1-3. (a) Nguyiphi inkinga bonkhe bantfu labasha lababhekana nayo, futsi loku singakufananisa nani? (Buka sitfombe lesisekucaleni kwalesihloko.) (b) Yini emaKhristu lasemasha langayenta kute akhone kubhekana nalenkinga?

ASESITSI uhlela kuya emkhosini lobalulekile edolobheni lelikhashane futsi kufanele uhambe ngebhasi. Nawufika esiteshini semabhasi uyadideka nawukhandza bantfu nemabhasi lamanyenti. Kubalulekile kutsi wati kahle lapho uyakhona kuze utogibela ibhasi lefanele. Ngoba nawungagibela noma nguyiphi ibhasi ungalahleka.

² Kuphila kufana neluhambo loludze futsi bantfu labasha bafana nebantfu labasesiteshini semabhasi. Ngaletinye tikhatsi bangahle badideke nakufanele bente tincumo ekuphileni. Nine labasha, kutawuba melula kwenta tincumo ekuphileni nangabe nitibekele imigomo. Ngumiphi imigomo leningatibekela yona?

³ Lesihloko sitawuphendvula lombuto ngekukhutsata bantfu labasha kutsi batimisele kufeza sifiso sabo sekujabulisa Jehova. Loko bangakwenta ngekutsi balalele seluleko sakhe endzabeni  yemfundvo, umsebenti, kushada nekuba nebantfwana kanye nalokunye. Loku kusho kutsi kufanele batimisele kufinyelela imigomo yekukhonta Nkulunkulu. Bantfu labasha labatimisele kukhonta Jehova bangaciniseka kutsi batawuphumelela ekuphileni futsi utababusisa.​—Fundza Taga 16:3.

4. Sitawucoca ngani kulesihloko?

⁴ Kubalulekile kutibekela imigomo yekukhonta Nkulunkulu usemusha. Kungani? Sitawucoca ngetizatfu letintsatfu. Tizatfu letimbili tekucala tikhombisa kutsi kufinyelela imigomo lotibekele yona yekukhonta Nkulunkulu kungabucinisa buhlobo bakho naJehova. Sizatfu sesitsatfu sichaza kutsi kutakusita ngani kutibekela imigomo yekukhonta Nkulunkulu usemusha.

5. Ngusiphi sizatfu lesiyinhloko sekutibekela imigomo yekukhonta Nkulunkulu?

⁵ Sizatfu lesiyinhloko sekutibekela imigomo yekukhonta Nkulunkulu kutsi sifuna kubonga ngetintfo lasentela tona kanye nekutsi uyasitsandza. Umhlabeleli watsi: “Kuhle kubonga wena, Simakadze. . . Ngobe nguwe, Simakadze, longente ngatfokota ngaloko lokwentile, imisebenti yetandla takho ingente ngahlabelela ngekujabula.” (Hla. 92:1, 4) Cabanga ngako konkhe Jehova lakwentele kona; kungaba kuphila, kukholwa, liBhayibheli, libandla kanye nematsemba lamahle ngelikusasa. Kwenta kukhonta Jehova kute kucala ekuphileni kwakho kungakhombisa kutsi uyambonga Nkulunkulu ngaletibusiso futsi kungakwenta usondzele kuye.

6. (a) Kutibekela imigomo yekukhonta Jehova kubutsintsa njani buhlobo betfu naye? (b) Ngumiphi imigomo labasebancane labangatibekela yona?

⁶ Sizatfu sesibili kutsi kwetama kufinyelela imigomo lemayelana nekukhonta Nkulunkulu kuyintfo lenhle emehlweni aJehova futsi kukwenta usondzele kakhulu kuye. Umphostoli Pawula watsi: “Nkulunkulu akasuye umuntfu longakalungi kutsi angakhohlwa umsebenti wenu nelutsandvo lenibe nalo ngelibito lakhe.” (Heb. 6:10) Ngisho nalabancane bangatibekela imigomo. Nakaneminyaka lengu-10, Christine watibekela umgomo wekufundza njalo umlandvo wekuphila wemaKhristu letsembekile. Nakaneminyaka lengu-12, Toby watibekela umgomo wekulifundza lonkhe liBhayibheli angakabhajatiswa. Maxim bekaneminyaka lengu-11 nakabhajatiswa kantsi sisi wakhe Noemi bekaneminyaka lengu-10. Bobabili batibekela umgomo wekuyokhonta eBethel. Kuze bahlale banake umgomo wabo, banamatsisela lifomu laseBethel elubondzeni lwasendlini yakubo. Kungani ungatibekeli imigomo lebalulekile ekuphileni kwakho futsi wetame kuyifinyelela?​—Fundza Filiphi 1:10, 11.

7, 8. (a) Kutibekela imigomo kungakusita njani kuze ukutfole ku melula kwenta tincumo? (b) Kungani lomunye losemusha akhetsa kungayi enyuvesi?

⁷ Siyini sizatfu sesitsatfu sekutibekela imigomo usemusha? Kunetincumo letinyenti bantfu labasebasha lokufanele batente, lokufaka ekhatsi kukhetsa imfundvo, umsebenti kanye naletinye tintfo. Kwenta tincumo kufana nekukhetsa umgcwaco lotawuhamba ngawo nawufika lapho ihlukana khona. Nawati lapho kufanele uye khona, angeke kube yinkinga kukhetsa umgcwaco lokahle. Ngendlela lefanako, kuba melula kwenta tincumo nangabe uyati imigomo yakho. Taga 21:5 titsi: “Emasu emuntfu lokhutsele amdvonsela ekuphumeleleni.” Utawusheshe uphumelele nangabe ushesha kutibekela imigomo. Nguloko lokwenteka kuDamaris ngesikhatsi kufanele ente sincumo lesibalulekile nakasemusha.

⁸ Damaris waphasa ngemalengiso esikolweni. Bekatfole umfundzate wekuyofundzela kuba ngummeli enyuvesi, kepha  wakhetsa kuyosebenta ebhange. Kungani? Utsi: “Ngesikhatsi ngisemncane ngatibekela umgomo wekuba lihlahlandlela. Bekufanele ngisebente ngemalanga latsite. Nangineticu tasenyuvesi bengingahola imali lenyenti, kodvwa bekutawufanele ngisebente onkhe malanga.” Damaris sewube lihlahlandlela iminyaka lengu-20. Uyajabula yini ngesincumo lasenta asemusha? Utsi: “Njengoba ngisebenta ebhange ngati bameli labanyenti. Benta umsebenti lebengitawenta kube ngafundzela kuba ngummeli. Labanyenti babo abajabuli ngemsebenti labawentako. Kukhetsa kwami kuba lihlahlandlela kwangenta ngavikeleka ekucindzetelweni ngumsebenti futsi ngiyajabula ngesincumo lengasenta.”

9. Kungani kufanele sibancome ngalokusuka enhlitiyweni bantfu labasha?

⁹ Tinkhulungwane tebantfu labasha emabandleni lasemhlabeni wonkhe bayakufanela kunconywa ngalokusuka enhlitiyweni. Batinikele kuJehova futsi banake imigomo yekumkhonta. Bakujabulela kakhulu kuphila futsi ngesikhatsi lesifanako bafundza kulalela sicondziso saJehova kuko konkhe labakwentako. Loko kufaka ekhatsi kukhetsa imfundvo, umsebenti, kanye nekukhetsa kutsi batawushada yini futsi babe nebantfwana. Solomoni wabhala watsi: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” (Taga 3:5, 6) Bantfu labasha labasebandleni lebuKhristu babaluleke kakhulu kuJehova, ubatsandza kakhulu, uyabavikela, abacondzise futsi ababusise.

10. (a) Kungani kushumayela kufanele kute kucala ekuphileni kwetfu? (b) Yini lesingayenta kuze siphumelele emsebentini wekushumayela?

¹⁰ Umuntfu lomusha lonaka kakhulu kujabulisa Jehova ucitsa sikhatsi lesinyenti ashumayela. Jesu Khristu wagcizelela kutsi “tindzaba letimnandzi kufanele tishunyayelwe kucala.” (Mak. 13:10) Umsebenti wekushumayela kufanele siwubeke kucala ekuphileni kwetfu ngoba uyaphutfuma. Ungatibekela yini umgomo wekuya njalo ensimini? Ungaba yini lihlahlandlela? Kutsiwani nangabe ungakujabuleli kakhulu kushumayela? Yini lengakusita ukhone kukuchaza kahle loko lokukholelwako? Naku lokubalulekile lokufanele ukwente: Lungiselela kahle futsi ungaphelelwa ngemandla ekucocela labanye loko lokwatiko. Ungatfola injabulo Iemangalisako nawushumayela.

11, 12. (a) Yini bantfu labasha labangayenta kuze balungele kufakaza? (b) Lomunye losemusha walisebentisa njani litfuba lekufakaza esikolweni?

¹¹ Ungacala ngekulungiselela imphendvulo yembuto lovame kubutwa bantfwana lofundza nabo. Kungaba ngulotsi: “Yini lekwenta ukholelwe kuNkulunkulu?” I-website yetfu letsi jw.org inetihloko letentelwe kusita bantfu labasha batitfolele indlela lekahle yekuphendvula lombuto. Chafata IZIMFUNDISO ZEBHAYIBHELI > INTSHA. Utawutfola lishadi lelinesihloko lesitsi “Kungani Ngikholelwa KuNkulunkulu?” Lelishadi litakusita nawulungiselela imphendvulo. Linemibhalo lemitsatfu lengakusita uchaze kutsi kungani ukholelwa kuNkulunkulu​—linembhalo waHebheru 3:4, Roma 1:20 kanye neTihlabelelo 139:14. Kusebentisa lamashadi kungakusita ukhone kuphendvula imibuto leminyenti.​—Fundza 1 Phetro 3:15.

¹² Nakuvela litfuba, khutsata lofundza nabo kutsi bangene ku-jw.org. Nguloko kanye Luca lakwenta ngesikhatsi eklasini lakhe bafundza ngetinkholo letehlukahlukene. Wabona kutsi lencwadzi yesikolwa beyikhuluma lokungesiko ngaBoFakazi BaJehova. Nanobe bekangabata, wacela imvume yekuchazela liklasi kutsi kungani loko lokushiwo ngulencwadzi kungasiko futsi lothishela wavuma. Luca akagcinanga  ngekubachazela ngetinkholelo takhe, waphindze wabatjengisa ne-website yetfu. Thishela wacela bafundzi kutsi babobukela i-video letfolakala ku-jw.org lenesihloko lesitsi Ncoba Lokuhluphako Ngaphandle Kwekulwa Naye. Luca wajabula kakhulu ngekutsi wakhona kufakaza.

13. Kungani kungakafaneli siphose lithawula nakuvela tinkinga?

¹³ Ungaphosi lithawula nawuhlangabetana netinkinga endleleni. (2 Thim. 4:2) Nangabe kuvela timo letimatima, hlala unake umgomo wakho. Ngesikhatsi Katharina aneminyaka lengu-17, watibekela umgomo wekufakaza kubo bonkhe lasebenta nabo. Lomunye wametfuka tikhatsi letinyenti, kodvwa Katharina akazange aphelelwe ngemandla. Hans labesebenta naye watsintseka ngenca yekutiphatsa kahle kwaKatharina ngisho noma abebhekene netinkinga. Loko kwamenta wafundza tincwadzi tetfu, wadadisha liBhayibheli futsi wabhajatiswa. Katharina abengati lutfo ngaloko ngobe abengasasebenti naye. Ngemuva kweminyaka lengu-13, Hans wavakashela libandla Katharina labekulo kute atobabekela inkhulumo. Cabanga ngendlela Katharina lajabula ngayo ngenca yekutsi akazange aphelelwe ngemandla ekufinyelela umgomo wakhe wekufakaza kubantfu lasebenta nabo!

14, 15. (a) Yini bantfu labasha lokufanele bacabange ngayo nangabe bacindzetelwa? (b) Bantfu labasha bangabhekana njani nekucindzetelwa bontsanga?

¹⁴ Lesihloko sikwente wabona kutsi kukhonta Jehova kufanele kute kucala ekuphileni kwakho. Loku kusho kutsi kufanele ulwele kufinyelela imigomo yekumkhonta. Kungenteka bontsanga yakho banake kakhulu kutijabulisa futsi bangahle bafune kutsi nawe wente lokufanako. Ngekuhamba kwesikhatsi kutawudzingeka ukhombise kutsi utimisele kangakanani kunamatsela etincumeni lotentile. Ungavumeli bontsanga yakho bakuphatamise. Cabanga ngemfanekiso lesicoce ngawo ekucaleni lomayelana nekugibela ibhasi. Angeke nje umane ugibele noma nguyiphi ibhasi ngesizatfu sekutsi ubona labayigibele bajabulile.

 ¹⁵ Kunyenti lokungakusita ukhone kumelana nekucindzetelwa bontsanga. Nasi sibonelo, tibalekele tintfo letingakufaka esilingweni. (Taga 22:3) Cabanga ngemiphumela lebuhlungu longayitfola ngekwenta imikhuba lemibi leyentiwa bontsanga. (Gal. 6:7) Kufanele uvume nekutsi uyasidzinga seluleko salabanye. Kutfobeka kutakwenta uyemukele imibono yebatali bakho kanye neyemaKhristu lavutsiwe lasebandleni.​—Fundza 1 Phetro 5:5, 6.

16. Niketa sibonelo lesikhombisa tinzuzo tekutfobeka.

¹⁶ Christoph wasemukela seluleko ngobe bekatfobekile. Ngemuva kwesikhashana abhajatisiwe wacala kuya ejimini. Bontsanga yakhe bamkhutsata kutsi ajoyine licembu labo letemidlalo. Christoph wakhuluma nalomdzala welibandla ngalendzaba futsi lona lomdzala wamcela kutsi ngaphambi kwekutsi ente sincumo acale acabange ngetingoti letifaka ekhatsi kungenwa ngumoya wekuncintisana. Noma kunjalo Christoph walijoyina lelicembu. Ngekuhamba kwesikhatsi wabona kutsi lomdlalo bewunebudlova futsi uyingoti. Waphindze wakhuluma nalabadzala futsi bonkhe bamnika seluleko lesiseBhayibhelini. Christoph utsi: “Jehova wanginiketa beluleki labakahle futsi ngamlalela, ngisho noma loko kwatsatsa sikhatsi.” Uyatitfoba yini futsi wemukele seluleko?

17, 18. (a) Yini Jehova layifisela bantfu labasha lamuhla? (b) Ungakubalekela njani kutisola ngetincumo lowatenta usemusha? Shano sibonelo.

¹⁷ “Jabula jaha [noma ntfombi], ebusheni bakho, inhlitiyo yakho ayikujabulise ngemalanga ebusha bakho.” (Shu. 11:9) Jehova ufuna ubujabulele busha bakho. Kulesihloko sicoce ngalenye indlela longakwenta ngayo loko. Hlale unake imigomo yekukhonta Nkulunkulu futsi ulandzele sicondziso sakhe kuko kokhe lokwentako. Nawushesha kwenta loku utawusheshe ubone kutsi Jehova uyakucondzisa, uyakuvikela futsi uyakubusisa. Cabanga ngato tonkhe teluleko letinhle lesititfola eVini laNkulunkulu futsi ulalele seluleko lesitsi: “Khumbula uMdali wakho etinsukwini tebusha bakho.”​—Shu. 12:1.

¹⁸ Bantfu labasebasha angeke bahlale babancane. Ngekuhamba kwesikhatsi batawukhula babe badzala. Lokubuhlungu kutsi ngekuhamba kwesikhatsi labanyenti bayatisola ngenca yekutsi abazange batibekele imigomo noma batibekela imigomo lengasiyo. Kodvwa bantfu labasebasha labahlale banake imigomo yekukhonta Nkulunkulu batawutfola kwenetiseka ngenca yetincumo lebatentile nabasakhula. Nguloko lokwenteka kuMirjana lebekanelikhono kutemidlalo. Ngesikhatsi asemusha wacelwa kutsi adlale imidlalo yema-Olympic, kodvwa wakhetsa kwenta umsebenti wasikhatsi sonkhe. Sekuphele iminyaka lengetulu kwalengu-30 Mirjana nemyeni wakhe basemsebentini wasikhatsi sonkhe. Utsi: “Kuba ngumuntfu lodvumile, kuhlonishwa, kuba neligunya kanye nekunjinga akumenti umuntfu ajabule. Kukhonta Nkulunkulu kanye nekwetama kusita bantfu kutsi bamati kuyimigomo lemihle.”

19. Shano tinzuzo tekunaka imigomo yekukhonta Nkulunkulu usemusha.

¹⁹ Kufanele sibancome bantfu labasebasha labasemabandleni lesikuwo ngoba batimisele kukhonta Jehova ngisho noma bahlangabetana netinkinga. Bantfu labasha, timiseleni kufinyelela imigomo yekukhonta Nkulunkulu futsi nente umsebenti wekushumayela ute kucala ekuphileni kwenu. Ngetulu kwaloko ningalivumeli lelive kutsi liniphatamise. Bantfu labasha bangaciniseka kutsi umsebenti wabo awusilo lite. Bazalwane nabodzadze babasekela ngelutsandvo futsi batawuphumelela nangabe batinikele kuJehova.