1. Nguliphi litsemba Jehova lasinike lona?

 JEHOVA usinikete litsemba lelihle lekuphila phakadze. Labanye banelitsemba lekuphila phakadze ezulwini batidalwa temoya letingafi. (1 Khor. 15:50, 53) Kodvwa labanyenti banelitsemba lekuphila phakadze emhlabeni, baphile saka futsi bajabulile. (Semb. 21:3, 4) Ngisho nobe sinelitsemba lekuphila phakadze ezulwini nobe emhlabeni, litsemba lesinalo liligugu kitsi.

2. Lisekelwe kuphi litsemba letfu, futsi sisho ngani?

² Ligama leliseBhayibhelini lelitsi “litsemba” lingachazwa ngekutsi “kulindzela kutsi kutawenteka tintfo letinhle.” Siyaciniseka kutsi litsemba letfu ngelikusasa litawufezeka ngobe silinikwa nguJehova. (Rom. 15:13) Siyakwati loko lakwetsembisile futsi siyati kutsi uyakwenta loko lakushoko. (Num. 23:19) Siyaciniseka kutsi Jehova unesifiso sekukwenta loko lakushito futsi unawo emandla ekukwenta. Ngako litsemba letfu akusiso nje sifiso nobe loko lesikucabangako, kodvwa lisekelwe etintfweni letinebufakazi naletikhona mbamba.

3. Yini lesitawucoca ngayo kulesihloko? (Tihlabelelo 27:14)

³ Babe wetfu wasezulwini uyasitsandza futsi ufuna simetsembe. (Fundza Tihlabelelo 27:14.) Nangabe simetsemba kakhulu Jehova, sitawukhona kubeketelela tinkinga, sibe nesibindzi futsi sijabule ngisho nobe kwentekani kitsi. Ase sicoce ngekutsi litsemba letfu lisivikela njani. Sitawucale sicoce ngekutsi litsemba lifana njani nelihhuka lemkhumbi nesigcoko sekutivikela. Ngemuva kwaloko sitawucoca ngekutsi singalicinisa njani litsemba letfu.

4. Litsemba lifana njani nelihhuka lemkhumbi? (KumaHebheru 6:19)

⁴ Encwadzini layibhalela emaKhristu langemaHebheru, umphostoli Pawula wafananisa litsemba letfu nelihhuka lemkhumbi. (Fundza KumaHebheru 6:19.) Pawula bekavame kuhamba ngemkhumbi, ngako bekati kutsi lihhuka libalulekile kuze libambe umkhumbi. Ngalelinye lilanga, bekagibele umkhumbi ngesikhatsi kuba nesiphepho lesikhulu. Kuleso siphepho, wabona labo labasebenta emkhunjini bajika emahhuka emantini, kuze abambe lomkhumbi ungaphihlitwa ngematje layingoti. (Imis. 27:29, 39-41) Njengobe lihhuka lemkhumbi liwubamba, litsemba letfu lisenta singakhweshi kuJehova nasibhekene netimo letimatima. Litsemba letfu lelicinile lisenta sehlise umoya nasibhekene netinkinga ngobe siyaciniseka kutsi timo titawuba ncono. Khumbula, Jesu wasecwayisa kutsi sitawuphatfwa kabi. (Joh. 15:20) Ngako kucabangisisa ngelitsemba letfu ngelikusasa kutawenta sichubeke sikhonta Jehova.

5. Litsemba lamsita njani Jesu ngesikhatsi sekatawukufa?

⁵ Cabanga ngendlela litsemba lelamsita ngayo Jesu kutsi ahlale etsembekile nanobe bekatawubulawa kabuhlungu. NgeliPhentekhoste la-33 C.E., umphostoli Phetro wacaphuna siphrofetho lesisencwadzini yeTihlabelelo lesikuchaza kahle loko Jesu bekaciniseka ngako, satsi: “Ngitawuhlala ngikwetsemba, ngobe ngeke uze ungishiye eThuneni, futsi angeke uvumele kutsi lowetsembekile wakho abole. . . . kungemukela kwakho kutangenta ngijabule kakhulu.” (Imis. 2:25-28; Hla. 16:8-11) Nanobe Jesu bekati kutsi utakufa, bekanelitsemba lelicinile lekutsi Nkulunkulu utamvusa futsi aphindze ajabule ngekuba naBabe wakhe ezulwini.—Heb. 12:2, 3.

6. Yini lomunye umzalwane layisho mayelana nelitsemba?

⁶ Litsemba letfu lisite bazalwane nabodzadze labanyenti kutsi bacinisele. Cabanga ngesibonelo saLeonard Chinn, longumzalwane lowetsembekile lobekahlala eNgilandi. Ngesikhatsi seMphi Yelive Yekucala, waboshwa ngenca yekutsi bekangafuni kuba lisotja. Kwaphela tinyanga letimbili avalelwe yedvwa ejele futsi ngemuva kwaloko waphocelelwa kutsi ente umsebenti lomatima kakhulu. Ngemuva kwesikhatsi wabhala watsi: “Loko lokwenteka kimi, kwangenta ngabona kutsi silidzinga kangakanani litsemba kuze sicinisele. Sinesibonelo saJesu, sebaphostoli nesebaphrofethi kanye netetsembiso letinhle letiseBhayibhelini. Konkhe loku kusiniketa litsemba lelihle ngelikusasa futsi kusiniketa emandla ekucinisela.” Litsemba lafana nelihhuka lemkhumbi kuLeonard, futsi kungaba njalo nakitsi.

7. Tinkinga tilicinisa njani litsemba letfu? (KubaseRoma 5:3-5; Jakobe 1:12)

⁷ Nasibeketelela tinkinga futsi sibone indlela Jehova lasisita ngayo sibese siyabona kutsi uyasemukela, loko kwenta litsemba letfu licine. (Fundza KubaseRoma 5:3-5; Jakobe 1:12.) Ngako nyalo litsemba letfu licine kakhulu kunangesikhatsi semukela tindzaba letimnandzi. Sathane ufuna tinkinga tetfu tisincobe, kodvwa ngelusito lwaJehova singakhona kutibeketelela.

8. Litsemba lifana njani nesigcoko sekutivikela? (1 KubaseThesalonika 5:8)

⁸ LiBhayibheli liphindze lifananise litsemba letfu nesigcoko sekutivikela. (Fundza 1 KubaseThesalonika 5:8.) Lisotja ligcoka  sigcoko sekutivikela kuze livikele inhloko yalo ingalinyatwa sitsa salo. Kulemphi lesiyilwa naSathane, kufanele sivikele ingcondvo yetfu kuye. Usebentisa tintfo letinyenti kuze asilinge futsi angcolise indlela lesicabanga ngayo. Njengobe sigcoko sekutivikela sivikela inhloko yelisotja, litsemba letfu livikela indlela lesicabanga ngayo kuze sihlale setsembekile kuJehova.

9. Uba yini umphumela nangabe bantfu bete litsemba?

⁹ Litsemba lesinalo lekuphila phakadze lingasisita kutsi sente tincumo letihlakaniphile. Kodvwa nangabe litsemba letfu licala kuba butsakatsaka futsi sicale kucabanga ngaloko lesikufisako, singabese siyakhohlwa ngelitsemba lekuphila phakadze. Cabanga ngalokwenteka kulamanye emaKhristu lebekahlala eKhorinte. Abese akasasetsembi setsembiso saNkulunkulu lesibalulekile, lokusetsembiso seluvuko. (1 Khor. 15:12) Pawula watsi bantfu labete litsemba ngelikusasa baphilela lilamuhla. (1 Khor. 15:32) Bantfu labanyenti lamuhla labangatetsembi tetsembiso taNkulunkulu benta nobe ngabe yini kuze bajabule nyalo. Kodvwa tsine siyatetsemba tetsembiso taNkulunkulu telikusasa. Litsemba lesinalo linjengesigcoko sekutivikela, livikela tingcondvo tetfu futsi lisisite singaticabangeli tsine nje kuphela, ngobe loko bekungalimata buhlobo betfu naJehova.—1 Khor. 15:33, 34.

10. Litsemba lingakuvikela njani ekucabangeni imicabango lengasiyo?

¹⁰ Litsemba letfu lingaphindze lisivikele ekucabangeni kutsi akusiti ngalutfo kwetama kujabulisa Jehova. Sibonelo nje, labanye bangatsi: ‘Angeke ngiphile phakadze, akungifaneli. Angeke ngikhone kwenta loko Nkulunkulu lafuna ngikwente.’ Khumbula kutsi Elifazi washo intfo lefanako kuJobe. Watsi: “Kungenteka njani kutsi umuntfu abe msulwa?” Waphindze watsi ngaNkulunkulu: “Nkulunkulu akatetsembi tingilosi takhe, futsi ngisho nemazulu awakahlanteki emehlweni akhe.” (Jobe 15:14, 15) Lawa ngemanga laluhlata klaba! Khumbula kutsi nguSathane lofuna ucabange kanjalo. Uyati kutsi nawuhlale ucabanga kanjalo, litsemba lakho litawuphela. Ngako melana nemanga lanjalo, unake loko lokwetsenjiswe nguJehova. Hlale uciniseka kutsi ufuna uphile phakadze futsi utakusita kutsi kwenteke loko.—1 Thim. 2:3, 4.

11. Ngusiphi sizatfu lesinaso sekubeketela njengobe silindze kutsi litsemba letfu lifezeke?

¹¹ Akusimelula kuhlala unelitsemba lelicinile. Kungenteka sive shengatsi sekuphele sikhatsi lesidze solo silindzele Nkulunkulu kutsi afeze tetsembiso takhe. Kodvwa ngenca yekutsi Jehova bekasolo akhona, loko lokubonakala kusikhatsi lesidze kitsi, kuye sikhatsi lesifishane. (2 Phet. 3:8, 9) Utawukwenta loko lasetsembise kona, kodvwa kungenteka angakwenti ngesikhatsi tsine lesikulindzele ngaso. Yini lengasisita kutsi sihlale sinelitsemba lelicinile njengobe silindze ngesineke kutsi Nkulunkulu afeze tetsembiso takhe?—Jak. 5:7, 8.

12. Ngekusho kwembhalo waKumaHebheru 11:1, 6, litsemba lihlobana njani nekukholwa?

¹² Sitawuba nelitsemba lelicinile nangabe sihlale sisondzelene naJehova, ngobe nguye lotawenta litsemba letfu lifezeke. Ecinisweni, kuze sibe nelitsemba kufanele sikholwe kutsi Jehova ukhona nekutsi “ubanika umvuzo labo labamfuna ngekutimisela.” (Fundza KumaHebheru 11:1, 6.) Nangabe sikholwa mbamba kutsi Jehova ukhona, sitawuciniseka kakhulu kutsi utawukwenta konkhe lakwetsembisile. Ase sicoce ngetindlela lesingabucinisa ngato buhlobo betfu naJehova, lokutawusenta sibe nelitsemba lelicinile.

13. Singasondzela njani kuNkulunkulu?

 ¹³ Thantaza kuJehova futsi ufundze liVi lakhe. Nanobe singamboni Jehova, kodvwa singasondzela kuye. Singakhuluma naye sisebentisa umthantazo, siciniseke kutsi utasilalela. (Jer. 29:11, 12) Singamlalela Nkulunkulu ngekutsi sifundze liVi lakhe futsi sicabangisise ngalo. Njengobe sifundza ngendlela Jehova labanakekela ngayo labo lebebetsembekile kuye esikhatsini lesendlulile, litsemba letfu liyacina. Konkhe lokuseVini laNkulunkulu kwabhalelwa “kufundzisa tsine, kuze kutsi ngekucinisela kwetfu nangendvudvuto lesiyitfola emiBhalweni sibe nelitsemba.”—Rom. 15:4.

14. Kubaluleke ngani kutsi sicabangisise ngaloko Jehova lakwentele labanye?

¹⁴ Cabangisisa ngendlela Jehova latifeze ngayo tetsembiso takhe. Cabanga ngaloko Nkulunkulu lakwentela Abrahama naSara. Besebakhule kakhulu kutsi bangaba nebantfwana. Nobe kunjalo, Nkulunkulu wabetsembisa kutsi batawuba nemntfwana. (Gen. 18:10) Wativa njani Abrahama? LiBhayibheli litsi: “Wakholwa kutsi utawuba ngubabe wetive letinyenti.” (Rom. 4:18) Nanobe kumuntfu bekubonakala shengatsi ngeke kwenteke loko Nkulunkulu lakwetsembisile, kodvwa Abrahama bekaciniseka kutsi Jehova utakwenta loko lakwetsembisile futsi wakwenta. (Rom. 4:19-21) Tindzaba letinjena tisifundzisa kutsi kufanele sihlale simetsemba Jehova kutsi utatifeza tetsembiso takhe, ngisho nobe singabona ngatsi ngeke kwenteke.

15. Ngusiphi sizatfu lesisenta sicabange ngaloko Nkulunkulu lasentele kona?

¹⁵ Cabanga ngaloko Jehova lakwentele kona. Cabanga ngekutsi uzuze njani ngekugcwaliseka kwetetsembiso letiseVini laNkulunkulu. Sibonelo nje, Jesu wetsembisa kutsi Babe wakhe utakupha tintfo lotidzingile kuze uphile. (Mat. 6:32, 33) Jesu uphindze wakucinisekisa  kutsi Jehova utakupha umoya wakhe longcwele nangabe uwucela. (Luk. 11:13) Jehova utifezile letetsembiso. Kungenteka nawe ucabanga ngaletinye tetsembiso lombone atifeza ekuphileni kwakho. Sibonelo nje, wetsembisa kukucolela, kukudvudvuta futsi akunike loko lokudzingako kuze uhlale usondzelene naye. (Mat. 6:14; 24:45; 2 Khor. 1:3) Nangabe ucabangisisa ngaloko Nkulunkulu lakwentele kona nyalo, utawuciniseka mbamba kutsi utakwenta loko lakwetsembise kona esikhatsini lesitako.

16. Yini leyenta litsemba libe sipho lesiligugu?

¹⁶ Litsemba lesinalo lekuphila phakadze lisipho lesiligugu lesivela kuNkulunkulu. Silibuke ngalabovu likusasa lelihle, lelo lesiciniseka ngalo kutsi litawuba khona. Lifana nelihhuka lemkhumbi kitsi, liyasisita sikhone kubhekana netinkinga, sibeketelele kuphatfwa kabi futsi size sikhone ngisho nekubhekana nekufa. Lifana nesigcoko sekutivikela, lelivikela indlela lesicabanga ngayo kuze singakwenti lokubi kunaloko sente lokuhle. Litsemba letfu lelisekelwe eBhayibhelini lisisondzeta kakhulu kuNkulunkulu futsi liveta kutsi usitsandza kakhulu. Kusisita kakhulu kugcina litsemba letfu liphila futsi licinile.

17. Litsemba lisenta njani sijabule?

¹⁷ Encwadzini umphostoli Pawula layibhalela emaKhristu aseRoma, wawakhutsata watsi: “Jabulani ngenca yelitsemba leninalo.” (Rom. 12:12) Pawula bekajabula ngobe bekaciniseka ngekutsi nakahlala etsembekile bekatawutfola kuphila lokuphakadze ezulwini. Natsi siyajabula ngelitsemba lesinalo ngobe siyaciniseka kutsi Jehova utatifeza tetsembiso takhe. Umhlabeleli wabhala watsi “uyajabula . . . loyo lowetsembele kuJehova Nkulunkulu wakhe, . . . Yena uhlale etsembekile.”—Hla. 146:5, 6.