1-2. (a) Ngumiphi imibuto lesitawucoca ngayo? (b) Yini lekhombisa kutsi Jehova unesifiso lesikhulu sekusisita?

 JEHOVA angasisita kutsi sibeketelele tinkinga lesibhekana nato ekuphileni futsi sitfole injabulo emsebentini lesimentela wona. Usisita njani? Yini lesingayenta kuze sizuze kulolusito lasiniketa lona? Lemibuto itawuphendvulwa kulesihloko. Kodvwa ngaphambi kwekutsi siyiphendvule, asesicale sicoce ngembuto lotsi: Jehova ufuna mbamba yini kusisita?

² Ligama lelasetjentiswa ngumphostoli Pawula encwadzini layibhalela emaHebheru lingasisita kutsi sitfole imphendvulo. Pawula wabhala watsi: “Jehova ungumsiti wami; angeke ngesabe. Umuntfu angangentani nje?” (Heb. 13:6) Lenye incwadzi itsi ligama lelitsi ‘umsiti’ lelisetjentisiwe kulelivesi, lisho umuntfu logijimela kuyosita lomunye umuntfu lokhalela lusito. Mbone ngeliso lengcondvo Jehova agijimela kuyosita umuntfu locindzetelekile. Lesitfombe lonaso engcondvweni siveta kahle kutsi Jehova unesifiso lesikhulu sekusisita futsi uyakulangatelela. Nasisitwa nguJehova, singakhona kubeketelela tinkinga tetfu sibe sijabulile.

3. Ngutiphi tindlela letintsatfu Jehova latisebentisako kuze asisite sibeketelele tinkinga tetfu sibe sijabulile?

³ Ngutiphi letinye tindlela Jehova latisebentisako kuze asisite sibeketelele tinkinga tetfu sibe sijabulile? Kuze siphendvule, asesicoce ngencwadzi ya-Isaya. Leni? Ngobe tiphrofetho letinyenti Isaya laphefumulelwa kutsi atibhale tiyasebenta kubantfu baNkulunkulu lamuhla. Ngetulu kwaloko, Isaya nakachaza  Jehova uvame kusebentisa emagama lamelula kutsi siwacondze. Sibonelo saloko siku-Isaya sehluko 30. Kulesehluko, Isaya usebentisa imifanekiso lemelula kuze achaze indlela Jehova lasisita ngayo (1) ngekutsi asilalelisise futsi aphendvule imithantazo yetfu, (2) ngekutsi asinike sicondziso, (3) nangekutsi asibusise nyalo nasesikhatsini lesitako. Asesicoce ngaletindlela letintsatfu Jehova lasisita ngato.

4. (a) Jehova wawachaza njani emaJuda angesikhatsi sa-Isaya, futsi yini lavumela kutsi yenteke? (b) Nguliphi litsemba Jehova lalinika emaJuda letsembekile? (Isaya 30:18, 19)

⁴ Ekucaleni kwa-Isaya sehluko 30, Jehova uchaza emaJuda ngekutsi ‘madvodzana lanenkhani,’ ‘lengeta sono etikwalesinye.’ Uchubeka atsi: ‘Babantfu labavukelako, . . . labangakatimiseli kulalela umtsetfo waJehova.’ (Isa. 30:1, 9) Ngenca yekutsi labantfu bebangafuni kulalela, Isaya waphrofetha kutsi Jehova utawuvumela kutsi behlelwe yinhlekelele. (Isa. 30:5, 17; Jer. 25:8-11) Vele loko kwenteka, batfunjelwa eBhabhulona. Nobe kunjalo, kukhona lebebetsembekile emkhatsini wabo, futsi Isaya wabatjela umlayeto lowabaniketa litsemba. Wabatjela kutsi ngalelinye lilanga Jehova bekatawuphindze ababuyisele eveni labo. (Fundza Isaya 30:18, 19.) Nguloko kanye lokwenteka. Jehova wabakhulula ekutfunjweni. Nobe kunjalo, bebangeke baze bakhululwe ngaleso sikhatsi. Emavi latsi “Jehova ulindze ngesineke kuze anentele umusa” akhombisa kutsi bekutawendlula sikhatsi lesitsite ngaphambi kwekutsi ema-Israyeli letsembekile akhululwe. Ecinisweni, kwaphela iminyaka lengu-70 atfunjelwe eBhabhulona ngaphambi kwekutsi lamanye avunyelwe kubuyela eJerusalema. (Isa. 10:21; Jer. 29:10) Ngesikhatsi ema-Israyeli atfunjelwe eBhabhulona, bekakhala ngenca yelusizi, kodvwa nasekaseveni lawo, tinyembeti tawo tagucuka taba tenjabulo.

5. Umbhalo wa-Isaya 30:19 usicinisekisa ngani?

⁵ Angasidvudvuta lamuhla emavi latsi: “Nakanjani utanentela umusa nakeva kukhalela kwenu lusito.” (Isa. 30:19) Isaya uyasicinisekisa kutsi Jehova utasilalelisisa nakasiva sikhala kuye futsi utayiphendvula ngekushesha imithantazo yetfu. Isaya wengeta watsi: “Utaniphendvula ngekushesha.” Lamavi lasicinisekisako ayasikhumbuta kutsi Babe wetfu unesifiso lesikhulu futsi utimisele kusisita nasicela lusito. Kwati loku kusisita kutsi sicinisele sibe sijabulile.

6. Emavi laku-Isaya akhombisa njani kutsi Jehova ulalela umthantazo wesikhonti sakhe ngasinye?

⁶ Yini lenye lelivesi lelisicinisekisa ngayo mayelana nemithantazo yetfu? Jehova ulalela umthantazo wangamunye nangamunye wetfu. Sisho ngani? Encenyeni yekucala ya-Isaya sehluko 30, akukhulunywa nemuntfu munye, kodvwa Jehova ukhuluma nebantfu bakhe balicembu. Nobe kunjalo, ngesiHebheru, kuvesi 19 Jehova ukhuluma nemuntfu ngamunye. Isaya wabhala watsi: “Angeke ukhale”; “nakanjani utakwentela umusa”; “utakuphendvula ngekushesha.” Njengobe Jehova anguBabe lonelutsandvo, akayitjeli indvodzana yakhe nobe indvodzakati yakhe ledvumatekile atsi, “Cina ube nemandla njengabhuti wakho nobe njengasisi wakho.” Kunaloko, unendzaba nemuntfu ngamunye futsi ulalela umthantazo wangamunye nangamunye wetfu.​—Hla. 116:1; Isa. 57:15.

7. Isaya naJesu bakuveta njani kubaluleka kwekutsi sichubeke sithantaza?

⁷ Nasithantaza kuNkulunkulu futsi simtjela ngenkinga lesikhatsatako, Jehova angacale asinike emandla lesiwadzingako kuze sikhone  kuyibeketelela. Nangabe lenkinga ingalungi ngesikhatsi lebesifise kutsi ilunge ngaso, kungahle kudzingeke kutsi sichubeke sicela Jehova kutsi asiphe emandla ekuyibeketelela. Nguloko kanye lasikhutsata kutsi sikwente. Loko kuvela kahle kulamavi lashiwo ngu-Isaya latsi: “Ningamniki [Jehova] kuphumula.” (Isa. 62:7) Kusho kutsini loku? Kusho kutsi kufanele sihlale sithantaza kuJehova, kube shengatsi asimniketi litfuba lekuphumula. Emavi a-Isaya asikhumbuta imifanekiso yaJesu lemayelana nekuthantaza letfolakala kuLukha 11:8-10, 13. Kulamavi, Jesu wasikhutsata kutsi sithantaze ‘sibelesele’ futsi ‘sichubeke sicela’ umoya longcwele. Singaphindze simcele Jehova kutsi asinike sicondziso kuze sente tincumo letikahle.

8. Emavi laku-Isaya 30:20, 21 agcwaliseka njani esikhatsini lesendlulile?

⁸ Fundza Isaya 30:20, 21. Ngesikhatsi libutfo laseBhabhulona livimbetele iJerusalema umnyaka nehhafu, bantfu besebacindzeteleke kakhulu kangangekutsi besekuyintfo levamile kubo. Kodvwa ngekusho kwavesi 20 na-21, Jehova wetsembisa emaJuda kutsi utawasindzisa nangabe aphendvuka futsi ashintja indlela lebekaphila ngayo. Ngesikhatsi Isaya akhuluma ngaJehova kutsi ‘unguMfundzisi wabo Lomkhulu,’ wetsembisa labantfu kutsi Jehova utabafundzisa kutsi nguyiphi indlela lekahle lebekufanele bamkhonte ngayo. Lamavi agcwaliseka ngesikhatsi lamaJuda akhululwa ekutfunjweni. Jehova wakhombisa kutsi unguMfundzisi wawo Lomkhulu, futsi ngekucondziswa nguye, lamaJuda aphumelela kubuyisela kukhonta lokuhlantekile. Sijabula kakhulu lamuhla ngekutsi Jehova unguMfundzisi wetfu Lomkhulu.

9. Nguyiphi lenye indlela Jehova lasicondzisa ngayo lamuhla?

⁹ Kulamavesi, Isaya usifananisa nebafundzi labafundziswa nguJehova ngetindlela letimbili. Yekucala, Isaya utsi: “Nitambona uMfundzisi wenu Lomkhulu ngemehlo enu.” Kulomfanekiso, uMfundzisi uvetwa eme embikwebafundzi bakhe. Siyajabula ngekutsi Nkulunkulu uyasifundzisa lamuhla. Usifundzisa njani Jehova? Usebentisa inhlangano yakhe. Sibonga kakhulu ngeticondziso lesititfola enhlanganweni yakhe! Ticondziso lesititfola emihlanganweni yelibandla, emihlanganweni lemikhulu, etincwadzini tetfu, emisakatweni ye-JW kanye nangaletinye tindlela tisisita kutsi sikhone kubeketelela tinkinga sibe sijabulile.

10. Sisho ngani kutsi siva ‘livi emvakwetfu’?

 ¹⁰ Isaya wakhuluma ngalenye indlela Jehova lasifundzisa ngayo, watsi: “Tindlebe tenu titawuva livi emvakwenu.” Lomphrofethi watsi Jehova ufana nemfundzisi lohamba ngemuva kwalabo labafundzisako, abatjele kutsi nguyiphi indlela lokufanele bahambe ngayo futsi abacondzise. Lamuhla siva liVi laNkulunkulu emvakwetfu. Kanjani? Emavi aNkulunkulu laphefumulelwe latfolakala eBhayibhelini abhalwa kadzeni, esikhatsini lesingemuva, sisengakabi khona. Ngako nasifundza liBhayibheli, kuba shengatsi siva liVi laNkulunkulu emvakwetfu.​—Isa. 51:4.

11. Yini lokufanele siyente kuze sicinisele sibe sijabulile, futsi leni?

¹¹ Yini lesingayenta kuze sizuze kakhulu kulesicondziso Jehova lasinika sona asebentisa inhlangano yakhe neliVi lakhe? Naka kutsi Isaya washo tintfo letimbili. Kwekucala watsi, “nayi indlela.” Kwesibili watsi, “hambani ngayo.” (Isa. 30:21) Akukeneli nje kwati ‘lendlela.’ Kodvwa kufanele ‘sihambe ngayo.’ LiVi laJehova lesilichazelwa yinhlangano yakhe, lisifundzisa loko lakulindzele kitsi. Siphindze sifundze kutsi singakusebentisa njani loko lesikufundzako. Kuze sikhone kucinisela sibe sijabulile emsebentini waJehova, kufanele sitente totimbili letintfo. Nasenta njalo, singaciniseka kutsi Jehova utasibusisa.

12. Jehova bekatababusisa njani bantfu bakhe njengobe kuvetwe ku-Isaya 30:23-26?

¹² Fundza Isaya 30:23-26. Lesiphrofetho sagcwaliseka njani kumaJuda labuyela ka-Israyeli ngemuva kwekutfunjwa eBhabhulona? Jehova wawanika tintfo letinyenti letawasita kutsi achubeke aphila futsi achubeke amkhonta. Jehova wabusisa labantfu ngekudla lokunyenti. Kodvwa lokubaluleke kakhulu kutsi wabanika konkhe lebebakudzinga kuze basondzelane naye futsi baphindze bamkhonte ngendlela lekahle. Bantfu baNkulunkulu ngaleso sikhatsi bebangakake batfole tintfo letinyenti letivela kuye. Vesi 26 ukhombisa kutsi Jehova wabanika kukhanya, lokusho kutsi wabasita bacondza liVi lakhe. (Isa. 60:2) Letibusiso tasita bantfu bakhe kutsi bachubeke bamkhonta bajabulile nangemdlandla “ngenca yenhlitiyo lejabulile.”​—Isa. 65:14.

13. Sigcwaliseke njani lamuhla siphrofetho lesimayelana nekubuyiselwa kwekukhonta lokuhlantekile?

¹³ Lesiphrofetho lesimayelana nekubuyiselwa kwekukhonta lokuhlantekile siyasebenta yini lamuhla? Yebo! Kanjani? Kusukela  nga-1919 C.E., tigidzi tebantfu tikhululekile ekugcilatweni yiBhabhulona Lenkhulu, lokungumbuso wemhlaba wenkholo yemanga. Ticondziswe endzaweni lencono kakhulu kuneLive Lesetsembiso lelanikwa ema-Israyeli. Ticondziswe epharadisi lelingumfanekiso. (Isa. 51:3; 66:8) Liyini lelipharadisi lelingumfanekiso?

14. Liyini lipharadisi lelingumfanekiso, futsi bobani labahlala khona lamuhla? (Buka Inchazelo Yeligama.)

¹⁴ Kusukela nga-1919 C.E., labagcotjiwe bebahlala epharadisi lelingumfanekiso. b Njengobe sikhatsi sichubeka, nalabo labanelitsemba lekuphila emhlabeni, ‘lokunguletinye timvu,’ nabo babese bayahlala kulendzawo lengumfanekiso futsi batfola tibusiso letinyenti.​—Joh. 10:16; Isa. 25:6; 65:13.

15. Likuphi lipharadisi lelingumfanekiso?

¹⁵ Likuphi lelipharadisi lelingumfanekiso lamuhla? Tikhonti taJehova titfolakala emhlabeni wonkhe. Ngako, lelipharadisi lelingumfanekiso lisemhlabeni wonkhe. Lamuhla, ngisho nobe sihlala kuphi, singaba sepharadisi lelingumfanekiso nangabe nje sisekela kukhonta kweliciniso.

16. Yini lesingayenta kuze sichubeke sibona buhle balelipharadisi lelingumfanekiso?

¹⁶ Kuze sichubeke sihleli epharadisi lelingumfanekiso, kufanele sichubeke sibatsandza kakhulu bazalwane betfu emhlabeni wonkhe. Singakwenta njani loku? Ngekutsi sinake lokuhle kulabo labahlala kulendzawo, hhayi emaphutsa abo. (Joh. 17:20, 21) Kubaluleke ngani loku? Cabanga nganangu umfanekiso. Silindzele kubona tihlahla letehlukahlukene e-park lenhle. Ngendlela lefanako, emabandleni lesikuwo lamuhla kunebazalwane nabodzadze labehlukahlukene lesingabafananisa netihlahla. (Isa. 44:4; 61:3) Kufanele sitimisele kuchubeka sinaka lokuhle kulelihlatsi kunekutsi sinake lokubi “lokusesihlahleni” ngasinye lesiseceleni kwetfu. Kufanele singawavumeli emaphutsa etfu nobe ebazalwane nabodzadze ebandleni kutsi asente singasabunaki buhle bebazalwane betfu nabodzadze emhlabeni wonkhe.

17. Yini ngamunye wetfu langayenta kuze kube nebunye ebandleni?

 ¹⁷ Yini ngamunye wetfu langayenta kuze kube nebunye? Kufanele sikutsandze kuthula. (Mat. 5:9; Rom. 12:18) Ngaso sonkhe sikhatsi nasenta kube nekuthula ebandleni, sisuke senta kutsi libe lihle lelipharadisi lelingumfanekiso. Sihlale sikhumbula kutsi Jehova udvonse ngamunye walabo labakulelipharadisi lelingumfanekiso ekukhonteni lokuhlantekile. (Joh. 6:44) Cabanga nje kutsi Jehova ujabula kangakanani nakasibona sisebenta kamatima kuze kube nekuthula nebunye emkhatsini webantfu labaligugu kuye, lokutikhonti takhe!​—Isa. 26:3; Hag. 2:7.

18. Yini lokufanele sicabangisise ngayo, futsi leni?

¹⁸ Yini lesingayenta kuze sizuze kakhulu kuletibusiso letitfolwa tikhonti taNkulunkulu? Singacabangisisa ngaloko lesikufundza eVini laNkulunkulu nasetincwadzini letisekelwe kulo. Kudadisha nekuzindla kutasisita kutsi sibe nebuntfu bebuKhristu, lobutasenta sitsandzane “ngelutsandvo lwebuzalwane” ebandleni. (Rom. 12:10) Nasicabangisisa ngetintfo Jehova lasibusisa ngato nyalo, buhlobo betfu naye butawucina. Ngetulu kwaloko, nasicabangisisa ngetibusiso latawusipha tona esikhatsini lesitako, loko kutawulenta licine litsemba letfu lekumkhonta kuze kube phakadze. Konkhe loku kutawenta kutsi sichubeke sikhonta Jehova sibe sijabulile nyalo.

19. (a) Ngekusho kwa-Isaya 30:18, yini lesingaciniseka ngayo? (b) Yini letasisita kutsi sicinisele sibe sijabulile?

¹⁹ Jehova “utawusukuma” futsi avikele bantfu bakhe nakabhubhisa lelive lelibi. (Isa. 30:18) Siyaciniseka kutsi Jehova, ‘longuNkulunkulu lowehlulela ngekulunga,’ angeke avume kutsi lelive laSathane lengce sikhatsi lasibekile, angeke avume kutsi lengce nangelilanga linye. (Isa. 25:9) Lelilanga lekukhululwa sililindzele ngesineke sikanye naJehova kutsi lifike. Njengobe sisengakefiki leso sikhatsi, sitimisele kuchubeka sithantaza, sidadisha liVi laNkulunkulu futsi sikusebentisa loko lesikufundzako, ngetulu kwaloko sicabangisise ngetibusiso lesititfolako. Nasenta njalo, Jehova utasisita kutsi sicinisele sibe sijabulile ekumkhonteni.