1-2. Kungasisita njani kufundza ngendzaba yaSamsoni?

 YINI lefika engcondvweni yakho nawuva ligama laSamsoni? Kungenteka ucabanga ngendvodza lebeyinemandla lamakhulu. Vele beyinemandla. Kodvwa Samsoni wenta sincumo lesibi lesaba nemiphumela lebuhlungu. Nobe kunjalo, Jehova wanaka loko lokwentiwa nguSamsoni kuze amkhonte futsi Nkulunkulu wenta kutsi sibonelo sakhe lesihle sibhalwe eBhayibhelini kuze kusitakale tsine.

² Jehova wasebentisa Samsoni kutsi afeze tintfo letimangalisako kuze asite bantfu bakhe labakhetsile, lokungema-Israyeli. Ngemuva kwemakhulu eminyaka Samsoni afa, Jehova waphefumulela umphostoli Pawula kutsi asho neligama laSamsoni nakabala emadvodza letsembekile. (Heb. 11:32-34) Singasikhutsata sibonelo saSamsoni. Wetsembela kuJehova, loko wakwenta ngisho nangetikhatsi letimatima. Kulesihloko, sitawucoca ngekutsi yini lesingayifundza kuSamsoni nekutsi sibonelo sakhe singasikhutsata njani.

3. Ngumuphi umsebenti Samsoni laniketwa wona?

³ Ngesikhatsi Samsoni atalwa, emaFilisti bekabusa sive saka-Israyeli futsi bekasicindzetela. (Khu. 13:1) Lokuwabusa kwawo ngelunya kwenta ema-Israyeli acindzeteleka kakhulu. Jehova wakhetsa Samsoni kutsi ‘ahole ekusindziseni sive saka-Israyeli esandleni semaFilisti.’ (Khu. 13:5) Loyo bekungumsebenti  lomatima! Kuze akhone kuwenta lomsebenti, bekutawudzingeka etsembele kuJehova.

4. Jehova wamsita njani Samsoni kutsi aphunyule kumaFilisti? (Tikhulu 15:14-16)

⁴ Cabanga nganasi sibonelo lesikhombisa kutsi Samsoni beketsembele kuJehova nekutsi bekabuke kuye kuze amsite. Ngalelinye lilanga, libutfo lemaFilisti laya eLehi, lokungenteka beyikaJuda kuze libambe Samsoni. Emadvodza akaJuda esaba, ngako ancuma kumnikela etitseni takhe. Bantfu besive sakubo bambopha ngetintsambo letinsha letimbili futsi bammikisa kumaFilisti. (Khu. 15:9-13) Nobe kunjalo, “umoya waJehova wabese unika Samsoni emandla” futsi wakhona kutinyomula. “Wabese utfola umhlatsi losemusha wembongolo lendvuna,” wawutsatsa futsi wabulala ngawo emaFilisti langu-1 000!​—Fundza Tikhulu 15:14-16.

5. Samsoni wakhombisa njani kutsi wetsembele kuJehova ngesikhatsi asebentisa umhlatsi wembongolo?

⁵ Samsoni wasebentiselani umhlatsi wembongolo? Bantfu bebangakavami kusebentisa umhlatsi wembongolo nabalwa! Siyaciniseka kutsi bekati kutsi kuphumelela kwakhe bekungayi ngesikhali lasisebentisako kodvwa bekatawuphumelela ngekusitwa nguJehova. Lendvodza leyetsembekile yasebentisa lebekutfolakala ngaleso sikhatsi kuze ifeze intsandvo yaJehova. Samsoni wawancoba emaFilisti ngobe beketsembele kuJehova.

6. Yini lesingayifundza kuSamsoni nangabe senta imisebenti letsite enhlanganweni?

⁶ Jehova angasinika natsi emandla ekwenta imisebenti yetfu, ngisho naleyo lebonakala imatima. Nkulunkulu angasisita ngendlela lengasimangalisa. Yetsemba kutsi Jehova lowanika Samsoni emandla utakusita kutsi wente intsandvo yakhe, kuphela nje nawetsembela kuye kutsi akusite.​—Taga 16:3.

7. Ngusiphi sibonelo lesikhombisa kutsi kubalulekile kufuna sicondziso saJehova?

⁷ Bazalwane labanyenti nabodzadze labasita emsebentini wekwakha takhiwo tenhlangano bakhombisile kutsi betsembela kuJehova. Esikhatsini lesendlulile, bazalwane bebavame kuhlela nekwakha emaHholwa  eMbuso lamanyenti naletinye takhiwo. Kodvwa ngenca yekukhula lokukhona enhlanganweni yaJehova, kudzingeke kutsi kwentiwe lushintjo. Bazalwane labaholako bathantazela sicondziso saJehova futsi bafuna tindlela letinsha tekusebenta, letifaka ekhatsi kutsenga takhiwo nekutilungisa. Robert losasite etakhiweni letinyenti emhlabeni wonkhe kuleminyaka yakamuva utsi: “Ekucaleni bekungasimelula kulabanye kutsi balwemukele lolushintjo.” Uchubeka utsi: “Bekwehluke kakhulu kuloko besikwenta eminyakeni leyendlulile. Kodvwa bazalwane bebatimisele kuvumelana netimo, futsi kuvele kwacaca kutsi Jehova uyalubusisa lolushintjo.” Lesi ngulesinye sibonelo lesikhombisa kutsi Jehova ubacondzisa njani bantfu bakhe kuze bafeze intsandvo yakhe. Kuhle kutsi sonkhe sihle sitibuta: ‘Ngiyasifuna yini sicondziso saJehova, futsi ngitimisele yini kuvumelana nesimo kuze ngimkhonte kancono?’

8. Yini leyentiwa nguSamsoni ngesikhatsi ome kakhulu?

⁸ Kungenteka uke wafundza ngaletinye tintfo letimangalisako letentiwa nguSamsoni. Wabulala libhubesi futsi ngekuhamba kwesikhatsi wabulala emadvodza langemaFilisti langu-30 e-Ashkeloni. (Khu. 14:5, 6, 19) Samsoni bekati kutsi bekangeke akhone kukwenta loku kube bekangasitwa nguJehova. Loko kwabonakala ngalelinye lilanga ngesikhatsi oma kakhulu ngemuva kwekubulala emaFilisti langu-1 000. Wenta njani? Kunekutsi atetsembe yena kuze atfole emanti, wacela lusito kuJehova.​—Khu. 15:18.

9. Yini Jehova layenta ngesikhatsi Samsoni acela lusito? (Tikhulu 15:19 nembhalo longentasi)

⁹ Jehova wamphendvula Samsoni ngekutsi avete emanti ngalokusimangaliso. Ngesikhatsi Samsoni anatsa kuwo, ‘emandla akhe abuya wase uphindze uba nemandla.’ (Fundza Tikhulu 15:19 nembhalo longentasi.) Kusenekwenteka kutsi lomtfombo bewusolo ukhona ngemuva kweminyaka ngesikhatsi umphrofethi Samuweli aphefumulelwa kutsi abhale incwadzi yeTikhulu. Kusenekwenteka ema-Israyeli labona emanti ageleta kulomtfombo bekakhumbula kutsi angetsembela kuJehova, futsi utatisita tikhonti takhe letetsembekile natidzinga lusito.

10. Yini lokufanele siyente nangabe sifuna Jehova asisite? (Buka nesitfombe.)

¹⁰ Natsi kufanele setsembele kuJehova kutsi asisite ngisho nobe sinamaphi emakhono nobe ngisho sifeze tintfo letinyenti emsebentini wakhe. Kufanele sititfobe futsi sikhumbule kutsi siyaphumelela nasetsembela kuye. Njengobe Samsoni aba nemandla ngemuva kwekunatsa lamanti lebekavela kuJehova, natsi kufanele semukele lusito loluvela kuJehova kuze sihlale setsembekile kuye.​—Mat. 11:28.

11. Singakhombisa njani kutsi setsembele kuJehova kutsi asisite? Shano sibonelo.

¹¹ Cabanga ngesibonelo sa-Aleksey waseRussia lobeketelela kuphatfwa kabi lokumatima. Yini lemsita kutsi abeketelele lesimo lesimatima? Yena nemkakhe baneluhlelo lwekudadisha liBhayibheli nelwekukhonta Nkulunkulu. Utsi: “Ngiyetama kunamatsela eluhlelweni lwami lwekudadisha liBhayibheli nekulifundza onkhe malanga. Njalo ekuseni mine nemkami sicoca ngembhalo welusuku futsi sithantaze ndzawonye.” Kusifundzisani loku? Kunekutsi sitetsembe, kufanele setsembele kuJehova. Kanjani? Ngekutsi sente tintfo letitawucinisa kukholwa kwetfu, letifaka ekhatsi kudadisha liBhayibheli, kuthantaza,  kuya emihlanganweni nekushumayela. Nasenta njalo, Jehova utasibusisa ngemetamo yetfu yekumkhonta. Wamcinisa Samsoni, futsi angasicinisa natsi.

12. Ngusiphi sincumo lesibi lesentiwa nguSamsoni, futsi budlelwane bakhe naDelila bebehluke njani?

¹² Samsoni bekanesono njengatsi, ngako ngaletinye tikhatsi bekenta tincumo letimbi. Lesinye sato saba nemiphumela lebuhlungu kakhulu. Ngemuva kweminyaka Samsoni angumehluleli, “watsandzana nentfombi yaseSihosheni saseSoreki, libito layo lebekunguDelila.” (Khu. 16:4) Ngaphambi kwaloku, Samsoni beketsembisene umshado nalenye intfombi lengumFilisti, kodvwa loko ‘bekuvela kuJehova’ ngobe “bekafuna litfuba lekulwa nemaFilisti.” Ngekuhamba kwesikhatsi, wangena endlini yalenye ingwadla eGaza, lebekulidolobha lemaFilisti. Ngaleso sikhatsi, Nkulunkulu waniketa Samsoni emandla ekwetfwala iminyango yeligede lalelidolobha, ngalenyondlela walenta kutsi lingavikeleki. (Khu. 14:1-4; 16:1-3) Kodvwa kusenekwenteka kutsi indzaba yaDelila beyehlukile ngobe kungenteka bekangumIsrayeli.

13. Yini Delila layenta kuSamsoni?

¹³ Delila watsatsa sisamba semali kumaFilisti kuze nje awatsengisele Samsoni. Kungenteka yini kutsi Samsoni bekametsemba kakhulu Delila futsi avalwe lutsandvo waze wangaboni kutsi bekafuna kwentani? Kunobe ngukuphi, Delila bekahlale amcindzetela kutsi amtjele kutsi uwatsatsaphi emandla akhe, futsi wagcine amtjelile. Lokubuhlungu kutsi leliphutsa lelentiwa nguSamsoni lenta kutsi alahlekelwe ngemandla akhe futsi kwaphela sikhatsi lesitsite Jehova angamemukeli.​—Khu. 16:16-20.

14. Yini leyenteka kuSamsoni ngenca yekwetsemba Delila?

 ¹⁴ Samsoni wabhekana nemiphumela lebuhlungu ngenca yekwetsemba Delila kunekwetsemba Jehova. EmaFilisti ambamba futsi amkupuluta emehlo. Amvalela ejele leliseGaza, lokulidolobha lamonyula kulo tivalo teligede, futsi waba sigcili lesisila lokutinhlavu. EmaFilisti abese abukisa ngaye kulomunye umcimbi labanawo. Enta iminikelo kunkulunkulu wawo Dagoni, ngobe bekacabanga kutsi nguye lonikele Samsoni etandleni tawo. Amkhipha kulelijele ammikisa kulomcimbi kuze ‘atohlekisa ngaye.’​—Khu. 16:21-25.

15. Samsoni wakhombisa njani kutsi besekaphindze ametsemba Jehova? (Tikhulu 16:28-30) (Buka sitfombe lesisekhasini lekucala.)

¹⁵ Samsoni wenta liphutsa lelikhulu, kodvwa akazange alahle litsemba. Wafuna litfuba lekubulala emaFilisti, lebekuyintsandvo yaNkulunkulu. (Fundza Tikhulu 16:28-30.) Samsoni wancenga Jehova watsi: “Ngivumele ngitiphindziselele kumaFilisti.” Nkulunkulu weliciniso wawuphendvula umthantazo wakhe ngekutsi aphindze amnike emandla lamangalisako. Ngenca yaloko, Samsoni wabulala emaFilisti lamanyenti kakhulu kwendlula lawo lake wawabulala.

16. Yini lesingayifundza ephutseni laSamsoni?

¹⁶ Nanobe Samsoni abhekana nemiphumela lebuhlungu ngenca yeliphutsa lakhe, kodvwa akazange ayekele kwetama kwenta intsandvo yaJehova. Ngisho singenta liphutsa futsi kudzingeke sisolwe nobe kudzingeke siyekeliswe kwenta imisebenti letsite ebandleni, akukafaneli silahle litsemba. Khumbula kutsi Jehova akasilahli. (Hla. 103:8-10) Nanobe singenta emaphutsa, Jehova angachubeka asisebentisa njengobe enta kuSamsoni.

17-18. Ikukhutsata njani indzaba yaMichael? (Buka nesitfombe.)

¹⁷ Cabanga ngesibonelo salomunye umzalwane losemusha lokutsiwa nguMichael. Bekamatasa emsebentini waJehova, ayinceku lesebentako futsi alihlahlandlela lelivamile. Kodvwa lokubuhlungu kutsi wenta liphutsa lelenta kutsi ayekeliswe kwenta leminye imisebenti ebandleni. Utsi: “Ngaphambi kwekutsi ngente leliphutsa, bengimatasa emsebentini waJehova. Kodvwa ngekucwabita nje kweliso, ngeva ngatsi tonkhe tintfo tima nsi! Bengati kutsi Jehova angeke angilahle,  kodvwa bengitibuta kutsi budlelwane bami naye butake bufane yini, nekutsi ngitawuphindze yini ngimentele lokunyenti ebandleni njengobe bengenta.”

¹⁸ Lokuhle kutsi Michael akazange alahle litsemba. Uchubeka utsi: “Nganaka kakhulu kulungisa buhlobo bami naJehova, ngekutsi ngihlale ngithantaza, ngimtjele indlela lengitiva ngayo nangekudadisha nekucabangisisa ngalengikufundzile.” Ngekuhamba kwesikhatsi, Michael waphindze wenta leminye imisebenti ebandleni. Nyalo ungulomdzala welibandla futsi ulihlahlandlela lelivamile. Utsi: “Labadzala belibandla bangisekela futsi bangikhutsata, loko kwangisita ngabona kutsi Jehova usangitsandza. Nyalo sengiphindze ngenta leminye imisebenti ebandleni nganembeza lohlobile. Loku lokwenteka kungifundzisile kutsi Jehova angacolela nobe ngubani lophendvuke mbamba.” Natsi singaciniseka kutsi Jehova utasisebentisa futsi asibusise ngisho nobe sente emaphutsa, nangabe nje senta konkhe lesingakwenta kuze silungise emaphutsa etfu futsi sichubeke setsembela kuye.​—Hla. 86:5; Taga 28:13.

19. Sikucinisa njani sibonelo saSamsoni?

¹⁹ Kulesihloko, sicoce ngetintfo letimbalwa letenteka ekuphileni kwaSamsoni. Nanobe bekanesono, kepha akazange ayekele kwetama kukhonta Jehova, ngisho nangetulu kwekwenta liphutsa nakutiwa endzabeni yaDelila. Ngetulu kwaloko, Jehova akazange amlahle. Nkulunkulu waphindze wamsebentisa ngendlela lemangalisako. Jehova bekambona njengendvodza lenekukholwa lokucinile, kangangekutsi wenta kutsi ligama lakhe libhalwe KubaseHebheru sehluko 11 nakubalwa bantfu labetsembekile. Kusikhutsata kakhulu kwati kutsi sikhonta Babe losezulwini lositsandzako, lokufuna mbamba kusicinisa, ikakhulukati nasibutsakatsaka! Ngako njengaSamsoni, natsi singancenga Jehova sitsi: “Ngicela ungikhumbule, futsi ngicela ungicinise.”​—Khu. 16:28.