UMLANDVO WEKUPHILA
“Bengifuna Kusebentela Jehova”
SAVALELISA licembu lelincane lebantfu lebesibavakashele edvute neGranbori, ekhatsi ehlatsini laseSuriname. Sase sigibela sikebhe lesakhiwe ngelugodvo futsi sehla ngemfula iTapanahoni. Njengobe sengca emanti lamanyenti kulomfula, i-fan yalesikebhe yashayisa litje. Ngekushesha kwangena emanti ngembili, futsi sacwila. Inhlitiyo yami yashayela etulu. Nanobe besekuphele iminyaka ngingumbonisi wesigodzi futsi ngihamba ngetikebhe, bengingakwati kubhukusha!
Ngaphambi kwekutsi nginicocele kutsi kwase kwentekani, ase ngicale nginicocele kutsi ngawungenela njani umsebenti wasikhatsi sonkhe.
Ngatalwa nga-1942 esichingini lesihle saseCaribbean lokutsiwa yiCuraçao. Babe bekawaseSuriname, kodvwa watfutsela kulesichingi ngenca yemsebenti. Eminyakeni lembalwa ngaphambi kwekutsi ngitalwe, wabhajatiswa futsi waba ngulomunye waBoFakazi BaJehova bekucala eCuraçao. a Njalo ngeliviki bekadadisha natsi liBhayibheli nanobe besihle singafuni kufundza. Ngesikhatsi ngineminyaka lengu-14 satfutsela eSuriname kuze babe anakekele make wakhe losakhulile.
NGASITWA BANGANI LABAKAHLE
ESuriname, ngafike ngatihlanganisa nalabasha lebebakhona ebandleni, lebebakhutsele emsebentini waJehova. Bebabadzadlana kunami futsi bangemahlahlandlela lavamile. Nabacoca ngaloko lebekwentekile nabasenta umsebenti wekushumayela, bengibona nje kutsi buso babo bugcwele injabulo. Ngemuva kwemihlangano yelibandla, besicoca nangeliBhayibheli futsi ngalesinye sikhatsi besicoca sihleli ngephandle sibuka tinkhanyeti. Labangani bami bangisita ngabona kutsi yini lebengiyifuna ekuphileni; bengifuna kusebentela Jehova. Ngako ngabhajatiswa nangineminyaka lengu-16. Ngekuhamba kwesikhatsi, nangineminyaka lengu-18, ngacala kuba lihlahlandlela lelivamile.
NGAFUNDZA TIFUNDVO LETIBALULEKILE
Ngesikhatsi ngilihlahlandlela eParamaribo
Ngafundza tifundvo letinyenti nangiselihlahlandlela letingisite kakhulu nangisenta umsebenti wasikhatsi sonkhe. Sibonelo nje, lesinye sifundvo lengasifundza kubaluleka kwekucecesha labanye. Nangisandza kuba lihlahlandlela, lesinye sitfunywa selivangeli lokutsiwa nguWillem van Seijl sangicecesha. b Sangifundzisa lokunyenti mayelana nekutsi ngingayenta njani imisebenti ebandleni. Ngaleso sikhatsi, bengingati kutsi lokuceceshwa bengikudzinga kakhulu. Ngemnyaka lowalandzela ngaba lihlahlandlela lelikhetsekile futsi ngabese ngicala kusita emacembu lamancane lebekasekhatsi nekhatsi nelihlatsi laseSuriname. Ngajabula kakhulu ngalokuceceshwa labazalwane labanginika kona lokwefika ngesikhatsi! Kusukela ngaleso sikhatsi, ngatimisela kulingisa sibonelo sabo ngekutsi nami ngiceceshe labanye.
Sifundvo sesibili lengasifundza kutsi kuhle kuphila imphilo lemelula kodvwa lehlelwe kahle. Njalo nakucala inyanga, mine nalebengilihlahlandlela naye besibhala tintfo lesitatidzinga emavikini lalandzelako. Ngemuva kwaloko munye wetfu bekabese utsatsa luhambo loludze loluya edolobheni kuze ayotsenga letintfo. Bekufanele siyisebentise kahle imali lebesiyitfola futsi bekufanele singatimoshi letintfo kuze tisichube inyanga yonkhe. Nakwenteka siphelelwa ngulokutsite ehlatsini, bantfu labambalwa bebasisita nakhona nakwentekile. Kufundza kuphila imphilo lemelula kodvwa lehlelwe kahle kusukela ngisesemncane kungisitile kutsi ngichubeke nginake umsebenti waJehova kuphila kwami konkhe.
Sifundvo sesitsatfu lengasifundza kutsi kukahle kufundzisa bantfu ngelulwimi labalumunya. Ngakhula ngikhuluma siDutch, siNgisi, siPapiamento, nesiSranantongo (lwatiwa nangekutsi siSranan), lokutilwimi letikhulunywa eSuriname. Kodvwa labantfu lebebahlala emahlatsini bebativa ncono tindzaba letimnandzi nawubashumayela ngelulwimi labalumunya. Ngakutfola kumatima kukhuluma letinye taletilwimi, njengesiSaramaccan, ngobe lamanye emagama akhulunyelwa etulu lamanye akhulunyelwe phasi. Kodvwa ngajabula kutsi ngalufundza nanobe bekumatima. Kuleminyaka leminyenti ngilapho, ngakhona kufundzisa bantfu labanyenti liciniso ngobe bengikhuluma lulwimi lwabo.
Kuliciniso kutsi tikhona tikhatsi langahlazeka khona. Sibonelo nje, ngalelinye lilanga bengifuna kubuta lomunye make lebengidadisha naye liBhayibheli lokhuluma siSaramaccan kutsi sewunjani ngobe bekakhale ngekutsi kubuhlungu sisu. Kodvwa akusiko loko lengambuta kona. Ngambuta kutsi ukhulelwe yini, futsi loko akuzange kumphatse kahle. Nanobe bengihle ngenta emaphutsa lanjengalawa, bengetama kukhuluma lulwimi lwebantfu lebengibashumayela.
KWEMUKELA LEMINYE IMISEBENTI
Nga-1970, ngaba ngumbonisi wesigodzi. Ngaloyo mnyaka ngabukelisa emacembu lamanyenti kulelihlatsi i-video letsi, “Visiting the World Headquarters of Jehovah’s Witnesses.” Kuze sifike kulamacembu, mine nalabanye bazalwane besihamba emifuleni lekulelihlatsi ngesikebhe lesidze lesakhiwe ngelugodvo. Kulesikebhe bekune-generator, sigubhu sa-petrol, tibane ta-petrol, kanye nemshini wekudlala le-video. Nasifika lasiya khona, besitfutsetela letintfo sitiyise lasitawubukelela khona le-video. Lengikukhumbulako kutsi bantfu bakuletindzawo bebatsandza kuyibukela le-video. Bengikutsandza kusita bantfu kutsi bafundze ngaJehova nangenhlangano yakhe yasemhlabeni. Kubona labanye basondzelana naJehova kwangijabulisa ngobe bengisebente kamatima.
KUPHOTFWA INTSAMBO LENEMICU LEMITSATFU
Mine na-Ethel sashada ngaSeptember 1971
Nanobe kungashadi bekwenta kube melula ngami kutsi ngente umsebenti wami, kodvwa bengifuna kushada. Ngako ngathantaza ngalokucondzile ngacela umfati lotawukhona kubeketelela bumatima bekuba semsebentini wasikhatsi sonkhe kulelihlatsi. Ngemuva kwemnyaka, ngacala kutsandzana na-Ethel, lobekalihlahlandlela lelikhetsekile futsi anemoya wekutidzela. Kusukela asemncane, Ethel bekasitsandza sibonelo semphostoli Pawula futsi bekafuna kutinikela emsebentini wekushumayela njengaye. Sashada ngaSeptember 1971 futsi saba semsebentini wekujikeleta kanye kanye.
Ethel akakhulelanga emndenini lonetintfo letinyenti, ngako washeshe wakhona kuphila imphilo yasehlatsini. Sibonelo nje, nasilungiselela kuya kulamabandla lakulelihlatsi, besipakisha tintfo letimbalwa. Besiwasha futsi sigeza emfuleni. Besidla nobe ngabe yini bazalwane lebebasinika yona, kungaba ngema-iguana, ema-piranhas, nobe ngabe yini nje lenye lebebayitingele ehlatsini nobe bayidweba emifuleni. Nakute emapleti, besidlela emacembeni abhanana. Nakute tipunu, besidla ngesandla. Mine na-Ethel sabona kutsi kutidzela lesakwenta kanye kanye sisebentela Jehova kusisitile saba yintsambo lephotfwe ngemicu lemitsatfu. (Shu. 4:12) Letintfo letenteka asiyuze sitikhohlwe!
Ngalelinye lilanga nasibuya kuyovakashela bazalwane kulelihlatsi, kwenteka loku lengicoce ngako ekucaleni. Lesikebhe sashobela emantini, kodvwa sasheshe savumbuka. Lokuncono kutsi besigcoke ema-jacket lasita kutsi singacwili futsi asizange siphume kulesikebhe kodvwa lesikebhe sagcwala emanti. Sacitsa kudla lebekusemabhodweni futsi sasebentisa lamabhodo kuze sikhiphe emanti lebekakulesikebhe.
Ngenca yekutsi besesite kudla, sacala kudweba njengobe besihamba kulomfula. Kodvwa kute lesakutfola. Ngako sathantaza kuJehova samcela kutsi asiphe kudla kwangalelo langa. Ngemuva nje kwalomthantazo, lomunye umzalwane wajika lidweba lakhe futsi wabamba imfishi lenkhulu lebeyingasenela sonkhe futsi senele.
KUBA YINDVODZA, NGIBE NGUBABE, FUTSI NGIBE NGUMBONISI WESIGODZI
Ngemuva kweminyaka lesihlanu senta umsebenti wekujikeleta kanye kanye, mine na-Ethel satfola sibusiso lebesingakasigadzi, besesitawuba batali. Ngajabula nangiva loko nanobe bengingati kutsi loko bekutakutsintsa njani kuphila kwetfu. Mine na-Ethel besinesifiso lesikhulu sekuchubeka sisemsebentini wasikhatsi sonkhe. Nga-1976, satfola indvodzana yetfu yekucala lokutsiwa ngu-Ethniël. Ngemuva kweminyaka lemibili nehhafu saba nendvodzana yetfu yesibili lokutsiwa nguGiovanni.
Ngisemfuleni iTapanahoni edvute naseGodo Holo emphumalanga neSuriname futsi kuyabhajatiswa, nga-1983
Ngenca yekutsi bekunesidzingo ngaleso sikhatsi eSuriname, ligatja lahlela kutsi ngichubeke ngingumbonisi wesigodzi njengobe sikhulisa bantfwana betfu. Ngesikhatsi bantfwana betfu basebancane, ngacelwa kutsi ngiyojikeleta etigodzini lapho bekunemabandla lambalwa khona. Loko kwenta kutsi ngikhone kujikeleta emaviki lambalwa enyangeni futsi lamanye ngikhone kuba lihlahlandlela ebandleni lebesabelwe kulo. Bengihamba na-Ethel nebafana betfu nangihambela emabandla ladvutane nelikhaya letfu. Kodvwa bengihamba ngedvwana nangihambela emabandla lasehlatsini nobe nangiya emihlanganweni yesigodzi kulelihlatsi.
Nangenta umsebenti wekujikeleta bengivame kuhamba ngesikebhe nangivakashela emabandla lakhashane
Bekudzingeka ngihlele kahle kuze ngikhone kuyenta yonkhe imisebenti yami. Bengiciniseka kutsi njalo ngeliviki siyakwenta kukhonta kwemndeni. Nangihambile ngiyovakashela emabandla ehlatsini, Ethel bekachuba kukhonta kwemndeni nebafana betfu ekhaya. Nanobe kunjalo, besivame kwenta tintfo ndzawonye njengemndeni. Mine na-Ethel besitinika sikhatsi sekutijabulisa kanye nebafana betfu, besidlala imidlalo nobe sivakashele tindzawo letidvutane nelikhaya letfu. Bengivame kuphuta kulala ebusuku, solo ngilungiselela imisebenti yelibandla. Ngenca yekutsi Ethel ungumfati lomuhle lochazwe kuTaga 31:15, bekavuka lokwa ekuseni kuze aciniseke kutsi siwufundza kanye kanye umbhalo welusuku futsi sidla ndzawonye kudla kwasekuseni ngaphambi kwekutsi bafana betfu bahambe baye esikolweni. Ngijabula kakhulu ngekuba nemfati lotidzelako, lobekasolo angisita kutsi ngikhone kuyenta yonkhe imisebenti Jehova langinike yona!
Njengebatali, sasebenta matima kuze sisite bafana betfu kutsi batsandze Jehova nemsebenti wekushumayela. Besifuna bafana betfu bente umsebenti wasikhatsi sonkhe, kodvwa hhayi ngenca yekutsi nguloko lebesikufuna kodvwa ngenca yekutsi bekusincumo sabo. Besihlale sigcizelela kutsi kumnandzi kangakanani kwenta umsebenti wasikhatsi sonkhe. Besikhuluma nangebumatima lobebubakhona, kodvwa besigcizelela kutsi Jehova usisite kanjani nekutsi usibusise njani singumndeni. Besiphindze siciniseke kutsi emadvodzana etfu akha bangani naboFakazi lababeka Jehova kucala ekuphileni kwabo.
Jehova wasipha konkhe lebesikudzinga singumndeni. Kuliciniso kutsi bengenta konkhe lengingakwenta kuze ngisekele umndeni wami. Loko lokwenteka nangisehlatsini ngilihlahlandlela lelikhetsekile lelingakashadi, kwangifundzisa kutsi kufanele ngihlele kutsi yini lokutawudzingeka ngiyitsenge. Kodvwa nanobe besenta konkhe lebesingakwenta, ngaletinye tikhatsi besihle singabi nako konkhe lebesikudzinga. Ngaleto tikhatsi, Jehova bekasisita. Sibonelo nje, ngasekupheleni kwabo-1980 nasekucaleni kwabo-1990 kwaba nemibhikisho eSuriname. Kuleyo minyaka, bekuhle kuba lukhuni kutfola tintfo letibalulekile ekuphileni. Nanobe kunjalo, Jehova wasisita.—Mat. 6:32.
NANGIBUKA EMUVA
Kusukela ngesencele kuya ngesekudla: Nginemkami Ethel
Indvodzana yetfu lendzala Ethniël, nemkakhe Natalie
Indvodzana yetfu Giovanni nemkakhe Christal
Kuphila kwetfu konkhe Jehova bekasolo asinakekela futsi kusente sajabula kakhulu futsi senetiseka. Bantfwana betfu babe sibusiso kitsi futsi kubakhulisa kutsi bakhonte Jehova kube ligugu kitsi. Sijabula kakhulu ngekutsi nabo bakhetse kuba semsebentini wasikhatsi sonkhe. Bo-Ethniël naGiovanni baphotfulile etikolweni letilungiselelwa yinhlangano futsi nyalo bakhonta egatjeni leliseSuriname kanye nabomkabo.
Mine na-Ethel sesikhulile, futsi nyalo singemahlahlandlela lakhetsekile futsi solo simatasa ngemsebenti waJehova. Ecinisweni simatasa kangangekutsi solo angisitfoli sikhatsi sekufundza kubhukusha! Kodvwa angitisoli. Nangibuka emuva, ngiyajabula kutsi sincumo lengasenta sekuba semsebentini wasikhatsi sonkhe ngisemncane, sincumo lesihle kakhulu lengasenta.
