1. Ngutiphi letinye tibusiso lesitijabulelako ngekuba yincenye yenhlangano yaJehova?

 SIBUSISEKE kakhulu ngekuba yincenye yenhlangano yaJehova kulamalanga ekugcina lamatima. Njengobe lelive liya liba libi kakhulu, Jehova usinikete umndeni lonebunye, lowakhiwa bazalwane betfu nabodzadze. (Hla. 133:1) Usisita kutsi sibe nebudlelwane lobuhle nemalunga emindeni yetfu. (Ef. 5:33–6:1) Uphindze asinikete kucondza kanye nekuhlakanipha lesikudzingako kuze sibe nekuthula mbamba.

2. Yini lokufanele siyente, futsi ngasiphi sizatfu?

² Nanobe kunjalo, kufanele sente konkhe lesingakwenta kuze sichubeke sikhonta Jehova ngekwetsembeka. Ngasiphi sizatfu? Ngenca yekutsi ngaletinye tikhatsi sihle sitfukutseliswa ngemaphutsa lentiwa ngulabanye. Singahle sidvumateke nasenta emaphutsa, ikakhulukati nangabe siphindzaphindza liphutsa linye. Kufanele sichubeke sikhonta Jehova (1) ngisho nobe umzalwane nobe dzadze asivisa buhlungu, (2) nangabe lesishade naye asidvumata, (3) nalapho sidvunyatwa ngemaphutsa lesiwentako. Kulesihloko, sitawucoca ngesimo ngasinye. Sitawuphindze sicoce ngekutsi yini lesingayifundza kumuntfu lowetsembekile lokukhulunywa ngaye eBhayibhelini.

HLALA WETSEMBEKILE KUJEHOVA NANGABE BAZALWANE BAKHO NABODZADZE BAKUVISA BUHLUNGU

3. Nguyiphi inkinga bantfu baJehova lababhekana nayo?

³ Inkinga. Labanye bazalwane betfu nabodzadze banebuntfu lobusicansulako. Labanye bangahle basidvumate nobe basiphatse ngendlela lengakhombisi kucabangela nobe lete umusa. Labadzala belibandla bangahle bente emaphutsa. Loko kungabangela labanye kutsi bangabate kutsi lena yinhlangano yaNkulunkulu. Kunekutsi bachubeke bakhonta Nkulunkulu  “bahlangene lihlombe ngelihlombe” nebazalwane babo nabodzadze, bangahle bayekele kutihlanganisa nalabo lababaphetse kabi nobe baze bayekele kuya emihlanganweni yelibandla. (Zef. 3:9) Kukuhlakanipha yini kwenta loko? Cabanga ngaloko lesingakufundza kulomunye lokukhulunywa ngaye eBhayibhelini lowabhekana netinkinga letifanako.

4. Ngutiphi tinkinga Pawula labhekana nato?

⁴ Sibonelo lesiseBhayibhelini. Umphostoli Pawula bekati kutsi bazalwane bakhe nabodzadze banesono. Sibonelo nje, labanye ebandleni abazange bakholwe kutsi sewungumfundzi ngesikhatsi acala kutihlanganisa nelibandla. (Imis. 9:26) Ngekuhamba kwesikhatsi, labanye bakhuluma kabi ngaye futsi bona lidvumela lakhe lelihle. (2 Khor. 10:10) Pawula wabona lomunye umzalwane loniketwe imisebenti leminyenti ebandleni enta sincumo lesibi lebesingakhuba labanye. (Gal. 2:11, 12) Lomunye webangani bakhe lokunguMakho, wamdvumata kakhulu. (Imis. 15:37, 38) Pawula bekangavumela loku labhekana nako kumente kutsi angasatihlanganisi nalabo labamphatsa kabi. Nanobe kunjalo, wachubeka abatsandza bazalwane bakhe nabodzadze futsi wachubeka akhonta Jehova ngekwetsembeka. Yini leyamsita kutsi akwente loko?

5. Yini leyasita Pawula kutsi ahlale asondzelene nebazalwane bakhe nabodzadze? (KubaseKholose 3:13, 14) (Buka nesitfombe.)

⁵ Pawula bekabatsandza bazalwane bakhe nabodzadze. Lolutsandvo lebekanalo ngalabanye lwamsita kutsi anganaki emaphutsa abo, kodvwa anake buntfu babo lobuhle. Lolutsandvo lwaphindze lwamsita kutsi akwente loko lakubhala, njengaloko lokubhalwe KubaseKholose 3:13, 14. (Fundza.) Naka kutsi Pawula wamphatsa njani Makho. Nanobe Makho alahla Pawula ngesikhatsi aseluhambeni lwakhe lwekucala njengobe bekasitfunywa selivangeli, kodvwa Pawula akazange ahlale amtfukutselele. Ngesikhatsi abhalela libandla laseKholose incwadzi lemnandzi, wadvumisa Makho ngekutsi usisebenti lesikanye naye, ‘lesiyindvudvuto lenkhulu.’ (Khol. 4:10, 11) Ngesikhatsi aboshiwe eRoma, wacela Makho kutsi ete kutomsita. (2 Thim. 4:11) Kusebaleni kutsi Pawula wabacolela bazalwane bakhe futsi wahlale asondzelene nabo. Yini lesingayifundza kuPawula?

6-7. Yini lengasisita kutsi sichubeke sibatsandza bazalwane betfu nabodzadze ngisho nobe banemaphutsa? (1 Johane 4:7)

⁶ Loko lesikufundzako. Jehova ufuna sichubeke sibatsandza bazalwane betfu nabodzadze. (Fundza 1 Johane 4:7.) Nangabe umzalwane nobe dzadze ehluleka kukhombisa lobunye buntfu bebuKhristu, singaciniseka kutsi uyafuna  kulandzela timiso teliBhayibheli, nekutsi umane nje wenta angakacabangi. (Taga 12:18) Nkulunkulu uyatitsandza tinceku takhe letetsembekile ngisho nobe tihle tenta emaphutsa. Akayekeli kusitsandza nasenta emaphutsa futsi akahlali asitfukutselele. (Hla. 103:9) Ngako kubalulekile kutsi silingise Babe wetfu locolelako!​—Ef. 4:32–5:1.

⁷ Khumbula kutsi njengobe lelive liya ngasekupheleni, kutawudzingeka sihlale sisondzelene nebazalwane betfu nabodzadze. Singalindzela kutsi sichubeke siphatfwa kabi kakhulu. Singaze siboshwe ngenca yekukholwa kwetfu. Nakwenteka loko, sitawubadzinga kakhulu bazalwane betfu nabodzadze. (Taga 17:17) Naka naku lokwenteka kuJosep, a longulomdzala welibandla eSpain. Yena kanye nalabanye bazalwane baboshwa ngenca yekungalutsatsi luhlangotsi. Utsi: “Ejele, bekamanyenti kakhulu ematfuba ekutsi sicansulane nebazalwane betfu ngenca yekutsi besivalelwe endzaweni lencane. Bekudzingeka sibeketelelane futsi sicolelane. Loku kwasisita kutsi sihlale sinebunye futsi sivikelane. Besivalelwe netiboshwa lebetingamkhonti Jehova. Ngalelinye lilanga, ngalimala umkhono futsi ngafakwa semende, ngako bengingasakhoni kutentela tintfo. Kodvwa lomunye umzalwane wangiwashela timphahla tami futsi wanginakekela nangaletinye tindlela. Ngatfola lutsandvo sibili ngesikhatsi lebengiludzinga ngaso kakhulu.” Lesi sikhatsi lesihle kakhulu sekutsi silungise tinkinga emkhatsini wetfu nebazalwane betfu nabodzadze!

CHUBEKA WETSEMBEKILE NANGABE LOSHADE NAYE AKUDVUMATA

8. Nguyiphi inkinga bantfu labashadene lababhekana nayo?

⁸ Inkinga. Yonkhe imishado inetinkinga. LiBhayibheli likubeka ebaleni kutsi bantfu labashadile “batawuba nelusizi enyameni.” (1 Khor. 7:28) Kwentiwa yini loku? Ngenca yekutsi kushada bantfu lababili labanesono, banebuntfu lobehlukene, batsandza tintfo letingafani, futsi netintfo labangatitsandzi atifani. Kungenteka bakhuliswe ngemasiko langafani nobe ngendlela lengafani. Ngekuhamba kwesikhatsi, bangahle bente tintfo lebetinganakeki basengakashadi. Konkhe loku kungabanga tinkinga. Kunekutsi babuke kutsi kukhona umuntfu ngamunye lakwentile kuze kube nalenkinga futsi betame kuyilungisa, bangacala kusolana. Bangaze babone ngatsi kuhlala ngekwehlukana nobe kudivosa kungayilungisa lenkinga. Kodvwa loko kulikhambi letinkinga tabo yini? b Asesicoce ngalomunye lokukhulunywa ngaye eBhayibhelini lowahlale etsembekile kuJehova ngisho nobe indvodza yakhe beyenta kuphila kwakhe kube matima.

9. Nguyiphi inkinga Abigayili labhekana nayo?

⁹ Sibonelo lesiseBhayibhelini. Abigayili bekashade naNabali futsi liBhayibheli litsi bekayindvodza lete umusa naleyenta tintfo letimbi. (1 Sam. 25:3) Kungenteka bekumatima nga-Abigayili kutsi aphile nendvodza lenjena. Kodvwa abenalo yini litfuba lekuphuma kulomshado? Walitfola litfuba ngesikhatsi Davide, lebekatawuba yinkhosi yaka-Israyeli, afuna kubulala indvodza yakhe ngenca yekutsi beyimtfukile, yena kanye nemadvodza lebekanawo. (1 Sam. 25:9-13) Abigayili bekangabaleka kuze Davide abulale Nabali. Kodvwa akazange akwenta loko, wancenga Davide kutsi angambulali Nabali. (1 Sam. 25:23-27) Yini leyamenta wenta njalo?

10. Yini lokungenteka yenta Abigayili kutsi achubeke etsembekile kuJehova ngisho nobe bekunetinkinga emshadweni wakhe?

 ¹⁰ Abigayili bekamtsandza Jehova futsi atihlonipha timiso takhe letimayelana nemshado. Siyaciniseka kutsi bekakwati loko Nkulunkulu bekakutjele Adamu na-Eva ngesikhatsi abashadisa. (Gen. 2:24) Bekati kutsi kuJehova umshado ungcwele. Bekafuna kujabulisa Nkulunkulu, futsi loko kwamenta wafuna kwenta nobe ngabe yini kuze asindzise umndeni wakhe, lokufaka ekhatsi nendvodza yakhe. Wenta ngekushesha kuze avimbe Davide angambulali Nabali. Bekakulungele nekucolisa ngisho nobe bekangakenti lutfo. Kusebaleni kutsi Jehova bekamtsandza lomfati lonesibindzi futsi lebekangaticabangeli yena. Yini emadvodza nebafati labangayifundza ku-Abigayili?

11. (a) Yini Jehova layilindzele kulabashadile? (Kubase-Efesu 5:33) (b) Yini loyifundzako kuloko Carmen lakwenta kuze avikele umshado wakhe? (Buka nesitfombe.)

¹¹ Loko lesikufundzako. Jehova utjela labo labashadile kutsi bawuhloniphe umshado ngisho nobe kulukhuni kuhlala nalona labashade naye. Uyajabula nakabona labashadile basebenta kamatima kuze balungise tinkinga tabo futsi bakhombisane kutsi batsandzana mbamba nekutsi bayahloniphana. (Fundza Kubase-Efesu 5:33.) Cabanga ngesibonelo saCarmen. Ngemuva kweminyaka lengaba sitfupha ashadile, Carmen wacala kudadisha liBhayibheli naBoFakazi BaJehova futsi ngekuhamba kwesikhatsi wabhajatiswa. Utsi: “Indvodza yami ayizange ijabule ngaloko. Yamdlela umona Jehova. Beyingetfuka futsi yaze yatsi itangishiya.” Nanobe kunjalo, Carmen wabeketela emshadweni wakhe. Sekuphele iminyaka lengu-50 asebenta kamatima emshadweni wakhe kuze atsandze indvodza yakhe futsi ayihloniphe. Utsi: “Njengobe iminyaka ichubeka, ngifundze kuyicondza indlela indvodza yami letiva ngayo futsi ngikhulume nayo ngemusa. Kwati kutsi umshado ungcwele kuJehova, kungente ngenta konkhe lokusemandleni ami kuze ngivikele umshado wami. Angizange ngetame kuyishiya indvodza yami ngobe ngiyamtsandza Jehova.” c Nangabe kuba netinkinga emshadweni wakho, ungetsemba kutsi Jehova utakusekela futsi akusite kutsi ubeketele.

YETSEMBEKA KUJEHOVA NGISHO NOBE WENTE EMAPHUTSA LAMAKHULU

12. Nguyiphi inkinga lesingaba nayo nangabe sente sono lesikhulu?

¹² Inkinga. Singahle sitive sidvumateke kakhulu nangabe sente sono lesikhulu. LiBhayibheli liyavuma kutsi tono tetfu tingasenta sitive sinenhlitiyo “leyephukile naledzabukile.” (Hla. 51:17) Kwaphela iminyaka lomunye  umzalwane lokutsiwa nguRobert asebenta kamatima kuze akufanele kuba yinceku lesebentako. Nanobe kunjalo, wenta sono lesikhulu lesamenta wabona kutsi umvise buhlungu kakhulu Jehova. Utsi: “Nembeza wami bewungishaya kakhulu. Ngemuva kwaloko ngeva buhlungu kakhulu, ngakhala futsi ngathantaza kuJehova. Ngikhumbula ngicabanga kutsi Nkulunkulu akayuze aphindze atihluphe ngekungilalela. Bekangangilalelelani nje? Bengimvise buhlungu.” Nangabe sente sono lesikhulu, singahle sive buhlungu kakhulu futsi sicale kucabanga kutsi Jehova usilahlile nekutsi kute sizatfu sekutsi sichubeke simkhonta. (Hla. 38:4) Nangabe uke wativa ngalendlela, cabanga ngalesinye sibonelo lesiseBhayibhelini semuntfu lowachubeka akhonta Jehova ngisho nobe bekente sono lesikhulu.

13. Ngusiphi sono lesikhulu Phetro lasenta, futsi yini leyamholela kulesono?

¹³ Sibonelo lesiseBhayibhelini. Ngebusuku lobungaphambi kwekutsi Jesu abulawe, Phetro wenta emaphutsa ngekulandzelana futsi ngenca yaloko wagcine ente sono lesikhulu. Ekucaleni, Phetro wakhombisa kutsi utetsemba kakhulu, atigcabha ngekutsi utawuhlala etsembekile ngisho nobe labanye baphostoli bangamshiya Jesu. (Mak. 14:27-29) Ngesikhatsi basensimini yaseGetsemane, wehluleka emahlandla kuhlala alindzile. (Mak. 14:32, 37-41) Ngemuva kwaloko, washiya Jesu nesicumbi lebesite kutombopha. (Mak. 14:50) Ekugcineni, Phetro waphika tikhatsi letintsatfu kutsi uyamati Jesu, waze wafunga wagomela. (Mak. 14:66-71) Wativa njani nakabona kutsi bekente sono lesikhulu? Wadzabuka enhlitiyweni, waze wakhala kabuhlungu, mhlawumbe ngenca yekutsi bekashaywa ngunembeza. (Mak. 14:72) Cabanga nje kutsi weva buhlungu lobunganani ngesikhatsi umngani wakhe abulawa ngemuva kwema-awa. Kungenteka wativa angasilutfo!

14. Yini leyasita Phetro kutsi achubeke akhonta Jehova? (Buka sitfombe lekucala.)

¹⁴ Phetro wachubeka akhonta Jehova ngenca yetizatfu letinyenti. Akazange atehlukanise; kunaloko waya kulabanye bafundzi futsi bamdvudvuta. (Luk. 24:33) Ngetulu kwaloko, ngemuva kwekuvuswa kwaJesu, wabonakala kuye, futsi kungenteka bekafuna kumkhutsata. (Luk. 24:34; 1 Khor. 15:5) Ngekuhamba kwesikhatsi, kunekutsi amsole ngemaphutsa akhe, Jesu wamtjela lomngani wakhe kutsi bekatawuniketwa imisebenti leminyenti. (Joh. 21:15-17) Phetro bekati kutsi bekente sono lesikhulu, kodvwa wachubeka etama kwenta lokulungile. Ngasiphi sizatfu? Ngenca yekutsi bekaciniseka kutsi iNkhosi yakhe, lokunguJesu beyisolo imtsandza. Ngetulu kwaloko, bafundzi bachubeka  bamsekela. Yini lesingayifundza esibonelweni saPhetro?

15. Yini Jehova lafuna siciniseke ngayo? (Tihlabelelo 86:5; KubaseRoma 8:38, 39) (Buka nesitfombe.)

¹⁵ Loko lesikufundzako. Jehova ufuna siciniseke kutsi uyasitsandza nekutsi ukulungele kusicolela. (Fundza Tihlabelelo 86:5; KubaseRoma 8:38, 39.) Nasenta sono, sishaywa ngunembeza. Loku kuvamile futsi kuyintfo lekahle. Nobe kunjalo, akukafaneli sicabange kutsi Jehova akasasitsandzi nobe kutsi angeke aze asicolele. Kunaloko, kufanele sicele lusito ngekushesha. Robert, lesike sakhuluma ngaye utsi: “Ngenta sono ngenca yekutsi bengitetsemba mine nangilingwa.” Wabona kutsi bekudzingeka ayokhuluma nalabadzala belibandla. Utsi: “Nasengikwentile loko, ngaluva ngekushesha lutsandvo lwaJehova asebentisa labazalwane. Labadzala belibandla bachubeka bangitsandza. Bangisita ngabona kutsi Jehova akakangilahli.” Natsi singaciniseka kutsi Jehova usitsandza kakhulu futsi utasicolela nangabe siphendvuka, sicela lusito futsi setame kamatima kutsi singawaphindzi emaphutsa etfu. (1 Joh. 1:8, 9) Nangabe siciniseka ngaloko, angeke siyekele kukhonta Jehova ngisho nobe sente liphutsa.

16. Yini lekwenta utimisele kuchubeka ukhonta Jehova?

¹⁶ Jehova ujabula kakhulu ngaloko lesikwentako kuze sichubeke simkhonta kulamalanga ekugcina lamatima. Ngekusitwa nguye, singakhona kuchubeka simkhonta ngekwetsembeka ngisho sidvumateka. Singachubeka sibatsandza bazalwane betfu nabodzadze futsi sibacolela nabasivisa buhlungu. Singakhombisa kutsi simtsandza kangakanani Nkulunkulu nekutsi siwuhlonipha kakhulu umshado ngekutsi sente konkhe lesingakhona kukwenta kuze silungise tinkinga letingahle tibe khona emshadweni wetfu. Nangabe sente sono, singacela Jehova kutsi asisite, semukele lutsandvo lwakhe nekucolelwa nguye futsi sichubeke simkhonta. Singaciniseka kutsi utasibusisa nangabe ‘singapheli emandla ekwenta lokuhle.’​—Gal. 6:9.