SIHLOKO LESIFUNDVWAKO 41
INGOMA 13 Khristu Usibonelo Setfu
Yini Lesingayifundza Emalangeni Langu-40 Ekugcina Jesu Alamhlabeni?
“Wabonakala kubo tikhatsi letinyenti emalangeni langu-40, futsi wabachazela ngeMbuso waNkulunkulu.”—IMIS. 1:3.
LOKUTAWUCOCWA NGAKO
Singasilingisa njani sibonelo saJesu lasibekela sona emalangeni ekugcina langu-40 alamhlabeni?
1-2. Yini leyenteka njengobe bafundzi baJesu lababili baya e-Emawusi?
NGUNISANI 16, 33 C.E. Bafundzi baJesu basebuhlungwini lobukhulu futsi besaba kakhulu. Lababili babo besuka eJerusalema baya e-Emawusi, lokuyindzawo lekhashane ngemakhilomitha langaba ngu-11 kusuka eJerusalema. Lamadvodza advumateke kakhulu ngenca yekutsi Jesu lebekasolo amlandzela sewubulewe. Bekanelitsemba lekutsi Mesiya utawentela tintfo letinhle emaJuda, kodvwa nyalo besekafile. Kepha kwenteka intfo lebekangakayilindzeli.
2 Kwachamuka lomunye umuntfu labangamati futsi wahamba nabo. Labafundzi bamtjela indlela lebebadvumateke ngayo ngaloko bekwenteke kuJesu. Lomuntfu wabese ucala kukhuluma ngetintfo labangayuze batikhohlwe. “Wacala kulokwabhalwa nguMosi wayofika kulokwabhalwa ngibo bonkhe baPhrofethi,” wabachazela kutsi yini lebeyente kwadzingeka kutsi Mesiya ahlupheke futsi afe. Ngesikhatsi lamadvodza lamatsatfu efika e-Emawusi, lomuntfu labangamati wativeta kutsi ungubani, bekunguJesu lovusiwe! Cabanga nje kutsi labafundzi bajabula kangakanani nababona kutsi Mesiya sewuyaphila!—Luk. 24:13-35.
3-4. Yini leyenteka kubafundzi baJesu, futsi yini lesitayifundza kulesihloko? (Imisebenti 1:3)
3 Jesu wabonakala tikhatsi letinyenti kubafundzi bakhe kulamalanga ekugcina langu-40 alamhlabeni. (Fundza Imisebenti 1:3.) Kuleso sikhatsi, wakhutsata balandzeli bakhe lebebeva buhlungu futsi besaba. Bajabula baphindze baba nesibindzi sekushumayela nekufundzisa ngetindzaba letimnandzi teMbuso. a
4 Kungasisita kufundza ngaloko lokwenteka kuleso sikhatsi. Kulesihloko, sitawubona kutsi Jesu wasisebentisa njani lesikhatsi (1) kuze akhutsate bafundzi bakhe, (2) kuze abasite bayicondze kancono imiBhalo, futsi (3) abaceceshe kuze bakhone kwenta imisebenti leminyenti. Esimeni ngasinye, sitawubona kutsi singamlingisa njani Jesu.
KHUTSATA LABANYE
5. Yini leyenta bafundzi baJesu badzinga kukhutsatwa?
5 Bafundzi baJesu bebadzinga kukhutsatwa. Ngasiphi sizatfu? Labanye bebashiye emakhaya, imindeni nemabhizinisi kuze balandzele Jesu ngaso sonkhe sikhatsi. (Mat. 19:27) Labanye bebaphatfwa kabi ngenca yekutsi besebabafundzi baJesu. (Joh. 9:22) Bakudzela konkhe loku ngobe bebakholelwa kutsi Jesu unguMesiya lowetsenjisiwe. (Mat. 16:16) Kodvwa ngesikhatsi abulawa, baphelelwa litsemba futsi bajabha.
6. Yini Jesu layenta ngemuva kwekuvuswa kwakhe?
6 Jesu bekati kutsi bekuyintfo levamile kutsi bafundzi bakhe beve buhlungu ngenca yekutsi besekafile. Bekati nekutsi lobuhlungu bebungabangelwa kutsi banekukholwa lokubutsakatsaka. Ngako ngelilanga lavuswa ngalo, wakhutsata bangani bakhe. Sibonelo nje, wabonakala kuMariya waseMagdala lebekakhala ethuneni lakhe. (Joh. 20:11, 16) Waphindze wabonakala kulabafundzi lababili lesikhulume ngabo ekucaleni kwalesihloko. Wabonakala nakumphostoli Phetro. (Luk. 24:34) Yini lesingayifundza esibonelweni saJesu? Ase sicoce ngaloko lokwenteka ngesikhatsi abonakala kwekucala.
7. Njengobe kuvetwe kuJohane 20:11-16, Jesu wabona Mariya entani ekuseni ngaNisani 16, futsi loko kwamenta kutsi enteni? (Buka nesitfombe.)
7 Fundza Johane 20:11-16. Ekuseni ngaNisani 16, labanye bafati labetsembekile baya ethuneni laJesu. (Luk. 24:1, 10) Ase sicoce ngalokwenteka kuMariya waseMagdala. Ngesikhatsi Mariya efika kulelithuna, walitfola lingenalutfo. Wagijima wayotjela boPhetro naJohane, futsi wabalandzela njengobe bagijima baya ethuneni. Ngemuva kwekutsi lamadvodza abone kutsi akunalutfo, abuyela ekhaya. Kodvwa Mariya wasala, wakhala. Bekangati kutsi Jesu bekambukile. Wambuka lomfati lowetsembekile njengobe akhala futsi watsintseka. Ngako wabonakala kuMariya futsi wenta lokutsite lokwamkhutsata kakhulu. Wakhuluma naye futsi wamniketa umsebenti lobalulekile wekuyotjela bafundzi bakhe letindzaba tekutsi sewuvusiwe.—Joh. 20:17, 18.
Lingisa Jesu ngekutsi unake futsi uvelane nalabo labadvumatekile (Buka sigaba 7)
8. Singamlingisa njani Jesu?
8 Singamlingisa njani Jesu? Kunyenti lesingakwenta kuze sikhutsate bazalwane betfu nabodzadze kutsi bachubeke bakhonta Jehova, nangabe natsi njengaJesu sikunaka kucindzeteleka kwabo futsi sibadvudvute. Cabanga ngalokwenteka kulomunye dzadze lokutsiwa nguJocelyn lowashonelwa ngusisi wakhe engotini lembi. Utsi: “Kwaphela tinyanga letinyenti ngiselusizini lolukhulu.” Nobe kunjalo, lomunye umzalwane nemkakhe bammemela ekhaya labo, bamlalelisisa futsi bamcinisekisa ngekutsi uligugu kuNkulunkulu. Jocelyn utsi: “Ngeva ngatsi Jehova usebentise bona kuze angikhiphe elwandle lolunesivunguvungu lesikhulu. Bangisita kutsi ngiphindze ngibe nesifiso sekuchubeka ngikhonta Jehova.” Natsi singabakhutsata labanye ngekutsi sibalalelisise njengobe batfulula sifuba sabo futsi sibadvudvute, sinemgomo wekubasita kutsi bachubeke bakhonta Nkulunkulu.—Rom. 12:15.
SITA LABANYE BACONDZE IMIBHALO
9. Nguyiphi inkinga bafundzi baJesu lababhekana nayo, futsi wabasita njani?
9 Bafundzi baJesu bebakholelwa eVini laNkulunkulu, futsi bebetama kamatima kulisebentisa ekuphileni kwabo. (Joh. 17:6) Nobe kunjalo, kwabadida kufa kwaJesu elugodvweni njengesigebengu. Jesu wabona kutsi kungabata kwabo bekungabangelwa kutsi banetinhlitiyo letimbi, kodvwa bekubangelwa kutsi bebangacondzi. (Luk. 9:44, 45; Joh. 20:9) Ngako wabafundzisa kutsi bacabangisise ngemiBhalo. Ase sibone kutsi loko wakwenta njani ngesikhatsi abonakala kulabafundzi bakhe lababili emgwacweni loya e-Emawusi.
10. Jesu wabacinisekisa njani bafundzi bakhe kutsi vele unguMesiya? (Lukha 24:18-27)
10 Fundza Lukha 24:18-27. Naka kutsi Jesu akazange awatjele ngekushesha lamadvodza kutsi ungubani. Kunaloko, wawabuta imibuto. Ngasiphi sizatfu? Mhlawumbe bekafuna avete loko lokusetingcondvweni tawo nasetinhlitiyweni tawo. Nguloko kanye lakwenta. Amtjela kutsi bekacabanga kutsi Jesu utawukhulula ema-Israyeli ekucindzetelweni ngemaRoma. Nasekayivetile indlela lativa ngayo, Jesu wabese usebentisa imiBhalo kuze awasite akucondze loko bekwentekile. b Ntsambama ngalelo langa, Jesu wacitsa sikhatsi nalabanye bafundzi bakhe futsi wabachazela lamaciniso. (Luk. 24:33-48) Yini lesingayifundza kulendzaba?
11-12. (a) Ngusiphi sifundvo lesingasifundza endleleni Jesu lafundzisa ngayo emaciniso laseBhayibhelini? (Buka netitfombe.) (b) Lobekadadisha liBhayibheli naNortey wamsita njani?
11 Singamlingisa njani Jesu? Kwekucala, nawufundzisa labanye liBhayibheli, babute imibuto lekahle letawenta bavete loko lokusetingcondvweni tabo nasetinhlitiyweni tabo. (Taga 20:5) Nasewuyicondza indlela labativa ngayo, bakhombise kutsi bangayitfola njani imibhalo lengasebenta kulesimo sabo. Ungabatjeli kutsi benteni. Kunaloko, basite bacabangisise ngemiBhalo futsi ubasite batibonele kutsi bangatisebentisa njani timiso letiseBhayibhelini ekuphileni kwabo. Cabanga ngalokwenteka kulomunye umzalwane waseGhana lokutsiwa nguNortey.
12 Ngesikhatsi Nortey aneminyaka lengu-16, wacala kudadisha liBhayibheli. Kodvwa ngekushesha umndeni wakubo wamphikisa. Yini leyamsita kutsi ahlale acinile? Lona bekadadisha naye liBhayibheli wasebentisa Matewu sehluko 10 kuze achaze kutsi emaKhristu eliciniso atawuphatfwa kabi. Nortey utsi: “Ngesikhatsi ngicala kuphatfwa kabi, ngabona kutsi sengilitfolile liciniso.” Lona bekadadisha naye liBhayibheli waphindze wamsita kutsi acabange ngaMatewu 10:16 kuze acaphele futsi ahloniphe nakakhuluma ngetindzaba letimayelana nenkholo ekhaya. Ngemuva kwekubhajatiswa, Nortey bekafuna kuba lihlahlandlela, kodvwa babe wakhe bekafuna aye enyuvesi. Kunekutsi lona bekadadisha naye amtjele loko lokufanele akwente, wasebentisa imibuto kuze amsite acabange ngetimiso teliBhayibheli futsi ente sincumo lesikahle. Waba yini umphumela? Nortey wancuma kungenela umsebenti wasikhatsi sonkhe. Babe wakhe wamcosha ekhaya. Utiva njani Nortey ngaloko lokwenteka? Utsi: “Ngiyaciniseka kutsi ngenta sincumo lesikahle.” Nangabe natsi sisita labanye kutsi bacabangisise ngemiBhalo, singabasita kutsi babe ngemaKhristu lavutsiwe.—Ef. 3:16-19.
Lingisa Jesu ngekutsi usite labanye bacabangisise ngemiBhalo (Buka sigaba 11) e
CECESHA BAZALWANE KUTSI BABE “TIPHO LETIBANTFU”
13. Yini Jesu layenta kuze aciniseke kutsi umsebenti waBabe wakhe uyachubeka wentiwa? (Kubase-Efesu 4:8)
13 Ngesikhatsi Jesu alamhlabeni, wawenta kahle umsebenti lebekawunikwe nguBabe wakhe. (Joh. 17:4) Kodvwa Jesu bekete umbono lotsi: ‘Nangabe ufuna intfo yentiwe kahle, yente wena.’ Kuleminyaka lemitsatfu nehhafu enta umsebenti wekushumayela, wacecesha labanye kuze bawente lomsebenti. Ngaphambi kwekutsi abuyele ezulwini, waniketa bafundzi bakhe umsebenti wekunakekela timvu taJehova letiligugu kanye nekuhola emsebentini wekushumayela newekufundzisa, futsi kungenteka labanye kulabafundzi bakhe bebaseminyakeni yabo-20. (Fundza Kubase-Efesu 4:8.) Jesu wawasebentisa njani lamalanga ekugcina langu-40 kuze asite lamadvodza latinikele, letsembekile futsi lasebenta kamatima kuze abe “tipho letibantfu”?
14. Yini Jesu layifundzisa bafundzi bakhe kulamalanga ekugcina langu-40 alamhlabeni? (Buka nesitfombe.)
14 Jesu wanika bafundzi bakhe seluleko lebebasidzinga kodvwa loko wakwenta ngelutsandvo. Sibonelo nje, wanaka kutsi labanye babo besebanemkhuba wekungabata, ngako wabeluleka. (Luk. 24:25-27; Joh. 20:27) Wabatjela kutsi banake kakhulu kunakekela timvu taJehova kunekunaka emabhizinisi abo. (Joh. 21:15) Wabakhumbuta kutsi bangacatsanisi loko labakwentako nalokwentiwa ngulabanye emsebentini waJehova. (Joh. 21:20-22) Waphindze walungisa naleminye imibono lengasiyo lebebanayo ngeMbuso futsi wabasita kutsi banake kakhulu kushumayela tindzaba letimnandzi. (Imis. 1:6-8) Yini labadzala belibandla labangayifundza kuJesu?
Lingisa Jesu ngekutsi uceceshe bazalwane kuze bakufanele kwenta leminye imisebenti ebandleni (Buka sigaba 14)
15-16. (a) Labadzala belibandla bangamlingisa njani Jesu? Chaza. (b) Seluleko samsita njani Patrick?
15 Labadzala belibandla bangamlingisa njani Jesu? Kufanele baceceshe futsi basite bazalwane, lokufaka ekhatsi labo labasebancane kuze bakhone kwenta imisebenti leminyenti ebandleni. c Labadzala belibandla akukafaneli balindzele kutsi labo lababaceceshako bangawenti emaphutsa. Kufanele babeluleke ngelutsandvo kuze bafundze kutfobeka, babone kutsi kubalulekile kutsi labanye babetsembe futsi babe nesifiso sekusita labanye.—1 Thim. 3:1; 2 Thim. 2:2; 1 Phet. 5:5.
16 Cabanga ngekutsi samsita njani seluleko lomunye umzalwane lokutsiwa nguPatrick. Nakasemusha, bekakhuluma angakacabangi futsi enta tintfo letibaphatsa kabi labanye, lokufaka ekhatsi bodzadze. Lomunye lomdzala welibandla lovutsiwe wabunaka lobutsakatsaka baPatrick futsi wamnika seluleko lebekasidzinga kodvwa ngendlela lenemusa. Patrick utsi: “Ngiyajabula kutsi wanginika leseluleko. Bengidvumateka nangibona labanye bazalwane batfola imisebenti lebengiyifuna. Kodvwa leseluleko salomzalwane sangisita ngabona kutsi kufanele ngitfobeke futsi ngikhombise kutsi ngiyabatsandza bazalwane bami nabodzadze kunekutsi nginake kutfola imisebenti ebandleni.” Ngenca yaloko, Patrick waba ngulomdzala welibandla nakaneminyaka lengu-23.—Taga 27:9.
17. Jesu wakhombisa njani kutsi bekabetsemba bafundzi bakhe?
17 Jesu wanika bafundzi bakhe umsebenti wekushumayela nekufundzisa. Kungenteka labafundzi beva shengatsi abakufaneli kwenta lomsebenti. Kodvwa Jesu bekaciniseka kutsi bangakhona kuwenta, futsi nguloko labatjela kona. Aveta indlela lebekabetsemba ngayo, watsi: “Njengobe Babe angitfumile, nami ngiyanitfuma.”—Joh. 20:21.
18. Labadzala belibandla bangamlingisa njani Jesu?
18 Labadzala belibandla bangamlingisa njani Jesu? Labadzala belibandla labahlakaniphile bacecesha labanye ngekutsi babavumele kutsi bente leminye imisebenti. (Fil. 2:19-22) Sibonelo nje, labadzala belibandla bangaba nalabasha nabahlanta liHholwa leMbuso nalapho linakekelwa. Ngemuva kwekubanika umsebenti, bangakhombisa kutsi bayabetsemba ngekutsi babaceceshe futsi betsembe kutsi batawenta kahle uze uphele. Lomunye losandza kuba ngulomdzala welibandla lokutsiwa nguMatthew utsi uyajabula ngekutsi labadzala bamcecesha kuze ente imisebenti letsite ebandleni futsi bametsemba kutsi utayenta kahle. Utsi: “Nangenta emaphutsa, bebangisita ngibone kutsi ngingenta njani kancono esikhatsini lesitako.” d
19. Yini lokufanele sitimisele kuyenta?
19 Jesu wasebentisa emalanga akhe ekugcina alamhlabeni kuze akhutsate labanye, abafundzise futsi abaceceshe. Shengatsi singatimisela kulandzela sibonelo sakhe edvute. (1 Phet. 2:21) Utasisita kuze sikhone kukwenta loko. Ngetulu kwako konkhe, wetsembisa watsi: “Nginani onkhe emalanga kuze kube sekupheleni kwalelive.”—Mat. 28:20.
INGOMA 15 Dvumisani Litibulo LaJehova!
a EmaVangeli naletinye tincwadzi teliBhayibheli tikhombisa kutsi Jesu lovusiwe wabonakala tikhatsi letinyenti kulabanye, lokufaka ekhatsi kuMariya waseMagdala (Joh. 20:11-18); kulabanye bafati (Mat. 28:8-10; Luk. 24:8-11); kubafundzi lababili (Luk. 24:13-15); kuPhetro (Luk. 24:34); kubaphostoli ngaphandle kwaTomase (Joh. 20:19-24); kubaphostoli, lokufaka ekhatsi naTomase (Joh. 20:26); kubafundzi labangu-7 (Joh. 21:1, 2); kubafundzi labangetulu kwa-500 (Mat. 28:16; 1 Khor. 15:6); kuJakobe umnakabo (1 Khor. 15:7); kubo bonkhe baphostoli (Imis. 1:4); kubaphostoli dvutane neBhetani. (Luk. 24:50-52) Kungenteka wabonakala nangaletinye tikhatsi kodvwa atikabhalwa eBhayibhelini.—Joh. 21:25.
b Kuze utfole luhla lwetiphrofetho letimayelana naMesiya, buka sihloko lesiku jw.org lesitsi “Tiphrofetho Letimayelana NaMesiya Tiyakufakazela Yini Kutsi Jesu Nguye LoMesiya?”
c Kuletinye timo, labanye labadzala belibandla bangaba babonisi besigodzi ngisho baneminyaka lengu-25 kuya ku-30. Nobe kunjalo, lamadvodza kufanele acale atfole lwati loludzingekile nawasengulabadzala belibandla.
d Kuze ubone kutsi bangasitwa njani bazalwane labasebasha kuze bakufanele kwenta imisebenti leminyenti ebandleni, buka Sicongosekulindza sa-August 2018, emakh. 11-12, tig. 15-17, nesa-April 15, 2015, emakh. 3-13.
e KUCHAZWA KWESITFOMBE: Ngemuva kwekutsi lofundzelwa liBhayibheli asitwe kutsi acabangisise ngemiBhalo, uncuma kulahla tintfo takhe tekuhlobisa ngaKhisimusi.
