1. Ngusiphi sincumo lesibalulekile bonkhe bantfu lokufanele basente?

 BANTFU lamuhla kufanele bente sincumo lesibalulekile. Batamsekela yini Jehova Nkulunkulu njengobe anelilungelo lekubusa indalo yonkhe, nobe batawusekela sitsa sakhe lesibi lesinguSathane Develi? Kute lotawuba semkhatsini. Sincumo labatasenta sitawuncuma kutsi bayakutfola yini kuphila lokuphakadze nobe cha. (Mat. 25:31-33, 46) Ngesikhatsi ‘sekuhlupheka lokukhulu,’ batawubekwa luphawu lwekusindza nobe lwekubhujiswa.—Semb. 7:14; 14:9-11; Hez. 9:4, 6.

2. (a) Umbhalo waKumaHebheru 10:35-39 usikhutsata kutsi senteni? (b) Incwadzi yeSembulo ingasisita njani?

² Fundza KumaHebheru 10:35-39. Nangabe ukhetse kusekela kubusa kwaJehova, wente sincumo lesihle. Nyalo utimisele kusita labanye kutsi nabo bente lesincumo lesihle. Kuze ukhone kukwenta loko, ungasebentisa loko lokushiwo yincwadzi yeSembulo kuze ubasite. Lencwadzi isitjela ngaloko lokutawenteka kulabo labamelene naJehova, kodvwa iphindze isitjele ngetibusiso letitawutfolwa ngulabo labasekela kubusa kwakhe ngekwetsembeka. Kufanele siwadadishe lamaciniso labalulekile. Kwenta njalo kutawenta kutsi sitimisele kakhulu kuchubeka sikhonta Jehova. Ngetulu kwaloko, singasebentisa loko lesikufundzile kuze sisite labanye kutsi nabo bente lesincumo lesihle futsi banamatsele kuso.

3. Sitawucoca ngani kulesihloko?

³ Kulesihloko, sitawucoca nganayi imibuto: Yini letawutfolwa ngulabo labasekela kubusa kwaNkulunkulu? Yini letawenteka kulabo labasekela lesilwane sesiganga lesibovu, lesichazwe encwadzini yeSembulo?

4. Nguliphi licembu umphostoli Johane lalibona linaJesu ezulwini?

⁴ Embonweni, umphostoli Johane wabona emacembu lamabili alabo labasekela kubusa kwaJehova futsi atfola tibusiso letihlala kuze kube phakadze. Licembu lekucala linebantfu labangu-144 000. (Semb. 7:4) Batsetfwe lamhlabeni kuze bakhe hulumende nobe uMbuso wasezulwini bakanye naJesu, futsi batawubusa naye umhlaba. (Semb. 5:9, 10; 14:3, 4) Kulombono, Johane ubabona beme naJesu eNtsabeni iSiyoni lesezulwini.—Semb. 14:1.

5. Yini letowenteka ngekushesha kulabo labasele lamhlabeni labayincenye yalabo labangu-144 000?

⁵ Kusukela ngesikhatsi semphostoli Johane kuze kube ngunyalo, tinkhulungwane tebantfu tikhetsiwe kutsi tibe yincenye yalo-144 000. (Luk. 12:32; Rom. 8:17) Kodvwa Johane watjelwa kutsi kutawube kusele labambalwa labatawube basaphila lamhlabeni ngemalanga ekugcina. Laba “labasele” batawutfola ‘luphawu’ lwekugcina lwekutsi Jehova uyabemukela nakucala kuhlupheka lokukhulu. (Semb. 7:2, 3; 12:17) Ngekuhlupheka lokukhulu, laba labasele labalamhlabeni batawutsatfwa baye ezulwini kuze babe nalaba labayincenye yalo-144 000, labafa betsembekile. Batawubusa naJesu eMbusweni waNkulunkulu.—Mat. 24:31; Semb. 5:9, 10.

6-7. (a) Ngumaphi emacembu labonwa nguJohane, futsi yini lesiyifundzako ngawo? (b) Yini lengenta labagcotjiwe labaselamhlabeni kanye nemalunga ‘esicumbi lesikhulu’ kutsi babe nendzaba naloko lokushiwo Sembulo sehluko 7?

⁶ Ngemuva kwekubona lelicembu lalabo labayophila ezulwini, Johane wabona “sicumbi lesikhulu.” Ngalokungafani nalabo labangu-144 000, kute umuntfu lowakhona kusibala lesicumbi. (Semb. 7:9, 10) Yini lesiyifundzako ngaso? Naku Johane latjelwa kona: “Laba ngulabaphume ekuhluphekeni lokukhulu, labahlante tingubo tabo batenta taba mhlophe engatini yeliWundlu.” (Semb. 7:14) Ngemuva kwekusindza ekuhluphekeni lokukhulu, ‘lesicumbi lesikhulu’ sitawuphila lamhlabeni futsi sijabulele tibusiso letinhle.—Hla. 37:9-11, 27-29; Taga 2:21, 22; Semb. 7:16, 17.

⁷ Siyatibona yini kuloku lokushiwo Sembulo sehluko 7 ngisho sinelitsemba lekuphila ezulwini nobe emhlabeni? Kufanele sitibone. Leso kuyobe kusikhatsi lesijabulisa mbamba etincekwini taNkulunkulu letingemalunga alamacembu lamabili! Sitawujabula kakhulu ngekutsi sikhetse kusekela kubusa kwaJehova. Yini lenye incwadzi yeSembulo lesitjela kona mayelana nekuhlupheka lokukhulu?—Mat. 24:21.

8. Kutawucala njani kuhlupheka lokukhulu, futsi kutawubatsintsa njani bantfu labanyenti?

⁸ Njengobe sifundzile esihlokweni lesendlulile, tepolitiki titawujikela iBhabhulona Lenkhulu, lokungumbuso wemhlaba wenkholo yemanga. (Semb. 17:16, 17) Loko kutawusho kucala kwekuhlupheka lokukhulu. Loko kusho kutsi bantfu labanyenti batawucala kukhonta Jehova yini? Cha. Kunaloko, Sembulo sehluko 6 sisitjela kutsi ngaleso sikhatsi lesitawube simatima, bantfu labangamkhonti Jehova batawufuna sivikelo kutepolitiki nakutekutsengiselana takulelive, letifananiswa netintsaba. Njengobe batawube bangawusekeli uMbuso waNkulunkulu, Jehova utabatsatsa ngekutsi bamelene naye.—Luk. 11:23; Semb. 6:15-17.

9. Bantfu baJehova batawehluka njani ngesikhatsi sekuhlupheka lokukhulu, futsi utawuba yini umphumela?

⁹ Bantfu baJehova labetsembekile ngibo bodvwa labatawehluka ngaleso sikhatsi lesitawube  simatima. Ngibo bodvwa emhlabeni labatawube bakhonta Jehova Nkulunkulu futsi labangeke basisekele ‘lesilwane sesiganga.’ (Semb. 13:14-17) Kuma kwabo bacinile kutawutfukutselisa labo labamelene naJehova. Ngenca yaloko, licembu letive litawuhlasela bantfu baNkulunkulu emhlabeni wonkhe. LiBhayibheli libita lokuhlasela ngekutsi kuhlasela kwaGogi wakaMagogi.—Hez. 38:14-16.

10. Njengobe kuchazwe kuSembulo 19:19-21, yini Jehova latawuyenta nakuhlaselwa bantfu bakhe?

¹⁰ Yini Jehova latayenta nakuhlaselwa bantfu bakhe? Utsi: “Intfukutselo yami lenkhulu itawuphakama.” (Hez. 38:18, 21-23) Sembulo sehluko 19 sisichazela loko lokutawubese kuyenteka. Jehova utawutfumela iNdvodzana yakhe kutsi ivikele bantfu bakhe futsi incobe titsa takhe. “Emabutfo asezulwini” atawuhlanganyela naJesu kulokuhlasela, lokutingilosi letetsembekile kanye nalabo labangu-144 000. (Semb. 17:14; 19:11-15) Utawuba yini umphumela walemphi? Bonkhe bantfu kanye netinhlangano letimelene naJehova kutawubhujiswa!—Fundza Sembulo 19:19-21.

11. Nguyiphi intfo letawenteka lebaluleke kakhulu encwadzini yeSembulo?

¹¹ Asewucabange nje kutsi batawutiva njani labetsembekile labatawube balamhlabeni labatawusindza nakubhujiswa titsa taNkulunkulu! Leso kuyobe kusikhatsi senjabulo lenkhulu! Kuliciniso kutsi kutawuba nemsindvo wenjabulo ezulwini ngemuva kwekubhujiswa kweBhabhulona Lenkhulu, kodvwa kunalokunye lokutawenta kutsi kube nekuhalalisa lokukhulu. (Semb. 19:1-3) Indzaba ‘yemshado weliWundlu’ ngiyo lebaluleke kakhulu encwadzini yeSembulo.—Semb. 19:6-9.

12. Njengobe kusho Sembulo 21:1, 2, utawuba nini umshado weliWundlu?

¹² Utawuba nini lomshado? Bonkhe labangu-144 000 batawube basezulwini ngaphambi nje kwekutsi kucale imphi ye-Amagedoni. Nobe kunjalo, leso kutawube kungasiso sikhatsi sekutsi kube ngumshado weliWundlu. (Fundza Sembulo 21:1, 2.) Umshado weliWundlu utawuba ngemuva kwemphi ye-Amagedoni futsi tonkhe titsa taNkulunkulu setibhujisiwe.—Hla. 45:3, 4, 13-17.

13. Usho kutsini umshado weliWundlu kulabo labatawuba nencenye kuwo?

¹³ Usho kutsini umshado weliWundlu kulabo labatawuba nencenye kuwo? Njengobe nje umshado uhlanganisa indvodza nemfati ndzawonye, lomshado longumfanekiso utawuhlanganisa Jesu Khristu loyiNkhosi kanye ‘namakoti’ wakhe, lokungulabo labangu-144 000. Loku lokubalulekile lokutawenteka kutawusho kubekwa kwembuso lomusha lotawubusa umhlaba iminyaka lengu-1 000.—Semb. 20:6.

14-15. Umbhalo weSembulo sehluko 21 ubafananisa nani labangu-144 000? (Buka sitfombe lesisekhasini lekucala.)

¹⁴ Ngemuva kwaloko, Sembulo sehluko 21 sifananisa labangu-144 000 nelidolobha lelihle kakhulu lokutsiwa ‘yiJerusalema Lensha.’ (Semb. 21:2, 9) Lelidolobha lisekelwe etikwematje langu-12 lasisekelo lokubhalwe kuwo “emabito langu-12 ebaphostoli beliWundlu labangu-12.” Yini leyenta Johane abe nendzaba naloku? Kungobe ubone ligama lakhe libhaliwe kulamatje. Lelo bekulilungelo lelikhulu kakhulu!—Semb. 21:10-14; Ef. 2:20.

¹⁵ Kute lidolobha lelifana nalelidolobha lelingumfanekiso. Linemgwaco lomkhulu weligolide, nemagede langu-12 emapharele,  lubondza lwalo netisekelo talo kuhlotjiswe ngematje laligugu, futsi likalwe kahle. (Semb. 21:15-21) Nobe kunjalo, kukhona lebekushoda. Naku Johane lakusho: “Kute lithempeli lengalibona kulelidolobha, ngobe Jehova Nkulunkulu Somandla kanye neliWundlu balithempeli lalo. Lelidolobha alilidzingi lilanga nobe inyeti kutsi kulikhanyisele, ngobe inkhatimulo yaNkulunkulu ilikhanyisele, nesibane salo liWundlu.” (Semb. 21:22, 23) Labo labakha iJerusalema Lensha batawuba naJehova. (Heb. 7:27; Semb. 22:3, 4) Ngako, Jehova naJesu balithempeli lalelidolobha.

16. Kutawentekani kubantfu ngesikhatsi Seminyaka Leyinkhulungwane Yekubusa kweMbuso waNkulunkulu?

¹⁶ Kuyabajabulisa labagcotjiwe kucabanga ngalelidolobha. Kodvwa nalabo labanelitsemba lekuphila emhlabeni nabo banendzaba nalo. Ngesikhatsi Seminyaka Leyinkhulungwane Yekubusa kweMbuso waNkulunkulu, iJerusalema Lensha itawuletsa tibusiso letinyenti. Johane wabona letibusiso tigeleta ‘njengemfula wemanti ekuphila.’ Ngala nangala kwalomfula “bekunetihlahla tekuphila” letinamacembe ‘ekuphilisa tive.’ (Semb. 22:1, 2) Bonkhe bantfu labatawube baphila lapho batawutitfola letintfo letinhle. Kancane kancane, bonkhe bantfu labalalelako batawuba bete sono. Kutawube sekute kugula, buhlungu kanye nekukhala.—Semb. 21:3-5.

17. Njengobe kusho Sembulo 20:11-13, bobani labatawuzuza ngesikhatsi Sekubusa Kweminyaka Leyinkhulungwane?

¹⁷ Bobani labatawutfola letibusiso letinhle? Bekucala nje, sicumbi lesikhulu lesitawusindza nge-Amagedoni kanye nebantfwana lokungenteka batalwe emhlabeni lomusha. Kodvwa Sembulo sehluko 20 siphindze setsembise kutsi labafile batawuvuswa. (Fundza Sembulo 20:11-13.) Kutawuvuka “labalungile” labafa betsembekile esikhatsini lesendlulile, kanye “nalabangakalungi” labangazange balitfole litfuba lekufundza ngaJehova. (Imis. 24:15; Joh. 5:28, 29) Loko kusho kutsi bonkhe bantfu batawuvuswa yini ekufeni ngesikhatsi Sekubusa Kweminyaka Leyinkhulungwane? Cha. Labo labala kukhonta Jehova ngaphambi kwekutsi bafe angeke bavuswe. Balitfola litfuba kodvwa bakhombisa kutsi abakufaneli kuphila emhlabeni loliPharadisi.—Mat. 25:46; 2 Thes. 1:9; Semb. 17:8; 20:15.

18. Kutawube kunjani lamhlabeni ekupheleni kweminyaka lengu-1 000?

¹⁸ Ekupheleni kweminyaka lengu-1 000, bonkhe bantfu labatawube bahlala emhlabeni batawube sebete sono. Kutawube sekute lotawuhlushwa sono lesasitfola ku-Adamu. (Rom. 5:12) Sicalekiso sesono sa-Adamu sitawube sesisusiwe. Loko kusho kutsi labo labatawube balamhlabeni ‘batawuphila,’ ngobe batawube sebete sono ekupheleni kweminyaka lengu-1 000.—Semb. 20:5.

19. Yini leyenta kudzingeke kutsi kube neluvivinyo lwekugcina?

¹⁹ Siyati kutsi Jesu wakhona kumelana naSathane ngesikhatsi etama kumenta kutsi ephule bucotfo bakhe. Wahlale etsembekile ngisho avivinywa. Kodvwa bonkhe bantfu labete sono batawukhona yini kuhlale betsembekile kuJehova ngisho Sathane abavivinya? Nguloyo naloyo utatiphendvulela lombuto ngemuva kwekutsi Sathane sekakhululiwe kulomgodzi longenamkhawulo ekupheleni kweminyaka lengu-1 000. (Semb. 20:7) Labo labatawuhlala betsembekile nabavivinywa batawutfola kuphila lokuphakadze, futsi ekugcineni batawutfola inkhululeko sibili. (Rom. 8:21) Labo labatawuvukela, batawubhujiswa ngalokuphelele bakanye naDeveli nemadimoni akhe.—Semb. 20:8-10.

20. Utiva njani ngaletiphrofetho letijabulisako letitfolakala encwadzi yeSembulo?

²⁰ Utiva njani ngaloko lesesikufundzile encwadzini yeSembulo? Akukujabulisi yini kubona kutsi nawe unencenye kuletiphrofetho? Akukwenti yini ufune kucela labanye kutsi bahlanganyele natsi ekukhonteni Nkulunkulu wetfu ngendlela lehlantekile? (Semb. 22:17) Njengobe sesicoce ngaletintfo letitawenteka esikhatsini lesitako, sijabulile futsi sisho emavi lafanako nalawo lashiwo ngumphostoli Johane nakatsi: “Amen! Wota Nkhosi Jesu.”—Semb. 22:20.