1. Ngubuphi bumatima labanyenti betfu lababhekana nabo?

 UKILE yini watibekela umgomo ekukhonteni Nkulunkulu kodvwa kwaba matima kuwufinyelela? b Nangabe kunjalo, awusiwedvwa. Sibonelo nje, Philip bekafuna kutfutfukisa imithantazo yakhe kanye nemahlandla lathantaza ngawo, kodvwa bekakutfola kumatima kutfola sikhatsi sekuthantaza. Erika bekatibekele umgomo wekusheshe afike emhlanganweni wangaphambi kwekuyoshumayela, kodvwa bekavame kuphuta kufika. Tomáš wetama emahlandla kulifundza lonkhe liBhayibheli alicedze. Utsi: “Bengingakutsandzi kufundza liBhayibheli. Ngetama tikhatsi letintsatfu, kodvwa ngaso sonkhe sikhatsi bengigcina encwadzini yaLevithikhusi bese ngiyayekela.”

2. Yini lokufanele isente singadvumali nangabe kunemgomo lesisengakawufinyeleli ekukhonteni Nkulunkulu?

² Nangabe unemgomo losengakawufinyeleli, ciniseka kutsi awusiso sehluleki. Ngisho nekufinyelela umgomo lomncane kuvame kudzinga sikhatsi nemetamo. Lokutsi nje uyafuna kufinyelela umgomo wakho kuyakhombisa kutsi ubutsatsa njengalobuligugu buhlobo bakho naJehova futsi ufuna kumniketa lokuncono kakhulu. Jehova uyajabula ngemetamo yakho. Kuliciniso kutsi akalindzeli kutsi wente lokungetulu kwaloko longakhona kukwenta.  (Hla. 103:14; Mik. 6:8) Ngako tibekele umgomo lotawukhona kuwufinyelela, kuye ngetimo takho. Ngemuva kwekukhetsa umgomo, yini longayenta kuze uwufinyelele? Ase sicoce ngalokunye longakwenta.

3. Kubaluleke ngani kuba nesifiso sekufinyelela umgomo?

³ Kuze ufinyelele imigomo yakho ekukhonteni Nkulunkulu, kufanele ube nesifiso. Nangabe unesifiso lesikhulu sekufinyelela umgomo wakho, utawusebenta kamatima kuze uwufinyelele. Loko singakufananisa nemoya lohambisa sikebhe size sifike lapho siya khona. Nangabe lomoya uchubeka uhhusha, lesikebhe sitawufika lapho siya khona. Kantsi nangabe kunemoya lomkhulu singasheshe sifike. Ngendlela lefanako, nangabe sinesifiso lesikhulu sekufinyelela imigomo yetfu, manyenti ematfuba ekutsi siyifinyelele. Lomunye umzalwane wase-El Salvador lokutsiwa nguDavid utsi: “Nawunesifiso uyatimisela. Wetama ngayo yonkhe indlela kutsi kube bete lokukuvimbako kutsi ufinyelele umgomo wakho.” Ngako yini longayenta kuze ube nesifiso sekufinyelela umgomo?

4. Yini lesingayithantazela? (KubaseFiliphi 2:13) (Buka nesitfombe.)

⁴ Thantazela kuba nesifiso lesikhulu. Asebentisa umoya wakhe, Jehova angakusita kutsi uwufinyelele umgomo wakho. (Fundza KubaseFiliphi 2:13.) Ngalesinye sikhatsi sitibekela umgomo ngobe siyati kutsi kufanele, futsi leyo yintfo lenhle. Kodvwa singahle sibe bete sifiso sekuwufinyelela. Nguloko lokwenteka kulomunye dzadze wase-Uganda lokutsiwa nguNorina. Bekatibekele umgomo wekudadisha liBhayibheli nalotsite nanobe bekeva shengatsi ute sifiso sekwenta njalo ngobe bekangacabangi kutsi ungumfundzisi lokahle. Yini leyamsita? Utsi: “Onkhe malanga bengithantaza kuJehova ngicele angiphe sifiso lesikhulu sekudadisha liBhayibheli nalotsite. Ngenta ngekuvumelana nemithantazo yami, ngatfutfukisa indlela lengifundzisa ngayo. Ngemuva kwetinyanga, ngabona kutsi sifiso sami besesikhulile. Ngawo lowo mnyaka, ngacala kudadisha liBhayibheli nebantfu lababili.”

5. Yini lesingacabangisisa ngayo lengasisita kutsi sibe nesifiso lesikhulu sekufinyelela umgomo wetfu?

⁵ Cabangisisa ngaloko Jehova lakwentele kona. (Hla. 143:5) Umphostoli Pawula wacabangisisa ngemusa lomkhulu Jehova lebekamkhombise wona, futsi loko kwamenta waba nesifiso lesikhulu sekusebentela Jehova. (1 Khor. 15:9, 10; 1 Thim. 1:12-14) Ngendlela lefanako, nawuchubeka ucabangisisa ngaloko Jehova lakwentele kona, utawuba nesifiso lesikhulu sekufinyelela umgomo wakho. (Hla. 116:12) Cabanga nganaku lokwasita lomunye dzadze waseHonduras kuze afinyelele umgomo wakhe wekuba lihlahlandlela lelivamile. Utsi: “Ngacabangisisa ngekutsi Jehova ungitsandza kangakani. Ungisitile kutsi ngitfole bantfu bakhe. Uyanginakekela futsi uyangivikela. Kucabangisisa ngaletintfo kwangenta ngamtsandza kakhulu, futsi ngaba nesifiso lesikhulu sekufinyelela lomgomo.”

6. Yini lenye lengasisita kuze sibe nesifiso lesikhulu sekufinyelela umgomo?

 ⁶ Naka tintfo lotawutitfola nawetama kufinyelela umgomo wakho. Naka naku lokwasita Erika, lesicoce ngaye ekucaleni lebekanemgomo wekusheshe afike emhlanganweni longaphambi kwekuyoshumayela. Utsi: “Ngabona kutsi bekukunyenti kakhulu lebekungilahlekela nangiphuta kufika. Kodvwa nangisheshe ngafika, bengikhona kuvusela bazalwane nabodzadze futsi ngicitse sikhatsi nabo. Bengilalela netindlela letilusito tekushumayela lebetitangenta ngikujabulele kushumayela futsi ngitfutfuke.” Erika wanaka kutsi bekumsita ngani kufika ngesikhatsi futsi wawufinyelela lomgomo wakhe. Ngutiphi tibusiso longatinaka? Nangabe umgomo wakho ukufundza liBhayibheli nobe kuthantaza, cabanga kutsi loko kungakusita njani ucinise buhlobo bakho naJehova. (Hla. 145:18, 19) Nangabe umgomo wakho kutfutfukisa buntfu bakho bebuKhristu, cabanga kutsi loko kutakusita njani utfutfukise buhlobo lonabo nalabanye. (Khol. 3:14) Kungakusita kwenta luhla lolunetizatfu letikwenta ufune kufinyelela loyo mgomo. Hlale ulibuka loluhla. Tomáš, lesicoce ngaye ekucaleni utsi: “Nangabe titinyenti tizatfu letingenta ngifune kufinyelela umgomo, ngisebenta kamatima kuze ngiwufinyelele. Aba mancane ematfuba ekutsi ngingawufinyeleli.”

7. Yini leyasita Julio nemkakhe kutsi bafinyelele umgomo wabo?

⁷ Citsa sikhatsi nalabo labatakusita kutsi ufinyelele umgomo wakho. (Taga 13:20) Naka loko lokwasita Julio nemkakhe kutsi bafinyelele umgomo wabo wekwenta lokunyenti emsebentini wekushumayela. Julio utsi: “Sakhetsa bangani lebebatasikhutsata kutsi sifinyelele umgomo wetfu, futsi besicoca ngalomgomo wetfu nabo. Linyenti labo beselivele liwufinyelele umgomo lofanako, ngako bebangasiniketa teluleko letilusito. Bebasibuta nekutsi kuhamba njani loko lesikuhlelile futsi bebasikhutsata nakunesidzingo.”

8. Yini lengenteka nangabe setama kufinyelela umgomo ngemalanga lesinesifiso sekuwufinyelela ngawo kuphela? (Buka nesitfombe.)

⁸ Kuliciniso kutsi ahle aba khona emalanga lapho sibabete sifiso sekufinyelela imigomo yetfu. Loko kusho kutsi angeke yini siwufinyelele? Cha. Ase sibekise: Umoya ungenta sikebhe sifike lapho siya khona. Nobe kunjalo, emandla emoya ayashiyashiyana, futsi ngalamanye emalanga kungahle kube bete sanhlobo umoya. Loko kusho kutsi lesikebhe angeke yini sichubeke sihamba? Cha. Sibonelo nje, letinye tikebhe tinenjini kantsi letinye tinetindvuku tekugwedla. Loyo locondzisa lesikebhe angasebentisa nobe ngukuphi kuloku kuze afike lapho aya khona. Sifiso setfu sekufinyelela umgomo singafananiswa nalomoya, ngalamanye emalanga siba nemandla kantsi ngalamanye emalanga siba bete. Ngako nasingetama kufinyelela umgomo wetfu ngemalanga lesinesifo ngawo kuphela, singahle singawufinyeleli.  Kodvwa njengobe locondzisa sikebhe asebentisa letinye tindlela kuze afike lapho aya khona, natsi singawufinyelela umgomo wetfu ngisho site sifiso sekuwufinyelela ngalelo langa. Kuliciniso kutsi loko angeke kube melula, kodvwa utawujabula nangabe uwufinyelela umgomo wakho. Ngaphambi kwekutsi sicoce ngaloko lesingakwenta, asesiphendvule nangu umbuto lokungenteka sibe nawo.

9. Kukabi yini kwetama kufinyelela umgomo ngisho nobe site sifiso sekuwufinyelela? Chaza.

⁹ Jehova ufuna simkhonte sijabulile futsi ngalokusuka enhlitiyweni. (Hla. 100:2; 2 Khor. 9:7) Ngako kufanele yini setame kufinyelela umgomo ngisho nobe singakhanuki? Cabanga ngesibonelo saPawula. Watsi: “Ngiwekhuta kamatima umtimba wami futsi ngiwenta sigcili.” (1 Khor. 9:25-27, umbhalo longentasi) Ngisho nobe Pawula bekete sifiso sekwenta loko Jehova bekatsi akakwente, bekaticindzetela kuze akwente. Wakwemukela yini Jehova loko? Yebo. Wambusisa ngaloko beketama kukwenta.​—2 Thim. 4:7, 8.

10. Kusisita ngani kwetama kufinyelela umgomo ngisho site sifiso?

¹⁰ Ngendlela lefanako, Jehova uyajabula nakasibona setama kufinyelela umgomo ngisho nobe site sifiso sekwenta kanjalo. Uyajabula ngobe uyati kutsi nanobe singakutsandzi loko lesikwentako, kodvwa siyakwenta ngoba sitsandza yena. Njengobe nje ambusisa Pawula, natsi utasibusisa ngaloko lesetama kukwenta. (Hla. 126:5) Nasibona indlela Jehova lasibusisa ngayo, singabese siba naso sifiso. Lomunye dzadze wasePoland lokutsiwa nguLucyna utsi: “Ngalesinye sikhatsi kuhle kwala kutsi ngiye emsebentini wekushumayela, ikakhulukati nangidziniwe. Nanobe kunjalo, injabulo lengiba nayo nangibuya iyamangalisa.” Ngako asesicoce ngekutsi yini lesingayenta nangabe site sifiso.

11. Jehova angasisita njani kutsi sikhone kakhudlwana kutibamba?

¹¹ Thantaza ucele kutibamba. Kutibamba kusho kulawula indlela lesitiva ngayo naloko lesikwentako. Leligama livame kusetjentiswa nakukhulunywa ngekutibamba kuze singenti tintfo letimbi. Nobe kunjalo, kutibamba kubalulekile ngisho nobe sifuna kwenta lokuhle, ikakhulukati nangabe lomsebenti ulukhuni nobe nasite sifiso. Khumbula kutsi kutibamba kungulesinye setitselo temoya, ngako thantazela umoya longcwele waJehova kutsi ukusite ube nalobuntfu lobubaluleke kangaka. (Luk. 11:13; Gal. 5:22, 23) David, lesikhulume ngaye ekucaleni uchaza indlela umthantazo lowamsita ngayo. Bekafuna kunamatsela eluhlelweni lwakhe lwekutidadishela liBhayibheli. Utsi: “Bengivame kucela Jehova angisite ngikhone kutibamba. Ngekusitwa nguye, ngakhona kuba neluhlelo lwekutidadishela liBhayibheli nekunamatsela kulo.”

12. Umbhalo weMshumayeli 11:4 usisita njani kutsi sifinyelele imigomo yetfu?

¹² Ungalindzi kuze kube sikhatsi locabanga kutsi sikahle. Kulelive lesiphila kulo, kusenekwenteka singabi khona sikhatsi lesicabanga kutsi sikahle. Nangabe sitimela letikhatsi, singahle singawufinyeleli umgomo wetfu. (Fundza Umshumayeli 11:4.) Lomunye umzalwane lokutsiwa nguDayniel utsi: “Kute sikhatsi lesikahle. Ngako akukafaneli sime, kodvwa kufanele sicale.” Lomunye umzalwane wase-Uganda lokutsiwa nguPaul usho lesinye sizatfu lokufanele sisente singahlehlisi. Utsi: “Nasicala ngisho nobe timo tingavumi, sisuke sinika Jehova litfuba lekutsi asibusise.”​—Mal. 3:10.

13. Kuhle ngani kucala ngemigomo lemincane?

¹³ Cala kancane. Kungenteka site sifiso sekufinyelela umgomo ngobe kubonakala kumatima kuwufinyelela. Nangabe usesimeni lesifanako, ungacala yini ngemigomo lemincane kuze ukhone kuwufinyelela? Nangabe umgomo wakho ukuveta buntfu lobutsite,  ungakhona yini kucala kubuveta ngetindlela letincane? Nangabe umgomo wakho ukufundza lonkhe liBhayibheli, ungakhona yini kutibekela sikhatsi lesifishane sekulifundza? Tomáš, lesike sakhuluma ngaye ekucaleni bekakutfola kumatima kufinyelela umgomo wakhe wekufundza liBhayibheli alicedze ngemnyaka. Utsi: “Ngabona kutsi bengente luhlelo lolungekhamako. Ngako ngancuma kuphindze ngetame. Ngahlela kufundza incenye yesehluko njalo ngelilanga futsi ngicabangisise ngaloko lengikufundzako. Ngenca yaloko, ngabese ngiyakujabulela kufundza liBhayibheli.” Njengobe Tomas besekakujabulela kufundza liBhayibheli, wabese ungeta sikhatsi lebekasicitsa alifundza. Ekugcineni walifundza lonkhe liBhayibheli futsi walicedza. c

14. Yini lengenteka lengabangela kube matima kufinyelela imigomo yetfu?

¹⁴ Ngisho nobe unesifiso lesinganani noma utimisele kanganani kufeza umgomo, kungahle kube netintfo letikubuyisela emuva. Sibonelo saloko kutsi ‘timo letingakalindzeleki’ tingatsatsa sikhatsi lebekufanele sisisebentise kuze sifeze umgomo wetfu. (Shu. 9:11) Singahle sibhekane nenkinga lengasishiya sidvumatekile futsi site emandla. (Taga 24:10) Ngenca yekutsi sinesono, singenta emaphutsa langenta kube matima kutsi sifinyelele umgomo wetfu. (Rom. 7:23) Nobe singahle sitive sikhatsele. (Mat. 26:43) Yini lesingayenta kuze sibhekane naloku?

15. Yini lesenta singapheli emandla nangabe kwenteka lokutsite lokwenta kube matima kufinyelela umgomo wetfu? Chaza. (Tihlabelelo 145:14)

¹⁵ Khumbula kutsi nakunalokutsite lokukuvimbela kutsi ufinyelele umgomo wakho, akusho kutsi wehlulekile. LiBhayibheli liyasho kutsi singahle sibhekane netinkinga tilandzelane. Nobe kunjalo, liphindze lisho kutsi singetama kufinyelela imigomo yetfu, ikakhulukati nasisitwa nguJehova. (Fundza Tihlabelelo 145:14.) Umzalwane Philip, lesike sakhuluma ngaye utsi: “Kuphumelela kwami akuyi  ngekutsi ngiwe tikhatsi letinganani, kunaloko kuya ngekutsi ngivuke tikhatsi letingakhi.” David lesike sakhuluma ngaye utsi: “Tintfo letingibuyisele emuva angititsatsi njengetintfo letingivimbelako, kunaloko ngititsatsa njengelitfuba lekukhombisa Jehova kutsi ngimtsandza kanganani.” Nawuchubeka wetama kufinyelela umgomo wakho ngisho nobe kumatima, usuke ukhombisa Jehova kutsi uyafuna kumjabulisa. Jehova ujabula kakhulu nakakubona uchubeka wetama kufinyelela umgomo wakho!

16. Nangabe ungakhoni kufinyelela umgomo, loko kukhombisani?

¹⁶ Fundza kulokutsite lokukuvimbele kutsi ufinyelele umgomo wakho. Cabanga ngekutsi loko kwabangelwa yini, bese uyatibuta: ‘Kukhona yini lengingakushintja kuze lesimo singaphindzeki?’ (Taga 27:12) Kodvwa ngaletinye tikhatsi kungakhoni kufinyelela umgomo kukhombisa kutsi ungetulu kwemandla etfu. Nangabe usesimeni lesifanako, phindze ucabange ngalomgomo futsi ubone kutsi utawukhona yini vele kuwufinyelela. d Jehova angeke akutsatse njengesehluleki nangabe awukhoni kufinyelela umgomo longetulu kwemandla akho.​—2 Khor. 8:12.

17. Kubaluleke ngani kuhlale sikhumbula loko lesesikufezile?

¹⁷ Hlale ukukhumbula loko lokufezile. LiBhayibheli litsi “Nkulunkulu ulungile, ngako ngeke awukhohlwe umsebenti” wakho. (Heb. 6:10) Ngako nawe ungakhohlwa. Cabanga ngaloko lokufezile, njengebuhlobo lonabo naJehova, kucocela labanye ngaye nobe kubhajatiswa. Njengobe utfutfukile futsi wafinyelela imigomo yakho, ungachubeka utfutfuka kuze ufinyelele lomgomo lotibekele wona.​—Fil. 3:16.

18. Yini lokufanele singayikhohlwa njengobe setama kufinyelela umgomo wetfu? (Buka nesitfombe.)

¹⁸ Ngekusitwa nguJehova, ungawufinyelela umgomo wakho, njengobe nalohamba ngesikebhe afika lapho aya khona. Kodvwa khumbula, linyenti lalabo labahamba ngesikebhe bahle babuka tintfo letinhle labatibonako njengobe bakuloluhambo. Ngendlela lefanako, njengobe wetama kuchubeka ufinyelela umgomo wakho, ungakhohlwa kubuka indlela Jehova lakusite ngayo nalakubusise ngayo njengobe usetama kuwufinyelela. (2 Khor. 4:7) Utawutfola tibusiso letinyenti nangabe ungapheli emandla.​—Gal. 6:9.