Akukafaneli sicabange kutsi ngenca nje yekutsi bebangekho ngesikhatsi acalisa Sidlo SeNkhosi Sakusihlwa, bekangasabemukeli labafundzi labangu-70 nobe kutsi besebamlahlile. Kunaloko, Jesu bekamane nje afuna kuba nebaphostoli bakhe.

Bekabemukela labafundzi bakhe labangu-12 nalaba labangu-70. Wacale wakhetsa emadvodza langu-12 kubafundzi bakhe labanyenti, wawabita ngekutsi baphostoli. (Luk. 6:12-16) BekaseGalile ngesikhatsi ‘abita baphostoli bakhe labangu-12’ futsi ‘abatfuma kutsi bayoshumayela ngeMbuso waNkulunkulu futsi baphilise bantfu.’ (Luk. 9:1-6) Ngekuhamba kwesikhatsi, nakaseJudiya, Jesu ‘wakhetsa labanye bafundzi labangu-70, wabatfuma ngababili.’ (Luk. 9:51; 10:1) Ngako, Jesu bekanebalandzeli etindzaweni letehlukahlukene lapho bekushunyayelwa khona umlayeto wakhe.

EmaJuda laba balandzeli baJesu bekachubeka agubha liPhasika njalo ngemnyaka, futsi kungenteka bekaligubha nemindeni yawo. (Eks. 12:6-11, 17-20) Njengobe sikhatsi saJesu besisondzela, yena nebaphostoli bakhe baya eJerusalema. Kodvwa akazange abite bonkhe bafundzi bakhe labaseJudiya, eGalile nalabasePheriya kutsi bagubhe naye leliPhasika. Ngako kuyacaca kutsi Jesu bekafuna kuba nebaphostoli bakhe. Wabatjela watsi: “Bengisolo ngifisa kakhulu kudla nani leliPhasika ngisengakahlushwa.”​—Luk. 22:15.

Kunesizatfu lesivakalako saloko. Ngekushesha Jesu bekatawufa kuze abe “liWundlu laNkulunkulu lelisusa sono selive.” (Joh. 1:29) Loku bekutawenteka eJerusalema, njengobe kusukela kadzeni, Nkulunkulu bekentelwa lapho imihlatjelo. Imvu yemhlatjelo beyikhumbuta ema-Israyeli kutsi Jehova bekawakhulule eGibhithe. Kodvwa umhlatjelo waJesu bewutawenta lokungetulu kakhulu kunaloko. Bewutawukhulula bonkhe bantfu esonweni nasekufeni. (1 Khor. 5:7, 8) Loko Jesu lebekatawukwenta bekutawenta kutsi labaphostoli labangu-12 babe sisekelo selibandla lebuKhristu. (Ef. 2:20-22) Lokunakekako kutsi iJerusalema, lidolobha lelingcwele, ‘inematje esisekelo langu-12’ lokubhalwe kuwo “emabito langu-12 ebaphostoli beliWundlu.” (Semb. 21:10-14) Ngako labaphostoli labetsembekile bebatawudlala indzima lebaluleke kakhulu ekufezeni injongo yaNkulunkulu. Ngako kunengcondvo kutsi Jesu afune kuba nabo nakagubha liPhasika kwekugcina naloko lebekutawenteka, lokuSidlo SekuNkhosi Sakusihlwa.

Labafundzi labangu-70 kanye nalabanye, bebangekho kulesidlo kanye naJesu. Kodvwa bonkhe bafundzi labakhombisa kutsi betsembekile bebatawuzuza kuloko Jesu lakucalisa, lokuSidlo SeNkhosi Sakusihlwa. Ngekuhamba kwesikhatsi, onkhe emaKhristu lagcotjiwe bekatawungena esivumelwaneni sembuso, leso Jesu lakhuluma ngaso kubaphostoli bakhe ngalobo busuku.​—Luk. 22:29, 30.