KUSEKUPHELENI kwaNovember 1932 edolobheni laseMexico. Nakusesele liviki kutsi kube nemhlangano, bekufakwe tibane letikhanyisa esitaladini kulelidolobha lelikhulu lelihlala bantfu labangetulu kwesigidzi. Nyalo lamalambu bese angasasebenti. Betindzaba balelidolobha bebabika ngaloko bekwenteka kuleloviki. Bebadvutane nesiteshi sesitimela baphetse imishini yekutsebula njengobe bekufika sivakashi lebesibalulekile—umzalwane Joseph F. Rutherford, lebekangumengameli weWatch Tower Society ngaleso sikhatsi. BoFakazi lebebahlala dvutane bebakulungele kwemukela ngenjabulo uMzalwane Rutherford, lebekete emhlanganweni wesifundza wemalanga lamatsatfu.

I-The Golden Age yabhala yatsi, “Lomhlangano wesifundza utawuba yingcophamlandvo lokutawukhulunywa ngawo ngemuva kwemitamo lemikhulu yekumemetela liciniso eMexico.” Kodvwa kwentiwa yini kutsi lomhlangano lebewunebantfu labangu-150 nje kuphela, ubaluleke kangaka?

Kusengakabi nalomhlangano, bebabancane bamemeteli eMexico. Kusukela nga-1919, beyiba khona imihlangano yesigodzi, kodvwa ngekuhamba kweminyaka emabandla nawo ancipha. Kuvulwa kwelihhovisi leligatja edolobheni laseMexico nga-1929, kwetsembisa kutsi simo besitawuba ncono. Nobe kunjalo, betikhona tiphatamiso. Ngesikhatsi emahlahlandlela ayalwa kutsi akayekele kwenta libhizinisi nakasemsebentini wekushumayela, lelinye lihlahlandlela latfukutsela futsi lashiya inhlangano layotivulela lalo licembu lebafundzi beliBhayibheli. Kusenteka loku, umbonisi weligatja watiphatsa ngendlela lephambene naloko lokushiwo liBhayibheli futsi kwadzingeka kutsi kubekwe lomunye esikhundleni sakhe. BoFakazi lebebatsembekile eMexico bebadzinga kuciniswa.

Ngalesikhatsi uMzalwane Rutherford avakashile wabacinisa kakhulu labazalwane labetsembekile futsi wetfula tinkhulumo letimbili letitsintsa inhlitiyo kanye netinkhulumo letisihlanu temsakato letinemandla. Bekukwekucala kutsi umsakato wakhona usakate tindzaba letimnandzi kulo lonkhe live laseMexico. Ngemuva kwalomhlangano, umbonisi lomusha weligatja wahlela umsebenti wekushumayela futsi BoFakazi labashisekako nalabacinisiwe bachubekela phambili nemsebenti wekushumayela futsi Jehova wababusisa.

Emnyakeni lolandzelako yaba mibili imihlangano leyabakhona kulelive, lomunye bewusedolobheni laseVeracruz kantsi lomunye bewusedolobheni laseMexico. Kutimisela kwalabazalwane emsebentini wekushumayela kwaba nemphumela lomuhle. Nga-1931 bekunebamemeteli labangu-82 nje kuphela. Kodvwa ngemuva kweminyaka lelishumi, lelinani lebamemeteli bese liphindvwe kalishumi! Nga-1941, bekunebantfu labangu-1 000 lebebete emhlanganweni wesifundza lobewusedolobheni laseMexico.

Nga-1943 BoFakazi bagaca emabhodi lamemetela sihloko semhlangano wesifundza lesitsi “Tive Letikhululekile,” lobewutawuba semadolobheni langu-12 aseMexico. * Umuntfu bekagaca emabhodi lamabili emahlombe  akhe, lelinye lilenge ngembili kantsi lelinye lilenge ngemuva, lobekuyindlela yekumemetela umhlangano lebeyisetjentiswa BoFakazi kusukela nga-1936.

Magazini i-La Nación nawukhuluma ngekuphumelela kwalomkhamkhaso lebewusedolobheni laseMexico, watsi: “Elangeni lekucala [lalomhlangano] wesifundza, [BoFakazi] bacelwa kutsi bameme bantfu labanyenti. Ngelilanga lelilandzelako bantfu bese bagcwele kulendzawo yemhlangano.” Lomphumela walomkhankhaso awuzange uwajabulise emalunga elisontfo lemaKatolika, lokwawenta aphuma umkhankhaso lobewumelene naBoFakazi. Ngetulu kwekuphikiswa, bazalwane nabodzadze bachubeka ngesibindzi kulomkhankhaso. Lomagazini waphindze watsi: “Bantfu babona lidolobha lonkhe ligcwele . . . emadvodza​—nebafati—​bashuca bagace ‘emabhodi.’” Lesihloko besiphindze sibe nesitfombe sebazalwane labashuca edolobheni laseMexico. Ngephansi kwalesitfombe bekubhalwe kutsi: “Sicumbi lesigcwele etitaladini.”

Kuleyo minyaka, BoFakazi labanyenti bekudzingeka kutsi batidzele kute baye emihlanganweni lebeyibakhona eMexico. Bantfu labanyenti lebebahlala etindzaweni tasemakhaya letikhashane nelidolobha, bebete titimela kanye nemigwaco. Lelinye libandla laze labhala latsi, “Lokukhona lapha endzaweni yakitsi, lilayini linye nje lelicingo.” Ngako-ke, labo lebebafuna kuya emihlanganweni bebahamba emalanga ngetinyawo nobe ngeminyuzi kute bayofika esiteshini sesitimela lesitawubamikisa edolobheni lelinemhlangano.

BoFakazi labanyenti bebaphuyile futsi bebangakhoni ngisho nekubhadalela luhambo nje lunye loluya emhlanganweni. Labanye nabefika, bebahlala emakhaya aBoFakazi labadvutane. Labanye bebalala emaHholweni eMbuso. Ngalomunye umhlangano, bantfu labacishe babe ngu-90 balala egatjeni, lapho basebentisa khona “emakhathoni langu-20 bawahlanganisa ndzawonye kute batolala etikwawo.” Incwadzi yemnyaka nayikhuluma ngaloko lokwentiwa nguletivakashi lebetijabulile ngalemibhedze yato yatsi “lemibhedze beyintofotela futsi ifutfumele kwendlula siyilo sasemende.”

LaboFakazi lebebajabulile, bekungabutwa kutsi bakujabulele kuba semhlanganweni webuKhristu futsi bebangatisoli ngekutidzela kwabo. Lamuhla, njengobe sekunebamemeteli labanyenti eMexico labajakele kuhlanganisa sigidzi, solo bayatimisela emsebentini wekushumayela. * Umbiko wanga-1949 lebewuvela egatjeni ukhuluma ngalabazalwane, watsi: “tikhatsi letimatima atizange tibacedze emandla labazalwane mayelana netintfo letiphatselene neMbuso ngenca yekutsi umhlangano ngamunye lesiba nawo uba nesihloko labacoca ngaso sikhatsi lesidze futsi labazalwane bahlale batibuta umbuto munye lotsi, Sitawuphindze sibe nawo nini lomunye uhlangano wesifundza?” Loyo mbiko solo uliciniso nalamuhla njengobe bewunjalo ngaleso sikhatsi.​—Lokuvela emtatjeni wetfu losenkhabeni yelive laseMelika.