SIHLOKO LESIFUNDVWAKO 45
INGOMA 138 Buhle Ekukhuleni
Fundza Emagameni Ekugcina Lashiwo Ngemadvodza Letsembekile
“Kuhlakanipha akutfolakali yini kulasebakhulile, futsi kucondza akutfolakali yini kulabo lasebaphile sikhatsi lesidze?”—JOBE 12:12.
LOKUTAWUCOCWA NGAKO
Kulalela Jehova Nkulunkulu kwenta sitfole tibusiso nyalo, futsi kuholela nasekuphileni lokuphakadze.
1. Sisho ngani kutsi singafundza kulasebakhulile?
SONKHE siyasidzinga sicondziso nasenta tincumo letibalulekile ekuphileni. Letinye taleticondziso singatitfola kulabadzala belibandla nakulamanye emaKhristu lavutsiwe. Akukafaneli singasilaleli sicondziso sabo nangabe babadzala kakhulu kunatsi, sititjele kutsi sesiphelelwe sikhatsi. Jehova ufuna sifundze kulasebakhulile. Sebabe nesikhatsi lesinyenti kunatsi sekutfola lwati, kucondza nekuhlakanipha.—Jobe 12:12.
2. Yini lesitawucoca ngayo kulesihloko?
2 Ngetikhatsi tekubhalwa kweliBhayibheli, Jehova wasebentisa labanye labakhulile futsi labetsembekile kuze bakhutsate baphindze bacondzise bantfu bakhe. Cabanga ngesibonelo saMosi, saDavide nesemphostoli Johane. Baphila ngetikhatsi letingafani, nangephansi kwetimo letehluke kakhulu. Nasebatawufa, baniketa labasebasha seluleko lesihlakaniphile. Lamadvodza letsembekile agcizelela kubaluleka kwekulalela Nkulunkulu. Jehova wasigcinela lamavi awo lahlakaniphile. Ngisho nobe sisebancane nobe sesikhulile, kungasisita kufundza ngeseluleko sawo. (Rom. 15:4; 2 Thim. 3:16) Kulesihloko, sitawucoca ngemavi ekugcina lashiwo ngulamadvodza lamatsatfu lakhulile, naloko lesingakufundza kuloko lakusho.
“NITAWUHLALA SIKHATSI LESIDZE”
3. Ngumiphi imisebenti leyentiwa nguMosi?
3 Mosi bekatinikele ngalokuphelele kuJehova. Waba ngumphrofethi, umehluleli, umholi nembhali. Wafundza lokunyenti kulebekwenteke ekuphileni kwakhe! Wahola sive sema-Israyeli wasikhipha ekugcilatweni eGibhithe, futsi watibonela ngewakhe timangaliso letentiwa nguJehova. Jehova wamsebentisa kuze abhale tincwadzi tekucala letisihlanu teliBhayibheli, Tihlabelelo 90, futsi kungenteka wabhala neTihlabelelo 91. Kungenteka futsi wabhala incwadzi yaJobe.
4. Bobani Mosi labakhutsata, futsi ngasiphi sizatfu?
4 Ngaphambi kwekutsi Mosi afe, ngesikhatsi aneminyaka lengu-120, wabita onkhe ema-Israyeli wawakhumbuta ngetintfo lebekatibonile nalebetenteke kuwo. Ngesikhatsi lamanye asemasha, bekabone tibonakaliso letinyenti kanye netimangaliso lebetentiwe nguJehova, abona nendlela labehlulela ngayo bantfu baseGibhithe. (Eks. 7:3, 4) Abona Jehova ehlukanisa Lwandle Lolubovu ahamba emhlabatsini lowomile, aphindze abona Jehova abhubhisa Faro nelibutfo lakhe. (Eks. 14:29-31) Nakasehlane, Jehova wawavikela futsi wawanakekela. (Dut. 8:3, 4) Njengobe lesive besesitawungena eVeni Lesetsembiso, Mosi wasebentisa lelitfuba kuze akhutsate labantfu ngaphambi kwekutsi afe. a
5. Emavi ekugcina aMosi lakuDutheronomi 30:19, 20 awacinisekisa ngani ema-Israyeli?
5 Yini Mosi layisho? (Fundza Dutheronomi 30:19, 20.) Ema-Israyeli bekangaba nelikusasa lelihle. Ngekubusiswa nguJehova, bekangaphila sikhatsi lesidze kulelive bekawetsembise lona. Leli bekulive lelihle kakhulu futsi lelivundzile! Mosi walichaza ngalendlela lelive, watsi: “Lokungemadolobha lamakhulu futsi lamahle leningazange niwakhe, netindlu letigcwele yonkhe inhlobo yetintfo letinhle leningazange nitisebentele, nemitfombo leningazange niyigubhe, kanye nemasimu emagilebisi netihlahla temncumo leningazange nitihlanyele.”—Dut. 6:10, 11.
6. Yini leyenta Nkulunkulu wavumela letinye tive kutsi tincobe ema-Israyeli?
6 Mosi waphindze wecwayisa ema-Israyeli. Kuze achubeka ahlala kulelive lelihle kakhulu, bekufanele achubeke alalela imitsetfo yaJehova. Mosi wawacela kutsi ‘abokhetsa kuphila’ ngekutsi alalele Jehova futsi ‘anamatsele kuye.’ Kodvwa ema-Israyeli amshiya Jehova. Ngako ngekuhamba kwesikhatsi Nkulunkulu wavumela base-Asiriya nebaseBhabhulona kutsi bawancobe futsi bawatfumbe.—2 Khos. 17:6-8, 13, 14; 2 Khr. 36:15-17, 20.
7. Yini lesingayifundza kuloko lokwashiwo nguMosi? (Buka nesitfombe.)
7 Yini lesiyifundzako? Nasilalela Jehova singaphila phakadze. Njengema-Israyeli lebesekatawungena eVeni Lesetsembiso, natsi sesitawungena eveni lelisha Nkulunkulu lasetsembise lona, lapho lomhlaba utawushintjwa ube lipharadisi. (Isa. 35:1; Luk. 23:43) Develi nemadimoni akhe batawube bangasekho. (Semb. 20:2, 3) Kutawuba bete inkholo lefundzisa emanga ngaJehova. (Semb. 17:16) Kutawuba bete nahulumende locindzetela bantfu. (Semb. 19:19, 20) Bantfu labavukelako ngeke babe khona ePharadisi. (Hla. 37:10, 11) Bonkhe bantfu batawulalela imitsetfo yaJehova lelungile, leyenta kutsi kube nebunye nekuthula. Ngako bantfu batawutsandzana futsi betsembane. (Isa. 11:9) Leli likusasa lelihle! Ngetulu kwaloko, nangabe sichubeka silalela Jehova, singachubeka siphila emhlabeni lolipharadisi hhayi nje emakhulu eminyaka, kodvwa kuze kube phakadze.—Hla. 37:29; Joh. 3:16.
Nangabe silalela Jehova, singaphila emhlabeni lolipharadisi hhayi nje emakhulu eminyaka, kodvwa kuze kube phakadze (Buka sigaba 7)
8. Setsembiso sekuphila phakadze samsita njani lomunye umzalwane lesekuphele sikhatsi lesidze asitfunywa selivangeli? (Juda 20, 21)
8 Nangabe sihlala sicabanga ngesetsembiso saNkulunkulu sekuphila phakadze, sitawufuna kunamatsela kuye ngisho nobe sibhekana natiphi tinkinga. (Fundza Juda 20, 21.) Lesetsembiso singasiniketa emandla ekulwa nebutsakatsaka lesinabo. Lomunye umzalwane lesekuphele sikhatsi lesidze asitfunywa selivangeli e-Africa lebekalwa nebutsakatsaka lobuchubekako watsi: “Kubona kutsi bengingalahlekelwa kuphila lokuphakadze kwangenta ngatimisela kakhulu kulwa nalenkinga lebenginayo futsi ngicele Jehova ngalokuphindzaphindziwe kutsi angisite. Ngekusitwa nguye, ngakhona kubuncoba.”
“UTAWUPHUMELELA”
9. Ngutiphi tinkinga Davide labhekana nato?
9 Davide bekayinkhosi lekahle kakhulu. Bekaphindze abe ngumhlabeleli, ngusonkondlo, lisotja futsi angumphrofethi. Waba netinkinga letinyenti. Kwaphela iminyaka abhacile futsi abalekela iNkhosi Sawula lebeyinemona. Nasekayinkhosi, kwadzingeka kutsi abaleke ngenca yekutsi indvodzana yakhe Absalomu beyifuna kumbulala kuze ibe yinkhosi. Nanobe Davide aba naletinkinga futsi wenta emaphutsa lamakhulu, wakhombisa kutsi wetsembekile kuNkulunkulu kwaze kwaba ngulapho afa. Jehova watsi ‘ungumuntfu lotsandzekako enhlitiyweni’ yakhe. Kukuhlakanipha kulalela seluleko saDavide!—Imis. 13:22; 1 Khos. 15:5.
10. Yini leyenta Davide weluleka indvodzana yakhe Solomoni lebeyitawuba yinkhosi esikhundleni sakhe?
10 Cabanga ngeseluleko Davide lasiniketa indvodzana yakhe Solomoni lebeyitawuba yinkhosi esikhundleni sakhe. Lelijaha belikhetfwe nguJehova kutsi lichubeke likhutsata kukhonta lokuhlantekile futsi lakhe lithempeli lebelitawudvumisa Nkulunkulu. (1 Khr. 22:5) Solomoni bekatawubhekana netinkinga. Yini Davide lebekatayisho kuye? Ase sibone.
11. Ngekusho kwa-1 Emakhosi 2:2, 3, Davide wamcinisekisa ngani Solomoni, futsi lamavi aba njani liciniso? (Buka nesitfombe.)
11 Yini Davide layisho? (Fundza 1 Emakhosi 2:2, 3.) Davide watjela indvodzana yakhe kutsi nangabe itawulalela Jehova, itawuphumelela ekuphileni. Kwaphela iminyaka leminyenti Solomoni aphumelela. (1 Khr. 29:23-25) Wakha lithempeli lelikhulu, wabhala letinye tincwadzi teliBhayibheli, futsi lamanye emavi akhe ayatfolakala nakuletinye tincwadzi teliBhayibheli. Watiwa kakhulu ngekuhlakanipha kwakhe nangekunjinga. (1 Khos. 4:34) Kodvwa njengobe Davide bekamtjelile, Solomoni bekatawuphumelela kuphela nakalalela Jehova Nkulunkulu. Lokubuhlungu kutsi ngekuhamba kwesikhatsi Solomoni wabese ukhonta labanye bonkulunkulu. Jehova akazange akutsandze loko, ngako wayekela kumnika kuhlakanipha kuze abuse ngekulunga nangemusa.—1 Khos. 11:9, 10; 12:4.
Emavi aDavide ekugcina lawatjela Solomoni asenta sibone kutsi nangabe silalela Jehova, utasinika kuhlakanipha kuze sente tincumo letikahle (Buka tigaba 11-12) b
12. Yini lesingayifundza kuloko lokwashiwo nguDavide?
12 Yini lesiyifundzako? Kulalela kwenta umuntfu aphumelele. (Hla. 1:1-3) Kuliciniso kutsi Jehova akasetsembisi kusinika umcebo neludvumo lebekanako Solomoni. Kodvwa nasilalela Nkulunkulu wetfu, utasinika kuhlakanipha lokutawenta sente tincumo letikahle. (Taga 2:6, 7; Jak. 1:5) Timiso takhe tingasicondzisa etindzabeni letimayelana nemsebenti, imfundvo, tekutijabulisa nemali. Kusebentisa kuhlakanipha kwaJehova kutawuvikela buhlobo betfu naye nelitsemba letfu lekuphila phakadze. (Taga 2:10, 11) Sitawuba nebangani labakahle. Ngetulu kwaloko, sitawutfola sicondziso lesisidzingako kuze sibe nemindeni lejabulako.
13. Yini leyasita Carmen kutsi aphumelele ekuphileni?
13 Carmen lohlala eMozambique, bekacabanga kutsi imfundvo lephakeme itamenta aphumelele ekuphileni. Waya enyuvesi futsi wafundzela kudvweba emaplani etakhiwo nekutakha. Utsi: “Bengikutsandza loko bengikufundza. Kodvwa bekutsatsa sikhatsi sami lesinyenti nemandla. Bengiba sesikolweni nga–7:30 ekuseni ngiphume nga–6:00 ntsambamba. Bekuba matima kuya emihlanganweni futsi buhlobo bami naJehova baba butsakatsaka. Ngekhatsi kimi bengibona kutsi ngetama kukhonta emakhosi lamabili.” (Mat. 6:24) Wathantaza ngalesimo futsi wacwaninga etincwadzini tetfu. Uchubeka utsi: “Ngemuva kwekwelulekwa bazalwane labavutsiwe kanye namake, ngancuma kuyekela enyuvesi kuze ngingenele umsebenti wasikhatsi sonkhe. Loko kwangisita ngenta tincumo letikahle ekuphileni kwami, futsi angitisoli.”
14. Bewutsini umlayeto lobalulekile lowashiwo nguMosi naDavide?
14 BoMosi naDavide bebamtsandza Jehova futsi bakubona kubaluleka kwekumlalela. Emavini abo ekugcina, bakhutsata labo bebabalalele kutsi balingise sibonelo sabo ngekutsi banamatsele kuJehova Nkulunkulu wabo. Bobabili becwayisa kutsi labo labatawushiya Jehova bekangeke abemukele futsi bebangeke basatitfola netibusiso bekabetsembise tona. Leseluleko sabo sisasebenta nalamuhla. Ngemuva kwemakhulu eminyaka, lesinye sikhonti saJehova naso sakhombisa kutsi kubalulekile kwetsembeka kuNkulunkulu.
“KUTE LENYE INTFO LENGIJABULISA KAKHULU”
15. Yini umphostoli Johane layibona kuko konkhe kuphila kwakhe?
15 Johane bekangumphostoli waJesu Khristu lebekamtsandza. (Mat. 10:2; Joh. 19:26) Johane bekahamba naJesu nakashumayela, wabona timangaliso lebekatenta futsi wanamatsela kuye nakabhekene netikhatsi letimatima. Wambona Jesu ngesikhatsi abulawa nalapho sekavusiwe. Wakubona nekwandza kwebuKhristu ngesikhatsi semaKhristu ekucala kusukela ecenjini lelincane lalabetsembekile kwaze kwaba ngulapho tindzaba letimnandzi tishunyayelwa “kuyo yonkhe indalo lengephansi kwelizulu.”—Khol. 1:23.
16. Bobani labasitakele ngetincwadzi letabhalwa nguJohane?
16 Nasekatawufa, Johane waba nesandla ekubhaleni liVi laNkulunkulu leliphefumulelwe. Wabhala “sembulo saJesu Khristu.” (Semb. 1:1) Wabhala neliVangeli lelibitwa ngeligama lakhe. Waphindze wabhala letinye tincwadzi letintsatfu letiphefumulelwe. Incwadzi yesitsatfu wayibhalela lomunye umKhristu lowetsembekile lokutsiwa nguGayusi lebekamtsandza ngatsi ngumntfwanakhe. (3 Joh. 1) Ngaleso sikhatsi, kungenteka banyenti lebekabatsandza ngatsi bantfwabakhe. Loko lokwabhalwa ngulendvodza lekhulile futsi leyetsembekile kubakhutsate bonkhe balandzeli baJesu kuze kube ngulamuhla.
17. Ngekusho kwa-3 Johane 4, yini leyenta umuntfu ajabule?
17 Yini Johane layibhala? (Fundza 3 Johane 4.) Johane wabhala kutsi kulalela Nkulunkulu kwenta umuntfu ajabule. Ngesikhatsi abhala incwadzi yesitsatfu, labanye bebasakata timfundziso letingemanga futsi babangela kwehlukana ebandleni. Nobe kunjalo, labanye bachubeka “bahamba ecinisweni.” Balalela Jehova futsi ‘bahamba ngekuvumelana nemiyalo yakhe.’ (2 Joh. 4, 6) LamaKhristu letsembekile akagcinanga nje ngekujabulisa Johane kodvwa ajabulisa naJehova.—Taga 27:11.
18. Yini lesingayifundza kuloko lokwashiwo nguJohane?
18 Yini lesiyifundzako? Kwetsembeka kwenta umuntfu ajabule. (1 Joh. 5:3) Sibonelo nje, kuyasijabulisa kwati kutsi senta Jehova ajabule. Uyajabula nakasibona simelana netilingo talelive futsi semukela liciniso. (Taga 23:15) Netingilosi ezulwini tiyajabula. (Luk. 15:10) Natsi siyajabula nasibona umuntfu ahlala etsembekile, ikakhulukati nakabhekene netinkinga kanye netilingo. (2 Thes. 1:4) Naliphela lelive, sitawujabula ngekwati kutsi sihleli setsembekile kuJehova ngisho nobe lelive belibuswa nguSathane.
19. Yini leshiwo ngulomunye dzadze lokutsiwa nguRachel mayelana nekufundzisa labanye liciniso? (Buka nesitfombe.)
19 Sijabula kakhulu nasifundzisa labanye liciniso. Lomunye dzadze lohlala eDominican Republic lokutsiwa nguRachel utsi kufundzisa umuntfu ngaNkulunkulu lesimkhontako kuyintfo lengachazeki. Nakakhuluma ngalabo labasitile kuze bakhonte Jehova utsi: “Angikhoni nekuyichaza injabulo lengiyivako nangibona bantfu lengibafundzisa liBhayibheli bakhula ekutsandzeni Jehova futsi bashintja nekuphila kwabo kuze bamjabulise. Lenjabulo ikwendlula khashane kutidzela nekutikhandla kwami kuze ngibafundzise.”
Siyajabula nasifundzisa labanye kutsi batsandze Jehova futsi bamlalele (Buka sigaba 19)
AKABE LUSITO KUWE EMAVI EKUGCINA EMADVODZA LETSEMBEKILE
20. Ngutiphi tindlela lesifana ngato naMosi, Davide, naJohane?
20 BoMosi, Davide, naJohane baphila ngetikhatsi letehlukile kunesetfu nangaphansi kwetimo letingafani netetfu. Kodvwa kunyenti lesifana ngako. Bebakhonta Nkulunkulu weliciniso njengatsi. Njengabo, sithantaza kuJehova, setsembele kuye futsi sibuke yena kuze asicondzise. Njengalamadvodza akadzeni, siyaciniseka kutsi Jehova ubabusisa kakhulu labo labamlalelako.
21. Ngutiphi tibusiso letitawutfolwa ngulabo labalalela seluko semadvodza lakhulile letsembekile lanjengaMosi, Davide, naJohane?
21 Ngako shengatsi singawalalela emavi ekugcina alamadvodza lakhulile ngekutsi silalele imitsetfo yaJehova. Nasenta njalo, sitawuphumelela mbamba kuko konkhe lesikwentako. Sitawuphila futsi ‘sitawuhlala sikhatsi lesidze,’ sihlale kuze kube phakadze! (Dut. 30:20) Ngetulu kwaloko, sitawutfola injabulo lebangelwa kujabulisa Babe wetfu wasezulwini lositsandzako, lofeza tonkhe tetsembiso takhe ngelizinga leliphakeme kakhulu kunalelo lesingalicabanga.—Ef. 3:20.
INGOMA 129 Sitawuchubeka Sicinisela
a Ema-Israyeli lamanyenti labona timangaliso taJehova eLwandle Lolubovu awazange angene eVeni Lesetsembiso. (Num. 14:22, 23) Jehova watsi labo labaneminyaka lengu-20 kuya etulu bebatawufela ehlane. (Num. 14:29) Kodvwa Joshuwa, Khalebi, kanye nalamanye ema-Israyeli lamanyenti lasemasha nesitukulwane semaLevi, aphila futsi ambona Jehova afeza setsembiso sakhe ngesikhatsi ema-Israyeli awela uMfula iJordane futsi angena eKhenani.—Dut. 1:24-40.
b KUCHAZWA KWETITFOMBE: Ngesencele: Davide utjela indvodzana yakhe Solomoni emavi ekugcina lahlakaniphile. Ngesekudla: Bafundzi bayafundziswa eSikolweni Semahlahlandlela.
