EMNYAKENI lophelile, tinkhulungwane tebazalwane emhlabeni wonkhe tamiswa taba ngulabadzala belibandla kanye netinceku letisebentako. Nangabe ungulomunye walabazalwane, siyaciniseka kutsi uyalijabulela lelilungelo.

Noma kanjalo, kungenteka wetfuka nawutfola lesabelo. Jason lomdzala welibandla losemusha utsi nakatfola lesabelo bekangaciniseki kutsi utawukhona kwenta imisebenti leminyenti lebekufanele ayente. Mosi naJeremiya bativa bangakufanelekeli kufeza tabelo Jehova labekabanike tona. (Eks. 4:10; Jer. 1:6) Nangabe utiva ngendlela lefanako, yini longayenta kuze ukhone kuncoba imiva lenjalo futsi uchubeke utfutfuka? Cabanga ngesibonelo saThimothi.—Imis. 16:1-3.

Kungenteka Thimothi abeseminyakeni yekutfomba nobe asandza kwengca eminyakeni lengu-20 ngesikhatsi Pawula acela kuhamba naye nakavakashela emabandla. Njengobe bekasemncane, kungenteka bekangatetsembi futsi bekangabata kutsi utasikhona lesabelo. (1 Thim. 4:11, 12; 2 Thim. 1:1, 2, 7) Ngemuva kweminyaka lelishumi, Pawula watjela libandla laseFiliphi watsi: “Nginelitsemba eNkhosini Jesu kutsi masinyane ngitawutfumela Thimothi kini . . . Kute lomunye lenginaye lonjengaye.”​—Fil. 2:19, 20.

Yini leyenta Thimothi waba ngulomdzala welibandla lokahle? Asesicoce ngetifundvo letisitfupha lesingatitfola kuye.

1. Abebakhatsalela mbamba bantfu. Pawula watjela bazalwane baseFiliphi kutsi: “[Thimothi] utawutinakekela kahle tintfo letiphatselene nani.” (Fil. 2:20) Thimothi bekabakhatsalela bantfu. Bekafuna basondzele kuJehova, ngako bekatidzela kuze abasite.

Ungafanani nemshayeli webhasi lolwela kufika ngesikhatsi etiteshini kepha longenandzaba nekulayisha bagibeli. William loneminyaka lengetulu kwa-20 angulomdzala welibandla ukhutsata bazalwane labasandza kubekwa kutsi batsandze bazalwane. Kunakekela tidzingo tebamemeteli kufanele kute kucala kunaleminye imisebenti yabo.

2. Umsebenti wekushumayela bewuta kucala ekuphileni kwakhe. Nakacatsanisa sibonelo saThimothi nesalabanye, Pawula watsi: “Bonkhe labanye bakhatsateka ngetintfo tabo, hhayi taKhristu Jesu.” (Fil. 2:21) Pawula wabhala lencwadzi ngesikhatsi aseRoma futsi wabona kutsi bazalwane balapho bebamatasa kakhulu ngetintfo tabo. Bebangakatinikeli ngalokuphelele ekwenteni umsebenti wekushumayela. Thimothi bekenta lokwehlukile. Ngesikhatsi kuvela ematfuba ekwandzisa tindzaba letimnandzi, walingisa Isaya watsi: “Nangu mine, tfuma mine!”​—Isa. 6:8.

Yini longayenta kuze ulinganisele emisebentini yakho nasemisebentini loyentela Nkulunkulu? Kwekucala, kufanele uhlele tintfo letita kucala. Pawula watsi: “Niciniseke ngetintfo letibaluleke kakhulu.” (Fil. 1:10) Tintfo letibalulekile kuJehova kufanele tite kucala kuwe. Kwesibili, kufanele uphile kuphila lokulula. Gwema kwenta tintfo letidla sikhatsi kanye nemandla akho. Pawula  wakhutsata Thimothi watsi: “Tibalekele tifiso tebusha, kodvwa ulwele kuba nekulunga, kukholwa, lutsandvo, nekuthula.”​—2 Thim. 2:22.

3. Abekhonta Nkulunkulu ngekutimisela. Pawula wabhalela libandla laseFiliphi watsi: “Niyabati bufakazi labuniketa lobumayelana naye, kutsi njengemntfwana lokanye neyise watigcilata kanye nami kuze tindzaba letimnandzi tichutjekiselwe phambili.” (Fil. 2:22) Thimothi bekakhutsele. Bekasebenta ngekutimisela kanye naPawula futsi loko kwabenta batsandzana kakhulu.

Enhlanganweni yaJehova kwahlale kunemsebenti lomnyenti. Kwenta lomsebenti kungakwenetisa futsi kungakwenta usondzelane nebazalwane bakho nabodzadze. Ngako kwente umgomo wakho kuhlale ‘unalokunyenti kwekukwenta emsebentini weNkhosi.’​—1 Khor. 15:58.

4. Bekakusebentisa lakufundzile. Pawula wabhalela Thimothi watsi: “Wena uyilandzele edvute imfundziso yami, indlela yekuphila, injongo, kukholwa, kubeketela, lutsandvo, kanye nekucinisela kwami.” (2 Thim. 3:10) Ngesizatfu sekutsi Thimothi bekakusebentisa lakufundzile, bekakufanelekela kuphatsiswa imisebenti lemikhulu.​—1 Khor. 4:17.

Kungaba kuhle kutsi kube nemzalwane lomdzala lotimisele kulingisa sibonelo sakhe. Tom losabe ngulomdzala sikhatsi lesidze utsi: “Lomunye umzalwane lobekanesikhatsi lesidze angulomdzala wanginaka futsi wangicecesha kahle. Bengicela seluleko sakhe njalo futsi bengisisebentisa. Loko kwangenta ngatetsemba.”

5. Bekahlale aticecesha. Pawula wayala Thimothi watsi: “Ticeceshe unemgomo wekwetsembeka kuNkulunkulu.” (1 Thim. 4:7) Kungenteka ingijimi ibe nemceceshi, kepha nayo kufanele iticeceshe. Pawula wancenga Thimothi watsi: “Chubeka utimisela ekufundzeleni linyenti, ekukhutsateni, nasekufundziseni. . . . Zindla ngaletintfo, utinikele kuto, kuze intfutfuko yakho itewubonakala kahle kubo bonkhe bantfu.”​—1 Thim. 4:13-15.

Nawe kufanele uchubeka utfutfukisa emakhono akho. Kufanele ube ngumfundzi lokhutsele futsi uhambisane neticondziso letinsha lesititfola enhlanganweni. Kufanele uphindze ugweme kutetsemba kakhulu—mhlawumbe usingatse simo lesitsite ungakacwaningi ngekucophelela ngenca yekutsi sewunesikhatsi lesidze unalesabelo. Lingisa Thimothi ngekutsi uhlale “utinaka wena nekufundzisa kwakho.”​—1 Thim. 4:16.

6. Abetsembele emoyeni longcwele. Nakacabanga ngemsebenti waThimothi, Pawula watsi: “Lilondvolote lelifa lowanikwa lona ngemoya longcwele lohlala kitsi.” (2 Thim. 1:14) Thimothi bekufanele awetsembe umoya waNkulunkulu kuze achubeke nekwenta umsebenti wakhe.

Donald losabe ngulomdzala welibandla sikhatsi lesidze utsi: “Emadvodza labekiwe kufanele ahlale anebuhlobo lobuhle naNkulunkulu. Nakenta njalo atawutfutfuka ‘emandleni aye emandleni.’ Atawuba sibusiso lesikhulu kubazalwane bawo nangabe athantazela umoya waNkulunkulu futsi akhombisa titselo temoya.”​—Hla. 84:7; 1 Phet. 4:11.

Kujabulisa kakhulu kubona bazalwane lababekiwe lokufaka ekhatsi nawe, basetjentiswa nguJehova. Jason lokukhulunywe ngaye ekucaleni kwalesihloko utsi: “Kunyenti lengikufundzile njengoba ngingulomdzala futsi sengitetsemba kakhudlwana. Nyalo sengisijabulela kakhulu sabelo sami futsi sililungelo lelihle kakhulu kimi!”

Utamvumela yini Jehova kutsi achubeke akusebentise? Tibekele umgomo wekufundza kuThimothi. Nangabe wenta njalo utawuba sibusiso kubantfu baNkulunkulu.