Kulandzisa kwaMatewu mayelana nekutalwa kwaJesu kanye nekuphila kwakhe asemncane, ngandlela tsite kwehlukile kuloko lokwabhalwa nguLukha ngobe lababhali balamavangeli bebabika ngetindlela letehlukene.

Matewu bekalandzisa kakhulu ngaloko lobekwenteka kuJosefa. Uchaza indlela Josefa lenta ngayo ngesikhatsi eva kutsi Mariya ukhulelwe, achaze neliphupho lakhe ngesikhatsi ingelosi imchazela ngalesimo kanye nendlela lemukela ngayo lenchazelo. (Mat. 1:19-25) Matewu uchubeka akhulume ngeliphupho laJosefa ngesikhatsi ingelosi imtjela kutsi akabalekele eGibhithe, nekubaleka kwakhe akanye nemndeni wakhe, neliphupho lakhe ngesikhatsi ingelosi imtjela kutsi akabuyele ka-Israyeli, neluhambo lwakhe lwekubuyela emuva kanye nesincumo sakhe sekuhlala nemndeni wakhe eNazaretha. (Mat. 2:13, 14, 19-23) Etahlukweni tekucala telivangeli laMatewu, libito laJosefa livela tikhatsi letisiphohlongo kodvwa laMariya livela tikhatsi letine nje kuphela.

Ngakulolunye luhlangotsi, Lukha ulandzisa kakhulu ngaMariya. Lomlandvo uhlanganisa kuvakashelwa kwaMariya yingilosi Gabhriyeli, nekuvakashela kwakhe sihlobo sakhe Elizabethe kanye nendlela Mariya ladvumisa ngayo Jehova. (Luk. 1:26-56) Lukha uphindze akhulume ngaloko lokwashiwo nguSimeyoni kuMariya mayelana nekuhlupheka kwaJesu lobekuseta. Ngisho nangalesikhatsi Jesu aneminyaka lengu-12 budzala, umndeni wakubo uye ethempelini, Lukha ubhala loko lokwashiwo nguMariya hhayi loko lokwashiwo nguJosefa. Lukha uphindze akhulume ngendlela Mariya lativa ngayo ngako konkhe loko lebekwenteka. (Luk. 2:19, 34, 35, 48, 51) Etahlukweni letimbili tekucala telivangeli laLukha libito laMariya livela tikhatsi letingu-12, kepha laJosefa livela tikhatsi letingu-3 nje kuphela. Ngako-ke, Matewu ukhuluma kakhulu ngaloko lobekwenteka kuJosefa kantsi Lukha usitjela ngaloko lokwentiwa nguMariya naloko lokwenteka kuye.

Ngendlela lefanako, kubika kwalababhali ngeluhla lwekutalwa kwaJesu kwehlukile. Matewu uveta bufakazi bemvelaphi yaJosefa aphindze abonise nekutsi Jesu loyindvodzana yaJosefa bekayindlalifa lesemtsetfweni yesihlalo sebukhosi saDavide. Kungani? Kungenca yekutsi Josefa bekasitukulwane seNkhosi Davide ngendvodzana yayo Solomoni. (Mat. 1:6, 16) Lukha yena ulandzisa ngebufakazi bemvelaphi yaMariya futsi ukhombisa kutsi Jesu bekayindlalifa yekutalwa ngoba ‘watalwa waba ngumuntfu’ eluhlwini lwebukhosi baDavide. (Rom. 1:3) Kungani? Kungenca yekutsi Mariya bekasitukulwane seNkhosi Davide eluhlwini lwendvodzana yayo lenguNathani. (Luk. 3:31) Kodvwa kungani Lukha angamfaki Mariya kuloluhlu lwekutalwa njengendvodzakati yaHeli? Kungenca yekutsi luhlu lwekutalwa beluvamise kubitwa ngebantfu besilisa. Ngako-ke, ngesikhatsi Lukha afaka Josefa kuloluhlu futsi ambita ngekutsi yindvodzana yaHeli, kuyacaca kutsi bekasho kutsi Josefa ngumkhwenyana waHeli.​—Luk. 3:23.

Loluhlu lwekutalwa lolwabhalwa nguMatewu lukucacisa kahle kutsi Jesu bekanguMesiya lobekatsenjisiwe. Liciniso, luhla lwekutalwa kwaJesu belatiwa kahle kangangekutsi ngisho nebaFarisi nebeSadusi bebangeke baluphike. Lamuhla, luhla lolwabhalwa nguMatewu nalolo lolwabhalwa nguLukha lusisekelo sekukholwa kwetfu kanye nebufakazi bekugcwaliseka kwetetsembiso taNkulunkulu.