UKUTFOLA kumatima yini kuhlale utidadishela liBhayibheli futsi ukujabulele? Kungenteka sonkhe sihle sikutfola kumatima. Kodvwa cabanga ngaletinye tintfo lesihlale sitenta, njengekugeza. Kugeza kutsatsa sikhatsi futsi kufuna imetamo, kodvwa siyajabula nasesigezile! Nekudadisha liBhayibheli kungafana ‘nekugeza ngemanti usebentisa livi.’ (Ef. 5:26) Cabanga nganati tintfo letingakusita:

• Yakha luhlelo. Kutidadishela liBhayibheli kusemkhatsini wetintfo “letibaluleke kakhulu” umKhristu lokufanele ahlale atenta. (Fil. 1:10) Kuze ukhone kunamatsela kuloluhlelo, ungalubeka lapho utalubona khona njengaselubondzeni nobe efrijini. Kungakusita nekucupha i-alarm letakukhumbuta kutsi sesikhatsi sekudadisha.

• Cabanga kutsi yini lengakusebentela kahle. Uchubeka uzuza yini nawudadisha sikhatsi lesidze nobe udzinga sikhatsi lesifishane? Nguwe lotati kahle. Hlela kudadisha kuye ngetimo takho. Nawutiva ungakhanuki kudadisha nasekufike sikhatsi sekutsi udadishe, kungaba njani udadishe imizuzu lengu-10? Nawudadisha sikhatsi lesifishane kunyenti lotakutfola kunalapho ungakadadishi sanhlobo. Nasewucalile, kungenteka ufune kuchubeka.​—Fil. 2:13.

• Ncuma kusenesikhatsi kutsi utawudadisha ngasiphi sihloko. Nawuhlala phansi bese uyatibuta kutsi utawudadisha siphi sihloko, utawube ‘awusisebentisi kahle sikhatsi’ sakho. (Ef. 5:16) Kungaba njani wakhe luhla lwetihloko lofuna kudadisha ngato. Njalo nawufikelwa ngumbuto lotsite, wubhale phansi. Njalo nawucedza kudadisha kungenteka kube nalokunye lofuna kudadisha ngako, nako kubhale phansi.

• Yenta lushintjo nakudzingekile. Yenta lushintjo eluhlelweni lwakho, kungaba sikhatsi lofuna kusicitsa udadisha nobe tihloko lofuna kudadisha ngato, kuye ngetimo. Lokubalulekile akusiko kutsi udadisha nini, sikhatsi lesinganani, nobe kutsi udadisha ini, kodvwa kutsi uhlale udadisha yini.

Sisitakala kakhulu nangabe sihlale sidadisha. Sisondzelana kakhulu naJehova, sifundza kwenta tintfo ngekuhlakanipha, futsi siyajabula.​—Josh. 1:8.