1. Ngusiphi sifundvo lesidvudvutako Jehova lasifundzisa Abrahama?

 ABRAHAMA akayuze akukhohlwe loko lakukhuluma naNkulunkulu. Nkulunkulu wasebentisa ingilosi kuze atjele Abrahama kutsi bekatawubhubhisa iSodoma neGomora. Loko kwayikhatsata lendvodza leyetsembekile. Yabuta yatsi: “Utababhubhisa yini vele bantfu labalungile nawubhubhisa lababi? . . . Njengobe unguMehluleli wemhlaba wonkhe, ngeke yini wente lokulungile?” Ngesineke Jehova wafundzisa lomngani wakhe lamtsandzako sifundvo lesisisita sonkhe futsi lesisidvudvutako: Nkulunkulu akayuze abhubhise bantfu labalungile.​—Gen. 18:23-33.

2. Yini lesicinisekisako kutsi Jehova wehlulela ngendlela lelungile nalenemusa?

² Yini lesicinisekisako kutsi indlela Jehova lehlulela ngayo inemusa futsi ilungile? Kungobe siyati kutsi “Jehova ubona lokusenhlitiyweni.” (1 Sam. 16:7) Ecinisweni, wati “inhlitiyo yemuntfu nemuntfu.” (1 Khos. 8:39; 1 Khr. 28:9) Lelo liciniso lelisijabulisako. Indlela Jehova lehlulela ngayo iphakeme kakhulu kwendlula indlela lesicabanga ngayo. Kungako umphostoli Pawula aphefumulelwa kutsi asho naku ngaJehova Nkulunkulu: “Kwehlulela kwakhe akuphenyeki!”​—Rom. 11:33.

3-4. Yini lesingahle sitibute yona, futsi sitawucoca ngani kulesihloko? (Johane 5:28, 29)

³ Nanobe kunjalo, kungenteka sibe nemibuto lefana naleyo leyabutwa ngu-Abrahama. Kungenteka sitibute: “Kutawenteka yini kutsi bantfu lababhujiswa nguJehova baphindze baphile, njengebantfu baseSodoma naseGomora? Kungenteka yini  kutsi labanye babo bavuswe ‘nakuvuswa bantfu labangakalungi’?”​—Imis. 24:15.

⁴ Asesicoce ngaloko lesikwatiko mayelana nekuvuswa kwebantfu labafile. Eminyakeni yakamuva, sitfole kucondza lokusha mayelana ‘nekuvuselwa ekuphileni nekuvuselwa ekwehlulelweni.’ a (Fundza Johane 5:28, 29.) Lokucondza lokusha kwente kutsi kube nalolunye lushintjo, futsi sitawucoca ngalo kulesihloko nakulelesilandzelako. Sitawucale sicoce ngekutsi yini lesingayati nekutsi yini lesiyatiko mayelana nekwehlulela kwaJehova ngekulunga.

LOKO LESINGAKWATI

5. Yini tincwadzi tetfu lebetiyisho esikhatsini lesendlulile mayelana nebantfu lababhujiswa nguJehova eSodoma naseGomora?

⁵ Esikhatsini lesendlulile, tincwadzi tetfu betikhuluma ngaloko lokwentekako kulabo Jehova labehlulele ngekutsi abakalungi. Besitsi bantfu labakanjalo angeke baze bavuswe ekufeni, lokufaka ekhatsi bantfu baseSodoma naseGomora. Kodvwa ngemuva kwekudadisha ngekutimisela ngalendzaba, futsi kuthantazwe tikhatsi letinyenti ngayo, kube sebaleni kutsi angeke sifunge sigomele ngaloko. Sisho ngani?

6. Ngutiphi tibonelo tebantfu labangakalungi labehlulelwa nguJehova, futsi yini lesingayati?

⁶ Cabanga nganati letinye tibonelo. Letinye tindzaba letiseBhayibhelini tiveta kutsi esikhatsini lesendlulile Jehova wehlulela bantfu labangakalungi lokufaka ekhatsi bantfu labanyenti lababulawa nguZamcolo, tive letingu-7 latjela bantfu bakhe kutsi batibhubhise lebetihlala eVeni Lesetsembiso, kanye nemasotja ema-Asiriya langu-185 000 labulawa yingilosi yaJehova ngebusuku bunye. (Gen. 7:23; Dut. 7:1-3; Isa. 37:36, 37) Kuletimo, liBhayibheli liyasinika yini imininingwane leyenele leyenta sitsi Jehova wabhubhisa labantfu phakadze futsi angeke aphindze abavuse? Cha. Sisho ngani?

7. Yini lesingayati mayelana nebantfu lababhujiswa ngaZamcolo nobe ngalabo bebahlala eKhenani? (Buka lesisekhasini lekucala.)

⁷ Asati kutsi Jehova bekamehlulela njani umuntfu ngamunye; futsi asati kutsi labo lababulawa balitfola yini litfuba lekufundza ngaJehova nelekuphendvuka. LiBhayibheli nalikhuluma ngesikhatsi saZamcolo, litsi Nowa “bekangumshumayeli wekulunga.” (2 Phet. 2:5) Kodvwa alisho kutsi ngesikhatsi asakha lomkhumbi lomkhulu bekaphindze ashumayele umuntfu ngamunye emhlabeni. Ngendlela lefanako, asati kutsi bonkhe bantfu lababi lebebahlala eKhenani balitfola yini litfuba lekufundza ngaJehova nelekushintja tindlela tabo.

8. Yini lesingayati mayelana nebantfu baseSodoma naseGomora?

⁸ Kutsiwani ngebantfu baseSodoma naseGomora? Loti lebekayindvodza lelungile bekahlala lapho. Kodvwa siyati yini kutsi Loti wabashumayela bonkhe bantfu balapho? Cha. Kusebaleni kutsi labantfu bebababi, kodvwa ngamunye wabo bekakwati yini lokulungile nalokungakalungi? Khumbula kutsi sicumbi semadvodza akulelidolobha besifuna kudlwengula tivakashi taLoti. LiBhayibheli litsi lesicumbi besakhiwa ‘ngemadvodza kusukela kulabancane kuye kulabadzala.’ (Gen. 19:4; 2 Phet. 2:7) Siyati yini kutsi Jehova, longuNkulunkulu lonemusa wancuma kutsi kute ngisho namunye kulabantfu lotawuvuswa? Cha. Jehova wacinisekisa Abrahama kutsi bekute ngisho nemadvodza langu-10 lalungile kulelidolobha. (Gen. 18:32) Ngako labantfu bebangakalungi, futsi Jehova bekafutile kubabhubhisa. Kodvwa singafunga sigomele  yini sitsi kute ngisho namunye kulabantfu lotawuvuswa ‘nakuvuswa labangakalungi’? Cha, angeke sisho njalo!

9. Yini lesingayati mayelana naSolomoni?

⁹ Siphindze sifundze eBhayibhelini ngebantfu lebebalungile lokwatsi ngekuhamba kwesikhatsi baba bantfu labangakalungi. INkhosi Solomoni ingulomunye wabo. Beyiwati kahle umtsetfo waNkulunkulu futsi Jehova bekayibusise kakhulu; kodvwa ngekuhamba kwesikhatsi yabese ikhonta bonkulunkulu bemanga. Tono tayo tenta Jehova watfukutsela kakhulu futsi sonkhe sive sema-Israyeli sahlupheka iminyaka leminyenti ngenca yato. Kuliciniso kutsi imiBhalo itsi Solomoni “wangcwatjwa lapho kwangcwatjwa khona bokhokho bakhe,” lokufaka ekhatsi iNkhosi Davide lebeyetsembekile. (1 Khos. 11:5-9, 43; 2 Khos. 23:13) Kodvwa indlela langcwatjwa ngayo isicinisekiso sekutsi utawuvuswa yini? LiBhayibheli alisho. Nobe kunjalo, labanye bangahle batsi “umuntfu lofile ukhululiwe esonweni sakhe.” (Rom. 6:7) Kuliciniso loko, kodvwa akusho kutsi bonkhe bantfu labafile batawuvuswa, kube ngatsi kufanele vele kutsi baphindze baphile. Kuvuswa ekufeni kusipho lesivela kuNkulunkulu lonelutsandvo. Usipha labo lafuna kubanika litfuba lekumkhonta kuze kube phakadze. (Jobe 14:13, 14; Joh. 6:44) Solomoni utasitfola yini lesipho? NguJehova lowatiko, tsine asati. Kodvwa siyati kutsi loko Jehova latawukwenta kulungile.

LOKO LESIKWATIKO

10. Jehova utiva njani ngekubhubhisa bantfu? (Hezekeli 33:11) (Buka nesitfombe.)

¹⁰ Fundza Hezekeli 33:11. Jehova usitjela indlela lativa ngayo mayelana nekwehlulela bantfu. Umphostoli Phetro waphefumulelwa kutsi asho emavi lafanako nalashiwo ngumphrofethi Hezekeli, watsi: “Jehova . . . akafisi kutsi kubhubhe ngisho namunye.” (2 Phet. 3:9) Lamavi ayasidvudvuta, siyati kutsi Jehova angeke amane nje ambhubhise phakadze umuntfu ngaphandle kwesizatfu lesivakalako. Umusa wakhe mkhulu kakhulu futsi uhlale awukhombisa bantfu nakunesidzingo.

11. Bobani labangeke bavuswe, futsi sikwati njani loko?

¹¹ Yini lesiyatiko mayelana nebantfu labangeke bavuswe? LiBhayibheli lisitjela ngetibonelo letimbalwa. b Jesu washo kutsi Judasi Skariyothi c bekangeke avuswe. (Mak. 14:21) Judasi wenta ngemabomu intfo lephambene naloko bekufiswa nguJehova neNdvodzana yakhe. (Buka sihloko lesitsi “Yisono Esinjani Esingenakuthethelelwa” ku jw.org.) Jesu washo kutsi labanye baholi benkholo lebebamphikisa bebangeke bavuke nasebafile. (Mat. 23:33) Ngetulu kwaloko, nemphostoli Pawula wecwayisa kutsi tihlubuki letingaphendvuki betingeke tivuswe.​—Heb. 6:4-8; 10:29.

12. Yini lesiyatiko ngemusa waJehova? Niketa tibonelo.

¹² Nanobe kunjalo, yini lesiyatiko mayelana nemusa waJehova? Ukhombise njani kutsi “akafisi kubhubhe ngisho namunye”? Cabanga ngemusa lawukhombisa labanye labenta tono letinkhulu. INkhosi Davide yenta tono letinkhulu, letifaka ekhatsi kuphinga nekubulala. Nanobe kunjalo, Davide waphendvuka ngako Jehova wamcolela. (2 Sam. 12:1-13) Cishe kuko konkhe kuphila kwayo, iNkhosi Manase yenta tono letinkhulu. Ngisho nobe leNkhosi yenta tintfo letinyenti letimbi, kodvwa Jehova wayikhombisa umusa ngobe yaphendvuka futsi wayicolela. (2 Khr. 33:9-16)  Letibonelo tisikhumbuta kutsi Jehova ukhombisa umusa wakhe ngaso sonkhe sikhatsi nakanesizatfu sekwenta njalo. Utawubavusa bantfu labanjalo ngobe bavuma kutsi bente tono letinkhulu futsi baphendvuka.

13. (a) Yini leyenta Jehova wabakhombisa umusa bantfu baseNineve? (b) Yini Jesu layisho mayelana nebantfu baseNineve?

¹³ Siphindze sibone umusa waJehova endleleni laphatsa ngayo bantfu baseNineve. Nkulunkulu watjela Jona watsi: “Labantfu benta tintfo letinyenti letimbi.” Kodvwa ngesikhatsi baphendvuka etonweni tabo, Jehova wabacolela. Umusa wakhe bewumkhulu kakhulu kunewaJona. Kwadzingeka akhumbute lomphrofethi wakhe lebekatfukutsele kutsi labantfu baseNineve ‘abakwati ngisho nekwehlukanisa emkhatsini walokuhle nalokubi.’ (Jona 1:1, 2; 3:10; 4:9-11) Ngekuhamba kwesikhatsi, Jesu wasebentisa lesibonelo kuze afundzise kutsi Jehova wehlulela ngemusa nangekulunga. Jesu watsi labantfu baseNineve labaphendvuka “batawuvuka . . . nasekwehlulelwa.”​—Mat. 12:41.

14. Kutawusho kutsini kubantfu baseNineve ‘kuvuselwa ekwehlulelweni’?

¹⁴ Kusho kutsini kutsi bantfu baseNineve “batawuvuka . . . nasekwehlulelwa”? Jesu watsi kunebantfu ‘labatawuvuselwa ekwehlulelweni.’ (Joh. 5:29) Bekakhuluma Ngesikhatsi Seminyaka Lengu-1 000 Sekubusa kwakhe, lapho khona kutawuvuswa “labalungile nalabangakalungi.” (Imis. 24:15) Labangakalungi ‘batawuvuselwa ekwehlulelweni.’ Lokusho kutsi Jehova naJesu batawubuka kutsi bayalalela yini futsi bayatenta yini tintfo labafundziswa tona. Nangabe umuntfu waseNineve lovusiwe angafuni kukhonta Jehova, angeke avunyelwe kutsi achubeke aphila. (Isa. 65:20) Kodvwa bonkhe labo labakhetsa kukhonta Jehova ngekwetsembeka, batawutfola litfuba lekuphila kuze kube phakadze!​—Dan. 12:2.

15. (a) Kubaluleke ngani kutsi singasho kutsi bantfu baseSodoma naseGomora angeke bavuswe? (b) Singawacondza njani emavi lakuJuda 7? (Buka libhokisi lelitsi “ Bekasho Kutsini Juda?”)

¹⁵ Ngesikhatsi Jesu akhuluma ngebantfu baseSodoma naseGomora, watsi batawuba ncono “ngeLilanga Lekwehlulelwa” kwendlula  bantfu labangakamlaleli futsi bangakulaleli naloko lakufundzisa. (Mat. 10:14, 15; 11:23, 24; Luk. 10:12) Bekasho kutsini? Singahle sicabange kutsi Jesu bekasebentisa sihabiso nakasho loko. Kodvwa kubonakala ngatsi akusinjalo, futsi kubonakala ngatsi bekangasebentisi sihabiso nangalesikhatsi akhuluma ngebantfu baseNineve. d Kunaloko, kubonakala ngatsi kuliciniso loko bekakusho. ‘LeLilanga Lekwehlulelwa’ lakhuluma ngalo kuto totimbili letikhatsi bekusikhatsi lesifanako. Bantfu baseSodoma naseGomora benta tintfo letimbi njengebantfu baseNineve. Kodvwa bantfu baseNineve balitfola litfuba lekuphendvuka. Ngetulu kwaloko, khumbula loko Jesu lakusho nakakhuluma ‘ngalabatawuvuselwa ekwehlulelweni.’ Labanye babo bantfu “labente lokubi.” (Joh. 5:29) Ngako kubonakala ngatsi likhona litsemba ngalabanye bantfu baseSodoma naseGomora. Kusenekwenteka labanye babo batawuvuswa, futsi kungenteka sibe nelitfuba lekubafundzisa ngaJehova nangaJesu Khristu.

16. Yini lesiyatiko mayelana nendlela Jehova latawuncuma ngayo kutsi bobani latawubavusa? (Jeremiya 17:10)

¹⁶ Fundza Jeremiya 17:10. Kulelivesi, sifundza ngaloko lesikwatiko mayelana nendlela Jehova lehlulela ngayo: Bekasolo ‘aphenya inhlitiyo, ahlolisisa imicabango lejulile.’ Ngako nakancuma kutsi bobani latawubavusa, ‘wonkhe umuntfu utamnika lokumfanele, kuye ngetindlela takhe.’ Jehova utawucinisa sandla nakudzingekile kodvwa abe nemusa nakufanele ente njalo. Ngako akukafaneli sicabange kutsi umuntfu angeke aze avuswe ngaphandle nangabe siciniseka ngaloko!

‘UMEHLULELI WEMHLABA WONKHE UTAWENTA LOKULUNGILE’

17. Kutawentekani kubantfu labafa?

¹⁷ Kusukela bo-Adamu na-Eva bavukela Jehova Nkulunkulu bakanye naSathane, sekufe tigidzigidzi tebantfu. ‘Sitsa lesikufa,’ besiloku sitentela nje! (1 Khor. 15:26) Kutawukwentekani kubo bonkhe labantfu? Licembu lelincane lebalandzeli baKhristu labetsembekile labangu-144 000 batawuvuselwa ezulwini futsi  angeke basafa. (Semb. 14:1) Sicumbi lesikhulu semadvodza nebafati labetsembekile futsi labatsandza Jehova batawuvuswa ngesikhatsi ‘kuvuswa labalungile’ futsi batawuphila emhlabeni kuze kube phakadze nangabe bahlala betsembekile ngesikhatsi Sekubusa KwaKhristu Kweminyaka Leyinkhulungwane nangesikhatsi seluvivinyo lwekugcina. (Dan. 12:13; Heb. 12:1) Ngetulu kwaloko, ngesikhatsi Sekubusa KwaKhristu, labo ‘labangakalungi,’ labafaka ekhatsi labo labangazange sebamkhonte Jehova, nobe “labo labente lokubi” batawunikwa litfuba lekushintja tindlela tabo futsi betsembeke. (Luk. 23:42, 43) Nobe kunjalo, labanye bantfu bebababi kakhulu kangangekutsi bebatimisele ngekuvukela Jehova kungako ancume kutsi angeke aze abavuse.​—Luk. 12:4, 5.

18-19. (a) Yini leyenta siyetsembe indlela Jehova latabehlulela ngayo labo labafile? (Isaya 55:8, 9) (b) Sitawucoca ngani esihlokweni lesilandzelako?

¹⁸ Singaciniseka mbamba yini kutsi Jehova nakehlulela bantfu uhlale enta sincumo lesikahle? Yebo! Abrahama bekakucondza kahle loko, bekati kutsi ‘uMehluleli wemhlaba wonkhe’ uphelele, uhlakaniphe ngelizinga leliphelele futsi unemusa. Uceceshe iNdvodzana yakhe futsi wawubeka emahlombe ayo wonkhe umsebenti wekwehlulela. (Joh. 5:22) Jehova naJesu bayakhona kuhlola inhlitiyo yemuntfu ngamunye. (Mat. 9:4) Ngako nabehlulela umuntfu ngamunye bahlale ‘benta lokulungile’!

¹⁹ Shengatsi singatimisela kwetsemba Jehova nato tonkhe tincumo takhe. Siyati kutsi nguye lokumfanele kuba ngumehluleli hhayi tsine! (Fundza Isaya 55:8, 9.) Kungako simetsemba Jehova neNdvodzana yakhe kutsi bente wonkhe umsebenti wekwehlulela. Ngetulu kwaloko, siyati kutsi iNkhosi yetfu Jesu itakulingisa ngelizinga leliphelele kwehlulela kahle kwaBabe wayo nemusa wakhe. (Isa. 11:3, 4) Kodvwa kukhona yini lesingakusho ngendlela Jehova naJesu labatawehlulela ngayo ngesikhatsi sekuhlupheka lokukhulu? Yini lesingayati? Yini lesiyatiko? Sihloko lesilandzelako sitawuphendvula lemibuto.