Nasisalungiselela kudadisha, singatibuta, ‘Yini lengilindzele kuyifundza?’ Kodvwa kufanele sikhumbule kutsi ngisho nobe singalindzela kufundza intfo letsite, loku akusho kutsi kute tintfo letinsha Jehova lafuna kutsi sitifundze. Yini lesingayenta kuze sifundze tintfo letinsha nasidadisha?

Thantazela kuhlakanipha. Cela Jehova akusite ukucondze loko lafuna kutsi nyalo ukufundze. (Jak. 1:5) Kugweme kwetsembela kakhulu kuloko lesewukwati.​—Taga 3:5, 6.

Vumela emandla elivi laNkulunkulu asebente ekuphileni kwakho. “Livi laNkulunkulu liyaphila.” (Heb. 4:12) Njalo nasifundza liBhayibheli, lingasifundzisa intfo lensha futsi lisisite ngetindlela letehlukene ekuphileni kwetfu. Kodvwa loko kungenteka kuphela nangabe sivuma kutsi siyakudzinga kufundziswa nguNkulunkulu.

Bonga ngako konkhe Jehova lakusebentisako kuze asifundzise. Imfundvo levela kuJehova ‘injengelidzili lekudla lokunotsile.’ (Isa. 25:6) Kugweme kungatifundzi tihloko locabanga kutsi angeke utijabulele. Angeke ugcine nje ngekuzuza kodvwa utawujabula mbamba ngaloko Nkulunkulu lakufundzisa kona!