1. Itsini ingilosi, futsi loko lekushoko kusho kutsini kitsi?

 NAKUNGENTEKA ingilosi ikhulume nawe, bewungalalela yini kutsi itsini? Lamuhla, ingilosi ikhuluma nato “tonkhe tive, tinhlanga, tilwimi kanye nebantfu.” Itsini? Itsi: ‘Mesabeni Nkulunkulu nimkhatimulise, khontani Loyo lowadala lizulu, umhlaba nelwandle.’ (Semb. 14:6, 7) Jehova nguye kuphela Nkulunkulu weliciniso lokufanele bonkhe bamkhonte. Sibonga kakhulu ngekutsi usinikete lelitfuba leliligugu lekumkhonta ethempelini lakhe lelikhulu lelingumfanekiso!

2. Liyini lithempeli laJehova lelingumfanekiso? (Buka nelibhokisi lelitsi “ Loko Lelingasiko.”)

² Liyini lelithempeli lelingumfanekiso, futsi singayitfola kuphi imininingwane lelichazako? Lelithempeli lelingumfanekiso alisiso sakhiwo mbamba. Yindlela lehlelwe nguJehova yekumkhonta ngendlela layemukelako ngesisekelo semhlatjelo waJesu loyinhlawulo. Umphostoli Pawula wakuchaza loku encwadzini yekucala layibhalela emaKhristu langemaHebheru lebekahlala eJudiya. b

3-4. Pawula bekakhatsateke ngani ngesikhatsi abhalela emaKhristu langemaHebheru lebekahlala eJudiya, futsi wawasita njani?

³ Yini leyenta Pawula wabhalela emaKhristu langemaHebheru lebekahlala eJudiya? Kungenteka kungenca yetizatfu letimbili. Kwekucala, kuze awakhutsate. Linyenti lawo belikhulele enkholweni yebuJuda. Kungenteka baholi balenkholo lebesekayishiyile  bebahlekisa ngawo ngenca yekutsi besekangemaKhristu. Ngasiphi sizatfu? EmaKhristu bekete lithempeli lekukhontela Nkulunkulu, bekete li-al’thare lebekangentela khona Nkulunkulu imihlatjelo futsi bekete nebaphristi lebebangabamelela. Loku bekungabadvumata bafundzi baKhristu futsi bekungenta kukholwa kwabo kube butsakatsaka. (Heb. 2:1; 3:12, 14) Kungenteka labanye bebaze balingeke kutsi babuyele enkholweni yebuJuda.

⁴ Kwesibili, Pawula watsi lamaKhristu langemaHebheru bekangatimiseli kucondza timfundziso letinsha nobe letijulile, ‘lokukudla lokucinile’ lokutfolakala eVini laNkulunkulu. (Heb. 5:11-14) Kubonakala ngatsi labanye kulamaKhristu bebasolo babambelele eMtsetfweni waMosi. Nobe kunjalo, Pawula wachaza kutsi imihlatjelo lebeyidzingeka ngephansi kwaloMtsetfo beyingasisusi ngalokuphelele sono. Ngenca yaloko, loMtsetfo ‘wabekelwa eceleni.’ Ngako Pawula wafundzisa lamaKhristu lamanye emaciniso lajulile. Wawakhumbuta ‘ngelitsemba lelincono’ lelisekelwe emhlatjelweni waJesu lebewungawasita kutsi ‘asondzele edvute naNkulunkulu.’​—Heb. 7:18, 19.

5. Yini lokufanele siyicondze ngencwadzi lebeyiya kumaHebheru, futsi leni?

⁵ Pawula wachazela bazalwane bakhe labangemaHebheru kutsi yini lebeyenta indlela emaKhristu lebekakhonta ngayo Nkulunkulu ibe ncono kakhulu kunaleyo bekakhontwa ngayo esikhatsini lesendlulile. Indlela emaJuda lebekakhonta ngayo Nkulunkulu ‘beyisitfunti setintfo lebetiseta, kodvwa lokungiko sibili kukuKhristu.’ (Khol. 2:17) Sitfunti sisitfombe sentfo mbamba, kodvwa asisiyo lentfo mbamba. Ngendlela lefanako, indlela emaJuda labekakhonta ngayo Nkulunkulu esikhatsini lesendlulile beyisitfunti sentfo mbamba lebeyiseta. Kudzingeka siyicondze indlela Jehova layibekile kuze sicolelwe tono tetfu khona sitamkhonta ngendlela layemukelako. Ase sicatsanise ‘lesitfunti’ (lokuyindlela emaJuda lebekamkhonta ngayo) naloko ‘lokungiko sibili’ (lokuyindlela emaKhristu lamkhonta ngayo), njengobe kuchazwe encwadzini lebeyibhalelwe emaHebheru. Ngekwenta njalo, sitawukhona kulicondza lelithempeli lelingumfanekiso nekutsi lisitsintsa njani tsine.

6. Belilani lithende lekukhontela?

⁶ Indlela yema-Israyeli yekukhonta Nkulunkulu. Pawula wakhuluma ngelithende lekukhontela lelakhiwa nguMosi nga-1512 B.C.E. (Buka  lishadi lelitsi “Indlela Yema-Israyeli Yekukhonta Nkulunkulu​—Indlela YemaKhristu Yekukhonta Nkulunkulu.”) Lelithende lekukhontela belakhiwe lafana nelithende futsi ema-Israyeli bekaletfwala nakasuka kulenye indzawo aya kulenye. Alisebentisa iminyaka lengaba ngu-500 kwaze kwaba ngulapho kwakhiwa lithempeli eJerusalema. (Eks. 25:8, 9; Num. 9:22) ‘Lelithende lekuhlangana’ beliba semkhatsini wema-Israyeli kuze akhone kusondzela kuNkulunkulu, amentele khona imihlatjelo futsi amkhontele kulo. (Eks. 29:43-46) Nobe kunjalo, lelithende lekukhontela beliphindze limelele lokutsite lokukhulu kakhulu lebekuseta.

7. Laba khona nini lithempeli lelingumfanekiso?

⁷ Indlela yemaKhristu yekukhonta Nkulunkulu. Lithende lekukhontela ‘belisitfunti setintfo tasezulwini,’ futsi belifanekisela lithempeli lelikhulu laJehova lelingumfanekiso. Pawula watsi “lelithende lingumfanekiso lomayelana nalesikhatsi sanyalo.” (Heb. 8:5; 9:9) Ngako ngesikhatsi abhalela emaHebheru, lelithempeli lelingumfanekiso beselikhona. Lacala kuba khona nga-29 C.E. Ngaloyo mnyaka, Jesu wabhajatiswa, wagcotjwa ngemoya longcwele futsi wacala kuba ‘ngumphristi lophakeme kakhulu’ kulelithempeli lelingumfanekiso. c​—Heb. 4:14; Imis. 10:37, 38.

8-9. Ngekuvumela nencwadzi yaKumaHebheru 7:23-27, ngumuphi umehluko lomkhulu lokhona emkhatsini webaphristi labaphakeme baka-Israyeli nakuJesu Khristu longumPhristi Lophakeme kakhulu?

⁸ Indlela yema-Israyeli yekukhonta Nkulunkulu. Umphristi lophakeme bekamelela bantfu embikwaNkulunkulu. Aroni waba ngumphristi lophakeme wekucala wema-Israyeli lowakhetfwa nguJehova ngesikhatsi kuniketelwa lithende lekukhontela. Nobe kunjalo, Pawula watsi “labanyenti babe baphristi ngekulandzelana ngobe kufa bekubavimba kutsi bachubeke babaphristi.” d (Fundza KumaHebheru 7:23-27.) Ngenca yekutsi baphristi labaphakeme bebanesono, bekudzingeka kutsi nabo batentele imihlatjelo yetono tabo. Loku kuveta umehluko lomkhulu emkhatsini webaphristi labaphakeme bema-Israyeli kanye naJesu Khristu umPhristi Lophakeme kakhulu.

⁹ Indlela yemaKhristu yekukhonta Nkulunkulu. Njengobe Jesu angumPhristi wetfu Lophakeme, ‘usisebenti sasethendeni lelingulonalona, lelo lelamiswa nguJehova hhayi bantfu.’ (Heb. 8:1, 2) Pawula wachaza kutsi “ngenca yekutsi [Jesu] uchubeka aphila kuze kube phakadze, kute lotawungena esikhundleni sakhe.” Pawula wengeta watsi Jesu ‘uhlantekile, akafani netoni’ futsi ngalokwehlukile kubaphristi labaphakeme bema-Israyeli, yena “akadzingi kwenta iminikelo malanga onkhe” ngenca yetono takhe. Nyalo ase sicoce ngemehluko emkhatsini wema-al’thare nemihlatjelo lebeyentiwa ngema-Israyeli kanye nendlela emaKhristu lakhonta ngayo Nkulunkulu.

10. Beyifanekisela ini imihlatjelo lebeyentiwa e-al’thare lelitfusi?

¹⁰ Indlela yema-Israyeli yekukhonta Nkulunkulu. Ngephandle kwelithende lekukhontela bekuneli-al’thare lelitfusi lapho bekunikelwa khona imihlatjelo yetilwane kuJehova. (Eks. 27:1, 2; 40:29) Nobe kunjalo, lemihlatjelo beyingenti kutsi bantfu bacolelwe tono tabo ngalokuphelele. (Heb. 10:1-4) Kuchubeka nekwenta imihlatjelo ethendeni lekukhontela bekumelela  umhlatjelo munye lebewutawenta kutsi bantfu bacolelwe ngalokuphelele tono tabo.

11. Jesu watinikela kuliphi li-al’thare kutsi abe ngumhlatjelo? (KumaHebheru 10:5-7, 10)

¹¹ Indlela yemaKhristu yekukhonta Nkulunkulu. Jesu bekati kutsi Jehova bekamtfume emhlabeni kuze atonikela ngekuphila kwakhe angumuntfu lote sono kube yinhlawulo yebantfu. (Mat. 20:28) Ngako ngesikhatsi Jesu abhajatiswa, watinikela kuze ente loko bekufunwa nguJehova. (Joh. 6:38; Gal. 1:4) Jesu watinikela e-al’thare lelingumfanekiso lelimelela ‘intsandvo’ yaNkulunkulu lekutsi iNdvodzana yakhe inikele ngekuphila kwayo lokute sono. Jesu wanikela ngekuphila kwakhe kwaba “kanye kuphela” kuze kube yinhlawulo nobe kumbonye ngalokuphelele tono tabo bonkhe labakhombisa kutsi bayakholwa kuKhristu. (Fundza KumaHebheru 10:5-7, 10.) Nyalo ase sicoce ngekutsi timelela ini tintfo lebetingekhatsi kulelithende lekukhontela.

12. Ngubani lobekangena endzaweni ngayinye lebeyisethendeni lekukhontela?

¹² Indlela yema-Israyeli yekukhonta Nkulunkulu. Lithende lekukhontela kanye nemathempeli lakhiwa ngekuhamba kwesikhatsi eJerusalema bekunetintfo letifanako ngekhatsi. Ngekhatsi ‘bekunendzawo leNgcwele’ ‘neNgcwelengcwele,’ lebetehlukaniswa yindvwangu lenemihlobiso. (Heb. 9:2-5; Eks. 26:31-33) Ngekhatsi endzaweni leNgcwele bekunesibane lesakhiwe ngeligolide, li-al’thare lekushisa imphepho kanye nelitafula lesinkhwa. Bekungulabo ‘labagcotjwe kutsi babe baphristi’ kuphela lebebavumeleke kutsi  bangene endzaweni leNgcwele kuze bente imisebenti yabo. (Num. 3:3, 7, 10) Endzaweni leNgcwelengcwele bekunelibhokisi lesivumelwane lelakhiwe ngeligolide lebelifanekisela kuba khona kwaJehova. (Eks. 25:21, 22) Ngumphristi lophakeme kuphela lebekavumeleke kutsi endlule lendvwangu futsi angene eNgcwelengcwele Ngelilanga Lekubuyisana NaNkulunkulu lebeliba khona kanye ngemnyaka. (Lev. 16:2, 17) Njalo ngemnyaka, bekangena nengati yetilwane kuze ayohlawulela tono takhe netaso sonkhe lesive. Ekugcineni, Jehova wasebentisa umoya wakhe longcwele kuze akwente kucace kutsi mbambambamba letintfo betimelela ini.​—Heb. 9:6-8. e

13. Indzawo leNgcwele naleNgcwelengcwele lesethendeni lekukhontela ifanekisela ini endleleni emaKhristu lakhonta ngayo Nkulunkulu?

¹³ Indlela yemaKhristu yekukhonta Nkulunkulu. Kunelicembu lelincane lebafundzi baKhristu leligcotjwe ngemoya longcwele, futsi linebuhlobo lobukhetsekile naJehova. LamaKhristu langu-144 000 atawuba baphristi ezulwini naJesu. (Semb. 1:6; 14:1) Indzawo leNgcwele yelithende lekukhontela ifanekisela kutsi Nkulunkulu uwafake esiswini, wawenta aba ngemadvodzana akhe asaphila emhlabeni. (Rom. 8:15-17) INgcwelengcwele lesethendeni lekukhontela ifanekisela lizulu lapho Jehova ahlala khona. ‘Indvwangu’ lebeyehlukanisa iNgcwele neNgcwelengcwele ifanekisela umtimba wenyama waJesu lebewumvimbela kutsi angene ezulwini abe ngumPhristi Lophakeme ethempelini lelingumfanekiso. Ngesikhatsi anikela ngemtimba wakhe loyinyama kutsi ube yinhlawulo yebantfu, Jesu wavulela onkhe emaKhristu lagcotjiwe indlela yekutsi ayophila ezulwini. Nawo kufanele angabi nemtimba wenyama kuze atfole umvuzo wawo wekuyophila ezulwini. (Heb. 10:19, 20; 1 Khor. 15:50) Ngemuva kwekuvuswa kwaJesu, wangena eNgcwelengcwele lesethempelini lelingumfanekiso futsi bonkhe labagcotjiwe bamkhandza khona.

14. Ngekusho kwembhalo waKumaHebheru 9:12, 24-26, yini leyenta kukhonta Jehova ethempelini lelingumfanekiso kube ncono kakhulu?

¹⁴ Kusebaleni kutsi indlela Jehova lasibekele yona yekukhonta lokuhlantekile lesekelwe enhlawulweni yaJesu Khristu nasebupristini bakhe iphakeme kakhulu. Umphristi lophakeme waka-Israyeli bekangena eNgcwelengcwele leyakhiwe bantfu aphetse ingati yetilwane, kodvwa Jesu wangena “ezulwini lucobo,” lokuyindzawo lengcwele kunato tonkhe kuze eme embikwaJehova. Nakalapho, waletsa kuphila kwakhe angumuntfu lote sono ngenca yetfu “kuze asuse sono ngemhlatjelo wakhe.” (Fundza KumaHebheru 9:12, 24-26.) Umhlatjelo waJesu ukuphela kwemhlatjelo losula sono kuze kube phakadze. Nyalo ase sicoce ngekutsi ngisho nobe sinelitsemba lekuphila ezulwini nobe emhlabeni, sonkhe singakhona kukhonta Jehova ethempelini lakhe lelingumfanekiso.

15. Bobani lebebasebenta ebaleni lebelisethendeni lekukhontela?

¹⁵ Indlela yema-Israyeli yekukhonta Nkulunkulu. Lithende lekukhontela belinelibala linye, lebekuyindzawo levulekile futsi lebiyelwe lapho baphristi bebentela khona imisebenti yabo. Li-al’thare lelikhulu lelitfusi lekushisa iminikelo belikulelibala, kanye nendishi yelitfusi lebeyinemanti ekugeza baphristi ngaphambi kwekutsi bente imisebenti lengcwele. (Eks. 30:17-20; 40:6-8) Kodvwa emathempeli lakhiwa kamuva abese aba nelibala langephandle, lapho labo labangasibo baphristi bebangema khona futsi bakhonte Nkulunkulu.

16. Bobani labasebenta ebaleni ngalinye lelithempeli lelingumfanekiso?

 ¹⁶ Indlela yemaKhristu yekukhonta Nkulunkulu. Ngaphambi kwekutsi labo labasele labagcotjiwe babe baphristi ezulwini naJesu, kufanele bakhonte Nkulunkulu ngekwetsembeka ebaleni lelingekhatsi kwalelithempeli lelingumfanekiso. Indishi lenkhulu yemanti ibalulekile ngobe ikhumbuta wona kanye nawo onkhe emaKhristu kutsi ahlale ahlantekile endleleni latiphatsa ngayo nalakhonta ngayo Nkulunkulu. Simkhontela kuphi Jehova “sicumbi lesikhulu” lesibasekela ngekwetsembeka banakaboKhristu labagcotjiwe? Umphostoli Johane wasibona “sime embikwesihlalo sebukhosi,” lokumelela libala langephandle, lapho sentela khona “[Nkulunkulu] umsebenti longcwele busuku nemini ethempelini lakhe.” (Semb. 7:9, 13-15) Sibonga kakhulu ngekutsi Jehova usinikete lelitfuba lelihle lekumkhonta kulelithempeli lelingumfanekiso!

17. Ngumiphi imihlatjelo lesiyentela Jehova?

¹⁷ Lamuhla, onkhe emaKhristu anelitfuba lelihle lekunikela imihlatjelo kuJehova ngekutsi asebentise sikhatsi sawo, emandla kanye netintfo tawo kuze akhonte Nkulunkulu. Njengobe umphostoli Pawula atjela emaKhristu langemaHebheru, natsi singanikela “kuNkulunkulu umhlatjelo wekudvumisa, lokusitselo setindzebe tetfu, ngekutsi simemetele libito lakhe embikwebantfu.” (Heb. 13:15) Singakhombisa kutsi sibonga kakhulu ngelitfuba lesinalo lekukhonta Jehova ngekutsi simnike imihlatjelo lencono kakhulu.

18. Ngekusho kwembhalo waKumaHebheru 10:22-25, yini lokungakafaneli siyiyekele futsi yini lokungakafaneli siyikhohlwe?

¹⁸ Fundza KumaHebheru 10:22-25. Ngasekwephetseni kwencwadzi layibhalela emaKhristu langemaHebheru, Pawula washo tintfo letiphatselene nekukhonta kwetfu Nkulunkulu lokungakafaneli sitiyekele. Letintfo tifaka ekhatsi kuthantaza kuJehova, kushumayela, kuhlangana ndzawonye emihlanganweni yelibandla, kanye nekukhutsatana, ‘ikakhulukati njengobe sibona lilanga [laJehova] lisondzela.’ Ngasekwephetseni kwencwadzi yeSembulo, ingilosi yaJehova yawasho kabili emavi latsi: “Khonta Nkulunkulu,” kuze igcizelele. (Semb. 19:10; 22:9) Shengatsi singahlale silikhumbula leliciniso lelijulile lelimayelana nelithempeli laJehova lelingumfanekiso kanye nelitfuba lelihle lesinalo lekukhonta Nkulunkulu wetfu lomkhulu!