NgesiHebheru, lombhalo ungasho tintfo letehlukene. Ngako lamaphuzu lalandzelako asisita sitfole umcondvo longiwo ngalelivesi:

1. Cabanga ngaso sonkhe sehluko salelivesi. Tibusiso lokukhulunywa ngato kuvesi 12 kuya ku-14 titawutfolwa bantfu labalungile—labo labacela ‘kusindziswa nekuphephiswa’ kubantfu lababi (livesi 11). Livesi 15 liphindze livumelane nalamavesi njengoba ligama lelitsi ‘babusisiwe’ lisho bantfu labalungile—labo ‘Nkulunkulu wabo kunguSimakadze!’

2. Lokucondza kuvumelana nalokushiwo ngulamanye emavesi eliBhayibheli lanesetsembiso sekutsi Nkulunkulu utatibusisa kakhulu tinceku takhe letetsembekile. Letihlabelelo tikhombisa kutsi Davide bekanelitsemba lelicinile lekutsi ngemuva kwekutsi Nkulunkulu akhulule sive sema-Israyeli etitseni taso, utawabusisa ngenjabulo nangemphumelelo. (Lev. 26:9, 10; Dut. 7:13; Hla. 128:1-6) Nasi sibonelo: Dutheronomi 28:4 utsi: “Sitselo sesisu senu siyawubusiswa, nesivuno selive lenu, nemazinyane etifuyo, nemankhonyane emihlambi yenu, nemazinyane etimvu tenu newetimbuti tenu.” Ecinisweni, ngesikhatsi kubusa Solomoni indvodzana yaDavide sive sema-Israyeli besinekuthula nemphumelelo lebesingazange sibe nayo. Lokubaluleke kakhulu kutsi loko lokwenteka nakubusa Solomoni kusikhombisa loko lokutawenteka nasekubusa Mesiya.​—1 Khos. 4:20, 21; Hla. 72:1-20.

Singaphetsa ngekutsi lokucaciswa kweTihlabelelo 144 kwenta lesehluko sonkhe sikhombise ngalokucacile litsemba letinceku taJehova lekutsi bantfu lababi batawubhujiswa futsi bantfu labalungile batawuba nekuthula kanye nemphumelelo.