1-2. Yini leyenta leminye imiBhalo ibaluleke kakhulu kitsi nakushintja timo tetfu?

 UMKHWENYANE namakoti bayalalelisisa njengobe kubekwa inkhulumo yemshado lesekelwe eBhayibhelini. Timiso lokukhulunywa ngato kulenkhulumo abacali kutiva. Kodvwa kusukela ngalelo langa, letimiso tibaluleka kakhulu kubo. Leni? Ngobe batatisebentisa emshadweni wabo.

² Kungulokufanako nalapho labashadile sebatawuba nemntfwana. Kungenteka kuleminyaka leyendlulile bebativa tinkhulumo letikhuluma ngekukhulisa bantfwana. Kodvwa nyalo, letimiso titawubaluleka kakhulu kubo. Sebatawuba nemntfwana lokufanele bamkhulise. Loyo ngumsebenti lomkhulu! Ngako nakushintja timo tetfu, leminye imiBhalo ibaluleka kakhulu kitsi. Lesi ngulesinye sizatfu lesenta labo labakhonta Jehova kutsi bafundze liBhayibheli futsi bazindle ngalo ‘konkhe kuphila kwabo,’ njengobe emakhosi aka-Israyeli atjelwa kutsi ente kanjalo.—Dut. 17:19.

3. Sitawucoca ngani kulesihloko?

³ Batali, ninelilungelo lelikhulu kakhulu umKhristu langahle abe nalo, lokulilungelo lekufundzisa bantfwana benu ngaJehova. Kodvwa anifuni nje kugcina ngekubafundzisa emaciniso ngaNkulunkulu wetfu. Nifuna nekubasita kutsi bamtsandze ngalokusuka enhlitiyweni. Yini longayenta kuze usite bantfwana bakho bamtsandze Jehova? Kulesihloko, sitawucoca ngetimiso letine letisekelwe eBhayibhelini letitawusita  batali. (2 Thim. 3:16) Sitawuphindze sibone kutsi kusebentisa seluleko lesiseBhayibhelini kubasite njani labanye batali labangemaKhristu.

4. Ngusiphi simiso lesingasita batali kutsi bafundzise bantfwana babo kutsandza Jehova? (Jakobe 1:5)

⁴ Simiso sekucala: Funa sicondziso saJehova. Cela Jehova akuphe kuhlakanipha lokudzingako kuze usite bantfwana bakho kutsi bamtsandze. (Fundza Jakobe 1:5.) Nguye kuphela longakunika seluleko lesihle. Tinyenti tizatfu letisenta sisho njalo. Nati letimbili tato. Sekucala, sekuphele iminyaka leminyenti Jehova angumtali. (Hla. 36:9) Sesibili, seluleko lasinika sona sihlale sisisita.—Isa. 48:17.

5. (a) Nguluphi lusito inhlangano yaJehova leluniketa batali? (b) Njengobe ubonile kule-video, yini loyifundzile endleleni uMzalwane naDzadze Amorim labakhulisa ngayo bantfwana babo?

⁵ Jehova usebentisa liVi lakhe nenhlangano yakhe kuze anike batali imfundvo lenyenti lesekelwe eBhayibhelini lengabasita kutsi bafundzise bantfwana babo ngaye, kuze bakhule bamtsandza. (Mat. 24:45) Sibonelo nje, ungatfola seluleko lesilusito etihlokweni letiluchungechunge letitsi: “Usizo Lomndeni,” letitfolakala ku-Phaphama! futsi nyalo setitfolakala naku-website yetfu. Ngetulu kwaloko, kunema-video lamanyenti latfolakala ku-jw.org, lafaka ekhatsi etincociswano, langasita batali kutsi basebentise seluleko saJehova njengobe bakhulisa bantfwana babo. *—Taga 2:4-6.

6. Lomunye umzalwane nemkakhe bativa njani ngesicondziso labasitfola enhlanganweni yaJehova?

⁶ Batali labanyenti babonga kakhulu ngelusito Jehova labanikete lona asebentisa inhlangano yakhe. Lomunye umzalwane lokutsiwa nguJoe utsi: “Akusiwo umdlalo kukhulisa bantfwana labatsatfu kutsi batsandze Jehova. Mine nemkami sihlale sithantaza kuJehova, simcele kutsi asisite. Etikhatsini letinyenti bekuvame kuphuma sihloko nobe i-video lebekusisita esimeni lesitsite lebesibhekene naso. Kusukela ekucaleni, besihlale sifuna sicondziso saJehova.” Joe nemkakhe babonile kutsi letihloko nalama-video kusite bantfwana babo basondzelana naJehova.

7. Kubaluleke ngani kutsi batali bente konkhe lokusemandleni abo kuze babe sibonelo lesihle? (KubaseRoma 2:21)

 ⁷ Simiso sesibili: Bani sibonelo lesihle. Bantfwana bayabanakisisa batali babo futsi bavame kwenta loko labakwentako. Kuliciniso kutsi bonkhe batali banesono. (Rom. 3:23) Nanobe kunjalo, batali kufanele bente konkhe labangakwenta kuze babe sibonelo lesihle kubantfwana babo. (Fundza KubaseRoma 2:21.) Akhuluma ngebantfwana, lomunye umzalwane watsi: “Bamunya konkhe, kuhle kwesipontji.” Wachubeka watsi: “Batasitjela nangabe loko lesikwentako kungahambisani naloko lesibafundzisa kona.” Kufanele simtsandze kakhulu Jehova futsi loko kubonakale, nangabe sifuna bantfwana betfu bamtsandze Jehova.

8-9. Yini loyifundzako kuloko lokushiwo ngu-Andrew na-Emma?

⁸ Tinyenti tindlela batali labangatisebentisa kuze bafundzise bantfwana babo kutsi batsandze Jehova. Naka naku lokwashiwo ngulomunye umzalwane loneminyaka lengu-17 lokutsiwa ngu-Andrew, utsi: “Batali bami bangifundzisa kutsi kubalulekile kuthantaza. Onkhe malanga ebusuku, babe bekathantaza nami, ngisho nobe sengitithantazele. Batali betfu bebahlale basitjela batsi: ‘Ungathantaza nobe kukangakhi kuJehova.’ Ngenca yaloko, umthantazo ubaluleke kakhulu kimi. Nyalo ngikutfola kumelula kuthantaza futsi ngiva shengatsi Jehova unguBabe longitsandzako.” Batali, nibohlale nikhumbula kutsi indlela lenimtsandza ngayo Jehova ingenta bantfwana benu kutsi nabo bamtsandze.

⁹ Cabanga nanganasi sibonelo sa-Emma. Ngesikhatsi babe wakhe abashiya, washiya make wakhe netikweleti letinyenti. Emma utsi: “Make bekavame kuba bete imali leyenele, kodvwa bekahlale akhuluma ngendlela Jehova latinakekela ngayo tikhonti takhe futsi atiphe loko letikudzingako. Indlela lebekaphila ngayo beyikhombisa kutsi ukukholelwa mbamba loko. Make bekakwenta loko lebekakufundzisa.” Yini lesiyifundzako? Batali bangaba sibonelo lesihle kubantfwana babo ngisho nobe babhekene netimo letimatima.—Gal. 6:9.

10. Ngumaphi ematfuba batali labanyenti labangema-Israyeli lebabenawo ekucoca nebantfwana babo? (Dutheronomi 6:6, 7)

¹⁰ Simiso sesitsatfu: Hlale ucoca nebantfwana bakho. Jehova watjela ema-Israyeli kutsi kufanele ahlale afundzisa bantfwana bawo ngaye. (Fundza Dutheronomi 6:6, 7.) Kusukela ekuseni lize liyoshona, batali labangema-Israyeli bebanematfuba lamanyenti ekucoca nebantfwana babo futsi babafundzise kutsi batsandze Jehova. Sibonelo nje, umfanyana longum-Israyeli bekangacitsa ema-awa lamanyenti asita babe wakhe ngekuhlanyela nobe ngekubutsa loko labakuvunile. Sisi wakhe bekangacitsa sikhatsi lesinyenti asita make wakhe ngekutfunga, ngekuluka nangaleminye imisebenti yasekhaya. Njengobe batali nebantfwana bebasebenta kanyekanye, bebangacoca ngetintfo letinyenti letibalulekile. Sibonelo nje, bebangacoca ngebuhle baJehova nangendlela labasita ngayo bangumndeni.

11. Nguliphi litfuba batali labangemaKhristu labanalo lekucoca nebantfwana babo?

¹¹ Tikhatsi setishintjile. Emaveni lamanyenti, batali abasakhoni kucitsa lilanga lonkhe nebantfwana babo. Kungenteka batali basuke basemsebentini, kantsi bantfwana basuke basesikolweni. Ngenca yaloko, batali kufanele bafune ematfuba ekucoca nebantfwana babo. (Ef. 5:15, 16; Fil. 1:10) Kukhonta kwemndeni kuyawavula ematfuba aloku. Lomunye umzalwane losemusha lokutsiwa ngu-Alexander  utsi: “Babe uhlale ahlela kutsi sibe nekukhonta kwemndeni futsi akavumeli lutfo lusivimbe kutsi sibe ndzawonye. Ngemuva kwekufundza, sibese siyacoca.”

12. Yini inhloko yemndeni lokufanele ihlale ikukhumbula ngekukhonta kwemndeni?

¹² Nangabe uyinhloko yemndeni, yini longayenta kuze bantfwana bakho bakujabulele kukhonta kwemndeni? Ungafundza nebantfwana bakho incwadzi lensha letsi Jabulela Kuphila Kuze Kube Phakadze! Lencwadzi yenta kube melula kutsi nicoce kamnandzi. Nangabe ufuna bantfwana bakho bakutjele indlela labativa ngayo nangaloko lokubakhatsatako, ungasebentisi sikhatsi sekukhonta kwemndeni kuze ubatsetsise nobe ubatjele lapho bangenti kahle khona. Ngetulu kwaloko, yetama kungatfukutseli nangabe bantfwana bakho basho tintfo letingavumelani netimiso teliBhayibheli. Kunaloko, bonga nabakutjela indlela labativa ngayo, futsi ubente bative bakhululekile kuchubeka bakwenta loku. Utawukhona kubasita kahle bantfwana bakho nangabe uyati indlela labativa ngayo.

13. Nguliphi lelinye litfuba batali labanalo lekusita bantfwana babo kutsi basondzelane naJehova?

¹³ Batali, funani ematfuba ekucitsa sikhatsi nebantfwana benu kuze nibasite basondzelane naJehova. Akukafaneli nimele sikhatsi sekudadisha liBhayibheli kuze nibafundzise ngaNkulunkulu wetfu lositsandzako. Lomunye dzadze lokutsiwa nguLisa utsi: “Besisebentisa konkhe lesikubonako kuze sifundzise bantfwana betfu ngaJehova. Sibonelo nje, inja yetfu nayenta lokutsite futsi ihlekise bantfwana betfu, besibatjela kutsi loku kukhombisa kutsi Jehova unguNkulunkulu lojabulako, futsi usenta sijabule.”

14. Kubaluleke ngani kutsi batali basite bantfwana babo bakhetse kahle bangani? (Taga 13:20)

¹⁴ Simiso sesine: Sita bantfwana bakho kutsi bakhetse bangani labakahle. LiVi laNkulunkulu lisitjela ngalokucacile kutsi bangani betfu bangasenta sibe bantfu labakahle nobe labakabi. (Fundza Taga 13:20.) Batali, niyabati yini bangani bebantfwana benu? Nikile yini nababona futsi nacitsa sikhatsi nabo? Yini leningayenta kuze nisite bantfwana benu babe bangani balabo labatsandza Jehova?  (1 Khor. 15:33) Ungabasita bantfwana bakho kutsi babe nebangani labakahle ngekutsi umeme labo labanebuhlobo lobuhle naJehova kutsi bacitse sikhatsi kanye nani.—Hla. 119:63.

15. Yini batali labangayenta kuze basite bantfwana babo babe nebangani labakahle?

¹⁵ Cabanga ngalokwentiwa ngulomunye umzalwane lokutsiwa nguTony. Achaza ngaloko yena nemkakhe labakwentile kuze basite bantfwana babo babe nebangani labakahle, utsi: “Kuyo yonkhe leminyaka, mine nemkami simeme bazalwane labehlukene, labanebudzala lobehlukene kutsi basivakashele ekhaya letfu. Sidla nabo futsi sente nabo kukhonta kwemndeni. Lena yindlela lekahle yekwati labo labatsandza Jehova futsi labamkhonta bajabulile. Sikujabulele kuba nebabonisi betigodzi, titfunywa telivangeli kanye nalabanye ekhaya letfu. Bantfwana betfu bafundze lokunyenti nabeva loko lokwenteke kubo, nababona kukhutsala kwabo kanye nemsebenti lomatima labawentela Jehova. Konkhe loku kubasitile bantfwana betfu kutsi basondzelane naJehova.” Batali, timiseleni kusita bantfwana benu kutsi batfole bangani labakahle.

16. Yini longayenta nangabe umntfwana wakho atsi akafuni kukhonta Jehova?

¹⁶ Kutsiwani nangabe lomunye webantfwana bakho akutjela kutsi akafuni kukhonta Jehova, ngisho nobe wente konkhe lokusemandleni akho kuze umsite? Ungacabangi kutsi usehluleki. Sonkhe Jehova usinike inkhululeko yekutikhetsela, lokufaka ekhatsi umntfwana wakho, lokulikhono lekutikhetsela kutsi sitamkhonta yini nobe cha. Nangabe umntfwana wakho akhetse kushiya Jehova, chubeka wetsemba kutsi ngalelinye lilanga utawubuya. Khumbula umfanekiso wendvodzana leyahamba ekhaya. (Luk. 15:11-19, 22-24) Lendvodzana yenta tintfo letinyenti letimbi, kodvwa ekugcineni yabuya ekhaya. Kepha labanye bangahle batsi: “Lena akusiyo indzaba sibili. Loku lokushiwo ngulomfanekiso kungenteka mbamba yini?” Kungenteka! Ecinisweni, nguloko lokwenteka kulelinye lijaha lokutsiwa ngu-Elie.

17. Kukukhutsata njani loko lokwenteka ku-Elie?

 ¹⁷ Akhuluma ngebatali bakhe, Elie utsi: “Benta konkhe lobekusemandleni abo kutsi bangifundzise kutsandza Jehova kanye neliVi lakhe liBhayibheli. Nobe kunjalo, nangiseminyakeni yekutfomba ngacala kuba lihlongandlebe.” Elie wacala kwenta tintfo letimbi ngasense, futsi batali bakhe betama kumsita kuze ahlale asondzelene naJehova kodvwa akazange abalalele. Ngemuva kwekuhamba ekhaya, wacala kutiphatsa kabi. Nobe kunjalo, bekahle acoca ngeliBhayibheli nalomunye umngani wakhe. Elie utsi: “Bekutsi nangimcocela ngaJehova, bese ngimcabanga kakhulu Jehova. Kancane kancane, inhlanyelo yeliciniso lebeyivaleleke enhlitiyweni yami—inhlanyelo batali bami lebebetame ngawo onkhe emandla abo kuyihlanyela—yacala kumila.” Ekugcineni, Elie wabuyela kuJehova. * Cabanga kutsi batali bakhe bajabula kangakanani ngekutsi bamfundzisa asesemncane kutsandza Jehova!—2 Thim. 3:14, 15.

18. Utiva njani ngebatali labasebenta kamatima kuze bafundzise bantfwana babo kutsi batsandze Jehova?

¹⁸ Batali, Jehova uniphe sipho lesihle kakhulu sekukhulisa situkulwane lesisha setikhonti takhe. (Hla. 78:4-6) Lona ngumsebenti lomatima, futsi sinibonga kakhulu ngako konkhe lenikwentako kuze nisite bantfwana benu! Nangabe nichubeka nenta konkhe leningakwenta kuze nisite bantfwana benu kutsi batsandze Jehova futsi nibafundzise kutsi bamlalele, ningaciniseka kutsi Babe wetfu wasezulwini lositsandzako utawujabula kakhulu.—Ef. 6:4.