1. Kungani labanye bangakhoni kudadisha?

LAMUHLA, bantfu labanyenti basebenta kamatima kute bakhone kuphila. Bazalwane betfu labanyenti basebenta ema-awa lamanyenti kute batsengele imindeni yabo tintfo labatidzingako. Labanyenti babo bacitsa ema-awa lamanyenti nabaya noma nababuya emsebentini. Labanye batiphilisa ngekutsi bente imisebenti ledzinga emandla. Nakushona lilanga, labazalwane nabodzadze labasebenta kamatima basuke bakhatsele kakhulu! Loko kungabenta bangakhoni kudadisha.

2. Wena usitfola nini sikhatsi sekudadisha?

² Liciniso likutsi kufanele sitinike sikhatsi sekulidadisha kahle liVi laNkulunkulu kanye netincwadzi tetfu tebuKhristu. Nangabe sifuna kuba nebuhlobo lobuhle naNkulunkulu siphindze siphile phakadze, kufanele sitinike sikhatsi sekudadisha. (1 Thim. 4:15) Labanye basheshe bavuke onkhe malanga kute badadishe, ngobe kusuke kusethulile futsi nengcondvo yabo isuke ingakadzinwa. Labanye badadisha baphindze bazindle entsambama nasekute tiphatamiso.

3-4. Ngutiphi tingucuko letentiwe etintfweni lesitifundzako nalesitibukelako, futsi kungani?

³ Asingabati kutsi uyavuma kutsi kubaluleke kakhulu kutinika sikhatsi sekudadisha. Kodvwa yini lokufanele uyidadishe? Ungacabanga: ‘Kunyenti kakhulu lengingakufundza. Ngikutfola kumatima kutifundza tonkhe tincwadzi lesititfolako.’ Labanye bayakhona kutifundza tonkhe tincwadzi lesitinikwa yinhlangano baphindze babukele onkhe ema-video, kodvwa bazalwane betfu labanyenti abakhoni kwenta njalo. Sigungu Lesibusako siyakwati loko. Kungako Sigungu Lesibusako sancuma kutsi kuncishiswe tincwadzi letishicilelwako kanye naletitfolakala etintfweni tebuchwephesha.

 ⁴ Nasi sibonelo, nyalo ayisashicilelwa incwadzi yemnyaka yaBoFakazi BaJehova ngoba lebesikufundza kuyo sekuyatfolakala ku-jw.org^® kanye naseluhlelweni lwe-JW Broadcasting^® loluba khona njalo ngenyanga. Sicongosekulindza lesihanjiswako kanye ne-Phaphama! sekushicilelwa katsatfu ngemnyaka. Letingucuko atikentelwa kutsi sibe nesikhatsi lesinyenti sekwenta letinye tintfo letingakahlobani nekukhonta kwetfu Jehova. Kodvwa tentelwe kutsi sikhone kunakisisa “tintfo letibaluleke kakhulu.” (Fil. 1:10) Ase sicoce ngekutsi singancuma njani kutsi ngutiphi tintfo letibaluleke kakhulu futsi singazuza njani ngalokugcwele nasitidadishela liBhayibheli.

5-6. Yini lokufanele siciniseke kutsi siyidadisha ngekucophelela?

⁵ Yini lokufanele siyidadishe kucala? Onkhe malanga kufanele sitinike sikhatsi sekudadisha liBhayibheli. Emavesi lafundvwa emhlanganweni wasekhatsi neliviki ancishisiwe kute sitfole sikhatsi lesinyenti sekuzindla kanye nesekucwaningisisa etincwadzini tetfu. Umgomo wetfu akukafaneli ube kumane nje sifundze emavesi lokufanele siwafundze ngalelo viki, kodvwa kufanele sivumele umlayeto weliBhayibheli utsintse tinhlitiyo tetfu uphindze usente sisondzelane naJehova.—Hla. 19:14.

⁶ Yini lenye lokufanele siyidadishe ngekucophelela? Kufanele silungiselele Sifundvo se-Sicongosekulindza, Sifundvo SeliBhayibheli Selibandla kanye nemhlangano wasekhatsi neliviki. Kufanele sifundze bonkhe bomagazini be-Sicongosekulindza lesifundvwako nalesihanjiswako kanye ne-Phaphama!

7. Kufanele yini sidvumateke nangabe singakhoni kufundza nobe kubukela tonkhe tintfo lesititfola ku-website yetfu kanye nasemsakatweni we-JW?

⁷ Ungahle utsi: ‘Kutsiwani ngetihloko letinyenti kanye nema-video latfolakala ku-jw.org, kanye naku-JW Broadcasting?’ Cabanga nganangu umfanekiso: Tinyenti tinhlobonhlobo tekudla lokumnandzi letitfolakala e-restaurant. Akwenteki kutsi emakhasimende akuve konkhe kudla lokutfolakala khona, kodvwa akhetsa kudla lokumbalwa. Ngendlela lefanako, ungadvumali nangabe ungakhoni kufundza tonkhe tincwadzi kanye nekubukela onkhe ema-video latfolakala etintfweni tebuchwephesha. Fundza uphindze ubukele loko lokukhonako. Nyalo sitawucoca ngekutsi kusho kutsini kudadisha kanye nekutsi yini lesingayenta kuze sizuze lokunyenti nasidadisha.

8. Yini lokufanele uyente nawudadisha Sicongosekulindza, futsi loko kutakusita ngani?

⁸ Kudadisha kusho kunakisisa loko lokufundzako ube unemgomo wekutfola lokutsite lokubalulekile kuko. Akusiko nje kumane wengcise emehlo kuloko lokufundzako futsi udvwebele timphendvulo. Nangabe udadisha Sifundvo Se-Sicongosekulindza, cale ufundze loko lokutococwa ngako kulesihloko lokuvame kuba sekucaleni kwaso. Ngemuva kwaloko cabangisisa ngesihloko netihlokwana kanye nemibuto yekubuketa. Kufanele bese ufundza lesihloko ungagijimi futsi unakisise. Wunakisise umusho wekucala esigabeni ngoba uvame kusitjela ngaloko lokutawukhulunywa ngako esigabeni. Utawuphindze ukusite ubone nekutsi lesigaba sichaza liphi liphuzu. Njengoba ufundza lesihloko, naka kutsi sigaba ngasinye sihlobana njani nesihlokwana futsi sisisekela njani sihloko lesikhulu. Naka emagama longakawetayeli nemaphuzu longatsandza kucwaninga ngawo kute uwacondze kahle.

9. (a) Kungani kufanele siyinakisise ngalokukhetsekile imibhalo nasidadisha Sicongosekulindza futsi singakwenta njani loko? (b) Ngekusho kwaJoshuwa 1:8, yini lokufanele siyente ngetulu kwekufundza imibhalo?

⁹ Sifundvo Se-Sicongosekulindza sisisita kutsi  sicondze liBhayibheli. Ngako-ke yinakisise imibhalo ikakhulukati leyo letawufundvwa ebandleni. Naka kutsi emagama kanye nemisho leyinhloko emibhalweni kulisekela njani liphuzu lokukhulunywa ngalo esigabeni. Ngetulu kwaloko tinike sikhatsi sekucabangisisa ngemibhalo loyifundzako, uphindze uzindle ngekutsi ungayisebentisa njani ekuphileni kwakho.—Fundza Joshuwa 1:8.

10. Ngekusho kwembhalo waHebheru 5:14, kungani batali kufanele bafundzise bantfwana babo indlela yekudadisha nekucwaninga ekukhonteni kwemndeni?

¹⁰ Ngalokuvamile batali bafuna kutsi kukhonta kwemindeni kwamaviki onkhe kube sikhatsi lesijabulisako kubantfwana babo. Nobe kunjalo, ngisho nobe batali kufanele bacabange ngalokutsite labatokwenta ekukhonteni kwemndeni, kute sidzingo sekutsi bahlele tintfo letikhetsekile labatawutenta njalo ngeliviki. Ngisho nome ekukhonteni kwemndeni kungabukelwa luhlelo lweMsakato we-JW noma kwentiwe imisebenti letsite njengekwakha umkhumbi waNowa, kubalulekile nekutsi bantfwana bafundziswe indlela yekudadisha. Kufanele bafundziswe indlela yekudadisha imihlangano yelibandla, noma indlela yekucwaninga ngenkinga levelile nabasesikolweni. (Fundza Hebheru 5:14.) Nangabe bacitsa sikhatsi lesinyenti badadisha emakhaya, kutawuba melula kutsi banakisise nakuchubeka imihlangano yelibandla, imihlangano yesigodzi, kanye nemihlangano yesifundza, ngisho noma ngabe kute ema-video. Sikhatsi batali labatasicitsa badadisha nebantfwana babo sitawuya ngeminyaka yabo kanye nebuntfu bebantfwana babo.

11. Kubaluleke ngani kutsi sifundzise bantfu lesifundza nabo liBhayibheli kutsi batidadishele?

¹¹ Bantfu lesibafundzisa liBhayibheli nabo kufanele bafundze indlela yekudadisha. Nasicala kufundza nabo, sijabula kakhulu nasibabona badvwebele incwadzi lesiyifundza nabo nobe lesiyifundza emihlanganweni yelibandla. Kodvwa kufanele sibafundzise indlela yekucwaninga kanye nekudadisha ngalokujulile babodvwa. Loko kutawubasita kutsi nakuvela tinkinga, bangajakeli kucela seluleko lesivela kumalunga elibandla kodvwa batitfolele sona nabaticwaningela etincwadzini tetfu.

12. Ngumiphi imigomo lesingatibekela yona nasidadisha?

¹² Nangabe ungumuntfu longakutsandzi kudadisha, ungahle ucabange kutsi awuyuze ukujabulele kudadisha. Kodvwa ungakhona kutfola injabulo nawudadisha. Ungacala ngekudadisha sikhatsi lesincane, bese uyasikhulisa  kancane kancane ngekuhamba kwesikhatsi. Tibekele umgomo. Umgomo wetfu lobalulekile, kufanele ube kusondzela kakhulu kuJehova. Umgomo lesingakhona kusheshe siwufinyelele kuphendvula umbuto lobutwe ngulotsite nobe kucwaninga ngenkinga letsite lesibhekene nayo.

13. (a) Chaza tinyatselo letingatsatfwa ngulosemusha kute avikele tinkholelo takhe esikolweni. (b) Ungasisebentisa njani seluleko lesikuKholose 4:6?

¹³ Nasi sibonelo, ungumuntfu losemusha yini futsi lofundza sikolwa? Bonkhe bantfwana lofundza nabo bangahle bakholelwe emfundzisweni yekutigucukela kwemvelo. Ungatsandza kumelela loko lokufundziswa liBhayibheli, kodvwa mhlawumbe ucabange kutsi angeke uze ukhone. Ngako kungadzingeka udadishe uphindze ucwaninge. Ungahle utibekele nayi imigomo lemibili: (1) kukhulisa kukholwa kwakho kutsi Jehova wadala tonkhe tintfo kanye (2) nekutfutfukisa likhono lakho lekumelela liciniso. (Rom. 1:20; 1 Phet. 3:15) Ungacala ngekutibuta: ‘Yini leyenta bantfwana lengifundza nabo bakholelwe ekutigucukeleni kwemvelo?’ Bese usebentisa tincwadzi tetfu, kute ucwaninge. Kumelela loko lokukholelwako kungahle kungabi matima njengobe ucabanga. Labanye bakholelwa ekutigucukeleni kwemvelo ngenca yekutsi bantfu lababetsembako babafundzisa kutsi kuliciniso. Nangabe utfola munye nobe lababili labatimisele kwati liciniso, ungabasita kutsi batfole timphendvulo temibuto labanayo.—Fundza Kholose 4:6.

14-16. (a) Yini longayenta kute ufundze lokunyenti ngencwadzi yeliBhayibheli lonelwati loluncane ngayo? (b) Usebentisa lemiBhalo lekhonjiwe, chaza kutsi ingakusita kanjani wati lokunyenti ngencwadzi ya-Amose. (Buka nelibhokisi lelitsi “ Tifake Esimeni Sebantfu Lofundza Ngabo EBhayibhelini.”)

¹⁴ Ase sitsi emhlanganweni losekhatsi neliviki sitawufundza lenye incwadzi leyabhalwa ngulomunye webaphrofethi labancane, mhlawumbe longakametayeli. Sinyatselo sekucala kutsi ukhulise sifiso sakho sekwati lokwengetiwe ngaloyo mphrofethi. Ungakwenta njani loko?

¹⁵ Kwekucala, tibute: ‘Kukhona yini lengikwatiko ngembhali walencwadzi? Bekangubani, ahlalaphi, futsi bewuyini umsebenti wakhe?’ Nasifundza lokunyenti ngembhali wencwadzi, sitawukhona kuwacondza emagama lakhetsa kuwasebentisa kanye nemifanekiso. Njengobe ufundza liBhayibheli naka emagama lawasebentisa, ngobe angachaza kutsi abengumuntfu lonjani.

¹⁶ Kungakusita nekwati kutsi lencwadzi yabhalwa nini. Ungakhona kukwenta loko kamelula ngekutsi ubuke Luhla Lweticwadzi teliBhayibheli lolutfolakala encenyeni lengemuva ye-New World Translation of the Holy Scriptures. Ngetulu kwaloko, ungabuka lishadi lebaphrofethi nemakhosi lelitfolakala kubhukwana lotsi Lithulusi Lekutadisha LiVi LaNkulunkulu emakhasi 14 kuya ku-17. Nangabe ufundza incwadzi lesiphrofetho, kungaba kuhle kufundza kutsi bekunjani kuphila ngesikhatsi kubhalwa lencwadzi yeliBhayibheli. Nguyiphi indlela lekabi yekucabanga noma imikhuba lemibi lomphrofethi lebekafuna kutsi bantfu bayiyekele? Bobani lebebaphila ngesikhatsi sakhe? Kuze ukhone kukucondza kahle, kungadzingeka ubuke nakuletinye tincwadzi teliBhayibheli. Nasi sibonelo, kute ukhone kucondza kahle kutsi yini lebeyenteka ekuphileni kwemphrofethi Amose, ungatfola lokunyenti ngekufundza incwadzi ya-2 Emakhosi kanye neya 2 Tikhronike letitfolakala nawubuka tikhombo temibhalo letiku-Amose 1:1. Ngetulu kwaloko, ungafundza incwadzi yaHoseya lokungenteka waphila ngesikhatsi sa-Amose. Yonkhe lemininingwane itakusita wati ngaloko  lebekwenteka ngesikhatsi sa-Amose.—2 Khos. 14:25-28; 2 Khr. 26:1-15; Hos. 1:1-11; Amo. 1:1.

17-18. Usebentisa tibonelo letisesigabeni noma takho, chaza kutsi kunaka ngisho nemininingwane lemincane kungakwenta njani kudadisha liBhayibheli kujabulise?

¹⁷ Kukahle kuba nesifiso lesikhulu sekwati lokunyenti nasifundza liBhayibheli. Nasi sibonelo, asesitsi ufundza sehluko 12 saZakhariya lesikhuluma ngekufa kwaMesiya. (Zak. 12:10) Nawufika evesini 12, ufundza kusi “lusendvo lwendlu yakaNathani” belitawuva buhlungu kakhulu ngekufa kwaMesiya. Kunekutsi umane wendlule nje, kungaba kuhle kutsi ume, futsi utibute: ‘Lusendvo lwendlu yaNathani luhlangana njani naMesiya? Yini lenye lengingayenta kute ngitfole lokunyenti ngalendzaba?’ Kungadzingeka kutsi ucwaningisise. Sikhombo sembhalo sitawuveta sitakukhombisa incwadzi ya-2 Samuweli 5:13, 14, lotsi Nathani bekangulomunye webantfwana baDavide. Sikhombo sesibili sitakulayela incwadzi yaLukha 3:23, 31 leveta kutsi Nathani bekangukhokho waJesu ehlangotsini lwaMariya. (Buka liphuzu lelicwaningiwe laLukha 3:23 lelitsi “Josefa indvodzana yaHeli.” *) Ngekushesha uyajabula futsi uba nesifiso sekufundza lokwengetiwe. Bewati kutsi kunesiphrofetho lesitsi Jesu bekatawuvela emndenini waDavide. (Mat. 22:42) Kodvwa Davide bekanemadvodzana langetulu kwa-20. Akumangalisi yini kutsi Zakhariya watsi ngumndeni waNathani lebewutawudzabuka nakufa Jesu?

¹⁸ Cabanga nganasi lesinye sibonelo. Esehlukweni sekucala saLukha, sifundza ngengilosi Gabhriyeli leyavakashela Mariya futsi yamtjela  tindzaba letijabulisako ngendvodzana lebekatawuba nayo. Yatsi: “Itawuba ngumuntfu lomkhulu, ibitwe ngekutsi yiNdvodzana yaLosetikwako Konkhe, futsi Jehova Nkulunkulu utayinika sihlalo sebukhosi seyise Davide, itawubusa njengeNkhosi endlini yaJakobe kute kube phakadze.” (Luk. 1:32, 33) Ngalokuvamile singanaka intfo yekucala Gabhriyeli layisho, kutsi Jesu bekatawubitwa ngekutsi “yiNdvodzana yaLosetikwako Konkhe.” Kodvwa Gabhriyeli waphindze waphrofetha kutsi Jesu ‘bekatawubusa njengeNkhosi.’ Ngako singatibuta kutsi yini Mariya layicabanga ngalamavi lashiwo nguGabhriyeli. Mariya wacabanga kutsi lamavi bekasho kutsi Jesu bekatawutsatsa sikhundla saHerodi yini noma semadvodzana akhe ngekutsi abe yinkhosi yaka-Israyeli? Nangabe Jesu bekatawuba yinkhosi, Mariya bekatawuba yindlovukati, futsi umndeni wakhe bewutawuhlala esigodlweni. Nanobe kunjalo, liBhayibheli alisho kutsi Mariya wakhuluma emavi lanjalo kuGabhriyeli, futsi kute lapho sifundza khona kutsi Mariya wacela sikhundla eMbusweni, njengobe kwenta bafundzi baJesu lababili. (Mat. 20:20-23) Loku kusenta sibone kutsi Mariya bekatfobeke kakhulu!

19-20. Jakobe 1:22-25 na-4:8 utsi ngumiphi imigomo lokufanele sitibekele yona nasidadisha?

¹⁹ Kufanele sikhumbule kutsi umgomo wetfu loyinhloko nasidadisha liBhayibheli noma tincwadzi tebuKhristu kutsi sibe nebuhlobo lobusedvute naJehova. Sifuna nekubona kahle kutsi sibanfu labanjani nekutsi ngutiphi tingucuko lokudzingeka sitente ekuphileni kwetfu kute sijabulise Jehova. (Fundza Jakobe 1:22-25; 4:8.) Nasicala kudadisha, kufanele sicele umoya waJehova. Kufanele simcele kutsi asisite sizuze kuloko lesikufundzako futsi asisite sibone tingucuko lokudzingeka sitente.

²⁰ Shengatsi sonkhe singafana nalomunye umuntfu waJehova lowetsembekile lowachazwa ngumhlabeleli nakatsi: “Kujabula kwakhe kusemtsetfweni waSimakadze, uyacabanga azindle ngawo imini nebusuku. . . . Konkhe lakwentako kuyaphumelela.”—Hla. 1:2, 3.