1. Ngusiphi simo lesimatima lababhekana naso boJehowashi, Uziya naJosaya?

 ASE uticabange uyinkhosi yebantfu baNkulunkulu usengumntfwana nobe useminyakeni yekutfomba! Bewungalisebentisa njani ligunya lonalo? LiBhayibheli lisitjela ngalabanye lababa ngemakhosi akaJuda basebasha. Sibonelo nje, Jehowashi bekaneminyaka lengu-7, Uziya analengu-16, futsi Josaya bekanalengu-8. Kungenteka loku bekumatima kakhulu! Kodvwa ngisho nobe bekumatima, Jehova kanye nalabanye babasita kutsi bente tintfo letinyenti letinhle.

2. Kutasisita ngani kudadisha ngesibonelo saJehowashi, saUziya nesaJosaya?

² Asisiwo emakhosi nobe tindlovukazi, kodvwa kunyenti lesingakufundza kuJehowashi, ku-Uziya nakuJosaya. Benta tincumo letinhle naletimbi. Sibonelo sabo sitasisita sibone kutsi kubaluleke ngani kutsi sitihlanganise nebantfu labakahle, sihlale sitfobekile futsi sichubeke sifuna Jehova.

3. UMphristi Lophakeme Jehoyada wayisita njani iNkhosi Jehowashi kutsi yente tincumo letihlakaniphile?

³ Yenta tincumo letihlakaniphile njengaJehowashi. Ngesikhatsi iNkhosi Jehowashi iseyincane, yenta sincumo lesihlakaniphile. Njengobe beyite babe, yalalela sicondziso lebeyisinikwa nguMphristi Lophakeme futsi lowetsembekile, lokunguJehoyada. Lomphristi wafundzisa Jehowashi kwaba shengatsi uyindvodzana yakhe. Ngenca yaloko, Jehowashi wenta sincumo lesihlakaniphile sekuhola ekukhonteni lokuhlantekile nasekukhonteni Jehova. Jehowashi waphindze wahlela kutsi kulungiswe lithempeli laJehova.​—2 Khr. 24:1, 2, 4, 13, 14.

4. Kusisita njani kutsandza nekulalela imitsetfo yaJehova? (Taga 2:1, 10-12)

 ⁴ Nangabe ufundziswa kutsi utsandze Jehova futsi uphile ngetimiso takhe, usuke unikwa sipho lesiligugu. (Fundza Taga 2:1, 10-12.) Batali bangacecesha bantfwana babo ngetindlela letinyenti. Cabanga ngalokwentiwa ngubabe walomunye dzadze lokutsiwa nguKatya kuze amsite ente tincumo letikahle. Onkhe malanga nakammikisa esikolweni, bekacoca naye ngembhalo welusuku. Utsi: “Loko bekungisita kutsi ngikhone kwenta lokulungile nangibhekana netinkinga ngalelo langa.” Kodvwa kutsiwani nangabe sicondziso lesisekelwe eBhayibhelini losinikwa batali bakho sibonakala ngatsi sikuncisha inkhululeko? Yini lengakusita kutsi wemukele sicondziso sabo? Lomunye dzadze lokutsiwa ngu-Anastasia ukhumbula indlela batali bakhe bebatinika ngayo sikhatsi sekumchazela kutsi yini lebente babeka imitsetfo letsite. Utsi: “Loko bekungisita kutsi ngiyemukele, ngingayitsatsi ngatsi ingincisha inkhululeko kodvwa ngiyitsatse njengendlela labangivikela ngayo ngobe bangitsandza.”

5. Tintfo lotentako tibatsintsa njani batali bakho naJehova? (Taga 22:6; 23:15, 24, 25)

⁵ Batali bakho batawujabula nawusebentisa sicondziso lositfolako lesisekelwe eBhayibhelini. Ngetulu kwako konkhe, Nkulunkulu utawujabula futsi utawakha bungani lobuhlala njalo naye. (Fundza Taga 22:6; 23:15, 24, 25.) Lesi sizatfu lesihle sekulingisa Jehowashi ngesikhatsi asemncane.

6. Jehowashi wabese ulalela seluleko sabobani, futsi waba yini umphumela? (2 Tikhronike 24:17, 18)

⁶ Fundza etincumeni letimbi taJehowashi. Ngemuva kwekufa kwaJehoyada, Jehowashi waba nebangani lababi. (Fundza 2 Tikhronike 24:17, 18.) Wancuma kulalela tindvuna takaJuda lebetingamtsandzi Jehova. Kungenteka uyabona kutsi bekungakafaneli kutsi Jehowashi atihlanganise nalabantfu lababi. (Taga 1:10) Kodvwa walalela labangani lababi. Ecinisweni, ngesikhatsi umzala wakhe Zakhariya etama kumekhuta, Jehowashi wambulala. (2 Khr. 24:20, 21; Mat. 23:35) Loko kwaba kubi kakhulu futsi bekubulima! Jehowashi wacala kahle, kodvwa lokubuhlungu kutsi wabese uba sihlubuki nembulali. Ngemuva kwesikhatsi, tinceku takhe tambulala. (2 Khr. 24:22-25) Loko bekungeke kwenteka kube wachubeka alalela Jehova nalabo lebebatsandza Jehova! Yini longayifundza esibonelweni sakhe?

7. Bobani lokufanele ubakhetse kutsi babe bangani bakho? (Buka nesitfombe.)

⁷ Lesinye sifundvo lesingasitfola esincumeni  lesibi lesentiwa nguJehowashi kutsi kufanele sikhetse bangani labatasisita kutsi sente lokuhle, lokubangani labatsandza Jehova nalabafisa kumjabulisa. Singaba nebangani labadzala kunatsi nobe labancane. Khumbula kutsi Jehowashi bekamncane kakhulu kunemngani wakhe Jehoyada. Mayelana nebangani bakho, tibute: ‘Bayangisita yini kutsi ngicinise kukholwa kwami kuJehova? Bayangikhutsata yini kutsi ngiphile ngetimiso taNkulunkulu? Bayakhuluma yini ngaJehova nangemaciniso laligugu? Bayakhombisa yini kutsi bayatihlonipha timiso taNkulunkulu? Bangitjela loko lengifuna kukuva yini, nobe banesibindzi sekungekhuta nangiphambuka endleleni?’ (Taga 27:5, 6, 17) Nangabe unebangani labangamtsandzi Jehova, awubadzingi labo bangani. Kodvwa nangabe unebangani labatsandza Jehova, bambelela kubo, batakusita.​—Taga 13:20.

8. Nangabe sisebentisa tinhlelo tekuchumana, yini lokufanele sicabange ngayo?

⁸ Tinhlelo tekuchumana tingasisita kutsi sichumane nemalunga emndeni kanye nebangani. Nobe kunjalo, labanye bantfu basebentisa tinhlelo tekuchumana kuze bajabulise labanye, bafake titfombe nobe ema-video aloko labakutsengile nobe labakwentile. Nangabe usebentisa tinhlelo tekuchumana, tibute: ‘Umgomo wami kujabulisa labanye yini? Ngifuna kwakha labanye yini nobe ngifuna kudvunyiswa? Ngivumela labo labasebentisa letinhlelo tekuchumana kutsi balawule indlela lengicabanga ngayo yini, lengikhuluma ngayo nalengenta ngayo?’ UMzalwane Nathan Knorr lobekalilunga LeSigungu Lesibusako washo nasi seluleko: “Ungetami kujabulisa bantfu. Nawenta njalo utawugcine ungakajabulisi muntfu. Jabulisa Jehova, nawenta njalo, utabajabulisa bonkhe labo labamtsandzako.”

9. Yini Jehova lasita Uziya kutsi ayente? (2 Tikhronike 26:1-5)

⁹ Yenta tincumo letihlakaniphile njenga-Uziya. Ngesikhatsi iNkhosi Uziya iseyinsha, beyitfobekile. Yafundza “kwesaba Nkulunkulu weliciniso.” Yaphila iminyaka lengu-68, futsi kuleminyenti yayo Jehova bekayibusisa. (Fundza 2 Tikhronike 26:1-5.) Uziya wancoba titsa letinyenti tema-Israyeli futsi wenta konkhe lokusemandleni akhe kuze iJerusalema ivikeleke. (2 Khr. 26:6-15) Bekajabula kakhulu ngako konkhe Nkulunkulu lebekamsite kutsi akhone kukwenta.​—Shu. 3:12, 13.

10. Kwentekani ku-Uziya?

¹⁰ Fundza etincumeni letimbi ta-Uziya. INkhosi Uziya beyetayele kutsi labanye balandzele ticondziso tayo. Kungenteka yini loko kwayenta yacabanga kutsi ingenta nobe yini lekufunako? Ngalelinye lilanga Uziya wangena ethempelini laJehova futsi wetama kushisa imphepho e-al’thare, lokuyintfo emakhosi lebekangakavumeleki kutsi ayente. (2 Khr. 26:16-18) UMphristi Lophakeme Azariya wetama kumekhuta, kodvwa Uziya watfukutsela kakhulu. Lokubuhlungu kutsi loku lakwenta kona lidvumela lakhe lelihle lekukhonta Jehova, futsi washaywa ngebulephelo. (2 Khr. 26:19-21) Kuphila kwakhe bekutawuchubeka kukahle kube wahlala atfobekile!

11. Yini lengasisita kutsi sihlale sitfobekile? (Buka nesitfombe.)

¹¹ Ngesikhatsi Uziya aba neligunya, wakhohlwa kutsi nguJehova lebekamnikete leligunya futsi wamenta waphumelela. Yini lesiyifundzako? Kufanele sikhumbule kutsi nguJehova losinikete tonkhe tintfo letinhle lesinato nekutsi nguye losinike imisebenti enhlanganweni yakhe. Kunekutsi sitigcabhe ngaloko lesiphumelela kukwenta, kufanele sidvumise Jehova. b  (1 Khor. 4:7) Kufanele sitfobeke, sikhumbule kutsi sinesono nekutsi siyakudzinga kwelulekwa. Lomunye umzalwane loseminyakeni yabo-60 wabhala watsi: “Ngifundze kungakwati nobe kungadvumateki nangabe labanye babona emaphutsa ami. Nangelulekwa ngalamanye emaphutsa ami, ngetama kuwalungisa futsi ngichubeke ngikhonta Jehova.” Nangabe silalela Jehova futsi sihlale sitfobekile, sitawujabula mbamba ekuphileni.​—Taga 22:4.

12. Ngesikhatsi Josaya asemusha, wamfuna njani Jehova? (2 Tikhronike 34:1-3)

¹² Yenta tincumo letikahle njengaJosaya. Josaya bekaneminyaka lengu-16 ngesikhatsi acala kufuna Jehova. Bekafuna kufundza ngaJehova futsi ente intsandvo yakhe. Nobe kunjalo, beyetfwele kamatima lenkhosi leseyincane. Bekufanele imelele kukhonta lokuhlantekile ngesikhatsi kugcwele kukhonta kwemanga kulelive, futsi yakhona kukwenta loko. Ngaphambi kwekutsi Josaya abe neminyaka lengu-20, wacala kususa kukhonta kwemanga kulelive.​—Fundza 2 Tikhronike 34:1-3.

13. Kusho kutsini kuwe kutinikela kuJehova?

¹³ Ngisho nobe usemncane, ungamlingisa Josaya ngekutsi ufundze lokunyenti ngaJehova nangebuntfu bakhe lobuhle. Loko kutakukhutsata kutsi utinikele kuye. Kutinikela kuye kutakutsintsa njani kuphila kwakho? Luke, lowabhajatiswa aneminyaka lengu-14, utsi: “Kusukela nyalo, ngitawenta kukhonta Jehova kute kucala ekuphileni kwami, futsi ngitawetama kumjabulisa.” (Mak. 12:30) Utawubusiswa nangabe nawe wetama kwenta lokufanako!

14. Shano sibonelo sendlela labanye labasebasha labayilingisa ngayo iNkhosi Josaya.

¹⁴ Ngutiphi letinye tinkinga losemusha lokhonta Jehova langabhekana nato? Johan, lowabhajatiswa aneminyaka lengu-12, utsi labo lafundza nabo eklasini bebamcindzetela kutsi abheme lugwayi lwesimanjemanje (vaping). Kuze Johan akhone kumelana nalokucindzetelwa, utikhumbuta kutsi kubhema kungalimata imphilo yakhe kanye nebuhlobo  bakhe naJehova. Rachel, lowabhajatiswa eneminyaka lengu-14, usho loko lokumsitako kuze amelane netinkinga labhekana nato esikolweni. Utsi: “Ngetama kubuka tintfo letingikhumbuta ngeliBhayibheli nangaJehova. Sibonelo nje, sifundvo semlandvo (history) singangikhumbuta ngendzaba leseBhayibhelini nobe ngesiphrofetho lesitsite. Nobe nangicoca nalotsite, loko kungikhumbuta ngembhalo lotsite lengingawucocela labanye.” Tinkinga lobhekana nato kungenteka tehluke kunaleto iNkhosi Josaya leyaba nato, kodvwa ungahlakanipha futsi wetsembeke njengayo. Nangabe ukhona kubhekana netinkinga nawusemusha, loko kutakusita kutsi ukhone kubhekana nato njengobe usakhula.

15. Yini leyasita Josaya kutsi akhonte Jehova ngekwetsembeka? (2 Tikhronike 34:14, 18-21)

¹⁵ Ngesikhatsi iNkhosi Josaya seyikhulile, yacala kulungisa lithempeli. Nakusentiwa lomsebenti, kwatfolakala “incwadzi yeMtsetfo waJehova lebewunikwe Mosi.” Ngesikhatsi lenkhosi iva lebekufundvwa, yenta lushintjo ngekushesha kuze ilalele lebekubhalwe kuyo. (Fundza 2 Tikhronike 34:14, 18-21.) Ungatsandza yini kulifundza njalo liBhayibheli? Nangabe sewucalile kulifundza, kuhamba njani? Uyawabhala yini phansi emavesi lowabona alusito? Luke, lesike sakhuluma ngaye ubhala phansi emaphuzu lawatfole alusito. Kwenta loko kungakusita yini kutsi ukhumbule emavesi nobe emaphuzu lowatsandzako? Nawuchubeka wetayelana neliBhayibheli futsi ulitsandza, sitawukhula sifiso sakho sekukhonta Jehova. Njengobe liVi laNkulunkulu lasita iNkhosi Josaya kutsi yente lokulungile, litakusita nawe kutsi wente lokufanako.

16. Yini leyenta Josaya wenta liphutsa lelikhulu, futsi yini lesiyifundza kuloko?

¹⁶ Fundza esincumeni lesibi saJosaya. Ngesikhatsi Josaya aneminyaka lengaba ngu-39, wenta liphutsa lelaholela ekufeni kwakhe. Watetsemba yena kunekutsi acele sicondziso saJehova.  (2 Khr. 35:20-25) Singatfola sifundvo kulendzaba. Ngisho nobe sibadzala kwani nobe sinesikhatsi lesidze kanganani sidadisha liBhayibheli, kufanele sichubeke sifuna Jehova. Loko kufaka ekhatsi kuthantaza kuye njalo sicele sicondziso sakhe, kudadisha liVi lakhe nekulalela seluleko lesisitfola kumaKhristu lavutsiwe. Nasenta njalo, atawuba mancane ematfuba ekutsi sente emaphutsa lamakhulu futsi sitawujabula.​—Jak. 1:25.

17. Ngutiphi tifundvo letibalulekile lesitifundza kulamakhosi lamatsatfu akaJuda?

¹⁷ Tinyenti tintfo letijabulisako letingentiwa ngulabasebasha. Indzaba yaJehowashi, ya-Uziya neyaJosaya ikhombisa kutsi labasebasha bangenta tincumo letihlakaniphile futsi bajabulise Jehova ekuphileni kwabo. Njengobe sibonile, imiphumela ingahle ingabi mihle ngaso sonkhe sikhatsi. Nobe kunjalo, singatenta tintfo letinhle letentiwa ngulamakhosi futsi sigweme kwenta emaphutsa lawenta. Nasenta njalo, singaciniseka kutsi sitawuba nemphilo lejabulisako.

18. Ngutiphi tibonelo letiseBhayibhelini letikhombisa kutsi ungaba nako kuphila lokujabulisako? (Buka nesitfombe.)

¹⁸ ImiBhalo ikhuluma ngalabanye labasebasha labasondzelana naJehova, bemukelwa nguye futsi baphila imphilo lejabulisako. Davide bekangulomunye wabo. Nakasemncane, wakhetsa kukhonta Nkulunkulu, futsi ngekuhamba kwesikhatsi waba yinkhosi leyetsembekile. Kuyavunywa kutsi bekahle enta emaphutsa, kodvwa ngetulu kwako konkhe loko, Nkulunkulu wamtsatsa njengemuntfu lowetsembekile. (1 Khos. 3:6; 9:4, 5; 14:8) Kungakukhutsata kudadisha ngekuphila kwakhe kanye nekukhonta kwakhe Jehova ngekwetsembeka. Nobe ungadadisha ngesibonelo saMakho nobe saThimothi. Bacala kukhonta Jehova basebancane kakhulu futsi bachubeka bamkhonta ngekwetsembeka; loku kwenta kutsi bajabule.

19. Kungaba njani kuphila kwakho?

¹⁹ Kutsi kuphila kwakho kutawuba njani, kutawuya ngekutsi uphila imphilo lenjani nyalo. Nawetsembela kuJehova kunekutsi wetsembele ekwatini kwakho, yena utawucondzisa tinyatselo takho. (Taga 20:24) Utawujabula ekuphileni futsi uphumelele. Khumbula kutsi Jehova ukutsatsa njengalokuligugu loko lomentela kona. Kute lenye indlela lencono yekuphila leyendlula kukhonta Babe wetfu wasezulwini lositsandzako, lokunguJehova.