1-2. Yini leyenta labo labakhonta Nkulunkulu bajabule? (Jakobe 1:22-25)

 JEHOVA neNdvodzana yakhe layitsandzako bafuna sijabule. Umbhali weTihlabelelo 119:2 watsi: “Bayajabula bantfu labenta loko labakhumbuta kona, labo labamfunisisa ngenhlitiyo yabo yonkhe.” Jesu waphindze watsi: “Bayajabula labo labeva livi laNkulunkulu futsi baligcine!”​—Luk. 11:28.

² Njengobe sikhonta Jehova sibantfu labajabulile. Ngasiphi sizatfu? Sinetizatfu letinyenti, kodvwa lesinye lesihamba embili kutsi sihlale sifundza liVi laNkulunkulu njalo futsi siyatimisela kukusebentisa loko lesikufundza kulo.​—Fundza Jakobe 1:22-25.

3. Kusisita njani kusebentisa loko lesikufundza eVini laNkulunkulu?

³ Tinyenti tindlela lokusisita ngato ‘kuba benti belivi.’ Lokunye lesikwatiko kutsi kubaluleke kakhulu kuze sijabulise Jehova. Kukwati loko kwenta sijabule. (Shu. 12:13) Njengobe sikusebentisa loko lesikufundza eVini laNkulunkulu leliphefumulelwe, kuphila kwemindeni yetfu kuba ncono futsi siba nebuhlobo lobuhle nebazalwane betfu nabodzadze. Kungenteka loko kwentekile kuwe. Ngetulu kwaloko, sigwema tinkinga letinyenti lababanato labo labangatilandzeli tindlela taJehova. Sivumelana naloko lokwashiwo yiNkhosi Davide. Ngemuva kwekutsi engomeni yakhe akhulume ngemitsetfo, nemiyalo kanye netehlulelo taJehova, wephetsa ngekutsi atsi: “Loyo lotigcinako utfola umvuzo lomkhulu.”​—Hla. 19:7-11.

4. Yini leyenta kube matima kuba benti beliVi laNkulunkulu?

⁴ Kuliciniso kutsi akuhlali kumelula kuba benti beliVi laNkulunkulu. Sihlale simatasatasa, ngako kufanele sakhe sikhatsi sekufundza liBhayibheli nekulidadisha kuze sati loko Jehova lafuna sikwente. Ngako nyalo asesicoce ngaletinye tintfo letingasisita kutsi sihlale silifundza njalo liBhayibheli. Sitawuphindze  sicoce ngaloko lokungasisita kutsi sicabange ngaloko lesikufundzako futsi sifune tindlela lesingakusebentisa ngato ekuphilleni kwetfu.

TIBEKELE SIKHATSI SEKUFUNDZA LIVI LANKULUNKULU

5. Ngutiphi tintfo letitsatsa sikhatsi setfu lesinyenti?

⁵ Linyenti lebantfu baJehova lihlale limatasatasa. Sicitsa sikhatsi lesinyenti kakhulu senta imisebenti lephatselene nekukhonta Nkulunkulu. Nasi sibonelo, linyenti letfu liyasebenta kuze sikhone kutinakekela tsine kanye nemindeni yetfu. (1 Thim. 5:8) EmaKhristu lamanyenti anakekela tihlobo letigulako nobe lesetikhulile. Sonkhe kufanele sinakekele imphilo yetfu, nako lokutsatsa sikhatsi. Ngetulu kwako konkhe loku, sinemisebenti lokufanele siyente ebandleni. Kantsi umsebenti lobaluleke kakhulu lokufanele siwente kutsi sente konkhe lesingakwenta emsebentini wekushumayela. Njengobe kufanele wente yonkhe lemisebenti, ungasitfola njani sikhatsi sekufundza liBhayibheli njalo, ucabangisise ngaloko lokufundzako futsi ukusebentise loko lelikushoko?

6. Yini longayenta kuze kufundza liBhayibheli kute kucala kuwe? (Buka nesitfombe.)

⁶ Kufundza liBhayibheli kungulenye ‘yetintfo letibaluleke kakhulu’ kumaKhristu, ngako kufanele sikwente kute kucala. (Fil. 1:10) Sihlabelelo nasikhuluma ngemuntfu lojabulako sitsi: “Ujabula kakhulu ngemtsetfo waJehova, futsi ucabangisisa ngawo imini nebusuku.” (Hla. 1:1, 2) Ngako kusebaleni kutsi kufanele sitibekele sikhatsi kuze sikhone kufundza. Ngusiphi sikhatsi lesikahle sekufundza liBhayibheli? Angeke sonkhe siphendvule ngendlela lefanako. Kodvwa kamelula nje, kungaba sikhatsi lapho khona ungakhona kuhlale ulifundza njalo. Lomunye umzalwane lokutsiwa nguVictor utsi: “Ngiyakutsandza kufundza liBhayibheli ekuseni. Nanobe ngingatsandzi kuvuka, kepha tiba tincane tintfo letiphazamisanako ekuseni. Ngisuke ngingacabangi tintfo letinyenti futsi ngiyakhona kunaka loko lengikufundzako ekuseni.”  Kungulokufanako yini nakuwe? Tibute: ‘Ngusiphi sikhatsi lesingilungelako mine sekufundza liBhayibheli?’

CABANGISISA NGALOKO LOKUFUNDZAKO

7-8. Yini lengenta singasitakali ngalokugcwele nasifundza? Fanekisa.

⁷ Liciniso likutsi, ngalokuvamile kungenteka sifundze tintfo letinyenti kodvwa kube bete lokungenako. Kukile yini kwenteka wafundza lokutsite futsi watsi nawucedza nje wangasakukhumbuli loko lokufundzile? Loku kukile kwenteka kitsi sonkhe. Lokubuhlungu kutsi loko kungenteka ngisho nalapho sifundza liBhayibheli. Mhlawumbe sitibekele umgomo wekufundza tehluko letitsite teliBhayibheli njalo ngelilanga. Leyo yintfo lenhle. Kufanele vele sitibekele imigomo futsi sinamatsele kuyo. (1 Khor. 9:26) Kodvwa kufundza liBhayibheli kumane nje kusicalo futsi kusicalo lesihle. Kunyenti lokudzingekako kuze sisitakale ngalokugcwele nasifundza liVi laNkulunkulu.

⁸ Cabanga nganangu umfanekiso: Emanti, ngalokuvamile emanti emvula, abalulekile etintfweni letiphilako. Kodvwa nakungana imvula lenyenti ngesikhashana nje, umhlabatsi ungahle ungakhoni kuwamunya lamanti. Nakwenteka loku, imvula ayibi lusito. Umhlabatsi udzinga sikhatsi kuze umunye lamanti bese uwendlulisela etitjalweni. Ngendlela lefanako, kufanele sikugweme kufundza liBhayibheli sijakile, lokusho kulifundza sishesha bese siba bete sikhatsi sekucabanga, sekukhumbula nesekukusebentisa loko lesikufundzile.​—Jak. 1:24.

9. Yini lokufanele siyente nangabe sesitetayete kufundza liBhayibheli sisheshe?

⁹ Kuyenteka yini utibone ngatsi ulifundza ushesha liBhayibheli? Yini lokufanele uyente? Ungajaki. Yetama kucabanga ngalokufundzako nobe ngalosandza kukufundza. Loku akufaneli kube matima. Nangabe kuzindla kubonakala kumatima kuwe mhlawumbe ungakutsatsa ngatsi uyacabanga ngaloko lokufundzako. Ungakhetsa nekwelula sikhatsi sakho sekudadisha kuze ukhone kucabanga nobe kuzindla. Ngakulokunye, ungakhetsa  kufundza emavesi lambalwa futsi usebentise sikhatsi lesisele kuze ucabange ngaloko lokufundzile. Victor lesike sakhuluma ngaye utsi: “Ngifundza emavesi lambalwa, mhlawumbe sehluko sinye. Ngenca yekutsi ngifundza ekuseni kakhulu, ngiyakhona kucabangisisa ngako kulolonkhe lilanga.” Kunobe nguyiphi indlela loyisebentisako, kubalulekile kufundza ngendlela letawukwenta kutsi utfole lokunyenti kuloko lokufundzile.​—Hla. 119:97; buka nelibhokisi lelitsi “ Imibuto Longacabanga Ngayo.”

10. Fanekisa kutsi ungakusebentisa njani loko lokufundzako. (1 KubaseThesalonika 5:17, 18)

¹⁰ Ngisho nobe ulifundza nini liBhayibheli nobe ulifundza sikhatsi lesinganani, timisele kufuna tindlela longakusebentisa ngato loko lokufundzako. Njengobe ufundza emavesi eVini laNkulunkulu, tibute: ‘Loku lengikufundzako ngingakusebentisa njani nyalo nobe esikhatsi lesitako?’ Asesibekise, asesitsi nawusafundza liBhayibheli ufundza na-1 KubaseThesalonika 5:17, 18. (Fundza.) Ngemuva kwekufundza lamavesi lamabili ungema ucabange ngekutsi uvame kuthantaza kangakhi nekutsi uvame kuthantaza ngalokujulile yini. Ngetulu kwaloko, ungacabanga nangetintfo lobongako ngato. Mhlawumbe uncuma kutsi utawubonga Jehova ngetintfo letintsatfu. Nawucitsa imizuzu lembalwa wenta loko, ngandlela tsite angeke ugcine ngekuva kodvwa utawuphindze ube ngumenti weliVi laNkulunkulu. Cabanga nje kutsi ungasitakala kangakanani nawungakwenta ngalokuphindzaphindziwe loko lilanga ngalinye, ucabange nangalamanye emavesi lowafundzako! Siyaciniseka kutsi utawutfutfuka ekubeni ngumenti weliVi laNkulunkulu. Kodvwa yini longayenta nangabe ubona kutsi kusekunyenti lakufanele utfutfukise khona?

TIBEKELE IMIGOMO LOTAWUKHONA KUYIFINYELELA

11. Yini lengahle yente ubone ngatsi kulukhuni kwenta lushintjo? Niketa sibonelo.

¹¹ Nawufundza liBhayibheli futsi ufuna tindlela longasebentisa ngaso secwayiso lesikulo, ungahle ubone ngatsi kunyenti lakufanele utfutfukise khona. Cabanga nganasi simo: Asesitsi lamuhla nawufundza liBhayibheli, ufundza ngeseluleko lesimayelana nekukhetsa. (Jak. 2:1-8) Uyabona kutsi kufanele utfutfukise endleleni lophatsa ngayo labanye, ngako uncuma kwenta lushintjo. Kuhle loko! Ngakusasa ufundze lamanye emavesi lakhombisa kutsi kubalulekile kunaka loko lokushoko. (Jak. 3:1-12) Uyanaka kutsi ngalesinye sikhatsi tintfo lotikhulumako atakhi. Ngako uyatimisela kukhuluma tintfo letikahle naletakhako. Ngelilanga lelilandzelako  ufundza ngesecwayiso lesimayelana nekuba ngumngani walelive. (Jak. 4:4-12) Uyanaka nalapho kutsi kufanele ucaphele kakhudlwana nawukhetsa loko lotijabulisa ngako. Ngelilanga lesine, ungahle ubone ngazutsi kulukhuni kakhulu kwenta lonkhe lolushintjo.

12. Kubaluleke ngani kutsi ungadvumateki nawubona kutsi kukhona lakufanele utfutfukise khona? (Buka umbhalo longentasi.)

¹² Nangabe kufanele wente lushintjo nobe utfutfukise ungadvumateki. Loku kuyakhombisa kutsi unenhlitiyo lenhle. Umuntfu lotfobekile nalowetsembekile ufundza liBhayibheli ngobe afuna kubona lapho kufanele atfutfukise khona. a Khumbula nekutsi akupheli kugcoka “buntfu lobusha.” (Khol. 3:10) Yini letakusita kutsi uchubeke ube ngumenti weliVi laNkulunkulu?

13. Yini longayenta kuze utibekele imigomo longayifinyelela? (Buka nesitfombe.)

¹³ Kunekutsi wetame kukwenta konkhe loku lokufanele utfutfukise kuko, tibekele imigomo longayifinyelela. (Taga 11:2) Naku longakwetama: Yenta luhla lwetintfo lokufanele utfutfukise kuto bese ucala ngekwenta kunye nobe kubili, loku lokunye ukwente esikhatsini lesitako. Yini longacala ngayo?

14. Ngumiphi imigomo longacala ngayo?

¹⁴ Ungancuma kucala ngemgomo longakhona kuwufinyelela. Nobe ungakhetsa kutfutfukisa lawubona khona kutsi kubaluleke kakhulu khona kutsi utfutfukise. Nasewuwati umgomo wakho, cwaninga etincwadzini tetfu mhlawumbe ungasebentisa i-Watch Tower Publications Index nobe Lithulusi Lekucwaninga LaBofakazi BaJehova. Thantaza ngalomgomo wakho ucele Jehova kutsi akunike “sifiso nemandla ekwenta intsandvo yakhe.” (Fil. 2: 13) Ngemuva kwaloko, yetama kukusebentisa loko lokufundzile. Nangabe uwente kahle umgomo wakho wekucala loko kungakukhutsata kutsi uchubekele nakulomunye umgomo. Ecinisweni, nawubona kutsi ukhonile kwenta lushintjo nobe ukhonile kutfutfukisa buntfu bakho bebuKhristu, loko kungakukhutsata kutsi uchubeke wenta lushintjo futsi kungenteka ungakutfola kumelula kwenta nalolunye lushintjo.

“VUMELA LIVI LANKULUNKULU LISEBENTE KUWE”

15. Bantfu baJehova behluke njani kubantfu labanyenti labafundza liBhayibheli? (1 KubaseThesalonika 2:13)

¹⁵ Labanye bantfu batsi sebalifundze tikhatsi letinyenti liBhayibheli. Kodvwa bayaletsemba yini vele? Bayakusebentisa yini loko lokukulo futsi bayalivumela yini kutsi litsintse indlela labaphila ngayo? Lokubuhlungu kutsi ngalokuvamile imphendvulo nguCha. Kodvwa kunemehluko lomkhulu kubantfu baJehova! NjengemaKhristu ekucala, semukela liBhayibheli ‘njengelivi laNkulunkulu, njengobe lingilo sibili.’ Ngetulu kwaloko, siyatimisela kuze sikhombise kutsi liyasebenta ekuphileni kwetfu.​—Fundza 1 KubaseThesalonika 2:13.

16. Yini lengasisita kutsi sibe benti beliVi?

¹⁶ Akuhlali kumelula kufundza liVi laNkulunkulu futsi ukusebentise loko lelikushoko. Singahle sikutfole kumatima kutfola sikhatsi sekufundza. Nobe singafundza sishesha singacabangi ngaloko lesikufundzako. Nobe singahle sive ngatsi angeke sikhone kwenta lonkhe lushintjo lokufanele silwente. Kunobe nguyiphi inkinga longaba nayo ungakhona kuyincoba. Ngekusitwa nguJehova ungakhona kubhekana nayo. Shengatsi singatimisela kwemukela lusito lwakhe, futsi singabi ngulabevako bese siyakhohlwa kodvwa sibe benti beliVi. Siyaciniseka kutsi nasichubeka sifundza liVi laNkulunkulu futsi sikusebentisa ekuphileni kwetfu loko lesikufundzako sitawujabula kakhulu.​—Jak. 1:25.