1. LiBhayibheli liluchaza njani lutsandvo sibili?

 “LUTSANDVO loluvutsako lunjengemalangabi emlilo, yebo lilangabi laJehova. Emagagasi angeke alucishe lutsandvo, ngisho nemifula angeke ilukhukhule.” b (Ngo. 8:6, 7) Lamavi aluchaza kahle lutsandvo sibili! Acinisekisa indvodza nemfati kutsi bangaba nalo lutsandvo lolungapheli.

2. Yini labashadene labangayenta kuze lutsandvo lwabo lungapheli?

² Kutawuya ngalabashadene kutsi batawuba nalo yini lutsandvo lolungapheli. Ase sibekise: Umlilo ungachubeka uvutsa kuphela nangabe ukhwetelwa. Kodvwa nangabe unganakwa, lomlilo utawucisha. Ngendlela lefanako, lutsandvo lolukhona emkhatsini wendvodza nemfati lungahlala lucinile kuphela nangabe bacinisa budlelwane babo. Ngaletinye tikhatsi labashadene bangahle beve shengatsi lutsandvo lwabo luyancipha, ikakhulukati nangabe banetinkinga tetimali, tinkinga temphilo, nobe bacindzetelekile ngenca yekukhulisa bantfwana. Ngako nangabe ushadile, yini longayenta kuze ugcine “lilangabi laJehova” livutsa emshadweni wakho? Kulesihloko, sitawucoca ngetintfo letintsatfu letinganisita kuze budlelwane benu buhlale bucinile futsi niwujabulele umshado wenu. c

3. Kuba nebuhlobo lobuhle naJehova kungabasita njani labashadene kutsi bachubeke batsandzana? (Umshumayeli 4:12) (Buka nesitfombe.)

³ Kuze bagcine “lilangabi laJehova” livutsa, indvodza nemfati kufanele bente lokusemandleni kuze babe nebuhlobo lobucinile naJehova. Loko kungawucinisa njani umshado wabo? Nangabe labashadene batsatsa buhlobo babo naJehova njengalobubalulekile, batakulungela kusebentisa seluleko sakhe, lokutabasita kutsi bagweme tinkinga letingenta kutsi lutsandvo lwabo lunciphe baphindze batincobe. (Fundza Umshumayeli 4:12.) Labo labanebuhlobo lobuhle naJehova betama kumlingisa futsi betama kuveta buntfu bakhe lobunjengemusa, kubeketela nekucolela. (Ef. 4:32–5:1) Nangabe labashadene bakhombisa lobuntfu, kuba melula kutsi lutsandvo lwabo lukhule. Lomunye dzadze lokutsiwa nguLena, lesekuphele iminyaka lengetulu kwalengu-25 ashadile, utsi: “Kumelula kutsandza umuntfu lonebuhlobo lobuhle naNkulunkulu futsi umhloniphe.”

4. Yini leyenta Jehova wakhetsa Josefa naMariya kutsi babe batali baloyo bekatawuba nguMesiya?

⁴ Cabanga nganasi sibonelo lesiseBhayibhelini. Ngesikhatsi Jehova akhetsa labatawuba batali baloyo bekatawuba nguMesiya, wakhetsa Josefa naMariya emkhatsini wesitukulwane lesikhulu saDavide. Leni? Nguloyo naloyo bekanebuhlobo lobuhle naJehova, futsi Jehova bekati kutsi bebatamenta ete kucala emshadweni wabo. Nine lenishadile, yini leningayifundza kuJosefa nakuMariya?

5. Yini emadvodza langayifundza kuJosefa?

⁵ Josefa bekasisebentisa ngekushesha sicondziso saJehova, futsi loko kwamenta waba yindvodza lekahle. Watfola sicondziso lesivela kuNkulunkulu cishe tikhatsi letintsatfu lesimayelana nemndeni wakhe. Sikhatsi ngasinye, bekasilalela ngekushesha ngisho nobe kwenta njalo bekusho kwenta lushintjo lolukhulu. (Mat. 1:20, 24; 2:13-15, 19-21) Ngekulalela sicondziso saNkulunkulu, Josefa wavikela Mariya, wamsekela futsi wamnakekela. Kusenekwenteka loko lokwentiwa nguJosefa kwenta Mariya wamtsandza kakhulu futsi wamhlonipha kakhulu! Nine madvodza, ningamlingisa Josefa ngekutsi nifune seluleko lesiseBhayibhelini sekunakekela imindeni yenu. d Nangabe nisisebentisa leseluleko ngisho nobe loko kusho kwenta lushintjo, nikhombisa kutsi niyabatsandza bafati benu futsi nicinisa imishado yenu. Lomunye dzadze waseVanuatu, lesekuphele iminyaka lengetulu kwalengu-20 ashadile utsi: “Nangabe indvodza yami ifuna sicondziso saJehova futsi isisebentisa, ngiyihlonipha kakhulu. Ngitiva ngivikelekile futsi ngiyatetsemba tincumo tayo.”

6. Yini bafati labangayifundza kuMariya?

 ⁶ Mariya bekanebuhlobo lobuhle naJehova; bekangaketsembeli kuJosefa kuze agcine kukholwa kwakhe kucinile. Bekayati kahle imiBhalo. e Bekacabangisisa ngaloko lakufundzile. (Luk. 2:19, 51) Siyaciniseka kutsi buhlobo lobuhle Mariya bekanabo naJehova bamenta waba ngumfati lokahle. Lamuhla, bafati labanyenti bayetama kwenta loko lokwentiwa nguMariya. Nasi sibonelo, lomunye dzadze lokutsiwa ngu-Emiko utsi: “Ngesikhatsi ngingakashadi, bengineluhlelo lwekutidadishela liBhayibheli. Kodvwa ngemuva kwekushada, indvodza yami beyisithantazela futsi ihola ekukhonteni kwemndeni, ngako ngabona kutsi besengetsembele kuyo. Ngabona kutsi ngimi lebekufanele ngigcine buhlobo bami naJehova bucinile. Nyalo sengitinika sikhatsi sekuba ngedvwa naNkulunkulu wami ngithantaze, ngifundze liBhayibheli futsi ngicabangisise ngaloko lengikufundzako.” (Gal. 6:5) Nine bafati, njengobe nichubeka nicinisa buhlobo benu naJehova, emadvodza enu atawuba netizatfu letinyenti tekunidvumisa netekunitsandza.​—Taga 31:30.

7. Yini labashadene labangayifundza kuJosefa naMariya ngekukhonta Jehova ndzawonye?

⁷ BoJosefa naMariya bebabambisana kuze babe nebuhlobo lobuhle naJehova. Bebati kutsi kubalulekile kutsi bakhonte Jehova ndzawonye bangumndeni. (Luk. 2:22-24, 41; 4:16) Kungenteka bekumatima kutsi bente njalo, ikakhulukati ngesikhatsi baba nebantfwana labanyenti, kodvwa bakhona kukwenta. Lesi sibonelo lesihle kulabashadile lamuhla! Nangabe ninebantfwana njengaJosefa naMariya, kungenteka kube matima kuya emihlanganweni nobe kuhlela sikhatsi sekukhonta kwemndeni. Kungenteka kube matima kakhulu kutfola sikhatsi sekudadisha nobabili nobe sekuthantaza. Kodvwa khumbulani kutsi nanikhonta Jehova ndzawonye, nitawusondzelana kakhulu naye niphindze nisondzelane nobabili. Ngako yentani kukhonta Jehova kube yintfo leta kucala kini.

8. Yini lengentiwa ngulabashadene labanetinkinga emshadweni wabo kuze bazuze kakhudlwana ekukhonteni kwemndeni?

⁸ Yini leningayenta nangabe umshado wenu unetinkinga? Kungenteka ningayijabuleli indzaba yekuba ndzawonye nente kukhonta kwemndeni. Nangabe kunjalo, calani ngekwenta lokufishane lenikujabulela nobabili futsi lenivumelana ngako. Loku kungacinisa budlelwane benu nesifiso senu sekukhonta Jehova ndzawonye.

9. Kubaluleke ngani kutsi indvodza nemfati bacitse sikhatsi ndzawonye?

⁹ Nine lenishadile, ningaphindze nigcine lutsandvo lwenu luvutsa ngekutsi nicitse sikhatsi ndzawonye. Loko kunganciphisa ematfuba ekutsi kube nesikhala emkhatsini wakho naloshade naye, utawati kutsi ucabangani nekutsi utiva njani. (Gen. 2:24) Naka naku lokwabonwa nguLilia naRuslan ngekushesha nje ngemuva kwekutsi sebashadile, eminyakeni lengetulu kwalengu-15 leyendlulile. Lodzadze utsi: “Sabona kutsi besingeke sicitse sikhatsi ndzawonye njengobe besicabanga. Besimatasatasa ngemsebenti wekutiphilisa, ngemsebenti wasekhaya, futsi ngekuhamba kwesikhatsi saba nebantfwana. Sabona kutsi nasingasakhi sikhatsi sekuba ndzawonye, lutsandvo lwetfu lungaphela.”

10. Labashadene bangasisebentisa njani simiso lesiKubase-Efesu 5:15, 16?

¹⁰ Yini labashadile labangayenta kuze bacitse sikhatsi ndzawonye? Bangabekela eceleni sikhatsi labatasicitsa ndzawonye. (Fundza  Kubase-Efesu 5:15, 16.) Lomunye umzalwane waseNigeria lokutsiwa ngu-Uzondu utsi: “Nangihlela tintfo lengitawutenta, ngiyasifaka nesikhatsi lengitasicitsa nemkami, futsi leso sikhatsi sibaluleke kakhulu kimi.” (Fil. 1:10) Cabanga ngendlela Anastasia, longumfati wembonisi wesigodzi eMoldova lasisebentisa kahle ngayo sikhatsi sakhe. Utsi: “Nangabe umyeni wami amatasatasa ngemisebenti yakhe, nami ngiyetama kwenta imisebenti yami. Ngaleyo ndlela nasesikanye kanye siyakhona kucitsa sikhatsi ndzawonye.” Kodvwa yini leningayenta nangabe nimatasatasa futsi ningasitfoli sikhatsi sekuba ndzawonye?

11. Ngutiphi tintfo lebebatenta kanye kanye bo-Akhwila naPhrisila?

¹¹ Labashadene bangafundza esibonelweni sa-Akhwila naPhrisila, lebebatsandvwa ngemaKhristu ekucala lamanyenti. (Rom. 16:3, 4) Nanobe liBhayibheli lingasho lokunyenti ngemshado wabo, kodvwa liyaveta kutsi bebasebenta ndzawonye, bashumayela ndzawonye, futsi basita labanye ndzawonye. (Imis. 18:2, 3, 24-26) Ecinisweni, ngaso sonkhe sikhatsi liBhayibheli nalikhuluma nga-Akhwila naPhrisila, likhuluma ngabo bobabili.

12. Yini indvodza nemfati labangayenta kuze bacitse sikhatsi ndzawonye? (Buka nesitfombe.)

¹² Labashadene bangamlingisa njani Akhwila naPhrisila? Cabanga ngetintfo letinyenti wena naloshade naye lokudzingeka nitente. Letintfo ningatenta yini ninobabili kunekutsi utente uwedvwa? Sibonelo nje, Akhwila naPhrisila bebashumayela ndzawonye. Nivamile yini kushumayela ndzawonye? Bo-Akhwila naPhrisila bebaphindze basebente kanye kanye. Kungenteka ninemisebenti lengafani yekutiphilisa, kodvwa ningayenta yini imisebenti yasekhaya ndzawonye? (Shu. 4:9) Nangabe nisitana kuze nente imisebenti letsite, niyabona kutsi nibambisene futsi niba nelitfuba lekucoca. BoRobert naLinda baneminyaka lengetulu kwalengu-50 bashadile. Robert utsi: “Sincane sikhatsi lesinaso lesingasicitsa sitijabulisa. Kodvwa nangiwasha titja futsi umkami atesule, nobe nangisengadzeni futsi ete atongisita, ngiyajabula. Kwenta tintfo ndzawonye kusenta sisondzelane. Lutsandvo lwetfu luchubeka lukhula.”

13. Yini indvodza nemfati lokufanele bayente kuze basondzelane?

¹³ Kodvwa khumbula kutsi kuba ndzawonye angeke kuhlale kusho kutsi nitosondzelana. Lomunye dzadze waseBrazil utsi: “Sesahlale simatasatasa, ngako kumelula kucabanga kutsi sicitsa sikhatsi ndzawonye ngenca nje yekutsi sihlala kanye kanye. Ngibonile kutsi kudzingeka lokungetulu kwekuba ndzawonye. Kudzingeka ngimnake loyo lengishade naye.” Naka kutsi yini Bruno nemkakhe Tays labayentako kuze baciniseke kutsi bayanakana. Bruno utsi: “Nasicitsa sikhatsi ndzawonye, sibeka phansi tincingo futsi sijabulele lesikhatsi sekuba kanye kanye.”

14. Yini labashadene labangayenta nangabe bangatsandzi kucitsa sikhatsi ndzawonye?

 ¹⁴ Kodvwa yini labashadene labangayenta nangabe bangatsandzi kucitsa sikhatsi ndzawonye? Mhlawumbe anitsandzi tintfo letifanako, nobe niyadzinana. Yini leningayenta? Cabanga ngalomfanekiso wemlilo lesiwente ekucaleni. Lomlilo awusuki emalangabi usawubasa. Kunaloko, kudzingeka uchubeke ufaka tinkhuni kancane kancane. Ngendlela lefanako, ningacala ngekucitsa sikhashana ndzawonye njalo ngelilanga. Cinisekani kutsi nenta tintfo lenititsandza nobabili, hhayi tintfo letinganicabanisa. (Jak. 3:18) Nanicala kancane kancane, ningaluvusetela lutsandvo lwenu.

15. Yini leyenta inhlonipho ibaluleke kuze lutsandvo luhlale luvutsa emshadweni?

¹⁵ Inhlonipho ibalulekile emshadweni. Injengemoya lowenta umlilo uchubeke uvutsa. Nakute umoya, umlilo usheshe ucishe. Ngendlela lefanako, nangabe labashadene bangahloniphani, lutsandvo lwabo lungasheshe luphele. Kantsi nangabe benta konkhe lokusemandleni abo kuze bahloniphane, benta kutsi lutsandvo lwabo luchubeke luvutsa. Nobe kunjalo, khumbula kutsi lena akusiyo indzaba yekutsi wena ucabanga kutsi uyamhlonipha yini, kodvwa yindzaba yekutsi lona loshade naye utiva ahlonishwa yini. Sekuphele iminyaka lengetulu kwalengu-25 boPenny na-Aret bashadile. Lodzadze utsi: “Ngenca yekutsi siyahloniphana, kugcwele lutsandvo ekhaya. Sikhululekile kucoca ngobe siyati kutsi siyayihlonipha imibono yalomunye nalomunye.” Yini longayenta kuze wente lona loshade naye ative ahlonishwa? Cabanga ngesibonelo sa-Abrahama naSara.

16. Yini emadvodza langayifundza esibonelweni sa-Abrahama? (1 Phetro 3:7) (Buka nesitfombe.)

¹⁶ Abrahama bekamhlonipha Sara. Bekamlalela futsi ayihlonipha indlela bekativa ngayo. Ngalelinye lilanga Sara bekatfukutsele, futsi wakhiphela intfukutselo yakhe ku-Abrahama, waze wamsola. Wamtfukutselela yini Abrahama futsi wamtsetsisa? Cha. Bekati kutsi Sara bekatitfoba kuye futsi amsekela. Abrahama wamlalela futsi wetama kucatulula lenkinga. (Gen. 16:5, 6) Yini lesingayifundza? Nine madvodza, ninemsebenti wekwenta tincumo emndenini wenu. (1 Khor. 11:3) Nobe kunjalo, nitawube nikhombisa lutsandvo nangabe nicabanga ngendlela bafati benu labativa ngayo ngaphambi kwekwenta sincumo, ikakhulukati nangabe sitabatsintsa. (1 Khor. 13:4, 5) Ngaletinye tikhatsi umkakho angahle ative acindzetelekile futsi afune kuveta indlela lativa ngayo. Uyamhlonipha yini ngekutsi umlalelisise? (Fundza 1 Phetro 3:7.) Sekuphele iminyaka lengaba ngu-30 Angela naDmitry bashadile. Lodzadze nakachaza indlela umyeni wakhe lamenta ative ahlonishwa  ngayo, utsi: “Dmitry uhlale akulungele kungilalela nangitfukutsele nobe nangifuna kukhuluma. Uyangibeketelela, ngisho nalapho ngikhuluma emehlo ami agcwele tinyembeti.”

17. Yini bafati labangayifundza esibonelweni saSara? (1 Phetro 3:5, 6)

¹⁷ Sara bekamhlonipha Abrahama ngekutsi asekele tincumo takhe. (Gen. 12:5) Ngalelinye lilanga, Abrahama watikhombisa umusa tivakashi lebekangakatilindzeli. Wacela Sara kutsi ayekele loko bekakwenta futsi alungise tinkhwa letinyenti. (Gen. 18:6) Sara wakwenta ngekushesha loko futsi wasekela sincumo sakhe. Nine bafati, ningamlingisa Sara ngekutsi nisekele tincumo temadvodza enu. Nanenta njalo, nicinisa umshado wenu. (Fundza 1 Phetro 3:5, 6.) Dmitry, lesikhulume ngaye esigabeni lesendlulile uchaza indlela umkakhe lamenta ative ahlonishwa ngayo. Utsi: “Ngiyakutsandza loko lokwentiwa ngu-Angela kuze asekele tincumo tami, ngisho nobe imibono yetfu ingavumelani. Nangabe tintfo tingahambi kahle, akangisoli.” Kumelula kutsandza umuntfu lokuhloniphako!

18. Labashadene basitakala njani nabagcina lutsandvo lwabo luvutsa?

¹⁸ Lamuhla, Sathane ufuna kucedza lutsandvo lolukhona emkhatsini wemishado yemaKhristu. Uyati kutsi nangabe labashadene bangasatsandzani, bangabese bacala kukhweshelana naJehova. Nobe kunjalo, lutsandvo sibili angeke luphele! Ngako shengatsi lutsandvo lolukhona emshadweni wenu lungafana nalolo loluchazwe encwadzini yeNgoma Yetingoma. Timiseleni kwenta Jehova ete kucala emshadweni wenu, nakhe sikhatsi lenitasicitsa ndzawonye, futsi nihloniphe indlela lomunye nalomunye lativa ngayo kanye netidzingo talomunye nalomunye. Nanenta njalo, lutsandvo lwenu lutawudvumisa uMsunguli welutsandvo sibili, lokunguJehova, futsi njengemlilo lobaselwako, lutsandvo lwenu lutawuchubeka luvutsa.