LESINYE sikhulu semaNazi sakhuluma nelicembu laBoFakazi BaJehova sitfukutsele ngeMphi Yelive Yesibili satsi: “Nangabe ukhona kini longeke avume kulwa neFrance nobe neNgilandi, nonkhe nitawukufa!” Nanobe bekunemasotja lahlomile eceleni kwalelicembu, kute ngisho namunye kulabazalwane betfu lowavuma. Loko kwaveta kutsi bebanesibindzi kakhulu! Lesibonelo siveta indlela BoFakazi BaJehova labativa ngayo ngemphi: Asivumi kulwa timphi ngisho nobe sisongelwa ngekufa, asilutsatsi luhlangotsi etindzabeni talelive.

1. BANTFU BANKULUNKULU BEBASIVE SINYE

Esikhatsini lesendlulile, Jehova wahlanganisa ndzawonye bantfu bakhe, baba sive sinye, lokusive sema-Israyeli. Wabita ema-Israyeli ngekutsi “yimphahla [yakhe] lekhetsekile emkhatsini wato tonkhe tive.” (Eks. 19:5) Nkulunkulu waphindze wawanika indzawo. Ngako ngesikhatsi Nkulunkulu atjela ema-Israyeli kutsi alwe naletinye tive, bekangalwi naletinye tikhonti takhe nobe atibulale. *

Lamuhla, tikhonti taJehova tivela “kuto tonkhe tive, tinhlanga, bantfu, kanye netilwimi.” (Semb. 7:9) Nangabe bantfu baNkulunkulu bebangaya emphini, bebangalwa nalabanye labakhonta Jehova futsi baze bababulale.

 2. JEHOVA WATJELA EMA-ISRAYELI KUTSI AYE EMPHINI

Esikhatsini lesendlulile, Jehova bekancuma kutsi ema-Israyeli atoyilwa nini imphi futsi atawuyilwa ngasiphi sizatfu. Sibonelo nje, Nkulunkulu watjela ema-Israyeli kutsi akhiphe sehlulelo sakhe kubantfu baseKhenani lebebatiwa ngekukhonta emadimoni, ngekutiphatsa kabi ngekwelicansi lokwenyanyekako nangekushisa bantfwana babo benta iminikelo. Jehova watjela ema-Israyeli kutsi abulale bonkhe labantfu labenta tintfo letimbi kulelive lebekabetsembise lona kuze ema-Israyeli angatenti letintfo letimbi lebebatenta. (Lev. 18:24, 25) Ngemuva kwekutsi ema-Israyeli sekahleti eVeni Lesetsembiso, Nkulunkulu bekahle awatjela kutsi alwe netitsa tawo kuze awavikele. (2 Sam. 5:17-25) Kodvwa Jehova bekangavumi kutsi ema-Israyeli atincumele wona kuya emphini. Nakwenteka atincumela wona, imiphumela beyivama kuba mibi kakhulu.—Num. 14:41-45; 2 Khr. 35:20-24.

Lamuhla, Jehova akabatjeli bantfu kutsi baye emphini. Tive tilwela loko lokufunwa bantfu hhayi loko lokufunwa nguNkulunkulu. Tingahle tilwe timphi kuze titfole indzawo nobe umcebo nobe kuze kwemukelwe imibono yato etindzabeni tepolitiki. Kodvwa kutsiwani ngalabo labatsi balwa timphi kuze bakhone kuchubeka bakhonta Nkulunkulu nobe kuze babulale titsa takhe? Jehova utativikela tikhonti takhe teliciniso futsi abhubhise titsa takhe emphini letako lokuyimphi ye-Amagedoni. (Semb. 16:14, 16) Kulemphi, libutfo laNkulunkulu litawakhiwa tidalwa letingumoya hhayi tikhonti takhe letibantfu.—Semb. 19:11-15.

3. EMA-ISRAYELI BEKANGABABULALI LABO LABAKHOMBISA KUKHOLWA

Esikhatsini lesendlulile, libutfo lema-Israyeli belivame kubentela umusa labo bebakhombisa kukholwa kuNkulunkulu futsi libulale kuphela labo Jehova bekatsi kufanele babulawe. Cabanga nganati tibonelo letimbili. Nanobe Jehova bekatsite kufanele ibhujiswe iJerikho, kodvwa ema-Israyeli awazange  ambulale Rahabi nemndeni wakubo ngobe wakhombisa kukholwa. (Josh. 2:9-16; 6:16, 17) Ngekuhamba kwesikhatsi, bonkhe bantfu basedolobheni laseGibeyoni abazange babulawe ngobe bakhombisa kutsi bayamesaba Nkulunkulu.—Josh. 9:3-9, 17-19.

Lamuhla, tive tiyababulala labo labakhombisa kukholwa, futsi ngaletinye tikhatsi tize tibulale ngisho nebantfu labangenacala.

4. EMA-ISRAYELI BEKUFANELE ALANDZELE UMTSETFO WANKULUNKULU WEKULWA IMPHI

Esikhatsini lesendlulile, Jehova bekafuna kutsi emasotja aka-Israyeli alandzele ticondziso takhe tekulwa. Nasi sibonelo, Nkulunkulu bekahle awatjela kutsi nawafika edolobheni lalwa nalo kufanele alinikete ‘litfuba lekwakha kuthula.’ (Dut. 20:10) Jehova bekalindzele nekutsi emasotja ema-Israyeli atigcine ahlobile futsi atiphatse kahle. (Dut. 23:9-14) Nanobe emabutfo etive letibomakhelwane bekavame kudlwengula besifazane basetindzaweni latincobile, kodvwa Jehova bekangawavumeli ema-Israyeli kutsi akwente loko. Ecinisweni, bekangawavumeli kutsi ashade nentfombi letfunjiwe kuze kube ngulapho kuphela inyanga lelidolobha lincotjiwe.—Dut. 21:10-13.

Lamuhla, emave lamanyenti ente tivumelwane tekulwa timphi alandzela imitsetfo letsite. Nanobe lemitsetfo yentelwe kuvikela bantfu, kodvwa lokubuhlungu kutsi ivame kungalandzelwa.

5. NKULUNKULU BEKASILWELA SIVE SAKHE

Esikhatsini lesendlulile, Jehova bekawalwela ema-Israyeli futsi bekavame kwenta timangaliso kuze ancobe. Sibonelo nje, Jehova wawasita njani ema-Israyeli kutsi ancobe iJerikho? Wawatjela kutsi ‘amemete kakhulu njengebantfu labasemphini, tindvonga tawa bhu phansi,’ lokwenta kwaba melula kutsi lelidolobha lincotjwe. (Josh. 6:20) Ema-Israyeli ayincoba njani imphi layilwa nema-Amori? “Jehova wehlisela kubo sangcotfo lesikhulu lesivela esibhakabhakeni . . . Ecinisweni, banyenti lababulawa sangcotfo kunalabo ema-Israyeli lababulala ngenkemba.”—Josh. 10:6-11.

EMAKHRISTU ELICINISO AYAKUTSANDZA KUTHULA

Njengobe sesibonile, timo tetfu lamuhla tehluke kakhulu kunaleto tema-Israyeli. Nanobe kunjalo, letizatfu akusito tona kuphela letisenta singayilwi imphi, kunaletinye. Sibonelo nje, Nkulunkulu watsi emalangeni ekugcina, labo labafundziswa nguye angeke baphindze ‘baceceshelwe kulwa imphi,’ ingasaphatfwa-ke yekuyilwa. (Isa. 2:2-4) Ngetulu kwaloko, Khristu watsi bafundzi bakhe bebangeke babe ‘yincenye yelive’; bebangeke balutsatse luhlangotsi etindzabeni talelive.—Joh. 15:19.

Khristu watjela balandzeli bakhe kutsi bente lokungetulu kwaloku. Wabatjela kutsi bagweme tintfo letingabenta batfukutsele futsi balwe. (Mat. 5:21, 22) Ngetulu kwaloko, wabatjela kutsi ‘batsandze kuthula’ futsi batsandze netitsa tabo.—Mat. 5:9, 44.

Singakwenta njani loku? Kuliciniso kutsi site ngisho nalesincane sifiso sekulwa imphi, kodvwa kungenteka yini kunalotsite ebandleni lesimtsatsa njengesitsa setfu? Shengatsi singachubeka sisebenta kamatima kuze sikususe loko etinhlitiyweni tetfu.—Jak. 4:1, 11.

Kunekutsi singenele timphi, sisebenta kamatima kuze sibe nekuthula futsi sitsandzane. (Joh. 13:34, 35) Shengatsi singachubeka sitimisela kungatingeneli tepolitiki, njengobe sisalindzele lilanga lekutsi Jehova acedze tonkhe timphi tingaphindzi tibe khona.—Hla. 46:9.