1-2. Ngutiphi tibusiso letitfolwa ngumuntfu ngemuva kwekubhajatiswa?

 SIYAJABULA nasibhajatiswa futsi sibe yincenye yemndeni waJehova. Labo labanebuhlobo lobuhle naJehova bayavumelana naloko lokwashiwo ngumhlabeleli Davide nakatsi: “Uyajabula loyo lomkhetsako [wena Jehova] futsi umsondzete kuwe kute ahlale emabaleni akho.”​—Hla. 65:4.

² Jehova akavumeli nobe ngubani kutsi ahlale emabaleni akhe. Njengobe sibonile esihlokweni lesendlulile, udvonsa labo labakhombisako kutsi bayafuna kuba nebuhlobo lobuhle naye. (Jak. 4:8) Nawutinikela kuJehova futsi ubhajatiswe, usondzelana naye ngendlela lekhetsekile. Ngako ungaciniseka kutsi ngemuva kwekubhajatiswa Jehova ‘utawutfululela tibusiso etikwakho kuze kube bete ngisho nendzawo yekutigcina.’​—Mal. 3:10; Jer. 17:7, 8.

3. Yini emaKhristu latinikele futsi abhajatiswa lokufanele ayente? (Umshumayeli 5:4, 5)

³ Kubhajatiswa kumane nje kusicalo. Ngemuva kwekubhajatiswa, utawufuna kwenta konkhe longakwenta kuze uphile ngekuvumelana nesifungo lowasenta nawutinikela, ngisho nalapho ulingwa nobe kukholwa kwakho kuvivinywa. (Fundza Umshumayeli 5:4, 5.) Njengobe ungumfundzi waJesu, utasilandzela edvute sibonelo sakhe futsi wente konkhe longakwenta kuze ulalele imiyalo yakhe. (Mat. 28:19, 20; 1 Phet. 2:21)  Lesihloko sitakusita kutsi ukhone kukwenta loko.

CHUBEKA ULANDZELA JESU NGISHO UBHEKANA NETINKINGA NETILINGO

4. Balandzeli baJesu bebatawuhlupheka ngayiphi indlela? (Lukha 9:23)

⁴ Ungacabangi kutsi kuphila kwakho kutawushelela ngemuva kwekubhajatiswa. Jesu wakwenta kwacaca kutsi bafundzi bakhe ‘bebatawuhlushwa.’ Ecinisweni, bebatawuhlushwa “malanga onkhe.” (Fundza Lukha 9:23.) Jesu bekasho kutsi balandzeli bakhe bebatawuhlale bahlupheka yini? Cha. Bekamane nje agcizelela kutsi ngetulu kwetibusiso lebebatawutitfola, bebatawuba netinkinga. Letinye tato betitawuba matima kakhulu.​—2 Thim. 3:12.

5. Jesu watsi labo labatidzelako batawutfola tiphi tibusiso?

⁵ Kungenteka uke waphikiswa ngemalunga emndeni wakho, nobe udzele kuba nemali kanye netintfo kuze wente uMbuso waNkulunkulu ute kucala ekuphileni kwakho. (Mat. 6:33) Nangabe kunjalo, ungaciniseka kutsi Jehova ukubone konkhe loko lokwentile kuze ukhombise kutsi unekukholwa. (Heb. 6:10) Kungenteka ubonile kutsi aliciniso lamavi aJesu latsi: “Wonkhe umuntfu loshiye indlu, bomnakabo, bodzadzewabo, babe wakhe, make wakhe, bantfwana, nobe emasimu ngenca yami nangenca yetindzaba letimnandzi, utawutfola tindlu, bomnakabo, bodzadzewabo, bomake, bantfwana, nemasimu ngalokuphindvwe tikhatsi letingu-100 kulesikhatsi sanyalo, aphindze aphatfwe kabi bese kutsi esikhatsini lesitako atfole kuphila lokuphakadze.” (Mak. 10:29, 30) Tibusiso lotitfolile tinyenti kakhulu kunekutidzela lokwentile.​—Hla. 37:4.

6. Yini leyenta kudzingeke kutsi uchubeke ulwa ‘nesifiso senyama’ ngemuva kwekubhajatiswa?

⁶ Kutawudzingeka uchubeke ulwisana ‘nesifiso senyama’ ngemuva kwekubhajatiswa. (1 Joh. 2:16) Loku kungenca yekutsi solo unesono. Ngaletinye tikhatsi ungahle utive ngendlela umphostoli Pawula lativa ngayo. Wabhala watsi: “Ngiyajabula ngemtsetfo waNkulunkulu ngenca yemuntfu lenginguye ngekhatsi, kodvwa ngibona lomunye umtsetfo emtimbeni wami, lolwisana nemtsetfo losengcondvweni yami, futsi ungenta sigcili semtsetfo wesono losemtimbeni wami.” (Rom. 7:22, 23) Kungahle kukudvumate kutsi kufanele ulwisane netifiso letimbi. Nobe kunjalo, kucabanga ngesetsembiso lowasenta kuJehova nawutinikela kuye kutakwenta utimisele kulwisana nesilingo. Lesetsembiso lowasenta sitakusita nawubhekana netilingo. Kanjani?

7. Kutinikela kuJehova kutakusita njani kutsi uhlale wetsembekile kuye?

⁷ Nawutinikela kuJehova, ubese awusatiphileli wena. Loko kusho kutsi ukhetsa kungatenti tintfo lofisa kutenta letingeke timjabulise Jehova futsi angeke ube nemigomo lengeke imjabulise. (Mat. 16:24) Ngako nawuvivinywa, ngeke ucitse sikhatsi lesinyenti ucabanga ngekutsi utawenta njani. Utawube sewuncumile kutsi yini lotawuyenta, lokukuhlala wetsembekile kuJehova. Utawutimisela kujabulisa Jehova. Nawenta njalo, utawufana naJobe. Ngisho nobe bekabhekene netimo letimatima, washo ngekutimisela watsi: Ngeke ‘ngibulahle bucotfo bami!’​—Jobe 27:5.

8. Kucabanga ngemthantazo lowawenta nawutinikela kungakusita njani kutsi ulwisane nesilingo?

⁸ Kucabanga ngemthantazo lowawenta nawutinikela kuJehova kutakunika emandla ekulwa nesilingo. Sibonelo nje, utawutisondzeta kakhulu yini kumuntfu webulili lobehlukile loshadile? Cha! Sewumetsembisile  Jehova kutsi awuyuze uyente intfo lenjalo. Nawenta njalo, ngeke kwakheke imiva lengakafaneli lokutawutsi ngekuhamba kwesikhatsi ulwe kamatima kuze uyisuse ngemuva kwekutsi seyakhekile. Angeke ‘usondzele’ “endleleni yalabakhohlakele.”​—Taga 4:14, 15.

9. Kucabanga ngemthantazo lowawenta nawutinikela kungaphindze kukusite njani kutsi kute kucala ekuphileni kwakho kukhonta Jehova?

⁹ Utawenta njani nawunikwa umsebenti lotakuvimbela kutsi ube khona njalo emihlanganweni yebuKhristu? Utawube ukwati loko lotawukwenta. Ngaphambi kwekutsi unikwe lomsebenti, besewuvele uncumile kutsi ngeke uwemukele umsebenti lonjalo. Ngako ngeke ulingeke kutsi uwemukele bese wetama kutfola indlela yekubeka Jehova kucala ekuphileni kwakho. Kukhumbula kutsi Jesu bekatimisele kujabulisa Babe wakhe kutakwenta ume ucine futsi ukugweme ngekushesha kwenta tintfo lowatiko kutsi ngeke timjabulise Nkulunkulu lotinikele kuye.​—Mat. 4:10; Joh. 8:29.

10. Jehova utakusita njani kutsi uchubeke ulandzela Jesu ngemuva kwekubhajatiswa?

¹⁰ Liciniso likutsi tinkinga netilingo kukunika litfuba lekukhombisa kutsi utimisele kuchubeka ulandzela Jesu. Ungaciniseka kutsi Jehova utakusita. LiBhayibheli litsi: “Nkulunkulu wetsembekile futsi ngeke avume kutsi nilingwe ngetulu kwaloko leningakhona kukwetfwala, kepha nanilingwa utawenta nendlela yekuphuma kuze nikhone kubeketela.”​—1 Khor. 10:13.

YINI LONGAYENTA KUZE UCHUBEKE ULANDZELA JESU?

11. Nguyiphi lenye indlela lebalulekile longachubeka ngayo ulandzela Jesu? (Buka nesitfombe.)

¹¹ Jesu bekakhonta Jehova ngenhlitiyo yakhe yonkhe futsi bekahlale athantaza. (Luk. 6:12) Ecinisweni, lenye indlela yekuchubeka  ulandzela Jesu ngemuva kwekubhajatiswa kutsi uchubeke wenta tintfo letitakusondzeta kuJehova. LiBhayibheli litsi: “Ngelizinga lesesitfutfuke ngalo, asichubekeleni embili ngendlela lefanako.” (Fil. 3:16) Utawuhle uva ngalokwentiwe bazalwane nabodzadze kuze bente lokunyenti ekukhonteni Jehova. Mhlawumbe baye eSikolweni Sebavangeli BeMbuso nobe batfutsele lakunesidzingo lesikhulu khona sebamemeteli. Nangabe ungakhona kutibekela lomgomo, yenta njalo. Bantfu baJehova bahlale bafuna ematfuba ekwenta lokunyenti emsebentini wakhe. (Imis. 16:9) Kodvwa yini longayenta nangabe ungakhoni kwenta njalo nyalo? Ungacabangi kutsi awusilutfo nawucatsaniswa nalabo labakhonako kukwenta. Lokubalulekile kutsi uchubeke ucinisela. (Mat. 10:22) Hlale ukhumbula kutsi Jehova ujabula kakhulu ngaloko lokhona kukwenta kuye ngemakhono akho netimo takho. Leyo yindlela lebalulekile yekuchubeka ulandzela Jesu ngemuva kwekubhajatiswa.​—Hla. 26:1.

12-13. Yini longayenta nangabe uphela emandla ekukhonteni Jehova? (1 KubaseKhorinte 9:16, 17) (Buka nelibhokisi lelitsi “ Hlala Kulomncintiswano.”)

¹² Yini longayenta nawuva shengatsi imithantazo yakho ayisuki enhlitiyweni nobe kutsi awusakujabuleli kwenta umsebenti wekushumayela njengakucala? Yini longayenta nangabe ungasakujabuleli kufundza liBhayibheli njengakucala? Nangabe utiva ngalendlela ngemuva kwekubhajatiswa, ungacabangi kutsi sewute umoya waJehova. Unesono, futsi indlela lotiva ngayo itawushintjashintja. Nangabe ucala kuphelelwa ngemandla, cabanga ngesibonelo semphostoli Pawula. Nanobe etama kulingisa Jesu, bekati kutsi bekangahle aphelelwe ngemandla ngaletinye tikhatsi. (Fundza 1 KubaseKhorinte 9:16, 17.) Watsi: “Ngisho nobe ngiwenta  ngingatsandzi, kufanele ngiwente ngobe ngiphatsisiwe.” Ngalamanye emavi, Pawula bekatimisele kuchubeka enta umsebenti wakhe wekushumayela angayi ngekutsi utiva njani ngaleso sikhatsi.

¹³ Ngako nawe ungavumeli indlela lotiva ngayo ikwentise tincumo. Timisele kwenta lokulungile ngisho nobe utiva njani. Nawuchubeka wenta lokulungile, kungenteka ishintje indlela lotiva ngayo. Kuchubeka neluhlelo lwakho lwekukhonta Nkulunkulu kutakusita kutsi uchubeke ulandzela Jesu ngemuva kwekubhajatiswa. Bazalwane bakho nabodzadze batawukhutsateka nabakubona uchubeka ukhonta Jehova.​—1 Thes. 5:11.

“CHUBEKANI NITIHLOLA . . . CHUBEKANI NIHLOLA”

14. Yini lokufanele uhlale uyihlola, futsi ngasiphi sizatfu? (2 KubaseKhorinte 13:5)

¹⁴ Kutakusita nekuhlale utihlola ngemuva kwekubhajatiswa. (Fundza 2 KubaseKhorinte 13:5.) Kuhle kutsi uhle uhlola indlela lophila ngayo nalowenta ngayo tintfo kuze ubone kutsi uthantaza njalo yini, ulifundza njalo yini liBhayibheli futsi ulidadishe, ubakhona njalo yini emihlanganweni yelibandla futsi uwenta njalo yini umsebenti wekushumayela. Yetama kutfola tindlela letitakwenta uyijabulele lemisebenti futsi uzuze kuyo. Sibonelo nje, tibute: ‘Ngingakhona yini kuchazela labanye timfundziso teliBhayibheli letisisekelo? Tikhona yini tindlela lengingatisebentisa kuze ngiwujabulele kakhudlwana umsebenti wekushumayela? Injani imithantazo yami, icondzile yini futsi iyakhombisa yini kutsi ngetsembela kuJehova ngalokuphelele? Ngihlale ngikhona yini emihlanganweni yelibandla? Yini lengingayenta kuze ngilalelisise nangisemihlanganweni futsi ngihlanganyele kuyo?’

15-16. Yini loyifundza kulokwenteka kulomunye umzalwane mayelana nekumelana nesilingo?

¹⁵ Kubalulekile kutihlola kutsi ngukuphi lapho ubutsakatsaka khona. Lomunye umzalwane lokutsiwa nguRobert ukhuluma ngaloko lokwenteka kuye lokuliveta kahle leliphuzu, utsi: “Nangineminyaka langaba ngu-20, bengisebenta emalanga latsite evikini. Ngalelinye lilanga nasiphuma emsebentini, lomunye sisi lesisebenta naye wangimemela ekhaya kubo. Watsi besitawuba sobabili futsi sibe nesikhatsi lesimnandzi. Ngacale ngabeka tizatfu letingasho lutfo, kodvwa ekugcineni ngala ngalokucinile futsi ngamchazela kutsi yini lebeyenta ngale.” Robert wamelana nalesilingo, futsi simncoma kakhulu ngaloko. Ngekuhamba kwesikhatsi, wacabanga  ngaloko lokwenteka futsi wabona kutsi ngabe wenta kancono kulesimo. Utsi: “Angizange ngale ngalokucinile nobe ngekushesha njengobe kwenta Josefa ngesikhatsi alingwa ngumfati waPhotifari. (Gen. 39:7-9) Ecinisweni, ngamangala kutsi bekube matima kutsi ngale. Loku lokwenteka kwangisita ngabona kutsi bekudzingeka ngicinise buhlobo bami naJehova.”

¹⁶ Kungakusita kutihlola njengaRobert. Ngisho nobe ukhonile kumelana nesilingo, tibute: ‘Kungitsetse sikhatsi lesingakanani kutsi ngitsi cha?’ Nangabe ubona kutsi kufanele utfutfukise, ungatibuki njengemuntfu lomubi. Jabula ngekutsi nyalo sewuyati lapho ubutsakatsaka ngakhona. Thantaza ngalenkinga lonayo futsi wente tintfo letitakwenta ube nesifiso lesikhulu sekulalela Jehova.​—Hla. 139:23, 24.

17. Loko lokwenteka kuRobert kwalitsintsa njani ligama laJehova?

¹⁷ Kunalokunye lesingakufundza kuloko lokwenteka kuRobert. Uchubeka atsi: “Ngemuva kwekwala, lona lengisebenta naye watsi: ‘Uphasile!’ Ngambuta kutsi bekasho kutsini. Watsi lomunye umngani wakhe lebekake waba nguFakazi wamtjela kutsi bonkhe boFakazi labasebasha benta tintfo letimbi ngasense nabatfola litfuba. Ngako losisi watjela lomngani wakhe kutsi ufuna kukubona lakimi loko. Ngajabula kakhulu ngekutsi bengilingcwelisile libito laNkulunkulu.”

18. Yini lotimisele kuyenta ngemuva kwekubhajatiswa? (Buka nelibhokisi lelitsi “ Tihloko Letimbili Lotatijabulela.”)

¹⁸ Nawutinikela kuJehova futsi ubhajatiswa, ukhombisa kutsi ufuna kungcwelisa libito lakhe ngisho nobe kungentekani. Ungaciniseka kutsi Jehova uyatati tinkinga lobhekana nato kanye netilingo lomelana nato. Utakubusisa nawetama kuhlala wetsembekile. Ungaciniseka kutsi asebentisa umoya wakhe longcwele, utakunika emandla lowadzingako kuze ukhone kukwenta loko. (Luk. 11:11-13) Ngekusitwa nguJehova, utawukhona kuchubeka ulandzela Jesu ngemuva kwekubhajatiswa.