1. Kungenteka titive njani letinye tikhonti taJehova?

 KUJABULISA kakhulu kwati kutsi Jehova uyabemukela bantfu bakhe! LiBhayibheli litsi: “Jehova uyabatsandza bantfu bakhe.” (Hla. 149:4) Kodvwa ngaletinye tikhatsi singahle sidvumateke kakhulu size sitibute: ‘Jehova uyajabula yini ngami?’ Tikhonti taJehova letinyenti letetsembekile tangesikhatsi sekubhalwa kweliBhayibheli betitibuta lombuto.​—1 Sam. 1:6-10; Jobe 29:2, 4; Hla. 51:11.

2. Bobani labemukelwa nguJehova?

² LiBhayibheli lisho ngalokucacile kutsi bantfu labanesono bangemukelwa nguJehova. Njani? Kufanele sibe nekukholwa kuJesu Khristu futsi sibhajatiswe. (Joh. 3:16) Nasenta njalo, sikhombisa labanye kutsi sesiphendvukile etonweni tetfu futsi setsembisa Nkulunkulu kutsi sitawenta intsandvo yakhe. (Imis. 2:38; 3:19) Jehova uyajabula nasikwenta loko kuze sibe nebuhlobo lobuhle naye. Nangabe senta konkhe lesingakwenta kuze sigcine setsembiso lesasenta nasitinikela kuJehova, yena uyasemukela futsi asitsatse njengebangani bakhe labakhulu.​—Hla. 25:14.

3. Yini lesitawucoca ngayo nyalo?

³ Kodvwa yini leyenta labanye beve shengatsi Nkulunkulu akabemukeli? Jehova ukhombisa njani kutsi uyasemukela? Yini umKhristu langayenta kuze aciniseke kakhulu kutsi Nkulunkulu uyamemukela?

 YINI LEYENTA LABANYE BEVE SHENGATSI JEHOVA AKABEMUKELI?

4-5. Yini lesingaciniseka ngayo ngisho nobe sitibukela phansi?

⁴ Labanyenti betfu bebasolo batibukela phansi kusukela basebancane. (Hla. 88:15) Lomunye umzalwane lokutsi ngu-Adrián utsi: “Bengisolo ngitiva ngingasilutfo. Nangisemncane, ngikhumbula ngithantazela kutsi umndeni wakitsi ungene ePharadisi, nanobe mine bengiciniseka kutsi bekungangifaneli kuya lapho.” Tony, longakhuliswanga boFakazi utsi: “Batali bami abazange sebangitjele kutsi bayangitsandza nobe kutsi bayatigcabha ngami. Bebavame kungitjela kutsi ngingenta kancono.”

⁵ Nangabe ngaletinye tikhatsi sihle sitibukela phansi, singakhumbula kutsi nguJehova lowasidvonsela kuye. (Joh. 6:44) Ubona lokuhle kitsi, lokungenteka tsine singakuboni, futsi uyatati tinhlitiyo tetfu. (1 Sam. 16:7; 2 Khr. 6:30) Ngako singametsemba nakatsi siligugu.​—1 Joh. 3:19, 20.

6. Umphostoli Pawula wativa njani ngenca yemaphutsa lawenta?

⁶ Ngaphambi kwekutsi sifundze liciniso, kungenteka labanye betfu bebenta tintfo letibenta bachubeke bativa banelicala. (1 Phet. 4:3) Ngisho nemaKhristu letsembekile alwisana netifiso letimbi. Iyakulahla yini inhlitiyo yakho? Nangabe kunjalo, ungadvudvuteka ngekwati kutsi tinceku taJehova letetsembekile betisolo titiva ngendlela lefanako. Sibonelo nje, umphostoli Pawula bekeva buhlungu kakhulu nakacabanga ngemaphutsa akhe. (Rom. 7:24) Kuliciniso kutsi Pawula besekaphendvukile etonweni takhe futsi wabhajatiswa. Nobe kunjalo, bekasolo atsi ‘ungulomncane kubaphostoli’ futsi usoni ‘lesihamba embili.’​—1 Khor. 15:9; 1 Thim. 1:15.

7. Yini lokufanele sihlale siyikhumbula ngetono lesatenta esikhatsini lesendlulile?

⁷ Babe wetfu wasezulwini wetsembisa kusicolela nasiphendvuka. (Hla. 86:5) Ngako nangabe siphendvuke mbamba etonweni lesitentile, singametsemba nakatsi usicolele.​—Khol. 2:13.

8-9. Yini lesingayenta nangabe sibona shengatsi asiyuze sikhone kumjabulisa Jehova?

⁸ Sonkhe sifuna kwenta konkhe lokusemandleni etfu kuze sikhonte Jehova. Nobe kunjalo, labanye beva shengatsi abayuze bakhone kwenta lokwenele kuze Jehova abemukele. Lomunye dzadze lokutsiwa ngu-Amanda utsi: “Ngivame kucabanga kutsi kwentela Jehova konkhe lengingakhona kukwenta kusho kutsi kufanele ngente lokungetulu kwalokusemandleni ami. Ngako ngivame kulindzela kutsi ngente lokungetulu kwalengingakhona kukwenta. Nangehluleka, ngivame kucabanga kutsi naJehova udvumateke njengami.”

⁹ Yini lesingayenta nasiva shengatsi asiyuze sikhone kwenta lokwenele kuze sijabulise Jehova? Khumbula kutsi Jehova akasilukhuni futsi uyacabangela. Akalindzeli kutsi sente lokungetulu kwemandla etfu. Uyajabula ngaloko lesikwentako, kuphela nje nasenta konkhe lesingakhona kukwenta. Cabanga ngalabo lokukhulunywa ngabo eBhayibhelini labakhonta Jehova ngemphefumulo wabo wonkhe. Sibonelo nje, cabanga ngaPawula. Kwaphela iminyaka leminyenti asebenta ngekutimisela, ahamba libanga lelidze futsi asungula emabandla lamanyenti. Kodvwa ngesikhatsi timo tenta kutsi angasakhoni kwenta lokunyenti emsebentini wekushumayela, Nkulunkulu wabese akasamemukeli yini? Cha. Wachubeka enta loko langakhona kukwenta futsi Jehova wambusisa. (Imis. 28:30, 31) Ngendlela lefanako, loko lesingakwentela Jehova kungahle kushintje. Kodvwa lokubalulekile kuye sizatfu  setfu sekukwenta. Nyalo ase sicoce ngaletinye tindlela Jehova lakhombisa ngato kutsi uyasemukela.

JEHOVA UKHOMBISA NJANI KUTSI UYASEMUKELA?

10. Singamuva njani Jehova atsi uyasemukela? (Johane 16:27)

¹⁰ Usebentisa liBhayibheli. Jehova ufuna tindlela tekukhombisa kutsi uyabatsandza bantfu bakhe futsi uyajabula ngabo. ImiBhalo isitjela ngetikhatsi letimbili lapho atjela khona Jesu kutsi uyamtsandza futsi uyamemukela. (Mat. 3:17; 17:5) Uyafuna yini kumuva akucinisekisa ngekutsi uyakwemukela? Akakhulumi natsi ngemlomo, kodvwa ukhuluma natsi asebentisa liVi lakhe. Singamuva Jehova asho kutsi uyasemukela nasifundza emavi aJesu lasemaVangelini. (Fundza Johane 16:27.) Jesu wabulingisa ncamashi buntfu baBabe wakhe. Ngako nasifundza kutsi Jesu watjela balandzeli bakhe labanesono futsi labetsembekile kutsi uyabemukela, singamcabanga Jehova asho lawo mavi kitsi.​—Joh. 15:9, 15.

11. Sisho ngani kutsi kuba netinkinga akusho kutsi Jehova akasasemukeli? (Jakobe 1:12)

¹¹ Sibona ngaloko lakwentako. Jehova uyafuna kusisita, uyafuna kusiniketa tintfo lesitidzingako. Ngaletinye tikhatsi Jehova angahle avume kutsi sibe netinkinga, njengobe kwenteka kuJobe lebekayindvodza lelungile. (Jobe 1:8-11) Loku akusho kutsi Nkulunkulu akasasemukeli. Kunaloko, kusiniketa litfuba lekukhombisa kutsi simtsandza kangakanani nekutsi simetsemba kangakanani. (Fundza Jakobe 1:12.) Nasibhekene nenkinga, sitawubona kutsi usitsandza kanganani nekutsi usisita kakhulu kuze sicinisele.

12. Yini lesingayifundza kuloko lokwenteka kuDmitrii?

¹² Cabanga ngaloko lokwenteka kulomunye umzalwane wase-Asia lokutsiwa nguDmitrii. Waphelelwa ngumsebenti futsi kwaphela tinyanga letinyenti solo angawutfoli lomunye. Wancuma kwenta lokunyenti emsebentini wekushumayela, ngaleyondlela akhombisa kutsi wetsembele kuJehova. Kwaphela letinye tinyanga solo angawutfoli umsebenti. Ngemuva kwaloko wagula kakhulu kangangekutsi besekahlala embhedzeni. Wacala kucabanga kutsi bekangasesiyo indvodza lekahle nababe lokahle, besekatibuta kutsi Jehova bekangasamtsandzi yini. Ngalelinye lilanga ntsambama indvodzakati yakhe yabhala emavi laku-Isaya  30:15 latsi: “Nitawuba nemandla nangabe ningeke nesabe futsi nitawetsembela kimi.” Yamletsela embhedzeni yafike yatsi: “Nawutiva uphansi ubokhumbula lelivesi.” Dmitrii wabona kutsi Jehova bekawunakekela umndeni wakhe ngobe bebanako kudla lokwenele, kwekugcoka nendzawo yekuhlala. Utsi: “Lebekufanele nje ngikwente kutsi ngingesabi futsi ngichubeke ngetsembela kuNkulunkulu.” Nawubhekene nenkinga lefanako, ungaciniseka kutsi Jehova unendzaba nawe nekutsi utakusita kutsi ucinisele.

13. Bobani Jehova langabasebentisa kuze akhombise kutsi uyasemukela, futsi loko ukwenta njani?

¹³ Usebentisa bazalwane nabodzadze. Jehova usebentisa bazalwane betfu nabodzadze kuze akhombise kutsi uyasemukela. Sibonelo nje, angenta labanye kutsi bakhulume emavi lasikhutsatako ngesikhatsi lesifanele. Lomunye dzadze wase-Asia wakubona loku ngesikhatsi acindzeteleke kakhulu. Waphelelwa ngumsebenti, futsi wabese ugula kakhulu. Ngemuva kwaloko indvodza yakhe yenta sono lesikhulu futsi yayekeliswa kuba ngulomdzala welibandla. Lodzadze utsi: “Bengingacondzi kutsi kwentiwa yini kutsi kwenteke tintfo letinjena. Bengicabanga kutsi mhlawumbe kukhona lokubi lengikwentile futsi Jehova bekangasangemukeli.” Lodzadze wancenga Jehova kutsi amcinisekise kutsi uyamemukela. Yini Jehova layenta? Utsi: “Labadzala belibandla bakhuluma nami futsi bangicinisekisa ngekutsi Jehova uyangitsandza.” Ngekuhamba kwesikhatsi, lodzadze waphindze wacela Jehova kutsi amsite. Utsi: “Ngalo lelo langa, ngatfola incwadzi lebeyivela kubazalwane bami nabodzadze ebandleni. Nangisafundza emavi abo ladvudvutako, ngabona kutsi Jehova bekangivile.” Ngako siyabona kutsi Jehova uvame kusebentisa emavi lanemusa alabanye kuze akhombise kutsi uyasemukela.​—Hla. 10:17.

14. Nguyiphi lenye indlela Jehova lakhombisa ngayo kutsi uyasemukela?

 ¹⁴ Jehova uphindze akhombise kutsi uyasemukela ngekutsi asebentise bazalwane betfu nabodzadze kuze basinikete seluleko nasisidzinga. Sibonelo nje, ngesikhatsi semaKhristu ekucala, Jehova wasebentisa umphostoli Pawula kuze abhale tincwadzi letingu-14 letiphefumulelwe lebetiya kubazalwane bakhe nabodzadze. Loko lakubhala kuletincwadzi bekufaka ekhatsi seluleko lesicinile kodvwa lesinelutsandvo. Yini leyenta Jehova waphefumulela Pawula kutsi afake seluleko kuletincwadzi? Jehova unguBabe lokahle, futsi uyabekhuta bantfwana bakhe ‘labatsandzako.’ (Taga 3:11, 12) Ngako nasitfola seluleko lesivela eBhayibhelini, loko kufanele sikutsatse njengebufakazi bekutsi Jehova uyasemukela hhayi kutsi akasasemukeli. (Heb. 12:6) Ngutiphi letinye tintfo letikhombisa kutsi Jehova uyasemukela?

LETINYE TINDLELA JEHOVA LAKHOMBISA NGATO KUTSI UYASEMUKELA

15. Bobani Jehova labaniketa umoya wakhe longcwele, futsi loko kusicinisekisa ngani?

¹⁵ Jehova ubapha umoya longcwele labo labemukelako. (Mat. 12:18) Singatibuta: ‘Ngiyatikhombisa yini titselo temoya waNkulunkulu ekuphileni kwami?’ Sewubabeketelela kakhudlwana yini labanye kunangalesikhatsi usengakamati Jehova? Nawuchubeka ukhombisa titselo temoya waNkulunkulu, kutawuba sebaleni kutsi Jehova uyakwemukela!​—Buka libhokisi lelitsi “ Titselo Temoya Nguleti . . .”

16. Jehova usebentisa bobani kuze bashumayele tindzaba letimnandzi, futsi loko kukwenta utive njani? (1 KubaseThesalonika 2:4)

¹⁶ Jehova uwunika labo labemukelako umsebenti wekushumayela tindzaba letimnandzi. (Fundza 1 KubaseThesalonika 2:4.) Naka indlela lokwamsita ngayo lomunye dzadze lokutsiwa nguJocelyn kucocela labanye tindzaba letimnandzi. Ngalelinye lilanga, Jocelyn wavuka ativa acindzeteleke kakhulu. Utsi: “Bengite emandla, kodvwa bengilihlahlandlela futsi ngalelo langa bekufanele ngiyoshumayela. Ngako ngathantaza futsi ngaya kuyoshumayela.” Ngalelo langa Jocelyn wahlangana naMary, lebekanemusa futsi wavuma kutsi badadishe liBhayibheli. Ngemuva kwetinyanga Mary watsi bekathantaza acela Nkulunkulu kutsi amsite ngesikhatsi Jocelyn anconcotsa emnyango wakhe. Jocelyn nakacabanga ngaloko  lokwenteka utsi: “Ngeva shengatsi Jehova utsi kimi: ‘Ngiyakwemukela.’” Kuliciniso kutsi akusibo bonkhe labatasilalela nasishumayela. Kodvwa singaciniseka kutsi Jehova uyajabula nasenta konkhe lesingakwenta kuze sicocele labanye tindzaba letimnandzi.

17. Yini loyifundza kuloko lokwashiwo nguVicky mayelana nenhlawulo? (Tihlabelelo 5:12)

¹⁷ Jehova wenta kutsi labo labemukelako bazuze enhlawulweni. (1 Thim. 2:5, 6) Kodvwa yini lesingayenta nangabe tinhlitiyo tetfu tingavumi kutsi Jehova uyasemukela ngisho nobe sinekukholwa enhlawulweni futsi sibhajatisiwe? Khumbula kutsi ngeke sihlale siyetsemba indlela lesitiva ngayo kodvwa singametsemba Jehova. Utsi balungile labo labanekukholwa enhlawulweni futsi wetsembisa kubabusisa. (Fundza Tihlabelelo 5:12; Rom. 3:26) Kucabangisisa ngenhlawulo kwamsita Vicky. Ngalelinye lilanga ngemuva kwekucabangisisa ngenhlawulo watsi: “Sekuphele sikhatsi lesidze Jehova angibeketelela. . . . Nobe kunjalo mine bengisolo ngitsi: ‘Angeke ukhone kumtsandza umuntfu lonjengami. Inhlawulo yeNdvodzana yakho angeke itimbonye tono tami.’” Nakacabangisisa ngesipho senhlawulo, wacala kubona kutsi Jehova uyamtsandza. Natsi singeva kutsi Jehova uyasitsandza nekutsi uyasemukela nasicabangisisa ngenhlawulo.

18. Yini lesingaciniseka ngayo nangabe sichubeka simtsandza Babe wetfu wasezulwini?

¹⁸ Nanobe singetama kamatima kukusebentisa loko lesicoce ngako kuletihloko, ngaletinye tikhatsi singahle sidvumateke futsi sitibute kutsi Jehova uyasemukela yini. Nangabe loko kwenteka, khumbula kutsi uyabemukela “labo labachubeka bamtsandza.” (Jak. 1:12) Ngako chubeka usondzelana naJehova futsi ubuke tindlela lakhombisa ngato kutsi uyakwemukela. Hlale ukhumbula kutsi Jehova ‘akekho khashane kuloyo naloyo kitsi.’​—Imis. 17:27.