buhle bembali ngayinye buluveta njani lutsandvo lwaJehova. Nanobe sekuphele iminyaka, solo ngisatibukisisa timbali, ngibuke indlela letehluke ngayo kuletinye, letakheke ngayo kanye nemibala yato. Solo tisangikhumbuta kutsi Jehova usitsandza kakhulu.”

12. Batali bangabasita njani bantfwana babo kuze babone kutsi Nkulunkulu uhlakaniphile? (Tihlabelelo 139:14) (Buka nesitfombe.)

¹² Sita bantfwana bakho babone kutsi Nkulunkulu uhlakaniphile. Jehova uhlakaniphe kakhulu kunatsi. (Rom. 11:33) Sibonelo nje, ungabatjela ngendlela emanti lakha ngayo emafu nendlela lokumelula ngayo ngalamafu kusuka kulenye indzawo aye kulenye. (Jobe 38:36, 37) Ungaphindze ubatjele ngendlela lemangalisako umtimba wemuntfu lowakheke ngayo. (Fundza Tihlabelelo 139:14.) Lomunye babe lokutsiwa nguVladimir wakwenta loko. Utsi: “Ngalelinye lilanga indvodzana yetfu yawa ebhayisikilini layo futsi yalimala. Ngemuva kwemalanga lambalwa, lesilondza saphola. Mine nemkami sayichazela kutsi Jehova wenta imitimba yetfu ngendlela yekutsi iphole. Saveta nekutsi loku akwenteki etintfweni letentiwe bantfu. Sibonelo nje, nangabe imoto itfole ingoti, ayitilungisi. Loko kwenta indvodzana yetfu yabona kutsi Jehova uhlakaniphile.”

13. Batali bangabasita njani bantfwana babo kutsi babone emandla aNkulunkulu? (Isaya 40:26)

 ¹³ Jehova usicela kutsi siphakamisele emehlo etfu emazulwini futsi sicabange ngendlela emandla akhe lenta ngayo kutsi tinkhanyeti tihlale etindzaweni tato. (Fundza Isaya 40:26.) Ungabakhutsata bantfwana bakho kutsi babuke esibhakabhakeni futsi bacabange ngaloko labakubonako. Naka naku lokukhunjulwa ngulomunye dzadze waseTaiwan lokutsiwa nguTingting lokwenteka ngesikhatsi asemncane. Utsi: “Ngalelinye lilanga savakasha namake siyobona indalo, futsi ebusuku sabona tinkhanyeti letinyenti esibhakabhakeni njengobe besingaphazanyiswa ngemalambu asedolobheni. Ngaleso sikhatsi bengicindzetelwa ngulengifundza nabo, futsi bengitibuta kutsi ngitawukhona yini kuchubeka ngikhonta Jehova ngekwetsembeka. Make wangikhutsata kutsi ngicabange ngemandla lasetjentiswa nguJehova kuze adale tonkhe letinkhanyeti wangikhutsata nekutsi ngikhumbule kutsi angasebentisa emandla lafanako kuze angisite ngibhekane nanobe yini levivinya kukholwa kwami. Ngemuva kwekubuka indalo kuloluhambo, ngafuna kumati kancono Jehova futsi ngatimisela kakhulu kuchubeka ngimkhonta.”

14. Batali bangayisebentisa njani indalo kuze basite bantfwana babo babone kutsi Jehova unguNkulunkulu lojabulako?

¹⁴ Tintfo letidalwe nguJehova tikhombisa kutsi uyajabula nekutsi ufuna natsi sijabule. Bososayensi babonile kutsi tilwane letinyenti tiyadlala, lokufaka ekhatsi tinyoni netinhlanti. (Jobe 40:20) Bakile bahleka yini bantfwana bakho nababuka silwane sidlala? Mhlawumbe bakile bambona kati adlala nobe imidlwane idlala kulumana. Esikhatsini lesitako nawutawubona bantfwana bakho bahlekiswa tintfo letentiwa tilwane, ungabakhumbuta kutsi sikhonta Nkulunkulu lojabulako.​—1 Thim. 1:11.

15. Yini lengasita batali kutsi batfole loko bantfwana babo labakucabangako? (Taga 20:5) (Buka nesitfombe.)

¹⁵ Ngaletinye tikhatsi, batali bakutfola kumatima kwenta bantfwana babo kutsi bakhulume ngetinkinga lababhekana nato. Nangabe  nawe ukulesimo, kungahle kudzingeke wente lokutsite kuze utfole loko labakucabangako. (Fundza Taga 20:5.) Labanye batali bakutfola kumelula kukwenta loko nangabe babuka indalo nebantfwababo. Kwentiwa yini? Lesinye sizatfu kutsi tisuke titincane kakhulu tintfo letibaphazamisako. Lomunye babe waseTaiwan lokutsiwa nguMasahiko uveta lesinye sizatfu, utsi: “Nasicitsa sikhatsi nebantfwabetfu sicanca tintsaba nobe sihamba elusentseni lwelwandle, bavame kutiva bakhululekile. Ngako siyakhona kutfola loko lokusetinhlitiyweni tabo naloko labakucabangako.” Katya lesike sakhuluma ngaye utsi: “Nasengiphumile esikolweni, make bekavame kuhamba nami e-park lenhle, futsi nasikulendzawo lethulile, bengikutfola kumelula kumtjela ngalokwenteke esikolweni nobe ngaloko lokungikhatsatako.”

16. Imindeni ingaphumula njani ndzawonye futsi ijabule nayisabuka indalo?

¹⁶ Indalo yaJehova ingaphindze inikete imindeni litfuba lekutsi iphumule futsi ijabule ndzawonye, ngaleyondlela icinise budlelwane bayo. LiBhayibheli litsi ‘kunesikhatsi sekuhleka’ “nesikhatsi sekugcumagcuma.” (Shu. 3:1, 4, umbhalo longentasi) Jehova udale tindzawo letinhle emhlabeni lasingakhona khona kwenta tintfo lesititsandzako. Imindeni leminyenti iyakutsandza kuba ndzawonye etindzaweni lakugcinwa khona tilwane, etindzaweni letisemakhaya nobe elwandle. Labanye bantfwana bayakutsandza kugijima nekudlala, kubuka tilwane nobe kubhukusha emfuleni nobe edanyini. Manyenti ematfuba ekujabulela indalo nasingephandle etindzaweni letivulekile!

17. Ngusiphi sizatfu lokufanele sente batali kutsi basite bantfwana babo bajabulele indalo yaNkulunkulu?

¹⁷ Emhlabeni lomusha, batali nebantfwana batayijabulela kakhulu indalo kunanyalo. Ngaleso sikhatsi, angeke sitesabe tilwane, futsi nato ngeke tisesabe. (Isa. 11:6-9) Sitayijabulela kuze kube phakadze indalo yaJehova. (Hla. 22:26) Kodvwa batali, ningalindzi kuze kube nguleso sikhatsi ngaphambi kwekutsi nisite bantfwana benu bajabulele indalo. Njengobe nisebentisa indalo kuze nifundzise bantfwana benu ngaJehova, kungenteka bavumelane naloko lokwashiwo yiNkhosi Davide nayitsi: “Awu Jehova . . . kute imisebenti lefana neyakho.”​—Hla. 86:8.