SIHLOKO LESIFUNDVWAKO 40
‘Basita Bantfu Labanyenti Kutsi Babe Ngulabalungile’
“Labo labasita bantfu labanyenti kutsi babe ngulabalungile, batawukhanya njengetinkhanyeti kuze kube phakadze naphakadze.”—DAN. 12:3.
INGOMA 151 Utawubabita
LOKUTAWUCOCWA NGAKO KULESIHLOKO *
1. Ngutiphi tintfo letijabulisako letitakwenteka ngesikhatsi Sekubusa Kweminyaka Lengu-1 000?
KUTAWUBE kulilanga lelimnandzi kakhulu lapho bantfu labafile bacala kuvuka emhlabeni ngesikhatsi Sekubusa KwaKhristu Kweminyaka Lengu-1 000! Bonkhe labashonelwe bantfu lababatsandzako bayakulangatelela kubabona. NaJehova uyakulangatelela kuphindze ababone. (Jobe 14:15) Cabanga ngenjabulo letawuba khona emhlabeni wonkhe lapho bantfu sebaphindze babonana nalabavusiwe lababatsandzako. Njengobe sifundzile esihlokweni lesendlulile, labo “labalungile” futsi emagama abo labhalwe encwadzini yekuphila “batawuvuselwa ekuphileni.” (Imis. 24:15; Joh. 5:29) Mhlawumbe linyenti lebantfu lesibatsandzako litawuba semkhatsini walabo labatawusheshe bavuswe. * Ngetulu kwaloko, labo ‘labangakalungi,’ njengalabo labangazange balitfole litfuba lelenele lekufundza ngaJehova nobe lekumkhonta ngekwetsembeka ngaphambi kwekutsi bafe, ‘batawuvuselwa ekwehlulelweni.’
2-3. (a) Njengobe kuvetwe ku-Isaya 11:9, 10, ngumuphi umsebenti lomkhulu wekufundzisa lotawentiwa emhlabeni wonkhe? (b) Sitawucoca ngani kulesihloko?
2 Bonkhe labo labatawuvuswa kutawudzingeka bafundziswe. (Isa. 26:9; 61:11) Kutawentiwa umsebenti lomkhulu wekufundzisa ngelizinga longazange sewentiwe ngalo emhlabeni wonkhe. (Fundza Isaya 11:9, 10.) Ngasiphi sizatfu? Ngobe labo labangakalungi labatawuvuswa kutawudzingeka bafundziswe ngaJesu Khristu, ngeMbuso, ngenhlawulo, ngekubaluleka kwelibito laJehova nangekutsi yini leyenta kube nguye yedvwa lonelilungelo lekubusa. Ngisho nalabo labalungile kutawudzingeka bafundziswe ngaloko Jehova abesolo akufundzisa bantfu bakhe mayelana nenjongo yakhe ngemhlaba kuleminyaka. Labanye kulabo labafa betsembekile, bafa ngaphambi kwekutsi livi laJehova licedvwe kuhlanganiswa libe liBhayibheli. Ngako kunyenti lokutawudzingeka kufundvwe ngulabalungile nalabangakalungi.
3 Kulesihloko, sitawuphendvula nayi imibuto: Utawentiwa njani lomsebenti lomkhulu wekufundzisa? Kutasifaka yini sandla kutsi bantfu bayakwenta loko labatawufundziswa kona nobe abakwenti kuze emagama abo abhalwe angacishwa kulencwadzi yekuphila? Tibalulekile kitsi lamuhla timphendvulo talemibuto. Njengobe sitawubona, letiphrofetho letimangalisako letibhalwe encwadzini yaDanyela nakuSembulo titasisita sikucondze kancono loko lokutakwenteka nakuvuswa labafile. Ase sicale sicoce ngetintfo letijabulisako lokwaphrofethwa ngato kutsi titawukwenteka kuDanyela 12:1, 2.
“LABALELE ELUTFULINI . . . BATAWUVUKA”
4-5. Yini incwadzi yaDanyela 12:1 lesitjela kona mayelana nesikhatsi sekuphela?
4 Fundza Danyela 12:1. Incwadzi yaDanyela isitjela kutsi tintfo letitawenteka ngesikhatsi sekuphela titawulandzelana kanjani. Sibonelo nje, Danyela 12:1 usitjela kutsi Mikhayeli, lokunguJesu Khristu ‘usita bantfu’ baNkulunkulu. Lencenye yalesiphrofetho yacala kugcwaliseka nga-1914 ngesikhatsi Jesu abekwa kutsi abe yiNkhosi yeMbuso waNkulunkulu ezulwini.
5 Nobe kunjalo, Danyela waphindze watjelwa kutsi Jesu ‘utawuvela’ ngesikhatsi “sekucindzeteleka lesingazange sesibe khona kusukela kwacala kuba khona sive kuze kube nguleso sikhatsi.” ‘Lesikhatsi sekucindzeteleka’ sikhatsi ‘sekuhlupheka lokukhulu’ lokukhulunywa ngako kuMatewu 24:21. Jesu utawuvikela bantfu baNkulunkulu ngasekupheleni kwalesikhatsi sekucindzeteleka, lokutawube kuyi-Amagedoni. Nayikhuluma ngalabantfu, incwadzi yeSembulo ibabita ngekutsi ‘sicumbi lesikhulu lesiphume ekuhluphekeni lokukhulu.’—Semb. 7:9, 14.
6. Yini letawenteka ngemuva kwekutsi sicumbi lesikhulu sisindze ekuhluphekeni lokukhulu? Chaza. (Buka nesihloko lesikulomagazini lesitsi “Imibuto Levela Kubafundzi” lesikhuluma ngekuvuselwa emhlabeni.)
6 Fundza Danyela 12:2, umbhalo longentasi. Yini letawenteka ngemuva kwekutsi sicumbi lesikhulu sisindze kulesikhatsi sekucindzeteleka? Ngaphambili, besitsi lesiphrofetho sikhuluma ngekuvuselwa ezulwini nobe ngelizinga lelisetulu umsebenti wembuso lowentiwa ngalo ngemuva kwekutsi ucishe umiswe baphikisi nga-1918. * Nobe kunjalo, nyalo kucondza lokusha kutsi lamavi asho kuvuka kwalabafile lokutakwenteka eveni lelisha. Yini lesenta sisho njalo? Emavi latsi “elutfulini” aphindze atfolakale nakuJobe 17:16 futsi asho ‘lithuna.’ Loko kukhombisa kutsi Danyela 12:2 ukhuluma ngekuvuswa ekufeni lokutawenteka ngemuva kwekutsi emalanga ekugcina sekaphelile futsi nemphi ye-Amagedoni seyiphelile.
7. (a) Sisho ngamuphi umcondvo kutsi labanye batawuvuselwa “ekuphileni lokuphadze”? (b) Sisho ngani kutsi loku ‘kuvuswa ekufeni ngendlela lencono kakhulu’?
7 Danyela 12:2 usho kutsini nawutsi labanye batawuvuselwa “ekuphileni lokuphakadze”? Usho kutsi ngeminyaka lengu-1 000, labo labatawuvuswa futsi bati Jehova naJesu, nobe bachubeke bati Jehova naJesu batawutfola kuphila lokuphakadze ekugcineni. (Joh. 17:3) Loku ‘kuvuswa ekufeni ngendlela lencono kakhulu’ nakucatsaniswa nalabo labavuswa ekufeni esikhatsini lesendlulile. (Heb. 11:35) Sisho ngani? Ngobe bona baphindze bafa.
8. Yini letawenta kutsi labanye bavuselwe “ehlazweni laphakadze”?
8 Kodvwa akusibo bonkhe labatawemukela lemfundvo levela kuJehova. Siphrofetho saDanyela sitsi labanye batawuvuselwa “ehlazweni laphakadze.” Ngenca yekutsi batawuvukela, emagama abo angeke abhalwe encwadzini yekuphila futsi angeke bakutfole kuphila lokuphakadze. Kunaloko, batawuvuselwa “ehlazweni laphakadze” nobe batawubhujiswa. Ngako Danyela 12:2 ukhuluma ngesiphetfo sabo bonkhe labatawuvuswa ekufeni kuye ngaloko labatawukwenta nasebavusiwe. * (Semb. 20:12) Labanye batawutfola kuphila lokuphakadze kantsi labanye angeke bakutfole.
‘BASITA BANTFU LABANYENTI KUTSI BABE NGULABALUNGILE’
9-10. Yini lenye letawenteka ngemuva kwekuhlupheka lokukhulu, futsi bobani ‘labatawukhanya njengekukhanya kwesibhakabhaka’?
9 Fundza Danyela 12:3. Yini lenye letakwenteka ‘ngesikhatsi sekucindzeteleka’? Ngetulu kwaloko lokushiwo nguDanyela 12:2, vesi 3 ukhuluma ngaloko lokutawenteka ngemuva kwesikhatsi sekuhlupheka lokukhulu.
10 Bobani ‘labatawukhanya njengekukhanya kwesibhakabhaka’? Imphendvulo singayitfola emavini aJesu latfolakala kuMatewu 13:43 latsi: “Ngaleso sikhatsi, labalungile bayawukhanya njengelilanga eMbusweni waBabe wabo.” Kulelivesi Jesu bekakhuluma “ngemadvodzana eMbuso,” lokubanakabo labagcotjiwe labatawubusa naye eMbusweni wasezulwini. (Mat. 13:38) Ngako kungenteka Danyela 12:3 ukhuluma ngalabagcotjiwe nangemsebenti labatawenta ngesikhatsi Sekubusa Kweminyaka Leyinkhulungwane.
Labangu-144 000 batawusebenta naJesu Khristu kuze bacondzise umsebenti wekufundzisa lotawentiwa ngesikhatsi seminyaka lengu-1 000 (Buka sigaba 11)
11-12. Ngumuphi umsebenti lotawentiwa ngulabangu-144 000 ngesikhatsi seminyaka lengu-1 000?
11 Yini letawentiwa ngulabagcotjiwe kuze ‘basite bantfu labanyenti kutsi babe ngulabalungile’? Labagcotjiwe batawusebenta naJesu Khristu kuze bacondzise umsebenti lomkhulu wekufundzisa lotawentiwa lamhlabeni ngesikhatsi seminyaka lengu-1 000. Labangu-144 000 ngeke nje bagcine ngekuba ngemakhosi kodvwa batawuphindze babe baphristi. (Semb. 1:6; 5:10; 20:6) Ngako batawenta umsebenti ‘wekuphilisa tive,’ futsi batawusita bantfu kutsi babe bete sono kancane kancane. (Semb. 22:1, 2; Hez. 47:12) Leso kuyawuba sikhatsi lesijabulisa kakhulu kulabagcotjiwe!
12 Bobani labatawuba semkhatsini walaba “labanyenti” labatawentiwa kutsi babe ngulabalungile? Kutawuba ngulabavusiwe nalabo labatawusindza ku-Amagedoni kanye nebantfwana lokungenteka batalwe eveni lelisha. Ngasekupheleni kweminyaka lengu-1 000, bonkhe bantfu emhlabeni batawube sebete sono. Ngako kunini lapho bantfu batawubhalwa khona nge-inki hhayi ngempenseli encwadzini yekuphila?
KUVIVINYWA KWEKUGCINA
13-14. Yini bantfu labete sono lokutawudzingeka bayente kuze batfole kuphila lokuphakadze?
13 Kufanele sikhumbule kutsi kubabete sono akusho kutsi umuntfu utawuvele nje atfole kuphila lokuphakadze. Cabanga nga-Adamu na-Eva. Bebete sono, kodvwa bekudzingeka balalele Jehova Nkulunkulu ngaphambi kwekutsi batfole kuphila lokuphakadze futsi lokubuhlungu kutsi abazange bamlalele.—Rom. 5:12.
14 Kutawentekani kubantfu emhlabeni ngasekupheleni kweminyaka lengu-1 000? Bonkhe batawube sebete sono. Bonkhe bantfu labete sono batakusekela ngalokuphelele yini kubusa kwaJehova kuze kube phakadze? Labanye batawufanana na-Adamu na-Eva yini, bangetsembeki nanobe bete sono? Lemibuto itawudzinga kuphendvulwa, kodvwa itawuphendvulwa njani?
15-16. (a) Bantfu batalitfola nini litfuba lekukhombisa kutsi betsembekile kuJehova? (b) Utawuba yini umphumela wekuvivinywa kwekugcina?
15 Sathane utawuvalelwa iminyaka lengu-1 000. Kuleso sikhatsi, angeke akhone kudukisa bantfu. Nobe kunjalo, utawukhululwa nakuphela iminyaka lengu-1 000. Utawubese wetama kudukisa bantfu labete sono. Ngaleso sikhatsi, bonkhe bantfu lebete sono emhlabeni batawuba nelitfuba lekukhombisa ngalokucacile kutsi bayalihlonipha yini libito laNkulunkulu nekutsi bayakusekela yini kubusa kwakhe. (Semb. 20:7-10) Indlela bantfu labatawenta ngayo ngaleso sikhatsi itawukhombisa kutsi emagama abo angabhalwa yini nge-inki encwadzini yekuphila.
16 LiBhayibheli lisitjela kutsi labanye angeke betsembeke futsi batawulingisa bo-Adamu na-Eva, nabo angeke bakwemukele kubuswa nguJehova. Yini letakwenteka kubo? Sembulo 20:15 sitsi: “Nobe ngubani lobekangakabhalwa encwadzini yekuphila wajikwa kulelichibi lemlilo.” Ngako bantfu labatawuvukela batawubhujiswa ngalokuphelele. Kodvwa linyenti lebantfu labete sono litawetsembeka kuJehova ngesikhatsi sekuvivinywa kwekugcina. Emagama abo atawubhalwa nge-inki encwadzini yekuphila.
‘NGESIKHATSI SEKUGCINA’
17. Yini Danyela latjelwa kutsi itakwenteka esikhatsini setfu? (Danyela 12:4, 8-10)
17 Kusijabulisa kakhulu kucabanga ngaletintfo letitawenteka esikhatsini lesitako! Nanobe kunjalo, ingilosi yaphindze yatjela Danyela imininingwane lebalulekile lemayelana nesikhatsi setfu, ‘lokusikhatsi sekugcina.’ (Fundza Danyela 12:4, 8-10; 2 Thim. 3:1-5) Lengilosi yatjela Danyela yatsi: “Lwati lweliciniso lutawuba lunyenti.” Bantfu baNkulunkulu bebatawacondza kahle lamavi lakulencwadzi lasiphrofetho. Lengilosi yaphindze yatsi kulesikhatsi, “lababi batawenta tintfo letimbi futsi kute ngisho namunye kubo lotawuba nekucondza.”
18. Yini letakwenteka madvutane kulababi?
18 Lamuhla, kungabonakala shengatsi lababi abajeziswa ngetintfo letimbi labatentako. (Mal. 3:14, 15) Kodvwa madvutane, Jesu utawehlulela labo labanjengetimbuti abehlukanise kulabo labanjengetimvu. (Mat. 25:31-33) Labantfu lababi angeke basindze ngekuhlupheka lokukhulu futsi angeke bavuswe eveni lelisha. Emagama abo angeke abhalwe ‘encwadzini yesikhumbuto’ lokukhulunywa ngayo kuMalakhi 3:16.
19. Nyalo sikhatsi sekutsi senteni, futsi leni? (Malakhi 3:16-18)
19 Nyalo sikhatsi sekutsi indlela lesiphila ngayo ikhombise kutsi asikho emkhatsini walababi. (Fundza Malakhi 3:16-18.) Jehova uhlanganisa labo labatsatsa ‘njengemphahla lekhetsekile,’ lokungulabo labaligugu kuye. Nakanjani sifuna kuba semkhatsini wabo.
Kutasijabulisa kakhulu kubona Danyela nebantfu lesibatsandzako kanye nalabanyenti ‘bavuka’ futsi batfola sabelo sabo eveni lelisha! (Buka sigaba 20)
20. Ngusiphi setsembiso sekugcina lasatjelwa Danyela, futsi yini lekwenta ulangatelele kugcwaliseka kwalesetsembiso?
20 Nyalo siphila emalangeni lapho khona kwenteka tintfo letinyenti kakhulu. Kodvwa kusetakwenteka tintfo letinyenti letijabulisako. Ngekushesha sitawubona nakubhujiswa bonkhe bantfu lababi. Ngemuva kwaloko sitawubona kugcwaliseka kwesetsembiso Jehova lasitjela Danyela lesitsi: “Kepha nasesiphelile sikhatsi sekulindza kwakho, utawuvuka utfole sabelo sakho.” (Dan. 12:13) Uyalilangatelela yini lilanga lapho khona Danyela kanye nalabo lobatsandzako baphindze ‘bavuka’? Nangabe kunjalo, yenta konkhe lokusemandleni akho nyalo kuze uhlale wetsembekile, futsi ungaciniseka kutsi ligama lakho litawuhlale likhona encwadzini yaJehova yekuphila.
INGOMA 80 “Nambitsani Nibone Buhle BaJehova”
^ Lesihloko silungisa indlela besicondza ngayo umsebenti lomkhulu wekufundzisa lokukhulunywa ngawo kuDanyela 12:2, 3. Sitawucoca ngekutsi utawenteka nini nekutsi bobani labatawenta lomsebenti. Sitawuphindze sicoce ngekutsi lomsebenti lomkhulu wekufundzisa utawubasita njani labo labasemhlabeni kutsi balungele kuvivinywa kwekugcina lokutawenteka ekupheleni Kwekubusa KwaKhristu Kweminyaka Lengu-1 000.
^ Kusenekwenteka kutawucale kuvuswe labo labafe betsembekile ngemalanga ekugcina bese kulandzela labo labafa embikwabo, kanjalo kanjalo. Nangabe nguloko lokutawenteka, situkulwane nesitukulwane sitawuba nelitfuba lekwemukela bantfu lesibatiko. Kunobe yini letawenteka, imiBhalo nayikhuluma ngekuvukela ezulwini isitjela kutsi batawuvuka “ngekulandzelana kwabo,” futsi singalindzela kutsi kutawenteka lokufanako nangalabo labatawuvuselwa emhlabeni.—1 Khor. 14:33; 15:23.
^ Lenchazelo ilungisa loko lokwavela encwadzini letsi Sinake Isiprofetho SikaDaniyeli! sehluko 17, naku-Sicongosekulindza saJuly 1, 1987, emakh. 21-25, lesitfolakala ngesiNgisi.
^ Ngalokwehlukile, emavi latsi “labalungile” nalatsi ‘labangakalungi’ latfolakala kuMisebenti 24:15 kanye nalatsi “labo labente lokuhle” nalatsi “labo labente lokubi” latfolakala kuJohane 5:29 akhuluma ngetintfo lebetentiwa ngulabavusiwe ngaphambi kwekutsi bafe.
