UMCULO bewuyintfo lebaluleke kakhulu emasikweni aka-Israyeli. LiBhayibheli livame kukhuluma ngebantfu lebebadlala tinsimbi temculo nalebebahlabela tingoma. Incenye lenkhulu yeliBhayibheli yakhiwa tingoma. Sibonelo nje, incwadzi yeTihlabelelo, Ingoma Yetingoma neSililo bekutingoma. Ngekusho kwencwadzi letsi Music in Biblical Life itsi liBhayibheli “liveta ngalokucacile kutsi ema-Israyeli bekasebentisa umculo nakenta tintfo letinyenti ekuphileni kwawo.”

Umculo ekuphileni kwamalanga onkhe. Ema-Israyeli bekadlala umculo kuze avete indlela lebekativa ngayo. (Isa. 30:29) Besifazane bebadlala emathamborine, bahlabele bajabulile futsi bajayive nakunemikhosi, lokufaka ekhatsi nakubekwa inkhosi lensha, nangabe emasotja ancobile emphini nalapho kunemikhosi yekukhonta. (Khu. 11:34; 1 Sam. 18:6, 7; 1 Khos. 1:39, 40) Ema-Israyeli bekaphindze ahlabele tingoma tekulila nangabe kushone lotsite. (2 Khr. 35:25) I-Cyclopedia yaMcClintock naStrong itsi: “Kuyacaca kutsi ema-Israyeli bekawutsandza kakhulu umculo.”

Umculo esigodlweni. Emakhosi aka-Israyeli bekawutsandza umculo. INkhosi Sawula yabita Davide esigodlweni sayo kuze atawumdlalela umculo. (1 Sam. 16:18, 23) Ngekuhamba kwesikhatsi, Davide nasekayinkhosi, wakha tinsimbi temculo, wabhala tingoma letimnandzi futsi wahlela bantfu kutsi batohlabela ethempelini laJehova. (2 Khr. 7:6; Amo. 6:5) INkhosi Solomoni beyinebahlabeleli labadvuna nalabasikati esigodlweni sayo.​—Shu. 2:8.

Umculo ekukhonteni Nkulunkulu. Ema-Israyeli lamanyenti bekasebentisa umculo kuze akhonte Jehova. Ecinisweni, bekunebahlabeleli labangu-4 000 lebebahlabela ethempelini lebeliseJerusalema. (1 Khr. 23:5) Bebadlala emasimbali, tinsimbi temculo letinetintsambo, emahabhu netimpalampala. (2 Khr. 5:12) Kodvwa akusibo labahlabeleli kuphela lebebadvumisa Jehova ngemculo. Kubonakala ngatsi ema-Israyeli lamanyenti bekahlabela Tingoma Tekwenyukela Edolobheni njalo ngemnyaka nakunemkhosi eJerusalema. (Hla. 120–134) Ngekusho kwetincwadzi temaJuda, ema-Israyeli bekahlabela letinye tingoma letikuTihlabelelo a ngesikhatsi sesidlo seliphasika.

Umculo solo ubalulekile kubantfu baNkulunkulu. (Jak. 5:13) Uyincenye yekukhonta kwetfu Nkulunkulu. (Ef. 5:19) Umculo wenta kutsi sibe nebunye nebazalwane betfu nabodzadze. (Khol. 3:16) Uphindze usicinise nasibhekene netimo letimatima. (Imis. 16:25) Umculo uyindlela lesikhombisa ngayo kukholwa kwetfu kuJehova nekutsi siyamtsandza.