1, 2. (a) Kungani bantfu labebaphila ngesikhatsi semphostoli Pawula bebahlale bacabanga ngekugcilateka kanye nekukhululeka? (b) Pawula watjela bantfu kutsi bangayitfolaphi inkhululeko sibili?

BANTFU baseRoma labebaphila nemaKhristu ekucala bebatigcabha ngenca yemitsetfo lebebanayo, inkhululeko kanye nekulunga. Noma kunjalo, uMbuso waseRoma bewunemandla kanye neludvumo ngenca yekutsi bewunetigcila. Ngalesinye sikhatsi emaphesenti langu-30 ebantfu baseRoma bebatigcila. Asingabati kutsi bantfu labanyenti lokufaka ekhatsi emaKhristu bebavame kucabanga ngenkhululeko kanye nekugcilatwa.

² Tincwadzi letabhalwa ngumphostoli Pawula tikhuluma kakhulu ngenkhululeko. Noma kunjalo, umgomo wekushumayela kwakhe bewungasiko kuletsa tingucuko eveni noma kutepolitiki lokuyintfo bantfu bangaleso sikhatsi bebayifuna. Esikhundleni sekutsi bafune inkhululeko kubabusi lababantfu noma etinhlanganweni, umphostoli Pawula kanye nemaKhristu lakanye nawo basebenta kamatima kute basite labanye bafundze ngetindzaba  letimnandzi teMbuso waNkulunkulu kanye nangesipho senhlawulo yaJesu Khristu lesingeke sisicatsanise nalutfo. Pawula watjela emaKhristu labekanye nawo ngemtfombo wenkhululeko sibili. Encwadzini yesibili layibhalela emaKhristu aseKhorinte, washo ngalokucacile kutsi: “Jehova unguMoya, futsi lapho umoya waJehova ukhona khona, kuba nenkhululeko.”​—2 Khor. 3:17.

3, 4. (a) Yini leyenta Pawula washo emavi laku-2 Khorinte 3:17? (b) Yini lokufanele siyente kuze sitfole inkhululeko levela kuJehova?

³ Ekucaleni kwencwadzi layibhalela emaKhristu aseKhorinte, Pawula wakhuluma ngebuso baMosi lobebukhatimula ngesikhatsi ehla eNtsabeni iSinayi ngemuva kwekutsi abone ingilosi yaNkulunkulu. Batsi nababona Mosi, bantfu besaba kakhulu ngako Mosi wambonya buso bakhe ngendvwangu. (Eks. 34:29, 30, 33; 2 Khor. 3:7, 13) Pawula wachaza kutsi, “kodvwa nabaphendvukela kuJehova, lendvwangu iyasuswa.” (2 Khor. 3:16) Lamavi aPawula asho kutsini?

⁴ Njengoba sifundzile esihlokweni lesendlule, Jehova longuMdali wato tonkhe tintfo nguye yedvwa lonekhululeko lengapheli futsi lete imingcele. Ngako kunengcondvo kutsi kuJehova kanye nalapho “umoya waJehova ukhona khona, kuba nenkhululeko.” Kuze sijabulele lenkhululeko futsi sizuze kuyo kufanele ‘siphendvukele kuJehova’ lokusho kuba nebuhlobo lobuhle naye. Ngesikhatsi ema-Israyeli asehlane akazange abe nembono lofanele ngendlela Jehova labewaphatsa ngayo. Bekungazutsi tinhlitiyo kanye netingcondvo tabo betimbonyiwe futsi ticinile ngoba bebafuna kusebentisa inkhululeko yabo yekuphuma eGibhithe kuze benetise tifiso tabo.—Heb. 3:8-10.

5. (a) Nguyiphi inkhululeko leletfwa ngumoya waJehova? (b) Sati ngani kutsi kugcilateka ngeke kuyicedze inkhululeko lesiyitfola kuJehova? (c) Ngumiphi imibuto lokufanele siyiphendvule?

⁵ Inkhululeko leletfwa ngumoya waJehova isho lokungetulu nje kwekukhululeka ekubeni sigcili. Umoya waJehova wenta lokungetulu kwaloko bantfu labafisa kukufinyelela, ngoba uyasikhulula ekugcilatweni sono kanye nekufa, uphindze usikhulule nasekugcilatweni yinkholo yemanga nemikhuba yayo. (Rom. 6:23; 8:2) Leyo yinkhululeko sibili! Umuntfu angaba nalenkhululeko ngisho noma acindzetelwa noma aboshiwe. (Gen. 39:20-23) Loko kwabonakala kuliciniso kudzadze Nancy Yuen kanye nemzalwane Harold King lababeketelela kuboshwa ngenca yekukholwa kwabo. Ungababukela nabasho lokwenteke ekuphileni kwabo ku-JW Broadcasting. (Buka INTERVIEWS AND EXPERIENCES > ENDURING TRIALS.) Singakhombisa njani kutsi siyitsatsa njengaleligugu inkhululeko yetfu? Yini lesingayenta kuze siyisebentise ngekuhlakanipha lenkhululeko?

6. Ema-Israyeli akhombisa njani kutsi awabongi ngenkhululeko Jehova lebekawanike yona?

⁶ Nasibona kutsi sipho sibaluleke kanganani siyakhutsateka kutsi sikhombise kubonga kuloyo losiphe sona. Ema-Israyeli akazange abonge ngenkhululeko Jehova lawanika yona ngesikhatsi awakhulula ekugcilatweni eGibhithe. Ngemuva kwetinyanga letimbalwa bakhululekile, bacala kufuna kudla kanye netinatfo lebebatitfola eGibhithe futsi bakhonona ngetintfo lebebatiniketwe nguJehova futsi baze bafuna ngisho nekubuyela eGibhithe. Kunekutsi inkhululeko yekukhonta Nkulunkulu weliciniso Jehova ite kucala, banaka kakhulu “inhlanti, emaselwa, nemajoti, nashaladi  na-anyanisi, negalikhi”. Akumangalisi kutsi Jehova wabatfukutselela kakhulu bantfu bakhe. (Num. 11:5, 6, 10; 14:3, 4) Loku kusifundzisa sifundvo lesibalulekile!

7. Umphostoli Pawula wasisebentisa njani seluleko sakhe lesiku-2 Khorinte 6:1, futsi singamlingisa njani?

⁷ Umphostoli Pawula wakhutsata onkhe emaKhristu kutsi angayibukeli phasi inkhululeko Jehova lasiphe yona ngeNdvodzana yakhe Jesu Khristu. (Fundza 2 Khorinte 6:1.) Khumbula buhlungu umphostoli Pawula labuva ngekuba sigcila sesono nekufa. Noma kunjalo watsi: “Akabongwe Nkulunkulu ngaJesu Khristu iNkhosi yetfu!” Kungani? Wachazela emaKhristu labekanye nawo watsi: “Ngobe umtsetfo wemoya lonika kuphila ebunyeni naKhristu Jesu, unikhululile emtsetfweni wesono newekufa.” (Roma 7:24, 25; 8:2) Silandzela sibonelo semphostoli Pawula, natsi akukafaneli sikutsatsele phasi kutsi Jehova wasikhulula ekugcilatweni sono nekufa. Inhlawulo yaJesu isenta sikhonte Jehova nganembeza lohlantekile futsi sitfole injabulo ngekwenta kanjalo.​—Hla. 40:8.

8, 9. (a) Ngusiphi secwayiso umphostoli Phetro lasiniketa sona mayelana nekusebentisa inkhululeko yetfu? (b) Ngutiphi tingoti lesihlangabetana nato lamuhla?

⁸ Ngetulu kwekubonga ngenkhululeko yetfu, kufanele sigadze kutsi singayisebentisi kabi. Umphostoli Phetro wasecwayisa kutsi singayisebentisi kabi inkhululeko yetfu kuze senetise tifiso tenyama. (Fundza 1 Phetro 2:16.) Lesecwayiso asikukhumbuti yini loko lokwehlela ema-Israyeli ehlane? Natsi singabhekana nengoti lefanako. Sathane nelive lakhe bachubeka baletsa tintfo letinyenti lesingakhetsa kuto kwekwembatsa nekutilungisa, kudla nekwekunatsa, kutijabulisa kanye naletinye tintfo. Bakhangisi labahlakaniphile basebentisa bantfu labahle kuze basente sitsenge tintfo lesingatidzingi. Kumelula kakhulu kutsi sibanjwe ngulolugibe futsi siyisebentise kabi inkhululeko yetfu!

⁹ Seluleko saPhetro singasebenta nasetindzabeni letibalulekile ekuphileni, letifaka ekhatsi imfundvo kanye nemsebenti. Nasi sibonelo, bantfu labasebasha etikolweni lamuhla bacindzetelwa kutsi balwele kutfola imfundvo lephakeme. Bafundziswa kutsi imfundvo lephakeme ivula ematfuba lamanyenti ekutfola umsebenti loholela kahle nalosezingeni lelisetulu. Bavame nekukhonjiswa tibalo letiveta kutsi bantfu labatfole imfundvo lephakeme bahola kakhulu nabacatsaniswa nebantfu labangakayitfoli. Njengobe kufanele bente tincumo letingatsintsa kuphila kwabo, bantfu labasha bangalingeka kutsi baphishekele imfundvo lephakeme. Yini lokufanele bona nebatali babo bacabangisise ngayo?

10. Yini lokufanele sicabangisise ngayo nasisebentisa inkhululeko yetfu nasenta tincumo?

¹⁰ Labanye bantfu bacabanga kutsi banenkhululeko yekukhetsa loko labakufunako, yingci nje nangabe nembeza wabo ubavumela. Mhlawumbe bacabanga ngemavi aPawula lebekawabhalele emaKhristu aseKhorinte mayelana nekudla latsi: “Kungani inkhululeko yami kufanele yehlulelwe nganembeza walomunye umuntfu?” (1 Khor. 10:29) Kuliciniso kutsi sinenkhululeko yekutentela tincumo mayelana nemfundvo kanye nemsebenti lesingawukhetsa, kepha kufanele sikhumbule kutsi inkhululeko yetfu inemincele nekutsi tonkhe tincumo tetfu tinemiphumela. Ngaleso sizatfu, Pawula watsi: “Tonkhe tintfo tivumelekile, kodvwa akusito tonkhe letilusito. Tonkhe tintfo tivumelekile, kodvwa akusito tonkhe letakhako.” (1 Khor. 10:23) Loku kusisita sibone kutsi ngisho noma sinenkhululeko yekutikhetsela  tinyenti tintfo lokufanele sicabangisise ngato futsi tibalulekile kunaloko lesikutsandzako.

11. Kungani sakhululwa?

¹¹ Kulesecwayiso lasisho mayelana nekusebentisa kabi inkhululeko, Phetro washo umgomo waso. Wasikhutsata kutsi sisebentise inkhululeko yetfu “njengetisebenti taNkulunkulu.” Ngako, sizatfu lesiyinhloko sekutsi Jehova asikhulule ngaJesu emtsetfweni wesono nekufa kutsi siphile imphilo yekutinikela “njengetisebenti” takhe.

12. Nowa nemndeni wakhe basibekela siphi sibonelo?

¹² Indlela lekahle yekutsi sivikeleke ekusebentiseni kabi inkhululeko yetfu siphindze sibe tigcili talelive, kutsi sitimisele ekukhonteni Nkulunkulu. (Gal. 5:16) Cabanga ngesibonelo saNowa nemndeni wakhe. Bebaphila eveni leligcwele budlova nekutiphatsa lokubi. Noma kunjalo abazange bagcilatwe tifiso kanye netintfo lebetentiwa bantfu lebebahlala nabo. Yini leyabasita? Bakhetsa kunaka kakhulu umsebenti Jehova labaniketa wona lofaka ekhatsi kwakha umkhumbi, kugcina kudla kwabo nekwetilwane kanye nekwecwayisa labanye ngaZamcolo. “Nowa wakwenta konkhe layalwa nguNkulunkulu kutsi akwente.” (Gen. 6:22) Waba yini umphumela? Nowa nemndeni wakhe basindza nakubhujiswa lelive.​—Heb. 11:7.

13. Ngumuphi umsebenti Jesu lanikwa wona futsi lawunika balandzeli bakhe ngekuhamba kwesikhatsi?

¹³ Jehova usiyale kutsi senteni lamuhla? Njengoba sibafundzi baJesu, siwati kahle umsebenti Jehova lasinikete wona. (Fundza Lukha 4:18, 19.) Lamuhla, nkulunkulu walelive uvale tingcondvo tebantfu labanyenti futsi batigcili. (2 Khor. 4:4) Kulilungelo lelikhulu kitsi kulandzela sibonelo saJesu ngekutsi sisite bantfu bamati Jehova longuNkulunkulu wenkhululeko futsi bamkhonte. (Mat. 28:19, 20) Lona akusiwo umsebenti lomelula futsi sibhekana netinkinga letinyenti. Kuletinye tindzawo bantfu bete sifiso sekufundza futsi labanye  baze basiphikise. Ngamunye wetfu kufanele atibute umbuto lotsi: ‘Ngingayisebentisa yini inkhululeko yami kute ngiwusekele ngalokugcwele umsebenti weMbuso?’

14, 15. Bantfu baJehova bativa njani ngemsebenti wekushumayela? (Buka sitfombe lesisekucaleni kwalesihloko.)

¹⁴ Kujabulisa kakhulu kutsi labanyenti bayabona kutsi lomsebenti uyaphutfuma futsi baphila kuphila lokumelula kuze bangenele umsebenti wasikhatsi sonkhe. (1 Khor. 9:19, 23) Labanye bakhonta etindzaweni labahlala kuto, kantsi labanye baya letinesidzingo lesikhulu khona. Imibiko iveta kutsi eminyakeni lesihlanu leyendlulile, sibalo semahlahlandlela lavamile sibe ngetulu kwa-1 100 000, futsi labangetulu kwa-250 000 emhlabeni wonkhe bangenele letinye tici tekushumayela sikhatsi lesigcwele. Loku kungumphumela lomuhle wekuyisebentisa ngekuhlakanipha inkhululeko yetfu kuze sikhonte Jehova!—Hla. 110:3.

¹⁵ Yini lesite labazalwane nabodzadze kutsi bayisebentise ngekuhlakanipha inkhululeko yabo? Cabanga ngesibonelo saJohn naJudith lebesekuphele iminyaka lengu-30 bakhonta emaveni lehlukahlukene. Ngesikhatsi baseSikolweni Semsebenti Semahlahlandlela nga-1977, kwagcizelelwa kakhulu kutsi kufanele babe nesifiso sekutfutsa baye lapho kunesidzingo lesikhulu khona. John utsi, kuze bafinyelele lomgomo kudzingeke ashintje imisebenti tikhatsi letinyenti kuze baphile kuphila lokulula. Nabefika kulelinye live batfola kutsi kuthantaza kuJehova kanye nekwetsembela kuye kuyabasita kutsi bancobe tinkinga letifaka ekhatsi kufundza lulwimi lolusha, kwetayela emasiko lamasha kanye nekubeketelela simo selitulu lesibi. Bativa njani ngeminyaka labayicitsa basemsebentini wasikhatsi sonkhe? John utsi: “Kute lomunye umsebenti loncono kakhulu lengake ngawenta kwendlula lona. Jehova ngimtsatsa njengemuntfu mbamba, njengobe kwenta umntfwana kubabe wakhe lonelutsandvo. Nyalo sengiyati kutsi asho kutsini emavi lakuJakobe 4:8 latsi: ‘Sondzelani kuNkulunkulu, naye utawusondzela kini.’ Ngiyaciniseka kutsi sengiyitfolile injongo yekuphila leyenetisako lebengisolo ngiyifuna.”

16. EmaKhristu lamanyenti ayisebentise njani ngekuhlakanipha inkhululeko yawo?

¹⁶ Ngalokwehlukile kuboJohn naJudith, labanye timo atibavumeli kutsi babe semsebenti wasikhatsi sonkhe sikhatsi lesidze. Noma kunjalo, labanyenti bayalisebentisa litfuba lekuvolontiya ekwakhiweni kwetakhiwo tenhlangano emhlabeni wonkhe. Nasi sibonelo, ngesikhatsi kwakhiwa indlunkhulu yemhlaba wonkhe eWarwick, New York, bazalwane babodzadze labacishe babengu-27 000 batinikela kute basebente emaviki lamabili, umnyaka noma ngetulu. Labanyenti babo babekela eceleni letinye tintfo kute bakhone kwenta lomsebenti. Lesi sibonelo lesihle kakhulu sekusebentisa inkhululeko yetfu kuze sidvumise Jehova longuNkulunkulu wenkhululeko futsi simkhonte!

17. Nguliphi likusasa lelijabulisako lelitawutfolwa bantfu labayisebentisa kahle inkhululeko labayinikwe nguNkulunkulu?

¹⁷ Siyajabula kutsi siyamati Jehova futsi sinenkhululeko leletfwa kukhonta kweliciniso. Shengatsi tincumo lesitentako tingakhombisa kutsi siyitsatsa njengaleligugu inkhululeko yetfu. Esikhundleni sekutsi siyisebentise kabi inkhululeko yetfu, kufanele siyisebentisele kukhonta Jehova ngawo onkhe emandla etfu. Nangabe senta njalo, singaba nelitsemba lekujabulela tibusiso Jehova latasiniketa tona nakugcwaliseka emavi esiphrofetho latsi: ‘Indalo itawukhululwa ekugcilatweni konakala, bese itfola inkhululeko lekhatimulako yebantfwana baNkulunkulu.’​—Rom. 8:21.