1-2. (a) Besinjani simo eJudiya ngesikhatsi Pawula abhala incwadzi leya kumaHebheru? (b) Sisho ngani kutsi lencwadzi yefika ngesikhatsi?

 EMAKHRISTU langemaHebheru lebekahlala eJerusalema naseJudiya abhekana netikhatsi letimatima eminyakeni leyalandzela kufa kwaJesu. Ngekushesha nje ngemuva kwekusungulwa kwelibandla lebuKhristu, aphatfwa kabi kakhulu. (Imis. 8:1) Eminyakeni lengaba ngu-20 leyalandzela, balandzeli baKhristu babhekana netimo letimatima, lokungenteka betibangelwe yindlala lebeyike yaba khona kulelive. (Imis. 11:27-30) Kodvwa ngabo-61 C.E., lamaKhristu aba nekuthula ngelizinga lelitsite nakucatsaniswa naloko bekuseta. Ngaleso sikhatsi, atfola incwadzi lephefumulelwe lebuya kumphostoli Pawula, futsi kwabonakala kutsi beyifike ngesikhatsi.

² Lencwadzi leya kumaHebheru beyifike ngesikhatsi ngobe lokuthula lebebanako bekungeke kuhlale kukhona. Pawula wabaniketa seluleko lebesitawubasita kutsi babeketelele lokuhlupheka lebebatawubhekana nako ngekushesha. Kubhujiswa kweJerusalema nelithempeli lebekakhulume ngako Jesu bekusondzela. (Luk. 21:20) Kuliciniso kutsi Pawula nalamaKhristu aseJudiya bebangati kutsi lokubhujiswa kutawufika nini. Nobe kunjalo, lamaKhristu bekangasisebentisa lesikhatsi lesisele kuze acinise kukholwa kwawo nekucinisela.​—Heb. 10:25; 12:1, 2.

3. Kubaluleke ngani kutsi emaKhristu lamuhla akunake kakhulu loko lokushiwo yincwadzi yakumaHebheru?

 ³ Ngekushesha sitawubhekana nekuhlupheka lokukhulu kwendlula loko emaKhristu langemaHebheru labhekana nako. (Mat. 24:21; Semb. 16:14, 16) Ngako ase sicoce ngaletinye teluleko Jehova latiniketa lamaKhristu letingasisita natsi lamuhla.

“ASICHUBEKELENI EKUVUTFWENI”

4. Ngutiphi tinkinga labhekana nato emaKhristu langemaJuda? (Buka nesitfombe.)

⁴ EmaJuda lebekagucukele enkholweni yebuKhristu bekufanele ente lushintjo lolukhulu, futsi loko bekungasimelula. EmaJuda bekake aba bantfu baJehova labakhetsiwe. IJerusalema beyike yaba sihlalo sebukhosi seMbuso waNkulunkulu, futsi lithempeli belike laba yindzawo lebekukhontelwa kuyo Nkulunkulu ngendlela lehlantekile. Onkhe emaJuda letsembekile bekagcina uMtsetfo waMosi njengobe bewuchazwa baholi bawo benkholo. Lomtsetfo bewukhuluma ngekudla, ngekusoka nendlela yekuphatsa bantfu labangasiwo emaJuda. Kodvwa ngemuva kwekufa kwaJesu, Jehova bekangasayemukeli imihlatjelo yawo. Loko kwawabangela inkinga emaKhristu langemaJuda lebeketayele kugcina loMtsetfo. (Heb. 10:1, 4, 10) Ngisho nemaKhristu lavutsiwe, njengemphostoli Phetro, akutfola kumatima kuhambisana nalokunye kulolushintjo. (Imis. 10:9-14; Gal. 2:11-14) Ngenca yetinkholelo tawo letinsha, lamaKhristu aphatfwa kabi baholi benkholo yemaJuda.

5. Yini emaKhristu lebekudzingeka ayicaphele?

⁵ EmaKhristu langemaHebheru bekaphikiswa ngemacembu ebantfu lamabili. Baholi benkholo yemaJuda bekawaphatsa njengetihlubuki. Ngetulu kwaloko, labanye lebebatsi bangemaKhristu bebaphocelela lamaKhristu kutsi agcine leminye imitsetfo eMtsetfweni waMosi, mhlawumbe loko bekakusho kuze angaphatfwa kabi. (Gal. 6:12) Yini lebeyitawusita emaKhristu letsembekile kutsi anamatsele ecinisweni?

6. Yini Pawula lakhutsata bazalwane bakhe nabodzadze kutsi bayente? (KumaHebheru 5:14–6:1)

 ⁶ Encwadzini Pawula layibhalela emaHebheru, wakhutsata bazalwane bakhe nabodzadze kutsi bambe bajule eVini laNkulunkulu. (Fundza KumaHebheru 5:14–6:1.) Asebentisa imiBhalo yesiHebheru, wabachazela kutsi yini leyenta indlela emaKhristu lakhonta ngayo Jehova ibe ncono khashane kunendlela emaJuda lamkhonta ngayo. a Pawula bekati kutsi lwati lolunyenti nekuwacondza kahle emaciniso bekutabasita kutsi bakhone kubona timfundziso letingemanga futsi batigweme kuze bangadukiswa.

7. Ngutiphi tinkinga lesibhekana nato lamuhla?

⁷ NjengemaKhristu langemaHebheru, natsi lamuhla sihlangana nebantfu labasakata tindzaba nobe imibono lephambene naloko Jehova latsi kuliciniso futsi kulungile. Labo labasiphikisako bavame kuhlasela loko lesikukholelwako lokusekelwe eBhayibhelini endzabeni yekutiphatsa, batsi silukhuni futsi asinanhlitiyo. Indlela bantfu labacabanga ngayo iya ikhwesha kakhulu endleleni Jehova lacabanga ngayo. (Taga 17:15) Ngako kubaluleke kakhulu kutsi siyibone lemicabango lengemanga futsi siyigweme, akukafaneli sivumele bantfu labasiphikisako kutsi basente siphelelwe ngemandla futsi siyekele kukhonta Jehova.​—Heb. 13:9.

8. Yini lesingayenta kuze sichubeke sitfutfuka siba ngemaKhristu lavutsiwe?

⁸ Senta kahle ngekulalela leseluleko Pawula lasiniketa emaHebheru sekutsi sichubekele ekuvutfweni. Loku kufaka ekhatsi kutfola lwati lolujulile ngeliciniso nekucabanga ngendlela Jehova lacabanga ngayo. Loku kufanele sichubeke sikwenta ngisho nangemuva kwekutinikela nekubhajatiswa. Ngisho nobe sinesikhatsi lesingakanani sisecinisweni, sonkhe kufanele sichubeke sifundza liVi laNkulunkulu futsi silidadisha. (Hla. 1:2) Kunamatsela eluhlelweni loluhle lwekutidadishela liBhayibheli kutasisita kutsi sicinise kukholwa, lokuyintfo Pawula layigcizelela encwadzini yakumaHebheru.​—Heb. 11:1, 6.

‘ASIBENI NEKUKHOLWA, LOKUHOLELA EKULONDVOLOTWENI KWEKUPHILA KWETFU’

9. Yini leyenta emaKhristu langemaHebheru adzinga kukholwa lokucinile?

⁹ EmaKhristu langemaHebheru bekutawudzingeka abe nekukholwa lokucinile kuze asindze kulokuhlupheka bekutawufika eJudiya. (Heb. 10:37-39) Jesu bekecwayise balandzeli bakhe kutsi nababona iJerusalema itungeletwa ngemabutfo, bekufanele babalekele etintsabeni. Seluleko sakhe besisebenta kuwo onkhe emaKhristu, ngisho ahlala ngekhatsi kulelidolobha nobe ngephandle kwalo. (Luk. 21:20-24) Ngalokuvamile, bantfu nabahlaselwa libutfo ngaleto tikhatsi bebabalekela edolobheni lelinetibondza njengeJerusalema kuze bavikeleke. Kubalekela etintsabeni bekutawubonakala kungenangcondvo futsi bekutawudzinga kukholwa lokucinile.

10. Kukholwa lokucinile bekutawenta emaKhristu kutsi enteni? (KumaHebheru 13:17)

¹⁰ EmaKhristu langemaHebheru bekutawudzingeka abetsembe labo Jesu bekabasebentisa kuze acondzise libandla. Kungenteka labo bebahola bakhipha ticondziso leticondzile lebetitawusita onkhe emabandla kutsi alalele sicondziso saJesu ngesikhatsi lesifanele nangendlela lehlelekile. (Fundza  KumaHebheru 13:17.) Ligama lesiGriki lelisetjentiswe KumaHebheru 13:17 lelitsi “balaleleni,” liveta kutsi umuntfu ukhutsateka kutsi alalele ngobe ametsemba loyo lokhipha lesicondziso. Loko kusho lokungetulu nje kwekulalela ngobe aneligunya lekuniketa lesicondziso. Ngako emaKhristu langemaHebheru bekufanele abetsembe labo labaholako ngaphambi kwekutsi kucale lokuhlupheka. Nangabe lamaKhristu bekalalela ticondziso talabo labaholako ngesikhatsi kusenekuthula, bekutawuba melula kutsi alalele ngetikhatsi letimatima.

11. Kubaluleke ngani kutsi emaKhristu abe nekukholwa lokucinile lamuhla?

¹¹ Lamuhla sidzinga kukholwa njengalamaKhristu langemaHebheru. Siphila esikhatsini lapho khona bantfu labanyenti bangasilaleli secwayiso seliBhayibheli lesimayelana nekuphela kwalelive, futsi baze bahlekise ngaso. (2 Phet. 3:3, 4) Ngetulu kwaloko, ngisho nobe liBhayibheli lisitjela kutsi kutawentekani ngekuhlupheka lokukhulu, kodvwa tinyenti tintfo lesingatati. Kufanele setsembe ngalokuphelele kutsi Jehova sewuvele uncumile kutsi kuphela kwalelive kutawufika nini nekutsi utasinakekela.​—Hab. 2:3.

12. Yini letasisita kuze sisindze ngekuhlupheka lokukhulu?

¹² Kufanele siphindze sikhulise indlela lesibetsemba ngayo labo Jehova labasebentisako lamuhla kuze asicondzise, ‘lokusisebenti lesetsembekile nalesihlakaniphile.’ (Mat. 24:45) Nakucala kuhlupheka lokukhulu, kungenteka sitawutfola ticondziso letitawusindzisa kuphila, njengobe kungenteka asitfola nemaKhristu langemaHebheru ngesikhatsi kuhlasela libutfo lemaRoma. Nyalo sikhatsi sekutsi sikhulise indlela lesisetsemba ngayo sicondziso lesisitfola kulabo labaholako enhlanganweni yaJehova. Nangabe singasetsembi futsi singasilaleli sicondziso sabo nyalo, kutawuba matima kukwenta loko ngekuhlupheka lokukhulu.

13. Yini leyenta sitsi besibalulekile seluleko lesiKumaHebheru 13:5?

¹³ Njengobe emaKhristu langemaHebheru bekalindzele luphawu lwekutsi sekangabaleka, bekufanele aphile imphilo lemelula ngekutsi ‘angayitsandzi imali.’ (Fundza KumaHebheru 13:5.) Labanye kuwo bebaphile ngesikhatsi sendlala nekweswela. (Heb. 10:32-34) Ngisho nobe bekake avuma kubeketelela bumatima ngenca yetindzaba letimnandzi, kodvwa kungenteka labanye besebacala kubona ngatsi umcebo usivikelo sabo. Kodvwa imali beyingeke ibavikele kulokubhujiswa bekuta, ngisho nobe beyinganani. (Jak. 5:3) Ecinisweni, labo lebebatsandza tintfo bebangakutfola kumatima kakhulu kubaleka, bashiye emakhaya abo netintfo tabo.

14. Kukholwa lokucinile kutatitsintsa njani tincumo lesitentako mayelana nekucongelela tintfo?

¹⁴ Nangabe setsemba mbamba kutsi lelive litawuphela, loko kungenta kutsi singatitsandzi tintfo. Ecinisweni, bantfu “bayawulahla lisiliva labo etitaladini” ngobe batawubona kutsi “ligolide nelisiliva labo angeke kubasindzise ngelilanga lentfukutselo yaJehova.” (Hez. 7:19) Kunekutsi sinake kucongelela imali lenyenti, kufanele sente tincumo letitasisita kutsi siphile kuphila lokumelula. Loko kufaka ekhatsi kugwema silingo sekudala tikweleti letingakadzingeki nekucitsa sikhatsi lesinyenti sinakekela tintfo tetfu letinyenti. Sitakugwema nekutitsandza kakhulu letintfo lesinato. (Mat. 6:19, 24) Njengobe sisondzela ekupheleni kwalelive, kutawudzingeka sikhetse kutsi setsemba Jehova yini nobe tintfo lesinato.

 “KUDZINGEKA NICINISELE”

15. Yini leyenta emaKhristu langemaHebheru akudzinga kakhulu kucinisela?

¹⁵ EmaKhristu langemaHebheru bekutawudzingeka abeketelele tintfo lebetitawuvivinya kukholwa kwawo njengobe timo betiya tiba timbi kakhulu eJudiya. (Heb. 10:36) Nanobe lamanye awo aphatfwa kabi kakhulu, kodvwa linyenti lawo beligucukele enkholweni yebuKhristu ngesikhatsi kunekuthula. Pawula watsi ngisho nobe bekabeketelele tinkinga letimatima letivivinye kukholwa kwawo, kodvwa bekasengakahlupheki njengaJesu, bekangakahlupheki aze afa. (Heb. 12:4) EmaJuda lamanyenti bekatfukutsele kakhulu futsi aneludlame ngenca yekutsi bantfu labanyenti bebaba ngemaKhristu. Eminyakeni lembalwa ngaphambi kwaloko, sicumbi sebantfu sahlasela Pawula ngesikhatsi ashumayela eJerusalema. EmaJuda langetulu kwalangu-40 “enta nesifungo sekutsi nakangadla nobe anatse lokutsite angakambulali Pawula, atawucalekiswa.” (Imis. 22:22; 23:12-14) Ngisho nobe lamaKhristu bekatawutondvwa futsi aphatfwe kabi, bekutawudzingeka achubeke nekuhlangana ndzawonye kuze akhonte Jehova, ashumayele tindzaba letimnandzi futsi achubeke acinisa kukholwa kwawo.

16. Incwadzi lebeyibhalelwe emaHebheru ingasisita njani kutsi sibe nembono lokahle ngekuphatfwa kabi? (KumaHebheru 12:7)

¹⁶ Yini lebeyitawusita emaKhristu langemaHebheru kutsi abeketelele kuphatfwa kabi? Pawula bekati kutsi bekudzingeka abe nembono lokahle ngetinkinga tawo. Ngako wawachazela kutsi Nkulunkulu angahle avumele kukholwa kwemKhristu kutsi kuvivinyeke kuze acecesheke. (Fundza KumaHebheru 12:7.) Lokuceceshwa kungamsita umKhristu kutsi abe nebuntfu bebuKhristu lobubalulekile futsi abutfutfukise. Nangabe bekatawunaka umphumela loletfwa nguletinkinga, bekutawuba melula kutsi acinisele.​—Heb. 12:11.

17. Yini Pawula layifundza mayelana nekubeketelela kuphatfwa kabi?

 ¹⁷ Pawula wakhutsata lamaKhristu langemaHebheru kutsi abe nesibindzi futsi angapheli emandla nakabhekana netinkinga. Bekafanele kukusho loko. Njengobe bekake wawaphatsa kabi emaKhristu, bekayati indlela lebekatawuphatfwa kabi ngayo. Bekakwati nekubeketelela kuphatfwa kabi. Ngetulu kwako konkhe, waphatfwa kabi ngetindlela letehlukahlukene nasekangumKhristu. (2 Khor. 11:23-25) Ngako Pawula bekakwati kahle loko bekudzingekile kuze umuntfu acinisele. Wakhumbuta lamaKhristu kutsi nakabeketelela tinkinga, bekufanele angatetsembi wona, kodvwa etsembele kuJehova. Nguloku lokwamnika sibindzi sekutsi atsi: “Jehova ungumsiti wami; angeke ngesabe.”​—Heb. 13:6.

18. Yini lokufanele siyati ngelikusasa lengasisita sibeketelele kuphatfwa kabi?

¹⁸ Labanye bazalwane betfu nabodzadze babeketelela kuphatfwa kabi ngisho nanyalo. Singabasekela ngekutsi sibathantazele, futsi ngaletinye tikhatsi sibasite ngaloko labakudzingako. (Heb. 10:33) Nobe kunjalo, liBhayibheli likwenta kucace kutsi “bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.” (2 Thim. 3:12) Ngenca yaloko, sonkhe kufanele sitilungiselele nyalo loko lokuseta. Shengatsi singachubeka simetsemba ngalokuphelele Jehova, siciniseka kutsi utasisita sicinisele ngisho nobe singabhekana nayiphi inkinga. Ngesikhatsi lesifanele, utawukhulula bonkhe labo labetsembekile kuye.​—2 Thes. 1:7, 8.

19. Yini lesingayenta kuze silungele kuhlupheka lokukhulu? (Buka nesitfombe.)

¹⁹ Siyaciniseka kutsi incwadzi yaPawula layibhalela emaHebheru yawasita lamaKhristu kutsi alungele kuhlupheka lebekuseta. Pawula wakhutsata bazalwane bakhe nabodzadze kutsi bambe bajule eVini laNkulunkulu futsi bayicondze imiBhalo. Kwenta loko bekutawubasita kutsi bakhone kubona timfundziso lebetingalimata kukholwa kwabo futsi batigweme. Wabakhutsata kutsi bacinise kukholwa kwabo kuze batasilalela ngekushesha sicondziso saJesu nesalabo labaholako ebandleni. Waphindze wasita lamaKhristu kutsi acinisele ngekutsi abe nembono lokahle ngetinkinga labhekana nato, futsi atitsatse njengelitfuba lekuceceshwa nguBabe wawo lonelutsandvo. Shengatsi natsi singasisebentisa leseluleko lesiphefumulelwe. Nasenta njalo, sitawukhona kucinisela kuze kube sekugcineni.​—Heb. 3:14.