SIHLOKO LESIFUNDVWAKO 45
Indlela Jehova Lasisita Ngayo Kutsi Sente Umsebenti Wekushumayela
“Batawati kutsi bekukhona umphrofethi emkhatsini wabo.”—HEZ. 2:5.
INGOMA 67 “Shumayela LiVi”
LOKUTAWUCOCWA NGAKO KULESIHLOKO a
1. Yini lesingayilindzela, futsi yini lesingaciniseka ngayo?
SINGALINDZELA kutsi labanye bantfu basiphikise nasenta umsebenti wekushumayela. Kungenteka siphikiswe kakhulu esikhatsini lesitako. (Dan. 11:44; 2 Thim. 3:12; Semb. 16:21) Nobe kunjalo, singaciniseka kutsi Jehova utasisita. Yini lesenta sisho njalo? Jehova bekasolo atisita tinceku takhe kutsi tente imisebenti latinikete yona, ngisho nobe beyilukhuni kanganani. Kuze sitfole sibonelo saloko, ase sicoce ngaletinye tintfo letenteka kumphrofethi Hezekeli, lowashumayela emaJuda lebekatfunjwe eBhabhulona.
2. Yini Jehova layisho ngebantfu bebashunyayelwa nguHezekeli, futsi sitawucoca ngani kulesihloko? (Hezekeli 2:3-6)
2 Bebanjani bantfu bebashunyayelwa nguHezekeli? Jehova watsi ‘bebanenkhani,’ ‘banetinhlitiyo letilukhuni’ futsi ‘bavukela.’ Bebafana nemanyeva futsi bayingoti njengabofecela. Kungako Jehova atjela Hezekeli tikhatsi letinyenti watsi: ‘Ungesabi’! (Fundza Hezekeli 2:3-6.) Hezekeli wakhona kwenta umsebenti wakhe ngobe (1) bekatfunywe nguJehova, (2) umoya waNkulunkulu bewumniketa emandla futsi (3) emavi aNkulunkulu acinisa kukholwa kwakhe. Letintfo letintsatfu tamsita njani Hezekeli? Tisisita njani tsine lamuhla?
JEHOVA WATFUMA HEZEKELI
3. Ngumaphi emavi lokungenteka acinisa Hezekeli, futsi Jehova wamcinisekisa njani kutsi utamsekela?
3 Jehova watjela Hezekeli watsi: ‘Ngiyakutfuma.’ (Hez. 2:3, 4) Kungenteka lamavi amcinisa Hezekeli. Sisho ngani? Sisho ngobe kungenteka wakhumbula kutsi Jehova wasebentisa emavi lafanako ngesikhatsi atfuma Mosi na-Isaya kutsi babe baphrofethi bakhe. (Eks. 3:10; Isa. 6:8) Hezekeli bekati nekutsi Jehova bekabasite njani labaphrofethi lababili ngesikhatsi babhekene nebumatima. Ngako ngesikhatsi Jehova atjela Hezekeli tikhatsi letimbili atsi: ‘Ngiyakutfuma,’ lomphrofethi bekangetsemba kutsi Jehova utamsita. Ngetulu kwaloko, emavi latsi: “Livi laJehova lefika kimi,” avela tikhatsi letinyenti encwadzini yaHezekeli. (Hez. 3:16) Aphindze avele tikhatsi letinyenti emavi latsi: “Livi laJehova laphindze lefika kimi.” (Hez. 6:1) Hezekeli bekaciniseka kutsi utfunywe nguJehova. Ngetulu kwaloko, njengobe bekayindvodzana yemphristi, kungenteka babe wakhe bekamtjela kutsi Jehova bekasolo abacinisekisa baphrofethi bakhe kutsi utabasita. Sibonelo nje, Jehova watjela Isaka, Jakobe naJeremiya watsi: “Nginawe.”—Gen. 26:24; 28:15; Jer. 1:8.
4. Ngumaphi emavi lokungenteka acinisa Hezekeli?
4 Ema-Israyeli lamanyenti bekatakwemukela yini loko bekushiwo nguHezekeli? Jehova watsi: “Bantfu baka-Israyeli ngeke bavume kukulalela ngobe abafuni kungilalela.” (Hez. 3:7) Ngenca yekutsi labantfu abazange bamlalele Hezekeli, bekufana nekutsi abalaleli Jehova. Lamavi acinisekisa Hezekeli kutsi kungalaleli kwalabantfu bekungeke kusho kutsi wehlulekile kwenta umsebenti wakhe njengobe angumphrofethi. Jehova waphindze wacinisekisa Hezekeli kutsi nasekwenteka loko bekakumemetela, labantfu “batawukwati kutsi bekunemphrofethi emkhatsini wabo.” (Hez. 2:5; 33:33) Siyaciniseka kutsi lamavi aniketa Hezekeli emandla ekwenta umsebenti wakhe.
JEHOVA UYASITFUMA LAMUHLA
NjengaHezekeli, singahle siphikiswe nobe siphatfwe kabi, kodvwa siyati kutsi Jehova unatsi (Buka tigaba 5-6)
5. Ngekuvumelana na-Isaya 44:8, yini lesenta sibe nesibindzi?
5 Natsi sinesibindzi ngobe siyati kutsi sitfunywe nguJehova kutsi sishumayele. Ukhombise kutsi uyasitsandza ngekutsi asibite ngekutsi ‘sibofakazi’ bakhe. (Isa. 43:10) Loko kusijabulisa kakhulu! Njengobe Jehova atjela Hezekeli watsi: ‘Ungesabi,’ natsi uyasitjela utsi: “Ningesabi.” Yini lesenta singabesabi labo labasiphikisako? NjengaHezekeli, natsi sitfunywe nguJehova, futsi utasisita.—Fundza Isaya 44:8.
6. (a) Jehova usicinisekisa njani kutsi utasisekela? (b) Yini lesikhutsatako?
6 Jehova wetsembisa kutsi utasisita. Sibonelo nje, ngaphambi kwekutsi atsi: “Nine nibofakazi bami,” watsi: “Nawudzabula ekhatsi emantini, ngitawuba nawe, nawewela imifula, angeke ikukhukhule. Nawuhamba ekhatsi emlilweni, angeke ushe, nelilangabi angeke likuhashule.” (Isa. 43:2) Nasishumayela, sihle sibhekana netimo letifana netikhukhula futsi sihle sihlangana netinkinga letifana nemlilo. Nobe kunjalo, Jehova uyasisita kuze sichubeke sishumayela. (Isa. 41:13) Njengasemalangeni aHezekeli, bantfu labanyenti lamuhla abawemukeli umlayeto lesiwuphetse. Kodvwa sihlale sikhumbula kutsi kungalaleli kwabo akusho kutsi asiwenti kahle umsebenti wekushumayela. Kuyasikhutsata futsi kusicinise kwati kutsi Jehova uyajabula nasichubeka siwenta ngekwetsembeka lomsebenti. Umphostoli Pawula watsi: “Nguloyo naloyo utawutfola umvuzo kuye ngemsebenti lawentile.” (1 Khor. 3:8; 4:1, 2) Lomunye dzadze lesekuphele sikhatsi lesidze alihlahlandlela utsi: “Kuyangijabulisa kwati kutsi Jehova uyakubusisa loko lesikwentako.”
UMOYA WANKULUNKULU WANIKA HEZEKELI EMANDLA
Hezekeli wabona umbono lomayelana nenkalishi yaJehova yasezulwini lowamenta waciniseka kutsi Jehova utamsita kutsi awufeze umsebenti wakhe wekushumayela (Buka sigaba 7)
7. Kungenteka Hezekeli bekativa njani nakacabanga ngalombono lawubona? (Buka sitfombe lesisekhasini lekucala.)
7 Hezekeli wabona kutsi umoya waNkulunkulu bewunemandla kangakanani. Embonweni, wabona umoya longcwele usita tingilosi letinemandla futsi uhambisa emasondvo lamakhulu enkalishi yasezulwini. (Hez. 1:20, 21) Wenta njani nakabona loku? Naku lakusho. “Ngatsi nangikubona, ngaguca ngatsintsa ngebuso phansi.” Hezekeli wamangala kakhulu kangangekutsi waze waguca. (Hez. 1:28) Ngemuva kwesikhatsi, kungenteka njalo nje Hezekeli nakacabanga ngalombono bekaciniseka kakhulu kutsi umoya waNkulunkulu utamsita kuze awufeze kahle umsebenti wakhe.
8-9. (a) Loko lokwashiwo nguJehova kwamsita njani Hezekeli? (b) Yini Jehova layenta kuze achubeke acinisa Hezekeli?
8 Naku Jehova lakutjela Hezekeli: “Ndvodzana yemuntfu, sukuma ume ngetinyawo ngitewukhuluma nawe.” Loko lokwashiwo nguJehova kwamniketa emandla lebekawadzinga kuze asukume. Hezekeli wabhala watsi: “Kwangena umoya kimi, futsi lomoya wangenta ngema ngetinyawo.” (Hez. 2:1, 2) Kuso sonkhe lesikhatsi enta umsebenti wakhe, Hezekeli bekacondziswa “sandla” saNkulunkulu, lokungumoya longcwele waNkulunkulu. (Hez. 3:22; 8:1; 33:22; 37:1; 40:1) Umoya waNkulunkulu waniketa Hezekeli emandla ekushumayela bantfu ‘labanetingcondvo letilukhuni netinhlitiyo letilukhuni.’ (Hez. 3:7) Jehova watjela Hezekeli watsi: “Ngente buso bakho bacina njengebuso babo, ngenta nelibunti lakho lacina njengemabunti abo. Ngente libunti lakho lafanana nedayimane, lacina kwendlula litje lelicinile. Ungabesabi nobe wetfuswe buso babo.” (Hez. 3:8, 9) Bekungatsi Jehova utjela Hezekeli utsi: ‘Ungavumeli labantfu labanetingcondvo letilukhuni bakucedze emandla. Mine ngitakusita.’
9 Ngemuva kwaloko, umoya waNkulunkulu wasita Hezekeli kutsi awente lomsebenti wekushumayela. Hezekeli wabhala watsi: “Emandla aJehova asebenta ngelizinga lelikhulu kimi.” Kwamtsatsa liviki lomphrofethi kutsi awucondze kahle lomlayeto kuze atoshumayela ngesibindzi. (Hez. 3:14, 15) Jehova wabese umtjela kutsi akaye esihosheni futsi nakefika lapho, “umoya waNkulunkulu wabese uyangena” kuye. (Hez. 3:23, 24) Hezekeli besekakulungele kucala lomsebenti wekushumayela.
UMOYA LONGCWELE USINIKA EMANDLA
NjengaHezekeli, yini natsi lesisitako lamuhla kutsi sente umsebenti wekushumayela? (Buka sigaba 10)
10. Yini lengasisita kuze sichubeke senta umsebenti wetfu wekushumayela, futsi leni?
10 Yini lengasisita kutsi sikhone kwenta umsebenti wekushumayela? Kuze sitfole imphendvulo, cabanga ngaloko lokwenteka kuHezekeli. Ngaphambi kwekutsi acale kwenta umsebenti wekushumayela, umoya waNkulunkulu wamniketa emandla lebekawadzinga. Njengobe bekunjalo nangaHezekeli, natsi singakhona kuwenta lomsebenti wekushumayela nangabe nje sisitwa ngumoya waNkulunkulu. Sisho ngani? Ngobe Sathane ulwa natsi futsi ufuna kuwumisa lomsebenti wekushumayela. (Semb. 12:17) Bantfu labanyenti bacabanga kutsi Sathane angakhona kukwenta loko ngobe unemandla kakhulu. Kodvwa siyamncoba sisebentisa umsebenti wekushumayela! (Semb. 12:9-11) Kanjani? Nasishumayela, sisuke sikhombisa kutsi asimesabi Sathane. Ngaso sonkhe sikhatsi nasishumayela sisuke sincoba Sathane. Ngako yini lesingaphetsa ngayo nasibona kutsi siyakhona kuchubeka sishumayela ngisho siphikiswa? Singaphetsa ngekutsi Jehova usipha emandla asebentisa umoya wakhe longcwele futsi uyasemukela.—Mat. 5:10-12; 1 Phet. 4:14.
11. Utasisita njani umoya longcwele waNkulunkulu, futsi yini lokufanele siyente kuze sichubeke siwutfola?
11 Yini lenye lesiyifundzako nasicabanga ngekutsi Jehova waniketa Hezekeli emandla lebekawadzinga kuze akhone kushumayela? Umoya waNkulunkulu ungasiniketa emandla lesiwadzingako kuze sikhone kubhekana nanobe nguyiphi inkinga emsebentini wekushumayela. (2 Khor. 4:7-9) Yini lesingayenta kuze sichubeke sitfola umoya waNkulunkulu? Kufanele sichubeke siwucela, siciniseka kutsi Jehova utayiva imithantazo yetfu. Jesu wafundzisa bafundzi bakhe watsi: “Chubekani nicela, . . . chubekani nifuna, . . . chubekani ninconcotsa.” Jehova utawubese ubapha “umoya longcwele labo labamcelako.”—Luk. 11:9, 13; Imis. 1:14; 2:4.
KUKHOLWA KWAHEZEKELI KWACINISWA NGEMAVI ANKULUNKULU
12. Ngekusho kwaHezekeli 2:9–3:3, lomculu bewubuyaphi futsi yini lebeyibhalwe kuwo?
12 Hezekeli akagcinanga nje ngekusitwa ngumoya waNkulunkulu, kodvwa wasitwa nangemavi aNkulunkulu. Embonweni, Hezekeli wabona sandla siphetse umculu. (Fundza Hezekeli 2:9–3:3.) Bewuvela kuphi lomculu? Bewubhalwe kutsini? Wamsita njani Hezekeli? Ase sibone. Lomculu bewuvela esihlalweni sebukhosi saNkulunkulu. Kungenteka Jehova wasebentisa yinye kuletingilosi letine letabonwa nguHezekeli kuze imnikete lomculu. (Hez. 1:8; 10:7, 20) Lomculu bewungemavi aNkulunkulu, lebekungemavi esehlulelo lebekufanele kutsi Hezekeli awatjele labantfu lebebatfunjiwe futsi labavukelako. (Hez. 2:7) Lomlayeto bewubhalwe ngembili nangemuva kwalomculu.
13. Yini Jehova latjela Hezekeli kutsi ayente ngalomculu, futsi yini lebeyenta kutsi unongotele?
13 Jehova watjela lomphrofethi kutsi adle lomculu futsi ‘agcwalise sisu sakhe ngawo.’ Hezekeli walalela futsi wawudla wonkhe lomculu. Bekusho kutsini loku? Hezekeli bekufanele awucondze kahle lomlayeto lebekatawumemetela. Bekufanele awetsembe lomlayeto kuze abe nesifiso sekushumayela. Ngemuva kwaloko, kwenteka intfo lemangalisako. Hezekeli weva kutsi lomculu “bewunongotela njengeluju.” (Hez. 3:3) Bekubangelwa yini loko? KuHezekeli, kumelela Jehova bekumnanzi nobe kumjabulisa. (Hla. 19:8-11) Bekajabula kutsi Jehova umkhetsile kutsi abe ngumphrofethi wakhe.
14. Yini leyasita Hezekeli kutsi akulungele kahle kwenta umsebenti wakhe?
14 Ngekuhamba kwesikhatsi, Jehova watjela Hezekeli watsi: “Lalela onkhe emavi lengikutjela wona futsi uwafake enhlitiyweni yakho.” (Hez. 3:10) Ngalamavi, Jehova bekatjela Hezekeli kutsi awagcine enhlitiyweni yakhe emavi alomculu futsi acabangisise ngawo. Nakakwenta loko, kukholwa kwakhe bekutawucina kakhulu. Ngetulu kwaloko, lomculu wamniketa umlayeto lonemandla lebekufanele awutjele labantfu. (Hez. 3:11) Ngesikhatsi Hezekeli sekawucondza kahle umlayeto waNkulunkulu futsi sekawetsemba, besekakulungele kucala ente umsebenti wakhe futsi achubeke awenta aze awucedze.—Catsanisa neTihlabelelo 19:14.
EMAVI ANKULUNKULU ACINISA KUKHOLWA KWETFU
15. Kuze sihlale senta umsebenti wekushumayela, yini lokufanele ‘siyifake etinhlitiyweni’ tetfu?
15 Kuze sihlale senta umsebenti wekushumayela, natsi kufanele sichubeke sivumela emavi aNkulunkulu acinise kukholwa kwetfu. Kufanele ‘sikufake enhlitiyweni’ konkhe Jehova lasitjela kona. Lamuhla, Jehova ukhuluma natsi asebentisa liVi lakhe liBhayibheli. Yini lesingayenta kuze siciniseke kutsi liVi laNkulunkulu liyakutsintsa loko lesikucabangako, indlela lesitiva ngayo kanye netifiso tetfu?
16. Yini lokufanele siyente ngeliVi laNkulunkulu, futsi yini lesingayenta kuze silicondze kahle?
16 Nasidla kudla, futsi kugayeka, imitimba yetfu iyacina. Ngendlela lefanako, nasidadisha liVi laNkulunkulu futsi sicabangisisa ngalo, kukholwa kwetfu kuyacina. Kufanele sihlale sikukhumbula loko lesikufundze kulendzaba yemculu. Jehova ufuna ‘sigcwalise tisu tetfu’ ngeliVi lakhe, lokusho kutsi kufanele silicondze kahle. Loko singakwenta ngekutsi sithantaze, sifundze liVi lakhe futsi sizindle ngalesikufundza kulo. Kwekucala, siyathantaza kuze silungise tinhlitiyo tetfu kutsi tilungele kutfola imicabango yaNkulunkulu. Ngemuva kwaloko, sifundza liBhayibheli. Sibese siyema, kuze sicabangisise ngaloko lesikufundzile. Utawuba yini umphumela nasenta njalo? Nasichubeka sicabangisisa ngaloko lesikufundzile, sitalicondza kancono liVi laNkulunkulu futsi loko kutawucinisa kukholwa kwetfu.
17. Kubaluleke ngani kucabangisisa ngaloko lesikufundza eBhayibhelini?
17 Kubaluleke ngani kufundza liBhayibheli futsi sizindle ngalesikufundza kulo? Loko kutasisita kutsi sibe nemandla lesiwadzingako kuze sishumayele umlayeto weMbuso nyalo, futsi kutasisita kutsi sishumayele umlayeto wesehlulelo lonemandla lokungenteka siwumemetele esikhatsini lesitako. Ngetulu kwaloko, nasicabangisisa ngebuntfu baJehova lobuhle, sitawusondzelana kakhulu naye. Loko kutawusenta sibe nalokutsite lokunongotelako nobe lokumnandzi kakhulu, lokukuthula kwangekhatsi nekwenetiseka.—Hla. 119:103.
SITIMISELE KUCINISELA
18. Yini bantfu labatayibona, futsi leni?
18 Hezekeli bekangumphrofethi, kodvwa tsine asisibo. Nobe kunjalo, sitimisele kuchubeka simemetela umlayeto waJehova lawugcine eVini lakhe kuze kube ngulapho atsi sekwenele. Nakufika sikhatsi sekwehlulela, bantfu batawuba bete sizatfu sekutsi abakasitfoli secwayiso nobe sekutsi Nkulunkulu ubashiyele ngephandle. (Hez. 3:19; 18:23) Kunaloko, batawubona kutsi lomlayeto besisolo siwumemetela bewuvela kuNkulunkulu.
19. Yini letasisita kutsi sibe nemandla ekwenta umsebenti wekushumayela?
19 Yini letasisita kutsi sibe nemandla ekwenta umsebenti wekushumayela? Nguletintfo letintsatfu letasita Hezekeli. Siyachubeka sishumayela ngobe siyati kutsi sitfunywe nguJehova, umoya wakhe longcwele usipha emandla, futsi liVi lakhe licinisa kukholwa kwetfu. Ngekusitwa nguJehova, siyakhutsateka kutsi sichubeke senta umsebenti wetfu wekushumayela futsi sicinisele “kuze kube sekugcineni.”—Mat. 24:13.
INGOMA 65 Chubekela Embili!
a Kulesihloko, sitawucoca ngetintfo letintsatfu letasita umphrofethi Hezekeli kutsi ente umsebenti wekushumayela. Sitawucoca ngekutsi Jehova wamsita njani lomphrofethi, futsi loko kutasicinisekisa kutsi natsi utasisita kuze sente umsebenti wetfu wekushumayela.