1. Kusho kutsini ‘kunakisisa tintfo letiphatselene naNkulunkulu,’ futsi kuhlobana njani nenjabulo?

 INJABULO mbamba ayisiyo nje yesikhashana. Umuntfu angajabula kuphila kwakhe konkhe. Kanjani? Jesu wachaza eNshumayelweni yakhe yaseNtsabeni nakatsi: “Bayajabula labo labanakisisa tintfo letiphatselene naNkulunkulu.” (Mat. 5:3) Jesu bekati kutsi bantfu badalwe baba nesifiso lesikhulu sekwati nesekukhonta uMdali wabo, lokunguJehova Nkulunkulu. Loku kutsiwa ‘kunakisisa tintfo letiphatselene naNkulunkulu.’ Njengobe Jehova ‘anguNkulunkulu lojabulako,’ nalabo labamkhontako bangajabula.—1 Thim. 1:11.

2-3. (a) Jesu watsi bobani labanye labangajabula? (b) Yini lesitawucoca ngayo kulesihloko, futsi kubaluleke ngani kucoca ngako?

² Singajabula kuphela nangabe tintfo tisihambela kahle yini ekuphileni? Cha. Jesu washo intfo lemangalisako enshumayelweni yakhe. Bangajabula “labo labalilako,” kungaba ngenca yekutisola kakhulu ngetono tabo nobe ngenca yetimo letibakhatsatako ekuphileni kwabo. Jesu waphindze watsi bayajabula labo “labaphetfwe kabi ngenca yekulunga” kanye nalabo ‘labahlanjalatwako’ ngenca yekuba balandzeli baKhristu. (Mat. 5:4, 10, 11) Kodvwa ungajabula njani nawubhekene naletimo?

³ Jesu bekasifundzisa kutsi injabulo ayiyi ngetimo lesibhekene nato ekuphileni, kodvwa singayitfola nasinakisisa tintfo letiphatselene naNkulunkulu futsi sisondzelane naye. (Jak. 4:8) Singakwenta njani loko? Kulesihloko, sitawucoca ngetintfo  letintsatfu letingasisita kutsi sitfole injabulo mbamba.

4. Yini intfo yekucala lesingayenta kuze sitfole injabulo sibili? (Tihlabelelo 1:1-3)

⁴ KWEKUCALA: Kuze sijabule mbamba, kufanele sifundze futsi sidadishe liVi laNkulunkulu. Jesu wafananisa liVi laNkulunkulu nekudla. Bantfu netilwane bayakudzinga kudla kuze baphile. Kodvwa bantfu kuphela labangafundza liVi laNkulunkulu, futsi kufanele bakwente loko. Kungako Jesu atsi: “Umuntfu ngeke aphile ngesinkhwa sodvwa, kodvwa uphila ngawo onkhe emavi laphuma emlonyeni waJehova.” (Mat. 4:4) Ngako akukafaneli lishone singakalifundzi liVi laNkulunkulu liBhayibheli leliligugu. Umhlabeleli watsi: ‘Uyajabula umuntfu lojabula ngemtsetfo waJehova, futsi uwufundza imini nebusuku.’—Fundza Tihlabelelo 1:1-3, umbhalo longentasi.

5-6. (a) Yini lesingayifundza eBhayibhelini? (b) Kungasisita njani kufundza liBhayibheli?

⁵ Ngenca yekutsi Jehova uyasitsandza, usikhombisile eBhayibhelini loko lesingakwenta kuze sijabule ekuphileni. Sifundza ngekutsi iyini injongo yakhe ngekuphila kwetfu. Sifundza nekutsi singasondzelana njani naye nekutsi yini lesingayenta kuze asicolele tono tetfu. Siphindze sifundze ngelitsemba letfu lelihle ngelikusasa. (Jer. 29:11) Lamaciniso lesiwatfola nasidadisha liBhayibheli asijabulisa kakhulu!

⁶ Siyati kutsi liBhayibheli ligcwele teluleko letingasisita. Nasitisebentisa leteluleko, singajabula. Nakwenteka ucindzetelwa tinkinga ekuphileni, tinike sikhatsi ufundze liVi  laJehova futsi ucabangisise ngalo. Jesu watsi: “Bayajabula labo labeva livi laNkulunkulu futsi baligcine!”—Luk. 11:28.

7. Yini lengakusita uzuze kakhulu nawufundza liVi laNkulunkulu?

⁷ Nawusafundza liVi laNkulunkulu, tinikete sikhatsi sekucabanga ngaloku lokufundzako. Kuke kwenteka yini kuwe loku? Lotsite upheka kudla lokutsandzako. Kodvwa ngenca yekutsi ujakile, nobe kukhona lomatasa ngako, ukudla ngekushesha, ungakunambitsi kahle. Nase ucedzile, ubese uyabona kutsi ukudle ngekushesha futsi ufise kutsi kube mane ukudle ungakajaki kuze utokujabulela. Uke walifundza yini liBhayibheli ujakile, futsi wangasakuboni loko lelikufundzisa kona? Tinike sikhatsi kuze ujabulele kufundza liVi laNkulunkulu; tibone ngeliso lengcondvo tintfo lotifundzako, uve emaphimbo ebantfu futsi ucabange ngaloko lokufundzako. Nawenta loku, utawujabula kakhulu.

8. ‘Sisebenti lesetsembekile nalesihlakaniphile’ siwufeza njani umsebenti waso? (Buka nembhalo longentasi.)

⁸ Jesu wabeka ‘sisebenti lesetsembekile nalesihlakaniphile’ kuze sisinikete kudla ngesikhatsi lesifanele, futsi asikwesweli. * (Mat. 24:45) Sisebenti lesetsembekile sisebentisa kakhulu umiBhalo lephefumulelwe nasilungiselela lokudla. (1 Thes. 2:13) Lokudla lokuvela kuNkulunkulu kuyasisita kuze sati indlela Jehova lacabanga ngayo njengobe ivetiwe eBhayibhelini. Kungako sifundza Sicongosekulindza ne-Phaphama! kanye netihloko letitfolakala ku jw.org. Silungiselela nemihlangano yelibandla lesekhatsi neliviki kanye nemihlangano yangemphelasontfo. Siphindze sibukele uMsakato we-JW njalo ngenyanga nawutfolakala. Nangabe sifundza liBhayibheli futsi silidadisha, sitawubese siyakhona kwenta naku kwesibili lokutasisita kutsi sijabule mbamba.

9. Yini intfo yesibili lesingayenta kuze sijabule mbamba?

⁹ KWESIBILI: Kuze sijabule mbamba, kufanele siphile ngetimiso taJehova. Umhlabeleli watsi: “Bayajabula labo labesaba Jehova, labo labahamba etindleleni takhe.” (Hla. 128:1) Kwesaba Jehova kusho kumhlonipha kakhulu size sigweme kwenta tintfo letingamjabulisi. (Taga 16:6) Ngako sihlale senta konkhe lokusemandleni etfu kuze siphile ngetimiso taNkulunkulu talokulungile nalokungakalungi, letibhalwe eBhayibhelini. (2 Khor. 7:1) Sitawujabula nangabe senta tintfo letitsandvwa nguJehova futsi singatenti leto latenyanyako.—Hla. 37:27; 97:10; Rom. 12:9.

10. Ngekusho kwembhalo waKubaseRoma 12:2, yini lokufanele siyente?

¹⁰ Fundza KubaseRoma 12:2. Umuntfu kungenteka ati kutsi nguJehova loneligunya lekuncuma kutsi yini lelungile nalengakalungi, kodvwa kufanele atincumele kutsi utatilalela yini letimiso taNkulunkulu. Sibonelo nje, umuntfu angati kutsi hulumende unelilungelo lekusho kutsi timoto kufanele tihambe ngesivinini lesingakanani emgwacweni. Kodvwa kungenteka angakulaleli loko futsi ahambe ngesivinini lesisetulu kunaleso lesibekiwe. Sikhombisa ngaloko lesikwentako kutsi setsemba mbamba kutsi kulalela timiso taJehova kuyindlela lencono kakhulu yekuphila. (Taga 12:28) Davide wativa ngaleyondlela, kungako atsi ngaJehova: “Uyangifundzisa indlela yekuphila. Lapho wena ukhona khona kuba nenjabulo lenkhulu; esandleni sakho sangesekudla kunenjabulo phakadze naphakadze.”—Hla. 16:11.

11-12. (a) Yini lokufanele siyicaphele nasinetinkinga nobe nasidvumatekile? (b) Emavi laKubaseFiliphi 4:8 angasisita njani nasikhetsa kwekutijabulisa?

 ¹¹ Nasinetinkinga nobe sidvumatekile, singeva shengatsi kufanele sente lokutsite lokungasisita kutsi siyekele kukhatsateka ngetinkinga tetfu. Loko kuyevakala, kodvwa kufanele sicaphele kutsi singenti intfo Jehova layenyanyako.—Ef. 5:10-12, 15-17.

¹² Encwadzini layibhalela emaKhristu aseFiliphi, Pawula wawakhutsata kutsi achubeke acabanga ngetintfo ‘letilungile, . . . letimsulwa, . . . letitsandzekako, . . . naletinhle.’ (Fundza KubaseFiliphi 4:8.) Nanobe liphuzu laPawula belingekho endzabeni yekutijabulisa, kodvwa singakusebentisa loko lakubhala nasikhetsa kwekutijabulisa. Yetama naku: Ngaso sonkhe sikhatsi nawubona ligama lelitsi “tintfo” kulelivesi, esikhundleni salo ubofaka ligama lelitsi “tingoma,” “ema-movie,” “ema-novel,” nobe lelitsi “imidlalo ye-video.” Kwenta loku kungakusita ubone kutsi ngutiphi tintfo letemukelekako kuNkulunkulu naletingemukeleki. Sifuna kuphila kwetfu kuvumelane netimiso taJehova letiphakeme. (Hla. 119:1-3) Nganembeza lomsulwa, singabese senta naku lokulandzelako kuze sitfole injabulo mbamba.—Imis. 23:1.

13. Nguyiphi intfo yesitsatfu lengasisita kutsi sitfole injabulo mbamba? (Johane 4:23, 24)

¹³ KWESITSATFU: Yenta konkhe longakwenta kuze kukhonta Jehova kute kucala ekuphileni kwakho. Njengobe Jehova anguMdali wetfu, kufanele simkhonte. (Semb. 4:11; 14:6, 7) Ngako kumkhonta ngendlela layemukelako kufanele kubaluleke kitsi, simkhonte “ngemoya nangeliciniso.” (Fundza Johane 4:23, 24.) Sifuna umoya longcwele waNkulunkulu ucondzise indlela lesimkhonta ngayo Jehova kuze ivumelane nemaciniso latfolakala eVini lakhe. Kumkhonta kwetfu kufanele kute kucala ngisho nobe sihlala eveni lapho umsebenti wetfu uvinjelwe khona. Nyalo kunebazalwane betfu nabodzadze labangetulu kwa-100 labasemajele ngenca nje yekutsi baBoFakazi BaJehova. * Nobe kunjalo, bajabulile futsi benta konkhe labangakwenta kuze bathantaze, badadishe liVi laNkulunkulu futsi batjele labanye ngaNkulunkulu wetfu nangeMbuso wakhe. Nasiphatfwa kabi, kuyasijabulisa kwati kutsi Jehova unatsi futsi utasibusisa.—Jak. 1:12; 1 Phet. 4:14.

14. Yini leyenteka kulomunye umzalwane losemusha waseTajikistan, futsi kwatsiwa yini licala lakhe?

¹⁴ Tindzaba letenteke mbamba tiyasicinisekisa kutsi letintfo letintsatfu lesesicoce ngato tingayiletsa injabulo mbamba ngisho nobe sibhekene natiphi timo. Cabanga ngaloko lokwenteka kuJovidon Bobojonov, waseTajikistan loneminyaka lengu-19, lowala kuba lisotja. Nga-October 4, 2019, watsatfwa ngenkhani ekhaya kubo, wavalelwa ejele tinyanga futsi waphatsiswa kwesigebengu. Lokuphatfwa kabi labhekana nako kwenta kutsi betindzaba bakulamanye emave bakhulume ngako. Kwabikwa kutsi washaywa kuze bamcindzetele kutsi avume kuba lisotja futsi agcoke netembatfo tawo. Ngemuva kwaloko walahlwa licala, futsi wayiswa enkambu lapho tiboshwa tisetjentiswa khona kamatima kwaze kwaba ngulapho mengameli walelive amkhulula. Kuso sonkhe lesikhatsi, Jovidon wachubeka etsembekile kuJehova futsi ajabulile. Wasitwa yini? Bekahlale anakisise tintfo letiphatselene naNkulunkulu.

15. Yini leyasita Jovidon kutsi achubeke afundza ngaJehova ngesikhatsi asejele?

 ¹⁵ Ngesikhatsi asejele, Jovidon wachubeka afundza ngaJehova, ngisho nobe bekete liBhayibheli nobe letinye tincwadzi tetfu. Kwenteka njani loko? Bazalwane nabodzadze lebebamletsela kudla bebabhala umbhalo welusuku kuletikhwama betiphatsa lokudla. Ngako bekakhona kufundza liBhayibheli futsi acabangisise ngalo onkhe malanga. Ngemuva kwekutsi sekakhululwe ejele, nasi seluleko lasisho kulabo labasengakabhekani netimo letimatima: “Kubaluleke kakhulu kutsi usisebentise ngalokugcwele sikhatsi lonaso nyalo njengobe ukhululekile kuze ufundze lokunyenti ngaJehova eVini lakhe nasetincwadzini tetfu.”

16. Yini Jovidon bekahlale acabanga ngayo?

¹⁶ Lomzalwane wetfu waphila ngetimiso taJehova. Kunekutsi ahlale acabanga ngetintfo letimbi futsi atente, wanaka Jehova naloko lokubalulekile kuJehova. Jovidon wacabangisisa ngebuhle bendalo yaNkulunkulu. Njalo ekuseni nakavuka, bekeva tinyoni tihlabela kamnandzi. Ebusuku bekabuka inyeti netinkhanyeti. Watsi: “Letipho letivela kuJehova betingijabulisa futsi tingikhutsata.” Nasibonga ngemfundvo Jehova lasipha yona  nangaloko lasentela kona, sitawujabula futsi lenjabulo itasisita kutsi sicinisele.

17. Emavi laku-1 Phetro 1:6, 7 angamsita njani umuntfu losesimeni lesifana nesaJovidon?

¹⁷ Jovidon wenta kukhonta Jehova kweta kucala ekuphileni kwakhe. Bekati kutsi kubaluleke kangakanani kuhlala etsembekile kuNkulunkulu weliciniso. Jesu watsi: “Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.” (Luk. 4:8) Baphatsi bemasotja kanye nalamanye emasotja bebafuna Jovidon ayekele kuba nguFakazi waJehova. Kunekutsi ente njalo, bekathantaza ngalokujulile kuJehova onkhe malanga acela Jehova kutsi amsite ahlale etsembekile. Nanobe aphatfwa kabi, Jovidon wachubeka etsembekile kuJehova. Ngenca yaloko, wajabula ngobe watfola intfo lebekete yona ngaphambi kwekutsi atsatfwe ekhaya, ashaywe futsi avalelwe ejele, lokukukholwa lokuvivinyiwe.—Fundza 1 Phetro 1:6, 7.

18. Ungahlala njani ujabulile?

¹⁸ Jehova uyakwati loko lesikudzingako kuze sijabule mbamba. Nawenta letintfo letintsatfu lesesicoce ngato letiholela enjabulweni sibili, ungajabula ngisho ubhekene netimo letimatima. Loko kutawenta kutsi nawe usho emavi latsi: “Bayajabula bantfu Nkulunkulu wabo lokunguJehova!”—Hla. 144:15.