1. Yini Jehova lafuna kutsi labo labamkhontako bayente? (Buka nesitfombe.)

 SINGAYA kubani nasidzinga kudvudvutwa nekucondziswa? Siyayati imphendvulo yalombuto. Singaya kuJehova Nkulunkulu ngemthantazo. Nguloko Jehova lafuna kutsi sikwente. Ufuna kutsi ‘sihlale sithantaza.’ (1 Thes. 5:17) Singakhululeka sithantaze kuye futsi simcele asicondzise kuko konkhe kuphila kwetfu. (Taga 3:5, 6) Njengobe Nkulunkulu anesandla lesivulekile, akasibaleli kutsi singathantaza kangakhi kuye.

2. Yini lesitawucoca ngayo kulesihloko?

² Siligugu kitsi sipho lesingumthantazo. Kodvwa njengobe sinetintfo letinyenti lokufanele sitente, kungahle kube matima kutfola sikhatsi sekuthantaza. Singahle sibone ngatsi kufanele sitfutfukise indlela lesithantaza ngayo. Siyabonga ngekutsi imiBhalo isikhutsata kakhulu futsi iyasicondzisa. Kulesihloko sitawucoca ngekutsi yini lesingayenta kuze sibekele eceleni sikhatsi sekuthantaza, loku sitakwenta ngekubuka sibonelo saJesu. Sitawuphindze sicoce ngetintfo letibalulekile letisihlanu lesingatisho kuze sitfutfukise imithantazo yetfu.

3. Yini Jesu lebekayati ngemthantazo?

³ Jesu bekati kutsi imithantazo yetfu ibaluleke kakhulu kuJehova. Kusasele sikhatsi lesidze ngaphambi kwekutsi ete emhlabeni, wambona Babe wakhe aphendvula imithantazo  yemadvodza nebafati labetsembekile. Sibonelo nje, Jesu bekaseceleni kwaBabe wakhe ngesikhatsi Jehova aphendvula imithantazo lesuka enhlitiyweni yaHana, yaDavide ya-Elija neyaletinye tikhonti takhe letetsembekile. (1 Sam. 1:10, 11, 20; 1 Khos. 19:4-6; Hla. 32:5) Kungako Jesu afundzisa bafundzi bakhe kutsi bahlale bathantaza futsi loko bakwente ngekuciniseka!​—Mat. 7:7-11.

4. Yini lesiyifundza emithantazweni yaJesu?

⁴ Jesu wabekela bafundzi bakhe sibonelo labangasilingisa asebentisa imithantazo yakhe. Kuso sonkhe lesikhatsi enta umsebenti wakhe wekushumayela, Jesu bekathantaza tikhatsi letinyenti. Bekabekela eceleni sikhatsi sekuthantaza ngobe bekahlale amatasatasa futsi bekavame kuba nebantfu labanyenti. (Mak. 6:31, 45, 46) Bekavuka ekuseni kakhulu kuze athantaze ayedvwana. (Mak. 1:35) Ngalelinye lilanga, wathantaza busuku bonkhe ngaphambi kwekwenta sincumo lesibalulekile. (Luk. 6:12, 13) Ngetulu kwaloko, Jesu wathantaza ngalokuphindzaphindziwe ngebusuku lebebungaphambi kwekufa kwakhe njengobe bekanake kakhulu kucedzisa incenye lematima yesabelo sakhe salamhlabeni.​—Mat. 26:39, 42, 44.

5. Singamlingisa njani Jesu nasithantaza?

⁵ Sibonelo saJesu sisifundzisa kutsi kufanele sibekele eceleni sikhatsi sekuthantaza ngisho nobe simatasatasa kangakanani. NjengaJesu, kufanele sisibekele eceleni sikhatsi sekuthantaza. Loko kungasho kusheshe sivuke nobe kuphutaphuta kulala. Nasenta njalo, sikhombisa Jehova kutsi siyabonga ngalesipho lesiligugu. Lomunye dzadze lokutsiwa nguLynne ukhumbula indlela latsintseka ngayo enhlitiyweni ngesikhatsi afundza kwekucala ngalesipho lesiligugu. Utsi: “Ngesikhatsi ngifundza kutsi ngingakhuluma naJehova nganobe ngusiphi sikhatsi, loko kwangisita ngamtsatsa njengemngani wami lomkhulu futsi ngafuna kutfutfukisa imithantazo yami.” Siyaciniseka kutsi linyenti letfu litiva ngendlela lefanako. Ngako nyalo asesicoce ngetintfo letisihlanu letibalulekile lesingatisho emithantazweni yetfu.

6. Ngekusho kweSembulo 4:10, 11, yini Jehova lokufanele anikwe yona?

⁶ Dvumisa Jehova. Embonweni lomangalisako, umphostoli Johane wabona labadzala  labangu-24 ezulwini bakhonta Jehova. Bebadvumisa Nkulunkulu futsi bebatsi ukufanele kwemukela “inkhatimulo, ludvumo nemandla.” (Fundza Sembulo 4:10, 11.) Tingilosi letetsembekile nato tinetizatfu letinyenti kakhulu tekunika Jehova inkhatimulo neludvumo. Tisezulwini kanye naye futsi setimati kahle kakhulu. Tiyabubona buntfu bakhe kuloko lakwentako. Njengobe tibona Jehova enta tintfo, loko kwenta kutsi timdvumise.​—Jobe 38:4-7.

7. Ngutiphi tizatfu lesinato tekudvumisa Jehova?

⁷ Natsi sifuna kudvumisa Jehova emithantazweni yetfu ngekutsi sisho loko lesikutsandzako ngaye netintfo letisijabulisako ngaye. Njengobe ufundza liBhayibheli futsi ulidadisha, yetama kubuka kutsi ngubuphi buntfu baJehova lobutsandza kakhulu. (Jobe 37:23; Rom. 11:33) Mtjele kutsi utiva njani ngalobuntfu bakhe. Singaphindze simdvumise Jehova ngenca yekutsi uyasisita futsi uphindze asite bazalwane betfu emhlabeni wonkhe. Uhlale asinakekela futsi asivikela.​—1 Sam. 1:27; 2:1, 2.

8. Ngutiphi letinye tizatfu tekubonga Jehova? (1 KubaseThesalonika 5:18)

⁸ Bonga Jehova. Sinetizatfu letinyenti tekubonga Jehova emithantazweni yetfu. (Fundza 1 KubaseThesalonika 5:18.) Singambonga Jehova nganobe ngabe ngutiphi tintfo letinhle lesinato, kwatise kutsi tonkhe tipho letinhle tivela kuye. (Jak. 1:17) Sibonelo nje, singabonga kuJehova ngemhlaba lomuhle nangendalo lemangalisako. Singaphindze simbonge ngenca yetimphilo tetfu, imindeni yetfu, bangani lesinabo nangelitsemba lesinalo. Singambonga futsi Jehova ngekusivumela kutsi sibe bangani bakhe.

9. Ngusiphi sizatfu lesenta kudzingeke kutsi sichubeke sibonga Jehova?

⁹ Kungahle kudzingeke sitinikete sikhatsi sekucabanga ngetizatfu tekubonga Jehova. Bantfu labanyenti lamuhla ababongi. Bavame kunaka loko labakufunako kunaloko labangakwenta kuze bakhombise kutsi bayabonga ngalabanako. Nangabe natsi besingabalingisa, imithantazo yetfu beyingagcwala ticelo. Kuze loko kungenteki, kufanele sichubeke sikhombisa kutsi siyabonga ngako konkhe Jehova lasentela kona.​—Luk. 6:45.

10. Kubonga kwamsita njani lomunye dzadze kutsi acinisele? (Buka nesitfombe.)

¹⁰ Kuba bantfu lababongako kungasisita kutsi sibeketelele timo letimatima. Cabanga ngendzaba yaKyung-sook, letfolaka ku-Sicongosekulindza saJanuary 15, 2015. Watjelwa kutsi unamdlavuza weliphaphu. Utsi: “Lendzaba yangikhatsata kakhulu. Ngeva shengatsi ngilahlekelwe ngiko konkhe lenginako futsi bengesaba kakhulu.” Yini leyamsita kutsi abeketelele lesimo? Kyung-sook utsi onkhe malanga ngaphambi kwekutsi alale, wenyukela eluphahleni lwendlu yabo futsi athantaze ngelivi lelivakalako abonge ngetintfo letisihlanu letimjabulisile ngalelolanga. Ngemuva  kwaloko ubese uyadvudvuteka futsi avete indlela lamtsandza ngayo Jehova. Ubonile kutsi Jehova uyatisekela tikhonti takhe letetsembekile etikhatsini letimatima nekutsi tinyenti kakhulu tibusiso lesititfolako ekuphileni naticatsaniswa nekuvivinywa lesibhekana nako. NjengaKyung-sook, natsi sinetizatfu letinyenti tekubonga Jehova ngisho nobe sibhekene netimo letimatima. Kubonga emithantazweni yetfu kungasisita kutsi sicinisele futsi sihlale sijabulile.

11. Yini leyenta bafundzi baJesu badzinga sibindzi ngemuva kwekutsi sekabuyele ezulwini?

¹¹ Cela Jehova kutsi akuphe sibindzi nawushumayela. Ngaphambi nje kwekutsi Jesu abuyele ezulwini, wakhumbuta bafundzi bakhe ngemsebenti bekabanikete wona wekufakaza ngaye “eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:8; Luk. 24:46-48) Ngekushesha ngemuva kwaloko, baholi bemaJuda babopha umphostoli Phetro nemphostoli Johane futsi babamikisa eNkantolo Lephakeme YemaJuda. Lamadvodza letsembekile atjelwa kutsi ayekele kushumayela, aze asongelwa. (Imis. 4:18, 21) Benta njani boPhetro naJohane?

12. Ngekusho kweMisebenti 4:29, 31, yini bafundzi labayenta?

¹² Njengobe Phetro naJohane bebasongelwa baholi benkholo yemaJuda, baphendvula batsi: “Kutawubona nine kutsi kulungile yini emehlweni aNkulunkulu kutsi silalele nine kunekutsi silalele Yena. Kodvwa tsine ngeke siyekele kukhuluma ngetintfo lesitibonile nalesitivile.” (Imis. 4:19, 20) Ngesikhatsi boPhetro naJohane sebakhululiwe, bathantaza kuJehova mayelana nekwenta intsandvo yakhe. Batsi: ‘Yenta tinceku takho tichubeke tikhuluma livi lakho ngesibindzi.’ Jehova wawuphendvula lomthantazo wabo losuka enhlitiyweni.​—Fundza Imisebenti 4:29, 31.

13. Yini lesingayifundza esibonelweni saJin-hyuk?

¹³ Singabalingisa labafundzi ngekutsi sichubeke nemsebenti wekushumayela ngisho nobe tiphatsimandla titsi asiwuyekele. Cabanga ngesibonelo semzalwane Jin-hyuk lowavalelwa ejele ngenca yekungalutsatsi luhlangotsi. Ngesikhatsi asejele, wanikwa umsebenti wekunakekela letinye tiboshwa lebetivalelwe todvwa esitokisini, kodvwa bekangakavumeleki kukhuluma nato ngetindzaba letingakaphatselani nalomsebenti bekanikwe wona, lokufaka ekhatsi kukhuluma ngeliBhayibheli. Wathantaza kuJehova acela sibindzi nekuhlakanipha kuze ashumayele nakatfola litfuba. (Imis. 5:29) Utsi: “Jehova wayiphendvula imithantazo yami ngekutsi anginike sibindzi nekuhlakanipha futsi ngacalisa tifundvo teliBhayibheli letinyenti letitsatsa imizuzu lesihlanu emnyango wetitokisi. Ebusuku bengibhala tincwadzi lengitawutinika tiboshwa ngakusasa.” Natsi singaciniseka kutsi Jehova utasisita siwente umsebenti wekushumayela. NjengaJin-hyuk, singathantaza sicele sibindzi nekuhlakanipha.

14. Yini lengasisita kutsi sibhekane netinkinga tetfu? (Tihlabelelo 37:3, 5)

¹⁴ Cela Jehova akusite ukhone kubeketelela tinkinga. Linyenti letfu liyagula nobe licindzetelekile emoyeni, sishonelwa bantfu lesibatsandzako, sinetinkinga temindeni, siphatfwa kabi naletinye nje tinkinga. Tifo letihlasela umhlaba wonkhe kanye netimphi tenta linyenti laletinkinga kube matima kakhulu kubhekana nato. Tfulula sifuba sakho kuJehova, mtjele ngalesimo ngendlela longatjela ngayo umngani wakho lomkhulu. Ciniseka kutsi Jehova “utakusita.”​—Fundza Tihlabelelo 37:3, 5.

15. Umthantazo ungasisita njani kutsi ‘sicinisele nasihlushwa’? Shano sibonelo.

 ¹⁵ Kuphikelela emthantazweni kutasisita kutsi ‘sicinisele nasihlushwa.’ (Rom. 12:12) Jehova uyakwati loko bantfu bakhe lababhekene nako, “uyabeva nabakhalela lusito.” (Hla. 145:18, 19) Lelinye lihlahlandlela lokutsiwa nguKristie lelineminyaka lengu-29 lakubona kuba liciniso kwaloko. Kungakalindzeleki, watfola kutsi unesifo lesimatima. Ngenca yaloko, waphatfwa sifo sekucindzeteleka. Ngekuhamba kwesikhatsi, weva kutsi make wakhe utfolakele kutsi unesifo lesingelapheki. Kristie utsi: “Ngathantaza kuJehova ngalokusuka enhlitiyweni, ngimcela kutsi angiphe emandla ekubeketelela lilanga ngalinye. Ngetama kunamatsela eluhlelweni lwami lwekukhonta Nkulunkulu ngekutsi ngibe khona emihlanganweni ngiphindze ngitidadishele liBhayibheli.” Uchubeka utsi: “Kuthantaza kwangisita ngakhona kubeketelela letikhatsi letimatima. Bengati kutsi Jehova unami, futsi kucabanga ngaloko kwangisita ngativa ngincono kakhulu. Nanobe kugula kwami kungazange kusheshe kuphele, kodvwa Jehova wayiphendvula imithantazo yami ngekutsi angisite ngibe nekuthula ngiphindze ngehlise umoya.” Shengatsi singete sakhohlwa kutsi “Jehova uyakwati kubakhulula ekulingweni bantfu labatinikele kuye.”​—2 Phet. 2:9.

16. Yini leyenta sidzinge kusitwa nguJehova kuze silwisane nesilingo?

¹⁶ Cela Jehova akusite ulwisane netilingo. Njengobe sinesono, sihlale silwisana nesilingo sekwenta lokubi. Sathane wenta konkhe langakwenta kuze asishubisele. Lenye indlela lakwenta ngayo loko kwetama kungcolisa tingcondvo tetfu asebentisa kwekutijabulisa lokungcolile. Kutijabulisa lokunjalo kungagcwalisa tingcondvo tetfu ngemicabango lengcolile futsi lemicabango ingangcolisa umuntfu lesinguye ngekhatsi, futsi ingenta kutsi sente sono lesikhulu.​—Mak. 7:21-23; Jak. 1:14, 15.

17. Ngemuva kwekucela Jehova asisite sigweme tilingo, yini lokufanele siyente? (Buka nesitfombe.)

 ¹⁷ Siyakudzinga kusitwa nguJehova nangabe sifuna kuncoba silingo sekwenta lokubi. Naku Jesu lakusho emthantazweni losibonelo: “Ungasingenisi ekulingweni, kodvwa usikhulule kulomubi.” (Mat. 6:13) Jehova uyafuna kusisita, kodvwa kufanele simcele kutsi asisite. Kufanele sente ngekuvumelana nemithantazo yetfu. Kufanele sente konkhe lokusemandleni etfu kuze sigweme kuba sesimeni lesingenta sibe nemicabango lemibi nobe sitfole imibono leyemukelekako kulelive laSathane. (Hla. 97:10) Singagcwalisa tingcondvo tetfu ngemicabango lehlantekile ngekutsi sifundze liBhayibheli futsi silidadishe. Kuba khona emihlanganweni kanye nekuba khona emsebentini wekushumayela nako kutasisita kutsi silondvolote tingcondvo tetfu. Nasesente loko, Jehova wetsembisa kutsi angeke aze asivumele silingwe ngetulu kwaloko lesingakhona kukwetfwala.​—1 Khor. 10:12, 13.

18. Yini sonkhe lokufanele siyente?

¹⁸ Ngamunye wetfu kufanele athantaze kakhulu kunakucala, acele kuhlale etsembekile kuJehova kulamalanga ekugcina lamatima. Tibekele sikhatsi sekuthantaza ngalokusuka enhlitiyweni onkhe malanga. Jehova ufuna sithantaze kuye ‘simtjele konkhe lokusetinhlitiyweni tetfu.’ (Hla. 62:8) Dvumisa Jehova futsi umbonge ngako konkhe lakwentako. Mcele akusite kutsi ube nesibindzi nawushumayela. Mncenge akusite ukhone kubhekana nanobe nguyiphi inkinga futsi ukhone kulwisana nesilingo lokungenteka ubhekane naso. Ungavumeli lutfo futsi ungavumeli muntfu kutsi akuyekelise kuthantaza kuJehova njalo. Kodvwa Jehova uyiphendvula njani imithantazo yetfu? Sitawucoca ngalombuto esihlokweni lesilandzelako.