1-2. Yini umuntfu lokufanele ayente ngaphambi kwekutsi abhajatiswe?

 KULEMINYAKA lesihlanu leyendlulile, kubhajatiswe bantfu labangetulu kwesigidzi baba BoFakazi BaJehova. NjengaThimothi, linyenti labo bafundziswa liciniso ‘kusukela basetinswane.’ (2 Thim. 3:14, 15) Labanye bafundze ngaJehova sebakhulile kantsi labanye bese babadzala kakhulu. Muva nje, lomunye gogo wadadisha liBhayibheli naBoFakazi BaJehova futsi wabhajatiswa aneminyaka lengu-97!

² Nangabe udadisha liBhayibheli naBoFakazi BaJehova nobe ukhuliswa batali lababoFakazi, utibekele yini umgomo wekubhajatiswa? Loyo ngumgomo lomuhle kakhulu! Kodvwa ngaphambi kwekutsi ubhajatiswe, kufanele utinikele kuJehova. Lesihloko sitawuchaza kutsi kufaka ekhatsi ini kutinikela. Sitawuphindze sikusite ubone kutsi yini leyenta kungadzingeki wesabe kutinikela nekubhajatiswa nangabe sewukulungele kwenta njalo.

KUSHO KUTSINI KUTINIKELA?

3. Niketa tibonelo letiseBhayibhelini tebantfu lebebatinikele kuJehova.

³ EBhayibhelini, umuntfu lobekatinikele kuJehova bekakhetfwe kutsi ente umsebenti lokhetsekile. Ema-Israyeli bekasive lesitinikele kuJehova. Kodvwa lamanye kuwo abetinikele kuJehova kuze ente umsebenti lokhetsekile. Sibonelo nje, Aroni abegcoka umshuculo ‘loneluphawu lolungcwele lwekutinikela,’ lokungungcwengcwe weligolide lomanyatelako lebewuba ngembili. Longcwengcwe weligolide bewukhombisa kutsi ukhetfwe kutsi akhonte Jehova ngendlela lekhetsekile kutsi  abengumpristi lophakeme waka-Israyeli. (Lev. 8:9) NemaNaziri nawo abetinikele kuJehova ngendlela lekhetsekile. Ligama lelitsi “Naziri” lelisuselwe egameni lesiHebheru lelitsi nazirʹ, lisho “Umuntfu Lowehlukanisiwe,” nobe “Umuntfu Lotinikele.” EmaNaziri bekufanele alalele imitsetfo lekhetsekile lebeyibhalwe eMtsetfweni waMosi.​—Num. 6:2-8.

4. (a) Nawutinikela kuJehova, yini lebese ibaluleka kakhulu kuwe? (b) Kusho kutsini ‘kutidzela’? (Buka nesitfombe.)

⁴ Nawutinikela kuJehova, usuke ukhetsa kuba ngumfundzi waJesu Khristu futsi wente intsandvo yaNkulunkulu ibe yintfo lebaluleke kakhulu ekuphileni kwakho. Yini letawulindzeleka kuwe nasewutinikele? Jesu watsi: “Nangabe umuntfu afuna kungilandzela, akatidzele.” (Mat. 16:24) Ligama lesiGriki lelihunyushwe ngekutsi ‘kutidzela’ lingasho “kungasatiphileli wena.” Njengobe usikhonti saJehova lesitinikele, kutawudzingeka ungasatenti tintfo letingahambisani nentsandvo yaNkulunkulu. (2 Khor. 5:14, 15) Loko kufaka ekhatsi kugwema “imisebenti yenyama,” lenjengebugwadla. (Gal. 5:19-21; 1 Khor. 6:18) Kulalela lemitsetfo kutawenta ungasakujabuleli yini kuphila? Angeke nangabe umtsandza Jehova futsi uciniseka kutsi imitsetfo yakhe isita wena. (Hla. 119:97; Isa. 48:17, 18) Lomunye umzalwane lokutsiwa nguNicholas wayibeka kanjena lendzaba: “Kukuwe kutsi timiso taJehova utitsatsa njengetinsimbi tasejele letikuvimbela kutsi ungakwenti loko lofuna kukwenta nobe utitsatsa njengetinsimbi letikwehlukanisa nelibhubhesi, letikuvikela engotini.”

5. (a) Utinikela njani kuJehova? (b) Uyini umehluko emkhatsini wekutinikela nekubhajatiswa? (Buka nesitfombe.)

⁵ Utinikela njani kuJehova? Uyathantaza kuye umetsembise kutsi utawukhonta yena yedvwa nekutsi utawenta intsandvo yakhe ite  kucala ekuphileni kwakho. Usuke wetsembisa Jehova kutsi utawuchubeka umtsandza “ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Mak. 12:30) Loko ukwenta uwedvwa, kube semkhatsini wakho naJehova. Kantsi kubhajatiswa ukwenta embikwebantfu; kukhombisa lababukile kutsi sewutinikele kuye. Lesetsembiso asisiwo umdlalo, umgomo wakho kufanele ube kusigcina futsi nguloko naJehova lalindzele kutsi ukwente.​—Shu. 5:4, 5.

KUBALULEKE NGANI KUTINIKELA KUJEHOVA?

6. Yini leyenta umuntfu atinikele kuJehova?

⁶ Sizatfu lesiyinhloko lesenta utinikele kuJehova kutsi uyamtsandza. Lolutsandvo alukasekelwa endleleni lotiva ngayo kuphela. Kunaloko lusekelwe ‘naselwatini lolungulonalona’ kanye “nekucondza lokuvela [kuNkulunkulu],” lokutintfo lotifundzile ngaJehova letente yakhula indlela lomtsandza ngayo. (Khol. 1:9) Kudadisha imiBhalo kukucinisekisile kutsi (1) Jehova ukhona mbamba, (2) kutsi liBhayibheli liliVi lakhe leliphefumulelwe (3) nekutsi usebentisa inhlangano yakhe kuze afeze intsandvo yakhe.

7. Yini lokufanele siyente ngaphambi kwekutsi sitinikele kuNkulunkulu?

⁷ Labo labatinikela kuJehova kufanele batati timfundziso letisisekelo letiseVini laNkulunkulu futsi baphile ngekuvumelana netimiso talo. Benta konkhe lokusemandleni abo kuze bacocele labanye ngaloko labakufundzile. (Mat. 28:19, 20) Indlela labamtsandza ngayo Jehova seyikhulile futsi banesifiso lesikhulu sekukhonta yena yedvwa. Nguleyo yini indlela nawe lotiva ngayo? Nangabe umtsandza  ngalendlela Jehova, angeke uze utinikele futsi ubhajatiswe ngenca nje yekutsi ufuna kujabulisa lona lodadisha naye liBhayibheli nobe batali bakho, futsi ngesikhatsi lesifanako angeke uze ukwente ngobe nje ufuna kujabulisa bangani bakho.

8. Kubonga kukusita njani kutsi utinikele kuJehova? (Tihlabelelo 116:12-14)

⁸ Nawucabanga ngako konkhe Jehova lakwentele kona, utakubona kufanele kutsi ubonge futsi utawuba nesifiso lesikhulu sekutinikela. (Fundza Tihlabelelo 116:12-14.) LiBhayibheli libita Jehova ngekutsi unguMuphi wato “tonkhe tipho letinhle naletiphelele.” (Jak. 1:17) Sipho lesikhulu kakhulu lasiphe sona ngumhlatjelo weNdvodzana yakhe, lokunguJesu. Cabanga nje! Inhlawulo ikuvulele litfuba lelihle lekutsi ube nebuhlobo lobuhle naJehova, futsi Nkulunkulu ukunike litsemba lekuphila phakadze. (1 Joh. 4:9, 10, 19) Kutinikela kuJehova kuyindlela longakhombisa ngayo kutsi uyabonga ngaloko lakwentile kuze akhombise kutsi ukutsandza kakhulu, nekutsi uyabonga ngato tonkhe tibusiso lakuphe tona. (Dut. 16:17; 2 Khor. 5:15) Lokunye lokungakwenta ubonge kuvetiwe kusifundvo 46, liphuzu 4, encwadzini letsi Jabulela Kuphila Kuze Kube Phakadze! Lesifundvo sine-video lenemizuzu lemitsatfu letsi Ukunikela Izipho Zakho KuNkulunkulu.

UKULUNGELE YINI KUTINIKELA NEKUBHAJATISWA?

9. Kubaluleke ngani kutsi umuntfu angativa acindzetelekile kutsi atinikele?

⁹ Kungenteka uve shengatsi usengakakulungeli kutinikela nekubhajatiswa. Kungenteka kusadzingeka wente lushintjo endleleni lophila ngayo kuze ivumelane netimiso taJehova, nobe kungenteka usadzinga sikhatsi lesinyentana sekucinisa kukholwa kwakho. (Khol. 2:6, 7) Akusibo bonkhe bafundzi labatfutfuka ngendlela lefanako, futsi akusibo bonkhe labasebasha labalungela kutinikela nekubhajatiswa nasebafike eminyakeni letsite. Yetama kubona kutsi nguluphi lushintjo lokufanele ulwente bese uyalwenta, futsi ungaticatsanisi nalomunye umuntfu.​—Gal. 6:4, 5.

10. Yini longayenta nawubona ngatsi usengakakulungeli kutinikela nekubhajatiswa? (Buka nelibhokisi lelitsi “ Lokungasita Labo Labakhuliswa Batali LababoFakazi.”)

¹⁰ Ngisho nobe ubona ngatsi usengakakulungeli kutinikela kuJehova, hlale ukwenta umgomo wakho. Cela Jehova akusite kutsi wente lushintjo loludzingekile ekuphileni kwakho. (Fil. 2:13; 3:16) Ungaciniseka kutsi utawuva umthantazo wakho futsi awuphendvule.​—1 Joh. 5:14.

YINI LEYENTA LABANYE BESABE KUTINIKELA NEKUBHAJATISWA?

11. Jehova utasisita njani kutsi sihlale setsembekile kuye?

¹¹ Nanobe labanye sebakulungele kutinikela nekubhajatiswa, solo bayesaba. Kungenteka bayatibuta: ‘Ngitawenta njani nangenta sono lesikhulu futsi ngiyekeliswa kuba nguFakazi?’ Nangabe wesaba loko, ciniseka kutsi Jehova utakunika konkhe lokudzingako “kuze uhambe ngendlela lefanele [embikwakhe], khona utewumjabulisa ngalokuphelele.” (Khol. 1:10) Jehova utawuphindze akunike emandla ekwenta lokulungile. Ukhombisile kutsi angakhona kukwenta loko ngekutsi asite labanye. (1 Khor. 10:13) Nguleso lesinye sizatfu lesenta kutsi babe mbalwa labayekeliswa kuba BoFakazi BaJehova. Jehova uyabasita bantfu bakhe kutsi bahlale betsembekile.

12. Yini lesingayenta kuze sigweme kwenta sono lesikhulu?

¹² Njengobe sonkhe sinesono, siyalingeka kutsi sente tintfo letimbi. (Jak. 1:14) Nobe kunjalo, kukuwe kutsi utakwenta yini  loko lolingeka kutsi ukwente. Liciniso likutsi nguwe lotawenta sincumo sekutsi ufuna kuphila imphilo lenjani. Nanobe labanye bangakutjela lokwehlukile, kodvwa ungakhona kulawula tifiso takho letimbi. Ngisho nobe ungaba netifiso letimbi, ungakhona kutibamba kuze ungakwenti loko lokufisako. Kuthantaza onkhe malanga kungakusita. Chubeka uneluhlelo loluhle lwekudadisha liBhayibheli, ube khona njalo emihlanganweni yelibandla futsi ucocele labanye ngaloko lokukholelwako. Kuhlale wenta letintfo kutakunika emandla ekunamatsela esifungweni lowasenta nawutinikela. Ungacali ukhohlwe kutsi Jehova utakusita kuze ukwente loko.​—Gal. 5:16.

13. Ngusiphi sibonelo lesihle Josefa lasibekela sona?

¹³ Utakutfola kumelula kunamatsela kulesifungo lowasenta nawutinikela kuJehova nangabe uncuma usengakabhekani nesilingo kutsi utawenta njani nawubhekana naso. LiBhayibheli lisitjela ngalabanye bantfu labakwenta loko nanobe nabo bebanesono. Sibonelo nje, umfati waPhotifari wancenga Josefa emahlandla kutsi alale naye, kodvwa Josefa bekati kutsi utawenta njani. LiBhayibheli lisitjela kutsi ‘wala’ futsi watsi: “Ngingayenta njani intfo lembi kangaka, ngone kuNkulunkulu?” (Gen. 39:8-10) Kusebaleni kutsi Josefa bekati kutsi utawenta njani ngaphambi kwekutsi umfati waPhotifari amlinge. Loko kwenta kwaba melula kutsi ente ngekuhlakanipha nakabhekene nalesilingo.

14. Singakugwema njani kwenta tintfo letimbi?

¹⁴ Ungamlingisa njani Josefa futsi uhlale wetsembekile nawulingwa? Ungancuma nyalo loko lotawukwenta nakungavela silingo. Tifundzise kutibalekela ngekushesha tintfo Jehova latenyanyako futsi ungacabangi ngisho nangato. (Hla. 97:10; 119:165) Nawenta njalo, angeke ukwente loko lolingeka kutsi ukwente. Utawube wati kutsi yini lokufanele uyente nakuvela silingo.

15. Umuntfu angakhombisa njani kutsi ‘umfuna ngekutimisela’ Jehova? (KumaHebheru 11:6)

¹⁵ Kungenteka uyati kutsi sewulitfolile liciniso nekutsi ufuna kukhonta Jehova ngenhlitiyo yakho yonkhe, kodvwa kukhona lokukwenta wesabe kutsi utinikele futsi ubhajatiswe. Kungakusita kucabanga ngesibonelo seNkhosi Davide. Ungancenga Jehova utsi: “Awu Nkulunkulu, ngihlolisise futsi wati inhlitiyo yami. Ngiphenyisise futsi wati imicabango lengikhatsatako. Buka kutsi ngisengakacali  yini kuhamba endleleni leyingoti futsi ungicondzise ngihambe endleleni yaphakadze.” (Hla. 139:23, 24) Jehova uyababusisa labo “labamfuna ngekutimisela.” Nawenta konkhe lokusemandleni akho kute ufinyelele umgomo wekutinikela futsi ubhajatiswe loko kutamkhombisa kutsi umfuna ngekutimisela.​—Fundza KumaHebheru 11:6.

CHUBEKA USONDZELA KUJEHOVA

16-17. Jehova ubadvonsela njani kuye bantfwana labakhuliswe batali lababoFakazi? (Johane 6:44)

¹⁶ Jesu watsi bafundzi bakhe badvonswa nguJehova. (Fundza Johane 6:44.) Cabanga nje ngaloko nekutsi kusho kutsini kuwe. Jehova ubona lokuhle kumuntfu ngamunye lamdvonsela kuye. Umtsatsa ‘njengemphahla yakhe lekhetsekile’ nobe ‘imphahla leligugu.’ (Dut. 7:6; umbhalo longentasi) Nguleyo indlela nawe lakubuka ngayo.

¹⁷ Kodvwa kungenteka ungulosemusha lokhuliswa batali lababoFakazi. Kungenteka uva shengatsi ukhonta Jehova ngenca yekutsi nebatali bakho bayamkhonta hhayi ngesizatfu sekutsi Jehova ukudvonsele kuye. Nobe kunjalo, liBhayibheli litsi: “Sondzelani kuNkulunkulu, naye utawusondzela kini.” (Jak. 4:8; 1 Khr. 28:9) Nakunguwe locale asondzele kuJehova, naye ubese usondzela kuwe. Jehova ubuke wena ngco, hhayi nilicembu. Udvonsa umuntfu ngamunye, lokufaka ekhatsi umntfwana ngamunye lokhuliswa batali lababoFakazi. Nangabe loyo muntfu kunguye losondzela kuJehova kucala, njengobe Jakobe 4:8 asho, naJehova bese usondzela kuye.​—Catsanisa na-2 KubaseThesalonika 2:13.

18. Sitawucoca ngani esihlokweni lesilandzelako? (Tihlabelelo 40:8)

¹⁸ Nawutinikela kuJehova futsi ubhajatiswa, usuke ulingisa Jesu. Watinikela ngekutitsandzela kuBabe wakhe kuze ente nobe yini latsi ayente. (Fundza Tihlabelelo 40:8; Heb. 10:7) Esihlokweni lesilandzelako, sitawucoca ngekutsi yini letakusita kutsi uchubeke ukhonta Jehova ngekwetsembeka ngemuva kwekubhajatiswa.