1. Ngaphambi nje kwekutsi umphostoli Phetro afe, yini laphefumulelwa kutsi ayente?

 UMPHOSTOLI Phetro bekati kutsi besekatawufa. Kuyo yonkhe leminyaka akhonta Jehova ngekwetsembeka, wahamba naJesu, washumayela etindzaweni lokungazange sekushunyayelwe kuto futsi waba lilunga lesigungu lesibusako. Kodvwa Phetro bekanalomunye umsebenti lebekufanele awente. Ngabo-62 kuya ku-64 C.E., waphefumulelwa kutsi abhale tincwadzi letimbili, lokuyincwadzi ya-1 Phetro na-2 Phetro. Beketsemba kutsi letincwadzi betitawusita emaKhristu ngemuva kwekushona kwakhe.​—2 Phet. 1:12-15.

2. Sisho ngani kutsi tincwadzi taPhetro tefika ngesikhatsi?

² Ngesikhatsi Phetro abhala letincwadzi, bazalwane bakhe nabodzadze ‘bebacindzetelwa tilingo letehlukene.’ (1 Phet. 1:6) Bantfu lababi bebetama kufaka timfundziso letingemanga kanye nemikhuba lengcolile ebandleni lebuKhristu. (2 Phet. 2:1, 2, 14) EmaKhristu lebekahlala eJerusalema bekatawubona ‘kuphela kwato tonkhe tintfo,’ lokukubhujiswa kwalelidolobha kanye nelithempeli, kubhujiswa ngemabutfo emaRoma. (1 Phet. 4:7) Siyaciniseka kutsi letincwadzi taPhetro tawasita lamaKhristu abona kutsi angachubeka kanjani etsembekile ngisho nobe bekabhekana netinkinga futsi tiwasite alungele tinkinga lebetiseta. b

3. Kubaluleke ngani kufundza tincwadzi taPhetro letiphefumulelwe?

 ³ Ngisho nobe Phetro bekabhalela emaKhristu lebekaphila ngaleso sikhatsi, Jehova wenta kutsi letincwadzi tifakwe eVini lakhe. Ngako natsi tingasisita letincwadzi. (Rom. 15:4) NjengalamaKhristu, natsi siphila eveni leligcwele kutiphatsa lokubi, lokwenta kube matima kutsi sikhonte Jehova. Ngetulu kwaloko, natsi sitawubhekana nekuhlupheka lokukhulu lokutawuba matima kakhulu kunaloko emaJuda labhekana nako. Sitfola tifundvo letibalulekile kuletincwadzi letimbili taPhetro. Loku kutasisita kutsi sililindzele lilanga laJehova, sincobe kwesaba bantfu futsi sitsandzane kakhulu. Letifundvo titawuphindze tisite labadzala belibandla babone kutsi yini labangayenta kuze bawunakekele kahle umhlambi.

4. Njengobe kuvetiwe ku-2 Phetro 3:3, 4, yini lengenta kukholwa kwetfu kube butsakatsaka?

⁴ Siphila nebantfu labangatetsembi tiphrofetho letiseBhayibhelini. Labanye bangahle bahlekise ngatsi ngenca yekutsi sekuphele iminyaka leminyenti silindze kuphela kwalelive. Labanye batsi akuyoze kufike. (Fundza 2 Phetro 3:3, 4.) Nasiva labo lesibashumayelako basho loku, nobe kushiwo ngulesisebenta nabo nobe lilunga lemndeni, kukholwa kwetfu kungahle kube butsakatsaka. Phetro wachaza kutsi yini lengasisita.

5. Yini lengasisita kutsi sibe nembono lokahle mayelana nekuphela kwalelive? (2 Phetro 3:8, 9)

⁵ Kulabanye kungahle kubonakale shengatsi Jehova uyephuta kubhubhisa lelive lelibi. Kodvwa emavi aPhetro angasisita kutsi sibe nembono lokahle, ngobe asikhumbuta kutsi indlela yaJehova yekubuka sikhatsi yehlukile kunendlela bantfu labasibuka ngayo. (Fundza 2 Phetro 3:8, 9.) KuJehova iminyaka leyinkhulungwane ifana nelilanga linye. Jehova uyabeketela, futsi akafuni kubhubhe ngisho namunye. Kodvwa nalifika lilanga lakhe, lelive litawuphela. Kufanele sisisebentise kahle sikhatsi lesisele kuze sishumayele bantfu bato tonkhe tive.

6. Yini lesingayenta kuze ‘sihlale silikhumbula’ lilanga laJehova? (2 Phetro 3:11, 12)

⁶ Phetro usikhumbuta kutsi ‘sihlale silikhumbula lilanga laJehova.’ (Fundza 2 Phetro 3:11, 12.) Kanjani? Ngekutsi onkhe malanga nakungenteka, sicabangisise ngetibusiso lesitatitfola eveni lelisha. Ticabange uhogela umoya lohlobile, udla kudla lokunemphilo, wemukela lobatsandzako lesebavusiwe, futsi ufundzisa bantfu lebebaphila eminyakeni leminyenti leyendlulile mayelana nekugcwaliseka kwetiphrofetho teliBhayibheli. Kucabangisisa ngaloku kutakusita kutsi uhlale ulindzile futsi uciniseke kutsi kuphela kutawufika ngekushesha. ‘Nasesinalolwati’ mayelana nelikusasa letfu, angeke ‘sidukiswe’ bantfu labafundzisa emanga.​—2 Phet. 3:17.

7. Kwesaba bantfu kungaba namiphi imiphumela?

⁷ Njengobe sibona kutsi lilanga laJehova lisondzela ngekushesha, sifuna kwenta konkhe lesingakwenta kuze sitjele labanye tindzaba letimnandzi. Kodvwa ngalesinye sikhatsi singahle sesabe kukwenta loko. Leni? Ngenca yekutsi sesaba bantfu. Nguloko lokwenteka kuPhetro. Ngebusuku lokwatekwa ngabo licala laJesu, Phetro wesaba kutiveta kutsi ungumlandzeli waJesu, waze waphika ngalokuphindzaphindziwe kutsi uyamati. (Mat. 26:69-75) Nobe kunjalo, ngekuhamba kwesikhatsi, yena kanye lomphostoli washo ngesibindzi watsi: “Ningakwesabi loko labakwesabako, futsi ningaphatamiseki.” (1 Phet. 3: 14) Emavi aPhetro ayasicinisekisa kutsi singakhona kuncoba kwesaba bantfu.

8. Yini lengasisita kutsi sincobe kwesaba bantfu? (1 Phetro 3:15)

⁸ Yini lengasisita kutsi sincobe kwesaba bantfu? Phetro watsi: “Ngcwelisani Khristu njengeNkhosi etinhlitiyweni tenu.” (Fundza 1 Phetro 3:15.) Loku kufaka ekhatsi kutikhumbuta kutsi Khristu Jesu uyiNkhosi yetfu nekutsi unemandla lamakhulu. Nakuvela litfuba lekutsi ushumayele tindzaba letimnandzi kodvwa wesabe, khumbula iNkhosi yetfu. Yibone ngeliso lengcondvo ibusa ezulwini futsi itungeletwe tigidzi tetingilosi. Khumbula kutsi ‘inikwe lonkhe ligunya ezulwini nasemhlabeni’ futsi itawuba nawe “onkhe emalanga kuze kube sekupheleni kwalelive.” (Mat. 28:18-20) Phetro usikhutsata kutsi ‘sihlale sikulungele’ kumelela kukholwa kwetfu. Uyafuna yini kushumayela emsebentini, esikolweni nobe kuletinye tindzawo ungakahleli? Cabanga kusengaphambili kutsi ungakhona nini kukwenta loko, bese ulungiselela loko lotawukusho. Thantaza ucele sibindzi, futsi wetsembe kutsi Jehova utakusita kutsi uncobe kwesaba bantfu.​—Imis. 4:29.

9. Ngalelinye lilanga, Phetro wehluleka njani kukhombisa lutsandvo? (Buka nesitfombe.)

⁹ Phetro wafundza kutsi angalukhombisa njani lutsandvo. Bekakhona ngesikhatsi Jesu  atsi: “Ngininika umtsetfo lomusha, wekutsi nitsandzane; njengobe nje nami nginitsandzile, nani tsandzanani.” (Joh. 13:34) Nanobe kunjalo, ngekuhamba kwesikhatsi, Phetro akazange adle nebazalwane bakhe nabodzadze lebebangasiwo emaJuda ngenca yekutsi bekesaba emaKhristu langemaJuda. Umphostoli Pawula wabita loko lokwentiwa nguPhetro ngekutsi ‘kutentisa.’ (Gal. 2:11-14) Phetro wakwemukela lokwekhutwa futsi wafundza kuko. Kuto totimbili tincwadzi takhe, wagcizelela kutsi akukafaneli nje sigcine ngekutiva sibatsandza bazalwane nabodzadze kodvwa kufanele sikhombise kutsi siyabatsandza.

10. Yini lengasisita kuze sikhombise kutsi ‘sibatsandza mbamba bazalwane’ betfu? Chaza. (1 Phetro 1:22)

¹⁰ Phetro watsi kufanele ‘sitsandzane mbamba.’ (Fundza 1 Phetro 1:22.) Lolutsandvo lutawuba khona nangabe ‘silalela liciniso.’ Leliciniso lifaka ekhatsi kutsi “Nkulunkulu akakhetsi.” (Imis. 10:34, 35) Angeke sisho kutsi siyawulalela umyalo waJesu wekutsi sitsandzane nangabe sitsandza labanye ebandleni kodvwa labanye singabatsandzi. Kuliciniso kutsi singahle sisondzelane kakhulu nalabanye njengaJesu. (Joh. 13:23; 20:2) Kodvwa Phetro usikhumbuta kutsi kufanele setame ‘kubatsandza bonkhe bazalwane’ betfu, sibatsandze ngatsi bangemalunga emindeni yetfu.​—1 Phet. 2:17.

11. Kusho kutsini ‘kutsandzana ngalokusuka enhlitiyweni’?

¹¹ Phetro wasikhutsata kutsi ‘sitsandzane kakhulu ngalokusuka enhlitiyweni.’ Kulendzaba, kutsandza “kakhulu” kusho kutsandza lotsite ngisho nobe kumatima kumtsandza. Sibonelo nje, kutsiwani nangabe umzalwane akuphetse kabi nobe akuvise buhlungu? Kungekwemvelo kutsi sifune kutiphindziselela kunekutsi sikhombise lutsandvo. Nanobe kunjalo, Phetro wafundza kuJesu kutsi kutiphindziselela akumjabulisi Nkulunkulu. (Joh. 18:10, 11) Phetro wabhala watsi: “Ningaphindziseli lokubi ngalokubi, nobe kwetfukwa ngekwetfuka. Esikhundleni saloko busisani.” (1 Phet. 3:9) Nangabe ubatsandza kakhulu bazalwane nabodzadze utawuba nemusa futsi ubacabangele nalabo lokungenteka bakuvise buhlungu.

12. (a) Yini lesitayenta nangabe sibatsandza kakhulu labanye? (b) Yini lotimisele kuyenta njengobe kuvetiwe kule-video letsi Londvolota Bunye Lokusipho Lesiligugu?

¹² Encwadzini yekucala Phetro layibhala, wasebentisa emavi latsi “tsandzanani kakhulu.” Lolutsandvo alugcini nje ngekumbonya tono letimbalwa, kodvwa lumbonya “tono letinyenti.” (1 Phet. 4:8) Kungenteka Phetro wakhumbula sifundvo lesimayelana nekucolela lasifundziswa nguJesu eminyakeni lengaphambili. Ngaleso sikhatsi, kungenteka Phetro bekacabanga kutsi unemusa nakatsi angamcolela “tikhatsi letingu-7” umnakabo. Kodvwa Jesu wamfundzisa kutsi kufanele acolele ‘tikhatsi letingu-77,’ lokusho kucolela tikhatsi letinyenti angabali, lokusifundvo natsi lasinika sona. (Mat. 18:21, 22) Nangabe ukutfola kumatima kusisebentisa leseluleko, ungapheli emandla! Tonkhe tikhonti taJehova tinesono futsi tihle tikutfola kumatima kucolela. Lokubalulekile nyalo kutsi wente konkhe longakhona kukwenta kuze ucolele umnakenu futsi wakhe kuthula naye. c

13. Yini lengenta kube matima ngalabadzala belibandla kutsi beluse bazalwane babo nabodzadze?

¹³ Siyaciniseka kutsi Phetro akazange akukhohlwe loko Jesu lamtjela kona ngemuva  kwekuvuswa kwakhe, nakatsi: “Yelusa emawundlu ami.” (Joh. 21:16) Nine labadzala belibandla, niyati kutsi nani kufanele nikwente loku. Kodvwa kungahle kube matima ngalomdzala welibandla kutfola sikhatsi sekwenta lomsebenti lobalulekile. Labadzala belibandla kufanele bacale banakekele imindeni yabo ngetidzingo tayo, baciniseke kutsi onkhe emalunga emndeni ativa atsandvwa futsi bawasite asondzelane naJehova. Baphindze bahole emsebentini wekushumayela futsi balungiselele baphindze babeke tinkhulumo emihlanganweni yelibandla, yesigodzi neyesifundza. Labanye bangemalunga eKomidi Lebonisana Netibhedlela nobe basita etikweni le-Local Design/Construction. Labadzala belibandla bamatasa kakhulu!

14. Yini lengakhutsata labadzala belibandla kutsi beluse umhlambi? (1 Phetro 5:1-4)

¹⁴ Phetro wakhutsata labadzala belibandla kutsi “beluse umhlambi waNkulunkulu.” (Fundza 1 Phetro 5:1-4.) Nangabe ungulomdzala welibandla, siyati kutsi uyabatsandza bazalwane bakho nabodzadze futsi uyafuna kubelusa. Nobe kunjalo, ngaletinye tikhatsi ungeva ngatsi umatasa kakhulu nobe udzinwe kakhulu kutsi ungenta lomsebenti. Yini longayenta? Thantaza kuJehova, umtjele loko lokukukhatsatako. Phetro wabhala watsi: “Nangabe lotsite asita labanye, loko akakwente etsembele emandleni lavela kuNkulunkulu.” (1 Phet. 4:11) Kungenteka bazalwane bakho nabodzadze babhekene netinkinga letingeke ticatululeke nyalo. Kodvwa khumbula kutsi “umelusi lomkhulu,” lokunguJesu Khristu, angabasita kwendlula nobe ngabe ngubani. Loko angakwenta nyalo naseveni lelisha. Nkulunkulu ucela labadzala belibandla kutsi bamane nje batsandze bazalwane babo, babeluse futsi babe “tibonelo emhlambini.”

15. Lomunye lomdzala welibandla uwelusa njani umhlambi? (Buka nesitfombe.)

¹⁵ William, losanesikhatsi lesidze angulomdzala welibandla, uyati kutsi kubaluleke kangakanani kwelusa. Kusukela kwacala i-COVID-19, yena kanye nalabanye labadzala belibandla bakwenta umgomo kutsi bachumane nemmemeteli ngamunye losecenjini labo lensimu njalo ngeliviki. Uyachaza kutsi bakwentelani loku, utsi: “Bazalwane nabodzadze labanyenti bebahlala bodvwa, ngako bekumelula kutsi bacabange tintfo letingakhi.” Nangabe  umzalwane nobe dzadze anenkinga letsite, William uyalalelisisa kuze abone kutsi udzingani nekutsi yini lemkhatsatako. Ubese utfola tintfo letingamsita, kungaba tincwadzi tetfu, nobe ema-video ku-website yetfu. Utsi: “Kwelusa kubaluleke kakhulu nyalo. Senta konkhe lokusemandleni etfu kuze sisite bantfu bafundze ngaJehova; kufanele sente lokufanako nalapho selusa umhlambi, sisite timvu taJehova kutsi tihlale ecinisweni.”

16. Singatisebentisa njani tifundvo lesitifundza etincwadzini taPhetro?

¹⁶ Sesicoce ngetifundvo letimbalwa lesititfola etincwadzini letimbili taPhetro letiphefumulelwe. Kungenteka sewubonile lakudzingeka utfutfukise khona. Sibonelo nje, uyafuna yini kucabangisisa kakhudlwana ngetibusiso letitawutfolakala eveni lelisha? Utibekele yini umgomo wekushumayela emsebentini, esikolweni nobe kuletinye tindzawo ungakahleli? Tikhona yini tindlela longakhombisa ngato kutsi ubatsandza mbamba bazalwane bakho nabodzadze? Nine labadzala belibandla, nitimisele yini kwelusa umhlambi waJehova? Nawutihlola ngekwetsembeka ungahle ubone lawubutsakatsaka ngakhona, kodvwa ungadvumali. “INkhosi inemusa,” futsi itakusita kuze utfutfuke. (1 Phet. 2:3) Phetro wasicinisekisa watsi: “Nkulunkulu . . . utawucedzela kuceceshwa kwenu. Utanenta nicine, anente nibe nemandla futsi anibeke esisekelweni lesicinile.”​—1 Phet. 5:10.

17. Utawuba yini umphumela nangabe singapheli emandla futsi sivumela Jehova kutsi asiceceshe?

¹⁷ Ekucaleni, Phetro bekakubona kungamfaneli kuba sedvute neNdvodzana yaNkulunkulu. (Luk. 5:8) Kodvwa ngekusitwa nguJehova naJesu, Phetro akazange aphele emandla ekuba ngumlandzeli waKhristu. Ngenca yaloko, wavunyelwa kutsi ‘angene eMbusweni waphakadze weNkhosi yetfu neMsindzisi wetfu Jesu Khristu.’ (2 Phet. 1:11) Lona kwaba ngumvuzo lomuhle! Nangabe ungapheli emandla njengaPhetro futsi uvume kuceceshwa nguJehova, nawe utawutfola umvuzo wekuphila lokuphakadze. ‘Utawutfola umphumela wekukholwa kwakho, lokukusindziswa kwekuphila kwakho.’​—1 Phet. 1:9.