1. Ngutiphi letinye tindlela lesingasebenta ngato naJehova?

NGEMUVA kwekutsi Jehova adale bantfu bekafuna kutsi babambisane naye kuze afeze injongo yakhe. Bantfu labetsembekile bangasebenta naJehova ngisho nobe banesono. Nasi sibonelo, sisuke “sitisebenti letikanye naNkulunkulu” nangabe sishumayela tindzaba letimnandzi futsi sifundzisa bantfu. (1 Khor. 3:5-9) Cabanga kutsi kulilungelo lelikhulu kangakanani kubambisana neMdali Lophakeme ekwenteni umsebenti lobaluleke kakhulu! Nobe kunjalo, tikhona letinye tindlela lesingasebenta ngato naJehova ngaphandle kwekushumayela kanye nekwenta bafundzi. Kulesihloko sitawucoca ngekutsi singasebenta njani naJehova nasisita emalunga emindeni yetfu nemalunga elibandla, nasemukela tivakashi, nasenta imisebenti letsite enhlanganweni yaJehova kanye nalapho sikhulisa sikhatsi lesisicitsa emsebentini waJehova.​—Khol. 3:23

2. Kungani kungasiko kahle kucatsanisa loko lesingakwenta kute sisekele injongo yaJehova kanye naloko labanye labangakwenta?

² Njengobe sifundza lesihloko, ungakucatsanisi loko longakwentela Jehova kanye naloko labanye labangamentela kona. Khumbula kutsi asilingani ngeminyaka, sinemphilo lengafani, futsi  timo tetfu kanye nemakhono etfu akufani. Umphostoli Pawula waphefumulelwa kutsi atsi: “Nguloyo naloyo akahlole tento takhe, nakenta njalo utawuba nesizatfu sekutibonga yena, hhayi ngekuticatsanisa nalomunye umuntfu.”​—Gal. 6:4.

3. Yini lesenta sitsi usuke ubambisana naNkulunkulu nangabe unakekela umndeni wakho?

³ Jehova ulindzele kutsi tinceku takhe tiwanakekele emalunga emindeni yato. Nasi sibonelo, kungadzingeka usebente kute utfole imali yekunakekela tidzingo temndeni wakho. Bomake labanyenti bahlala emakhaya kute banakekele bantfwana babo labancane. Labanye bantfwana lesebakhulile kungadzingeka kutsi banakekele batali babo labangasakhoni kutinakekela. Loku kubalulekile ngobe liVi laNkulunkulu litsi: “Nangabe umuntfu angabanakekeli lababakhe, ikakhulukati bendlu yakhe, ukuphikile kukholwa futsi mubi kakhulu kunemuntfu longakholwa.” (1 Thim. 5:8) Nangabe kufanele unakekele umndeni, ungahle ungakhoni kucitsa sikhatsi lesinyenti emisebentini yekukhonta Nkulunkulu ngendlela lebewungatsandza kwenta ngayo. Kodvwa ungaphelelwa ngemandla. Jehova uajabula nangabe uwunakekela umndeni wakho.​—1 Khor. 10:31.

4. Batali bangawubeka njani uMbuso waNkulunkulu kucala, futsi loko kungaba namiphi imiphumela?

⁴ Batali labangemaKhristu basuke babambisana naJehova nangabe basita bantfwana babo kutsi batibekele imigomo yekukhonta Nkulunkulu. Batali labanyenti labakwentile loku babona bantfwana babo bangenela umsebenti wasikhatsi sonkhe ngisho nobe bawenta khashane nasekhaya. Labanye babo batitfunywa telivangeli, labanye bangemahlahlandlela lapho kunesidzingo lesikhulu khona, kani labanye basebenta e-Bethel. Nangabe bantfwana bakhashane nasekhaya kungenteka batali bangakhoni kucitsa sikhatsi lesinyenti nebantfwana babo ngendlela lebebangatsandza ngayo. Nobe kunjalo, batali labatidzelako bakhutsata bantfwana babo kutsi bachubeke benta umsebenti waJehova. Kungani? Kungobe kubajabulisa kakhulu futsi kuyabenetisa kwati kutsi bantfwana babo babeka uMbuso waNkulunkulu kucala. (3 Joh. 4) Kungenteka labatali bativa ngendlela Hana labetiva ngayo nakamikisa Samuweli ethempelini laJehova. Kubo kulilungelo lelikhulu kakhulu kusebenta naJehova ngalendlela.​—1 Sam. 1:28.

5. Yini longayenta kuze usite emalunga elibandla lokulo? (Buka sitfombe lesisekucaleni kwalesihloko.)

⁵ Nangabe ute umtfwalo wekunakekela umndeni, ungabasita yini bazalwane nabodzadze labagulako, labakhulile nobe labanaletinye tidzingo? Ungabasita yini labo lababanakekelako? Ebandleni lokulo, funa labo labadzinga lusito futsi ubasite. Nasi sibonelo, kungenteka kunadzadze lonakekela batali bakhe lesebakhulile. Ungamsita yini ngekutsi unakekele batali bakhe nangabe yena amatasa ngaletinye tintfo. Mhlawumbe ungasita lotsite ngekutsi uhambe naye nakaya emihlanganweni, nakayotsenga, nobe uhambe nabo nabayohlola umuntfu lotsite esibhedlela. Nawenta njalo utawube usebenta naJehova ekuphendvuleni imithantazo yetinceku takhe.​—Fundza 1 Khorinte 10:24.

6. Kusho kutsini kwemukela tivakashi?

⁶ Tisebenti letikanye naNkulunkulu tibonakala ngekwemukela tivakashi. EmiBhalweni YemaKhristu YesiHebheru, emavi latsi “kwemukela tivakashi” asho kuba  nemusa kubantfu longabati. (Heb. 13:2) EVini laNkulunkulu, kunetibonelo letisifundzisa kutsi singatemukela njani tivakashi. (Gen. 18:1-5) Kufanele sifune ematfuba ekusita lesikholwa nabo nalabo lesingakholwa nabo.​—Gal. 6:10.

7. Ngutiphi tinzuzo tekwemukela tisebenti tasikhatsi sonkhe?

⁷ Ungasebenta yini naJehova ngekutsi unikete tisebenti tasikhatsi sonkhe indzawo yekuhlala? (Fundza 3 Johane 5, 8.) Nasenta njalo sitfola litfuba ‘lekukhutsatana.’ (Roma 1:11, 12) Cabanga ngalokwenteka ku-Olaf. Utsi ngesikhatsi asemusha, ebandleni labekulo bekute lebekafuna kwemukela umbonisi wesigodzi lebekangakashadi. Ngako wabuta batali bakhe labangasibo BoFakazi kutsi bangavuma yini kutsi umbonisi wesigodzi ahlale ekhaya kubo. Bavuma, kodvwa batsi Olaf kutawufanele alale kusofa. Nguloko lakwenta, futsi akazange atisole. Wakujabulela kakhulu kucitsa liviki nembonisi wesigodzi. Njalo ekuseni nabadla, bebacoca ngetindzaba letinyenti letijabulisako. Olaf wakhutsateka kakhulu kangangekutsi wakhetsa kukhonta Jehova sikhatsi sonkhe. Sekuphele iminyaka lengu-40 Olaf asitfunywa selivangeli emaveni lehlukahlukene.

8. Kungani kufanele sibe nemusa ngisho nome bantfu bangabongi? Shano sibonelo.

⁸ Tinyenti tindlela lesingakhombisa ngato kutsi siyabatsandza labanye bantfu ngisho noma bangahle bangaboni ekucaleni. Cabanga nganasi sibonelo. Lomunye dzadze waseSpain bekafundza liBhayibheli naYesica lobuya e-Ecuador. Ngalelinye lilanga basafundza, Yesica wakhala kakhulu. Lodzadze wambuta kutsi ukhalelani. Yesica watsi ngaphambi kwekuya eSpain abehlupheka kakhulu. Ngalelinye lilanga bekete kudla labekangakupha indvodzakati yakhe, bekunemanti kuphela. Njengobe abelalisa indvodzakati yakhe, Yesica wathantaza wacela Nkulunkulu amsite. Ngekushesha ngemuva kwaloko, boFakazi lababili bavakashela Yesica futsi bamniketa magazini. Wabatsetsisa futsi wadzabula lomagazini watsi: “Nicabanga kutsi umntfwana wami angadla lencwadzi?” Labodzadze betama kumdvudvuta, kodvwa akazange abalalele. Ngekuhamba kwesikhatsi labodzadze bamletsela kudla. Manje njengoba sebafundza uyabona kutsi akazange ayinake indlela Jehova layiphendvula ngayo imithantazo yakhe. Kodvwa manje Yesica besekatimisele kukhonta Jehova. Kuyacaca kutsi kuba nemusa kwalabodzadze lababili kwaba nemiphumela lemihle.​—Shu. 11:1, 6.

9, 10. (a) Ema-Israyeli bekanamaphi lamanye ematfuba ekuvolontiya? (b) Ngutiphi letinye tindlela bazalwane labangasita ngato lamuhla?

⁹ Endvulo, ema-Israyeli bekanematfuba lamanyenti ekuvolontiya nakwentiwa imisebenti letsite. (Eks. 36:2; 1 Khr. 29:5; Neh. 11:2) Nalamuhla sinematfuba lamanyenti ekunikela ngesikhatsi setfu, tintfo lesinato kanye nangemakhono etfu kuze sisite bazalwane betfu nabodzadze. Nasenta njalo sitawujabula futsi sitawutfola tibusiso letinyenti.

¹⁰ LiVi laNkulunkulu likhutsata emadvodza lasebandleni kutsi atimisele kusebenta naJehova ngekutsi abe tinceku letisebentako nalabadzala belilandla. (1 Thim. 3:1, 8, 9; 1 Phet. 5:2, 3) Nabenta njalo basuke bakhombisa kutsi bayafuna kusita labanye ngetintfo labatidzingako ekuphileni kanye nasekukhonteni Jehova. (Imis. 6:1-4) Labadzala bake bakucela yini kutsi ube ngumlindzi, usite ekunakekeleni tincwadzi, ekuhleleni insimu, ekunakekeleni lihholwa nobe kuletinye tintfo? Bazalwane labenta lomsebenti bajabula kakhulu ngekusita labanye.

11. Lomunye dzadze uzuze njani ngekwakha bangani nakasemsebentini wekwakha?

 ¹¹ Bazalwane nabodzadze labavolontiya emsebentini leyentiwa enhlanganweni yaJehova batfola bangani labasha. Cabanga ngesibonelo sadzadze Margie losekuphele iminyaka lengu-18 avolontiya ekwakhiweni kwemaHholwa eMbuso. Kuyo yonkhe leminyaka bekatinika sikhatsi sekuba nabodzadze labasebasha futsi abaceceshe. Ubonile kutsi kwenta lomsebenti kuyindlela lekahle kakhulu yekukhutsatana. (Rom. 1:12) Nakabhekene netikhatsi letimatima ekuphileni kwakhe, bangani bakhe lebekasebenta nabo ekwakheni bamkhutsata kakhulu. Wake wasita yini emsebentini wekwakha? Ungakhona kusita ngisho nobe unelikhono nobe ute.

12. Yini longayenta kuze usite nangabe kuvele sehlakalo semvelo?

¹² Nakuvela inhlekelele, bantfu baNkulunkulu banelitfuba lekusebenta naye ngekutsi basite bazalwane babo ngetintfo labatidzingako. Nasi sibonelo, banikela ngemali kuze basite labo labehlelwe yinhlekelele. (Joh. 13:34, 35; Imis. 11:27-30) Lenye indlela lesingasita ngayo kutsi sivolontiye nakuhlantwa nobe kulungiswa takhiwo letibhidlikile. Ngesikhatsi kunetikhukhula, kwabhidlika likhaya lalomunye dzadze wasePoland lobitwa ngekutsi nguGabriela. Wajabula kakhulu ngesikhatsi bazalwane labasemabandleni lasedvute beta batomsita. Gabriela utsi: “Angitsandzi kukhuluma ngetintfo letangilahlekela, kodvwa ngifuna kukhuluma ngaloko lengikutfolile. Loku kungicinisekisile kutsi kuba yincenye yelibandla lebuKhristu kulilungelo lelikhulu futsi kusenta sijabule.” Labanyenti labatfole lusito ngemuva kwesehlakalo semvelo bativa ngendlela lefanako. Nalabo labasebenta naJehova kute basite labanye batfola injabulo lenkhulu futsi bayenetiseka.​—Fundza Imisebenti 20:35; 2 Khorinte 9:6, 7.

13. Kuvolontiya kungasisita njani kutsi simtsandze kakhulu Jehova? Shano sibonelo.

¹³ Stephanie kanye nalabanye bamemeteli bajabulela kusebenta naNkulunkulu ngekusita bazalwane nabodzadze lababakhoseli eMelika. Basita labakhoseli kutsi batfole tindzawo tekuhlala kanye nefenisha. Stephanie utsi: “Kubabona bajabulile futsi  babonga kwasenta safuna kubasita. Bacabanga kutsi ngitsi lesibasitile, kodvwa ecinisweni ngibo labasisite kakhulu. Lutsandvo, bunye, kukholwa kanye nekwetsembela kuJehova kusisite kutsi simtsandze kakhulu Jehova futsi loku kusente sambonga ngelusito lasiniketa lona ngenhlangano yakhe.”

14, 15. (a) Ngusiphi simo sengcondvo umphrofethi Isaya labenaso? (b) Lamuhla emaKhristu angamlingisa njani?

¹⁴ Ungatsandza yini kucitsa sikhatsi lesengetiwe usebenta naJehova? Uyafisa yini kuyokhonta lapho kunesidzingo lesikhulu sebamemeteli? Kuliciniso kutsi tinceku taJehova akudzingeki kutsi tize tiye khashane kute timkhonte. Kodvwa timo talabanye bazalwane nabodzadze tiyabavumela kutsi bayokhonta etindzaweni letikhashane. Indlela labacabanga ngayo iyafana nendlela umphrofethi Isaya labecabanga ngayo. Ngesikhatsi Jehova abuta atsi: “Ngitawutfuma bani? Ngubani lotasiyela?” Isaya waphendvula watsi: “Nangu mine, tfuma mine!” (Isa. 6:8) Ungakhona yini kusita inhlangano yaJehova? Ngutiphi tindlela longakwenta ngato loko?

¹⁵ Nakakhuluma ngemsebenti wekushumayela newekwenta bafundzi, Jesu watsi: “Umsebenti wekuvuna mkhulu, kodvwa tisebenti timbalwa. Ngako ncusani iNkhosi yekuvuna kutsi yengete tisebenti ekuvuneni kwayo.” (Mat. 9:37, 38) Ungakhona yini kukhonta endzaweni lakunesidzingo lesikhulu khona, mhlawumbe ube lihlahlandlela? Ungamsita yini lomunye kutsi ente njalo? Kuze bakhombise kutsi bayamtsandza Jehova kanye nabomakhelwane babo, bazalwane kanye nabodzadze labanyenti babe ngemahlahlandlela endzaweni lenesidzingo lesikhulu naledzinga tisebenti letinyenti tekuvuna. Tikhona yini letinye tindlela longaticabanga tekukhulisa sikhatsi losicitsa wenta umsebenti waNkulunkulu? Ungatfola injabulo lenkhulu ngekwenta njalo.

16, 17. Ngumaphi lamanye ematfuba langakuvulekela nangabe ufuna kwandzisa umsebenti lowentela Jehova?

¹⁶ Uyafuna yini kuyosita e-Bethel nobe ekwakhiweni kwetakhiwo tenhlangano sikhashana lesitsite nobe ngemalanga latsite evikini? Inhlangano yaJehova yahlale idzinga bantfu labatimisele kusita nobe nini nakunesidzingo, futsi labatawenta nobe ngabe yini labacelwa kutsi bayente ngisho nobe banemakhono ekwenteni leminye imisebenti. Jehova ubatsandza kakhulu bonkhe bantfu labatimisele kutidzela kuze baye nobe ngukuphi lakunesidzingo khona.​—Hla. 110:3.

¹⁷ Utimisele yini kutfola kuceceshwa lokwengetiwe kuze ukhonte Jehova sikhatsi lesigcwele? Mhlawumbe ungafaka sicelo sekuya eSikolweni SebaVangeli BeMbuso. Lesikolwa sicecesha bazalwane nabodzadze labavutsiwe nalabatimisele kukhonta Jehova sikhatsi sonkhe futsi inhlangano yaJehova ingabasebentisa kuze bente lokunyenti emsebenti wakhe. Labo labafaka ticelo kulesikolwa kufanele batimisele kuyokhonta nobe ngabe ngukuphi lapho batawabelwa khona nabaphotfula. Utimisele yini kusebentisa lelitfuba kuze wentele Jehova lokunyenti?​—1 Khor. 9:23.

18. Ngutiphi tinzuzo tekusebenta naJehova onkhe malanga?

¹⁸ Ngenca yekutsi sibantfu baJehova, siyephana, silungile, sinemusa futsi siyabatsandza labanye bantfu. Loku kusenta sibe nekuthula futsi sijabule. (Gal. 5:22, 23) Ngisho nobe uhlangabetana natiphi timo, utawuhlala ujabulile ngekutsi ulingise Jehova ngekupha labanye futsi uchubeke usisebenti lesikanye naye!​—Taga 3:9, 10.