1. Ngekusho kwaMalakhi 3:16, nguyiphi incwadzi Jehova lebekasolo ayibhala, futsi icuketseni?

 SEKUPHELE tinkhulungwane teminyaka Jehova abhala incwadzi lebalulekile. Lencwadzi ibhalwe emagama ebantfu kusukela kufakazi wekucala lowetsembekile lokungu-Abela. * (Luk. 11:50, 51) Kuyo yonkhe leminyaka, Jehova bekasolo engeta emagama ebantfu kulencwadzi, futsi lamuhla kunetigidzi temagama ebantfu kuyo. EBhayibhelini, lencwadzi ibitwa ngekutsi ‘yincwadzi yesikhumbuto,’ ‘yincwadzi yekuphila’ nangekutsi ‘ngumculu wekuphila.’ Kulesihloko, sitayibita ngekutsi ‘yincwadzi yekuphila.’—Fundza Malakhi 3:16; Semb. 3:5; 17:8.

2. Ngulabanjani lababhalwe encwadzini yekuphila, futsi yini lesingayenta kuze emagama etfu abhalwe kulencwadzi?

² Lencwadzi lebalulekile icuketse onkhe emagama ebantfu labesaba Jehova nobe labamhloniphako, nalabatsandza libito lakhe. Basetfubeni lekutfola kuphila lokuphakadze. Lamuhla, emagama etfu angabhalwa kulencwadzi nangabe setama kuba nebuhlobo lobuhle naJehova ngesisekelo senhlawulo yeNdvodzana yakhe Jesu Khristu. (Joh. 3:16, 36) Sonkhe siyafuna kutsi emagama etfu abhalwe kulencwadzi, ngisho nobe sinelitsemba lekuphila ezulwini nobe emhlabeni.

3-4. (a) Sitawuphila yini phakadze nangabe nyalo emagama etfu abhaliwe encwadzini yekuphila? Chaza. (b) Sitawucoca ngani kulesihloko nakulesilandzelako?

³ Loku kusho kutsi bonkhe bantfu lababhalwe kulencwadzi  nakanjani batakutfola yini kuphila lokuphakadze? Imphendvulo siyitfola kuloko Jehova lakutjela Mosi, njengobe kubhalwe ku-Eksodusi 32:33. Jehova watsi: “Nobe ngubani lowonile kimi ngitawumesula encwadzini yami.” Ngako kwamanje emagama angesulwa nobe acishwe kulencwadzi, kube shengatsi Jehova uwabhale ngempenseli. (Semb. 3:5, umbhalo longentasi) Kufanele sente konkhe lokusemandleni etfu kuze emagama etfu ahlale abhalwe kulencwadzi kuze kube ngulapho abhalwa nge-inki.

⁴ Loku kungasenta sitibute imibuto. Nasi sibonelo, litsini liBhayibhelini ngalabo emagama abo labhalwe kulencwadzi yekuphila nangalabo emagama abo langakabhalwa kulencwadzi? Labo lababhalwe kulencwadzi batakutfola nini kuphila lokuphakadze? Kutawentekani kulabo labafa bangakalitfoli litfuba lekufundza ngaJehova? Kungenteka yini kutsi emagama abo abhalwe kulencwadzi? Lemibuto itawuphendvulwa kulesihloko nasesihlokweni lesilandzelako.

ABOBANI EMAGAMA LABHALWE KULENCWADZI?

5-6. (a) Njengobe kuvetwe KubaseFiliphi 4:3, bobani emagama abo labhaliwe kulencwadzi yekuphila? (b) Emagama abo atawubhalwa nini angacishwa encwadzini yekuphila?

⁵ Abobani emagama labhalwe kulencwadzi yekuphila? Kuze siphendvule lombuto, sitawucoca ngemacembu lasihlanu ebantfu. Emkhatsini walaba, kunemagama ebantfu lababhaliwe encwadzini yekuphila nalabo labangakabhalwa.

⁶ Licembu lekucala lakhiwa ngulabo labakhetfwe kutsi bayobusa naJesu ezulwini. Emagama abo abhaliwe yini nyalo encwadzini yekuphila? Yebo. Ngekusho kwemavi emphostoli Pawula lawatjela ‘tisebenti lakanye nato’  taseFiliphi, emagama alabagcotjiwe labakhetfwe kutsi bayobusa naJesu abhaliwe kulencwadzi yekuphila. (Fundza KubaseFiliphi 4:3.) Kodvwa kuze emagama abo ahlale akulencwadzi kufanele bahlale betsembekile. Ngemuva kwekutsi babekwe luphawu lwekugcina, emagama abo atawubhalwa angacishwa kulencwadzi. Loku kwenteka ngaphambi kwekutsi bafe nobe kutawenteka ngaphambi kwekutsi kucale kuhlupheka lokukhulu.—Semb. 7:3.

7. Nasicabanga ngalokushiwo Sembulo 7:16, 17, atawubhalwa nini angacishwa encwadzini yekuphila emagama emalunga esicumbi lesikhulu?

⁷ Licembu lesibili lakhiwa sicumbi lesikhulu saletinye timvu. Emagama emalunga aso abhaliwe yini nyalo encwadzini yekuphila? Yebo. Emagama abo atawuchubeka akhona yini encwadzini yekuphila ngemuva kwekutsi basindze ku-Amagedoni? Yebo. (Semb. 7:14) Jesu watsi laba labanjengetimvu batawutfola “kuphila lokuphakadze.” (Mat. 25:46) Kodvwa labo labatawusindza nge-Amagedoni ngeke bakutfole kuphila lokuphakadze ngaleso sikhatsi. Emagama abo atawuchubeka abhaliwe kulencwadzi yekuphila, kube ngatsi abhalwe ngempenseli. Ngesikhatsi Sekubusa Kweminyaka Leyinkhulungwane, Jesu ‘utawubelusa, abaholele emitfonjeni yemanti ekuphila.’ Labo labatawulalela sicondziso saKhristu futsi ekugcineni labatawutfolakala betsembekile kuJehova, emagama abo atawubhalwa angacishwa kulencwadzi yekuphila.​—Fundza Sembulo 7:16, 17.

8. Bobani labangakabhalwa encwadzini yekuphila, futsi yini letawenteka kubo?

⁸ Licembu lesitsatfu lifaka ekhatsi timbuti, lokungulabo labatawubhujiswa nge-Amagedoni. Emagama abo awakabhalwa encwadzini yekuphila. Jesu watsi “batawubhujiswa ngalokuphelele.” (Mat. 25:46) Aphefumulelwe, Pawula watsi “laba batawutfola sijeziso sekubhujiswa kwaphakadze.” (2 Thes. 1:9; 2 Phet. 2:9) Kungashiwo lokufanako nangalabo bebasolo bawona ngemabomu umoya longcwele. Nabo angeke bakutfole kuphila lokuphakadze, kodvwa batawubhujiswa ngalokuphelele. Kusebaleni kutsi angeke bavuswe. (Mat. 12:32; Mak. 3:28, 29; Heb. 6:4-6) Nyalo ase sicoce ngemacembu lamabili latawuvuselwa emhlabeni.

LABO LABATAWUVUSWA

9. Njengobe kusho Imisebenti 24:15, ngumaphi emacembu lamabili latawuvuselwa emhlabeni, futsi ngumuphi umehluko lokhona emkhatsini walamacembu?

⁹ LiBhayibheli likhuluma ngemacembu lamabili ebantfu labatawuvuswa labanelitsemba lekuphila phakadze emhlabeni, ‘lokungulabalungile’ “nalabangakalungi.” (Fundza Imisebenti 24:15.) “Labalungile” ngulabo labakhonte Jehova ngekwetsembeka basaphila. Kantsi ‘labangakalungi’ abazange bakhonte Jehova ngekwetsembeka. Ecinisweni, linyenti labo belitiphatsa ngendlela lengakalungi. Kodvwa ngenca yekutsi omabili lamacembu atawuvuswa, loko kusho kutsi emagama abo abhaliwe yini encwadzini yekuphila? Kuze siphendvule lombuto, ase sicoce ngelicembu ngalinye.

10. Yini letawenta kutsi “labalungile” bavuswe, futsi labanye batawuniketwa muphi umsebenti? (Buka nesihloko lesikulomagazini lesitsi “Imibuto Levela Kubafundzi” lesikhuluma ngekuvuselwa emhlabeni.)

¹⁰ Licembu lesine lakhiwa ‘ngulabalungile.’ Emagama abo abhalwa encwadzini yekuphila ngaphambi kwekutsi bafe. Asuswa yini encwadzini yekuphila nabafa? Cha, ngobe Jehova solo uyabakhumbula. Jehova “unguNkulunkulu walabaphilako, hhayi walabafile, ngobe ngekwembono wakhe bonkhe bayaphila.” (Luk. 20:38) Loko kusho kutsi nakuvuswa labalungile, emagama abo atawube  abhaliwe kulencwadzi, kodvwa atawube abhalwe “ngempenseli.” (Luk. 14:14) Labanye kulabo labatawuvuswa batawunikwa umsebenti wekuba tikhulu emhlabeni wonkhe.​—Hla. 45:16.

11. Yini lokutawudzingeka ifundvwe ‘ngulabangakalungi’ ngaphambi kwekutsi emagama abo abhalwe encwadzini yekuphila?

¹¹ Licembu lesihlanu lakhiwa ‘ngulabangakalungi.’ Ngenca yekutsi bebangayati imitsetfo yaJehova, kungenteka bebaphila ngendlela lengakalungi ngaphambi kwekutsi bafe. Ngako emagama abo awakabhalwa encwadzini yekuphila. Kodvwa Nkulunkulu utawubavusa kuze batfole litfuba lekutsi emagama abo abhalwe kulencwadzi. Laba ‘labangakalungi’ kutawudzingeka kutsi basitwe. Ngaphambi kwekutsi bafe, labanye babo bebenta tintfo letimbi kakhulu. Kutawudzingeka bafundziswe kuphila ngetimiso taJehova letilungile. Kuze bafundziswe loko, uMbuso waNkulunkulu utawucondzisa umsebenti lomkhulu wekufundzisa lotawube wentiwa ngelizinga longakase wentiwe ngalo lamhlabeni.

12. (a) Bobani labatawufundzisa labangakalungi? (b) Yini letawenteka kulabo labangeke bakusebentise loko labafundziswa kona?

¹² Bobani labatawufundzisa labangakalungi? Sicumbi lesikhulu nalabo labalungile labatawuvuswa. Kuze emagama alabangakalungi abhalwe encwadzini yekuphila, kutawudzingeka bacale babe nebuhlobo lobuhle naJehova futsi batinikele kuye. Jesu Khristu nalabagcotjiwe batawubanakisisa labo labangakalungi kuze babone kutsi bayakwenta yini loko labafundziswa kona. (Semb. 20:4) Nobe ngubani longeke akwente loko lafundziswa kona angeke avunyelwe kutsi achubeke aphila, ngisho kungatsiwa uneminyaka lengu-100 budzala. (Isa. 65:20) Jehova naJesu bayakhona kufundza tinhlitiyo, futsi ngeke bavume kutsi kube nemuntfu lobanga umonakalo eveni lelisha.—Isa. 11:9; 60:18; 65:25; Joh. 2:25.

 KUVUSELWA EKUPHILENI NEKUVUSELWA EKWEHLULELWENI

13-14. (a) Esikhatsini lesendlulile, besiwacondza njani emavi aJesu lakuJohane 5:29? (b) Yini lokufanele siyinake ngalamavi?

¹³ NaJesu wakhuluma ngalabo labatawuvuselwa emhlabeni. Sibonelo nje, watsi: “Sikhatsi siyeta lapho bonkhe labasemathuneni batawuliva livi layo futsi baphume; labo labente lokuhle batawuvuselwa ekuphileni, labo labente lokubi bavuselwe ekwehlulelweni.” (Joh. 5:28, 29) Bekasho kutsini Jesu?

¹⁴ Esikhatsini lesendlulile, besati kutsi lamavi aJesu asho loko lokutawentiwa ngulabavusiwe; lokungukutsi labanye batawuvuswa bente tintfo letikahle kantsi labanye batawuvuswa bese benta tintfo letimbi. Kodvwa naka kutsi Jesu akazange atsi labo labatawuvuswa batawenta lokuhle nobe atsi batawenta lokubi. Wasebentisa inkhulumo yesikhatsi lesendlulile. Watsi “labo labente lokuhle” waphindze watsi “labo labente lokubi.” Loku kukhombisa kutsi letintfo batenta ngaphambi kwekutsi bafe. Kunengcondvo loko ngobe kute lotawuvunyelwa kutsi ente tintfo letimbi eveni lelisha. Kusebaleni kutsi bantfu labangakalungi kungenteka bebente letintfo letimbi ngaphambi kwekutsi bafe. Ngako kufanele siwacondze njani emavi aJesu lamayelana ‘nekuvuselwa ekuphileni’ ‘nekuvuselwa ekwehlulelweni’?

15. Bobani ‘labatawuvuselwa ekuphileni,’ futsi leni?

¹⁵ Labo labalungile lebebenta tintfo letinhle ngaphambi kwekutsi bafe “batawuvuselwa ekuphileni” ngobe emagama abo atawube abhaliwe encwadzini yekuphila. Loko kusho kutsi kuvuswa ‘kwalabo labente lokuhle’ lokukhulunywa ngako kuJohane 5:29 solo kunye nekuvuswa ‘kwalabalungile’ lokukhulunywa ngako embhalweni weMisebenti 24:15. Lenchazelo iyavumelana nemavi latfolakala KubaseRoma 6:7, latsi: “Umuntfu lofile ukhululiwe esonweni sakhe.” Ngako labalungile nabafa, Jehova uyabacolela tono tabo, kodvwa ukukhumbula konkhe lokuhle labakwentile nabasaphila. (Heb. 6:10) Labo labalungile labatawuvuswa kutawudzingeka bahlale betsembekile kuze emagama abo achubeke akhona encwadzini yekuphila.

16. Kusho kutsini ‘kuvuselwa ekwehlulelweni’?

¹⁶ Yini letawenteka kulabo lebebenta lokubi ngaphambi kwekutsi bafe? Nanobe tono tabo tatsetselelwa nabafa, kodvwa abazange bamkhonte Jehova ngekwetsembeka nabasaphila. Emagama abo awakabhalwa encwadzini yekuphila. Kuvuswa kwalabo “labente lokubi” solo kunye nekuvuswa kwalabo ‘labangakalungi’ lokukhulunywa ngako embhalweni weMisebenti 24:15. Ngako ‘batawuvuselwa ekwehlulelweni.’ * Labangakalungi batawehlulelwa ngemcondvo wekutsi batawube basahlolwa. (Luk. 22:30) Ngemuva kwesikhatsi, Jesu utawubona kutsi emagama abo angabhalwa yini encwadzini yekuphila. Emagama abo atawubhalwa kuphela nangabe bashintja indlela yabo lembi bebaphila ngayo futsi batinikele kuJehova.

17-18. Yini lokutawudzingeka kutsi bayente bonkhe labatawuvuselwa emhlabeni, futsi ngutiphi ‘letento’ lokukhulunywa ngato kuSembulo 20:12, 13?

¹⁷ Ngisho nobe bebalungile nobe bangakalungi, labo labatawuvuswa kutawudzingeka balalele imitsetfo lemisha letawuba semiculwini lemisha letawuvulwa kuleminyaka lengu-1 000. Naku umphostoli Johane lakubona embonweni, watsi: “Ngabona nalabafile, labakhulu nalabancane beme embikwalesihlalo  sebukhosi, futsi imiculu yavulwa. Kodvwa kwavulwa nalomunye umculu, lokungumculu wekuphila. Labafile behlulelwa ngetintfo lebetibhalwe kulemiculu kuye ngetento tabo.”​—Semb. 20:12, 13.

¹⁸ Labavusiwe batawehlulelwa ngatiphi ‘tento’? Batawehlulelwa ngetintfo labatenta ngaphambi kwekutsi bafe yini? Cha! Khumbula kutsi tono tabo tatsetselelwa nabafa. Ngako, lana ‘tento tabo’ atisho loko labakwenta ngaphambi kwekutsi bafe. Kunaloko, tisho loko labatakwenta ngemuva kwekufundziswa eveni lelisha. Ngisho nemadvodza letsembekile lafaka ekhatsi boNowa, Samuweli, Davide naDanyela kutawudzingeka kutsi afundze ngaJesu Khristu futsi avete kutsi ayakholwa emhlatjelweni wakhe. Kakhulu kangakanani-ke ngalabo labangakalungi!

19. Yini letawenteka kulabo labangeke balisebentise lelitfuba lelihle nakangaka?

¹⁹ Yini letawenteka kulabo labangeke balisebentise lelitfuba lelihle nakangaka? Sembulo 20:15 sitsi: “Nobe ngubani lobekangakabhalwa encwadzini yekuphila wajikwa kulelichibi lemlilo.” Batawubhujiswa ngalokuphelele. Ngako kubaluleke kakhulu kutsi sente konkhe lesingakwenta kuze emagama etfu abhalwe kulencwadzi yekuphila futsi angacishwa!

20. Ngumuphi umsebenti lomkhulu lotawentiwa ngesikhatsi Sekubusa Kweminyaka Leyinkhulungwane? (Buka sitfombe lesisekhasini lekucala.)

²⁰ Sikhatsi Sekubusa Kweminyaka Leyinkhulungwane sitawuba sikhatsi lesijabulisa kakhulu! Kutawuba nemsebenti lomkhulu kakhulu wekufundzisa bantfu lotawentiwa ngelizinga longakase wentiwe ngalo lamhlabeni. Kodvwa kutawuphindze kube sikhatsi sekutsi labalungile nalabangakalungi bahlolisiswe kutsi batiphatsa njani. (Isa. 26:9; Imis. 17:31) Lomsebenti wekufundzisa utawentiwa njani? Sihloko lesilandzelako sitasisita sikucondze loku futsi sibonge ngalomsebenti lomkhulu lotawentiwa.