1-2. Ngusiphi sizatfu lokufanele sikwente ungadvumateki nangabe usengakakulungeli kubhajatiswa? (Buka sitfombe lesisekhasini lekucala.)

 NANGABE ufuna kubhajatiswa, utibekele umgomo lomuhle kakhulu. Ukulungele yini kubhajatiswa? Nangabe ucabanga kutsi ukulungele futsi nalabadzala belibandla bavumelana nawe, nakuvuleka litfuba lekutsi ubhajatiswe lisebentise. Nawenta njalo, utawuba nesikhatsi lesimnandzi ukhonta Jehova.

² Kodvwa uke watjelwa yini kutsi kufanele utfutfuke ngaphambi kwekutsi ubhajatiswe? Nobe kwawena uyatibona kutsi kufanele utfutfuke? Nangabe kunjalo, ungadvumateki. Ungatfutfuka futsi uwufinyelele lomgomo lobalulekile ngisho sewukhulile nobe usemusha.

3. Lenye indvuna lengumTopiya yambuta kutsini Filiphu, futsi ngumuphi umbuto lophakamako? (Imisebenti 8:36, 38)

³ Fundza Imisebenti 8:36, 38. Lenye indvuna yesigodlo saseTopiya yabuta Filiphu yatsi: “Yini lengivimba kutsi ngibhajatiswe?” Lendvodza lengumTopiya beyifuna kubhajatiswa, kodvwa beyikulungele yini vele?

4. LomTopiya wakhombisa njani kutsi bekatimisele kuchubeka afundza?

⁴ Lendvodza lengumTopiya “beyiye eJerusalema kuze iyokhonta Nkulunkulu.” (Imis. 8:27) Ngako kungenteka beyigucukele enkholweni yebuJuda. Siyaciniseka kutsi beyifundze ngaJehova emiBhalweni Lengcwele yesiHebheru. Nanobe kunjalo, beyifuna kwati lokunyenti. Filiphu wayitfola yentani lendvodza ngesikhatsi ahlangana nayo emgwacweni? Beyifundza  umculu wa-Isaya. (Imis. 8:28) Lawo bekungemaciniso lajulile eliBhayibheli. Lendvuna yesigodlo ayizange nje yenetiswe kufundza timfundziso letisisekelo teliBhayibheli, beyifuna kuchubeka ifundza.

5. LomTopiya wenta njani ngaloko lebekakufundza?

⁵ Lendvodza beyisiphatsimandla lesingephansi kwaKhandase iNdlovukazi yaseTopiya; futsi “beyinakekela yonkhe imali yakhe.” (Imis. 8:27) Ngako kungenteka beyimatasatasa yenta imisebenti leminyenti. Nanobe kunjalo, yatinika sikhatsi sekukhonta Jehova. Beyingenetiswa kufundza liciniso; beyikwenta loko beyikufundza. Ngako yahamba yesuka eTopiya kuze iyokhonta Jehova ethempelini lebeliseJerusalema. Loluhambo beludzinga sikhatsi lesinyenti nemali, kodvwa lendvodza yatimisela kuyokhonta Jehova ngisho nobe loko bekubitelani.

6-7. Yachubeka njani ikhula indlela lomTopiya lebekamtsandza ngayo Jehova?

⁶ LomTopiya wafundza emaciniso labalulekile kuFiliphu, lafaka ekhatsi kutsi Jesu unguMesiya. (Imis. 8:34, 35) Kwamjabulisa kufundza ngaloko Jesu lebekamentele kona. Yini layenta ngemuva kwekufundza letintfo? Bekangachubeka ahloniphekile futsi asenkholweni yebuJuda. Kunaloko, yakhula indlela lebekamtsandza ngayo Jehova neNdvodzana yakhe. Loko kwenta kutsi ente sincumo lesibalulekile sekubhajatiswa futsi abe ngumlandzeli waJesu Khristu. Filiphu wabona kutsi lendvodza beyikulungele kubhajatiswa ngako wayibhabhatisa.

⁷ Nangabe ulingisa sibonelo salomTopiya, ungakulungela kubhajatiswa. Nawe ungawasho ngesibindzi emavi latsi: “Yini lengivimba kutsi ngibhajatiswe?” Asesicoce ngekutsi ungakwenta njani loko lokwentiwa ngulendvodza: Yachubeka ifundza, yakwenta loko lebeyikufundza futsi yachubeka ikhula indlela lebeyimtsandza ngayo Nkulunkulu.

8. Johane 17:3 ukutjela kutsi wenteni?

⁸ Fundza Johane 17:3. Wasitwa ngulamavi aJesu yini kutsi uncume kudadisha liBhayibheli? Labanyenti betfu basitwa ngiwo. Kodvwa lamavi ayasitjela yini kutsi sichubeke sifundza? Yebo. Angeke siyekele ‘kwati Nkulunkulu lokukuphela kwakhe weliciniso.’ (Shu. 3:11) Sitawuchubeka sifundza kuze kube phakadze. Nasichubeka sifundza, sitawusondzelana kakhulu naJehova.—Hla. 73:28.

9. Yini lokufanele siyente ngemuva kwekufundza emaciniso lasisekelo laseBhayibhelini?

⁹ Nasicala kufundza ngaJehova sifundza timfundziso letisisekelo letiseBhayibhelini. Encwadzini layibhalela emaHebheru,  umphostoli Pawula wabita timfundziso letisisekelo ngekutsi “tintfo letimelula.” Bekangatibukeli phansi ‘letimfundziso letisisekelo,’ kepha bekaticatsanisa nelubisi lolusita umntfwana kutsi akhule kahle. (Heb. 5:12; 6:1) Kodvwa waphindze wakhutsata onkhe emaKhristu kutsi achubeke afundza lokungetulu kwaletimfundziso letisisekelo futsi afundze emaciniso lajulile laseVini laNkulunkulu. Unaso yini sifiso sekufundza timfundziso letijulile letiseBhayibhelini? Uyafisa yini kuchubeka utfutfuka, nekuchubeka ufundza ngaJehova nangetinjongo takhe?

10. Yini leyenta labanye bantfu bakutfole kumatima kudadisha?

¹⁰ Labanyenti betfu bakutfola kumatima kudadisha. Kutsiwani ngawe? Esikolweni wafundza yini kufundza kahle nekudadisha kahle? Bewukutsandza yini kudadisha futsi wabona yini kutsi kukusita njani? Nobe wabona ngatsi awukhoni kufundza tincwadzi? Nangabe kunjalo, awusiwedvwa. Nobe kunjalo, Jehova angakusita. Ute sono futsi unguMfundzisi lokahle kakhulu kubendlula bonkhe.

11. Jehova ukhombise njani kutsi ‘unguMfundzisi Lomkhulu’?

¹¹ Jehova utibita ngekutsi ‘unguMfundzisi wetfu Lomkhulu.’ (Isa. 30:20, 21) UnguMfundzisi losibeketelelako, lonemusa futsi losati kahle. Ubuka lokuhle kulabo labafundzisako. (Hla. 130:3) Akalindzeli lokungetulu kwaloko lesingakhona kukwenta. Khumbula kutsi nguye lowadala ingcondvo yetfu, lesipho lesihle. (Hla. 139:14) Sinesifiso lesingekwemvelo sekufundza. UMdali wetfu ufuna sichubeke sifundza kuze kube phakadze futsi sikujabulele. Ngako kukuhlakanipha ‘kulangatelela’ emaciniso laseBhayibhelini nyalo. (1 Phet. 2:2) Tibekele imigomo longakhona kuyifinyelela futsi unamatsele eluhlelweni lwekufundza nekudadisha liBhayibheli. (Josh. 1:8) Usitwa nguJehova utakujabulela kufundza lokubhaliwe kanye nekuchubeka ufundza ngaye.

12. Kubaluleke ngani kutsi sidadishe ngekuphila kwaJesu nangemsebenti wakhe wekushumayela?

¹² Hlale utinika sikhatsi sekucabangisisa ngekuphila kwaJesu nangemsebenti wakhe wekushumayela. Kubalulekile kutsi silingise Jesu nangabe sifuna kukhonta Jehova, ikakhulukati kuletikhatsi letimatima. (1 Phet. 2:21) Jesu watjela bafundzi bakhe kutsi batawubhekana netinkinga. (Luk. 14:27, 28) Nanobe kunjalo, bekaciniseka kutsi bangakhona kuhlala betsembekile kuNkulunkulu njengaye. (Joh. 16:33) Dadisha ngekuphila kwaJesu futsi utibekele umgomo wekumlingisa ekuphileni kwakho.

13. Yini lokufanele uchubeke uyicela kuJehova, futsi leni?

¹³ Lwati lulodvwa alukeneli. Lokwenta uludzinge kutsi ungafundza lokunyenti ngaJehova futsi umtsandze uphindze ukholwe kuye. (1 Khor. 8:1-3) Njengobe uchubeka ufundza, chubeka ucele Jehova kutsi akusite ube nekukholwa lokucinile. (Luk. 17:5) Uyayiphendvula imithantazo lenjalo. Kukholwa lokusekelwe elwatini lolungulonalona ngaNkulunkulu wetfu lutakusita kutsi utfutfuke.​—Jak. 2:26.

14. Umphostoli Phetro wakugcizelela njani kubaluleka kwekwenta loko lesikufundzako? (Buka nesitfombe.)

¹⁴ Umphostoli Phetro wagcizelela kutsi kubalulekile kutsi balandzeli baKhristu bachubeke bakwenta loko labakufundzako. Wakhuluma ngendzaba yaNowa leseBhayibhelini. Jehova watjela Nowa kutsi bekatawusebentisa zamcolo kuze abhubhise bantfu lababi bangaleso sikhatsi. Kwati nje kutsi bekuta zamcolo bekungeke kumsindzise Nowa nemndeni wakhe. Naka kutsi Phetro wakhuluma  ngesikhatsi lebesingaphambi kwazamcolo, “ngalesikhatsi kwakhiwa umkhumbi.” (1 Phet. 3:20) Nowa kanye nemndeni wakhe bakwenta loko labakutjelwa nguNkulunkulu ngekutsi bakhe umkhumbi. (Heb. 11:7) Phetro wabese ucatsanisa loko lokwentiwa nguNowa nekubhajatiswa, wabhala watsi: “Lubhabhatiso loluhlobene naloku seluyanisindzisa.” (1 Phet. 3:21) Ngako loko lokwentako nyalo kuze ulungele kubhajatiswa singakufananisa nemsebenti lowatsatsa iminyaka lowentiwa nguNowa kanye nemndeni wakhe wekwakha umkhumbi. Yini lokufanele uyente kuze ulungele kubhajatiswa?

15. Sikhombisa njani kutsi siphendvuke mbamba?

¹⁵ Lokunye longakwenta kutsi uphendvuke mbamba etonweni takho. (Imis. 2:37, 38) Kuphendvuka mbamba kutakwenta ushintje mbamba. Sewukuyekele yini kwenta tintfo letingamjabulisi Jehova letinjengekutiphatsa kabi, kubhema nobe kusebentisa lulwimi lolubi? (1 Khor. 6:9, 10; 2 Khor. 7:1; Ef. 4:29) Nangabe usengakakwenti loko, chubeka wetama. Khuluma naloyo lodadisha naye liBhayibheli nobe ucele labadzala belibandla kutsi bakusite futsi bakucondzise. Nangabe usemusha futsi usahlala nebatali bakho, chubeka ubacela kutsi bakusite uyekele tintfo letingakuvimbela kutsi ubhajatiswe.

16. Kufaka ekhatsi ini kuba neluhlelo loluhle lwekukhonta Jehova?

¹⁶ Kubalulekile nekutsi ube neluhlelo loluhle lwekukhonta Jehova. Loku kufaka ekhatsi kuba khona emihlanganweni yebuKhristu kanye nekuhlanganyela kuyo. (Heb. 10:24, 25) Nangabe sewungummemeteli longakabhajatiswa, hlale uwenta njalo lomsebenti wekushumayela. Nangabe uwenta njalo lomsebenti utawujabulela kakhulu. (2 Thim. 4:5) Nawusemusha futsi uhlala ekhaya, tibute: ‘Ngidzinga kukhunjutwa batali bami yini kutsi ngiye emihlanganweni nobe kutsi ngiye emsebentini wekushumayela? Nobe kuvame kusuka kimi?’ Nangabe kungadzingeki kutsi ukhunjutwe kuze wente letintfo, ukhombisa kutsi unekukholwa futsi uyamtsandza Jehova Nkulunkulu nekutsi uyabonga ngetintfo lakupha tona. Leti tintfo ‘letikhombisa kutsi utinikele kuNkulunkulu,’ lokutipho lotipha Jehova. (2 Phet. 3:11; Heb. 13:15) Tonkhe tipho  lesitipha Jehova ngalokusuka enhlitiyweni futsi singacindzetelwa tiyamjabulisa Nkulunkulu wetfu. (Catsanisa na-2 KubaseKhorinte 9:7.) Loko sikwenta ngobe siyakutsandza kunika Jehova lokuncono kakhulu kulesinako.

17-18. Ngubuphi buntfu lobubalulekile lobungakusita kutsi utfutfuke uze ubhajatiswe, futsi bungakusita njani? (Taga 3:3-6)

¹⁷ Njengobe uchubeka utfutfuka kuze ubhajatiswe, utawubhekana netinkinga. Labanye bangahle bakuhleke ngenca yenkholo yakho lensha; bangaze bakuphikise nobe bakuphatse kabi. (2 Thim. 3:12) Njengobe wetama kuncoba umkhuba lomubi, ngalesinye sikhatsi ungahle ukwente loko lokubi lowetama kukuncoba. Nobe kungenteka ubebete sineke, uphatseke kabi nobe ubone ngatsi kulukhuni kufinyelela lomgomo wakho. Yini letakusita kutsi ucinisele? Kutsandza Jehova.

¹⁸ Lutsandvo lonalo ngaJehova lubuntfu lobubalulekile. (Fundza Taga 3:3-6.) Nangabe umtsandza mbamba Nkulunkulu, ungakhona kubhekana netinkinga ekuphileni. LiBhayibheli livame kutsi Jehova utsandza bantfu bakhe ngelutsandvo lolucotfo. Loku kusho kutsi akayuze atishiye tikhonti takhe nobe ayekele kutitsandza. (Hla. 100:5) Wentiwe ngemfanekiso waNkulunkulu. (Gen. 1:26) Ungalukhombisa njani lutsandvo lolunjalo?

19. Yini longayenta kuze uchubeke ukhombisa kutsi uyabonga ngaloko Jehova lakwentele kona? (Galathiya 2:20)

¹⁹ Cala ngekubonga. (1 Thes. 5:18) Njalo ngelilanga tibute: ‘Jehova ukhombise njani kutsi uyangitsandza?’ Ngemuva kwaloko nawuthantaza, ubobonga Jehova utisho ngalokucondzile tintfo lakwentele tona. Tsatsa tintfo Jehova lakwentele tona njengendlela lakhombisa ngayo kutsi uyakutsandza, njengobe nemphostoli Pawula akubona loko ngaJehova. (Fundza Galathiya 2:20.) Tibute: ‘Ngiyafuna yini kukhombisa kutsi nami ngiyamtsandza?’ Kutsandza Jehova kutakusita kutsi ukhone kuchubeka umelana netilingo futsi ukhone kubhekana netinkinga. Kutakusita unamatsele eluhlelweni lwakho lwekukhonta Jehova futsi uchubeke ukhombisa kutsi uyamtsandza onkhe malanga.

20. Yini lokufanele uyente kuze unikele kuphila kwakho kuJehova, futsi sibaluleke kangakanani lesincumo?

²⁰ Ngekuhamba kwesikhatsi, indlela lomtsandza ngayo Jehova itakwenta kutsi wente umthantazo lokhetsekile. Utawutinikela kuNkulunkulu.  Khumbula kutsi nasewutinikele kuJehova utawuba nanali litsemba lelihle: Utawuba nelitsemba lekuba wakhe kuze kube phakadze. Nawunikela kuphila kwakho kuJehova wetsembisa kutsi utamkhonta ngetikhatsi letimnandzi naletimatima. Kute sidzingo sekutsi uphindze usente lesetsembiso. Kuliciniso kutsi nasitinikela sisuke senta sincumo lesibaluleke kakhulu. Kodvwa cabanga nganaku: Utawenta tincumo letinyenti ekuphileni kwakho, letinye tato titawuba tinhle kakhulu kodvwa kute lesitawendlula lesi sekunikela kuphila kwakho kuJehova. (Hla. 50:14) Sathane utawetama kunciphisa lizinga lomtsandza ngalo Babe wakho, anelitsemba lekutsi utawuyekela kuhlala wetsembekile kuye. Ungamvumeli Sathane kutsi aphumelele! (Jobe 27:5) Lutsandvo lolucinile lonalo ngaJehova lutakusita kutsi uchubeke ugcina setsembiso sakho sekumkhonta kuze kube phakadze futsi lutakusita kutsi usondzelane kakhulu naBabe wakho wasezulwini.

21. Sisho ngani kutsi kubhajatiswa akusiko kuphela kwendzaba kodvwa kusicalo?

²¹ Ngemuva kwekutinikela kuJehova, khuluma nalabadzala belibandla lokulo ngesifiso sakho sekutsatsa sinyatselo lesilandzelako lesibalulekile. Kodvwa hlale ukhumbula kutsi kubhajatiswa akusho kuphela kwendzaba, kodvwa kumane kusicalo. Ucala kuphila imphilo yekukhonta Jehova kuze kube phakadze. Ngako chubeka umtsandza kakhulu nyalo Babe wakho. Tibekele imigomo letakwenta lutsandvo lwakho lukhule lilanga nelilanga. Loko kutawukwenta kutsi ubhajatiswe. Lelo kuyawuba lilanga lelijabulisako. Kodvwa lesi kumane nje kusicalo. Shengatsi indlela lomtsandza ngayo Jehova kanye neNdvodzana yakhe ingachubeka ikhula kuze kube phakadze!