1. Kungani kubhajatiswa kusinyatselo lesibalulekile? (Buka sitfombe lesisekucaleni kwalesihloko.)

NJALO ngemnyaka tinkhulungwane tebafundzi beliBhayibheli tiyabhajatiswa. Letinyenti tato bantfwana labasatawufika eminyakeni yekutfomba kanye nalesebakuyo. Kungenteka basuke bakhuliswe batali labangemaKhristu. Mhlawumbe nawe ungulomunye wabo, futsi loko kuyancomeka. Kubhajatiswa kubalulekile kuwo onkhe emaKhristu futsi kusinyatselo lesibalulekile kuze umuntfu asindziswe.​—Mat. 28:19, 20; 1 Phet. 3:21.

2. Kungani kungakafaneli ukwesabe kutinikela kuJehova?

² Nanobe kubhajatiswa kuletsa tibusiso letinyenti, kuphindze kuhambisane nemtfwalo lotsite. Ngamuphi umcondvo? Ngelilanga lowabhajatiswa ngalo, wabutwa umbuto lotsi: “Ngesisekelo semhlatjelo waJesu Khristu, sewuphendvukile yini etonweni takho, watinikela kuJehova kute wente intsandvo yakhe?” Waphendvula watsi yebo, futsi nawubhajatiswa usuke ukhombisa kutsi sewutinikele. Wetsembisa Jehova kutsi utamtsandza futsi wente intsandvo yakhe ite kucala ekuphileni kwakho. Lesi  sifungo lesibaluleke kakhulu futsi akukafaneli utisole ngaso. Awuyuze utisole ngekunikela kuphila kwakho kuJehova. Umuntfu longamkhulekeli Jehova ubuswa nguSathane. Develi akanendzaba nawe, ecinisweni utawujabula nawulahlekelwa kuphila lokuphakadze ngenca yekutsi usekela yena ekuvukeleni bukhosi baJehova.

3. Ngutiphi tibusiso longatitfola ngekunikela kuphila kwakho kuJehova?

³ Cabanga ngetibusiso lotitfolile ngenca yekutsi utinikele futsi wabhajatiswa. Njengobe sewunikele kuphila kwakho kuJehova, ungasho ngesibindzi utsi: “Simakadze ungakimi angesabi lutfo. Umuntfu angangentani nje?” (Hla. 118:6) Kute lilungelo lelikhulu longaba nalo ekuphileni kwendlula kuba seluhlangotsini lwaJehova kanye nekwemukelwa nguye.

4, 5. (a) Kungani kutinikela kungumtfwalo wemuntfu ngamunye? (b) Ngutiphi tinkinga emaKhristu lamanyenti labhekana nato?

⁴ NasewungumKhristu lobhajatisiwe buhlobo bakho naJehova abufani nemshwalensi batali bakho labangakubhadalela wona. Kunaloko, kufanele utakhele buhlobo bakho naJehova kute usindziswe, ngisho noma usahlala nebatali bakho. Kungani kubalulekile kutsi uhlale ukukhumbula loku? Kungobe angeke wati kutsi yini lotawubhekana nayo esikhatsini lesitako. Nasi sibonelo, nangabe wabhajatiswa usengakefiki eminyakeni yekutfomba, kungenteka ubhekane nekucindzeteleka kanye nekushintja kwendlela lotiva ngayo njengobe sewuseminyekeni yekutfomba. Lenye intfombatane leseminyakeni yekutfomba itsi: “Umntfwana lomncane ngeke eve buhlungu ngenca yekutsi akalitfoli likhekhe esikolweni ngesizatfu sekutsi ungulomunye waBoFakazi BaJehova. Kodvwa ngemuva kweminyaka lemibalwa kucindzetelwa kutsi aye ecasini kungaba nemandla, ngako kudzingeka aciniseke kutsi kulalela imitsetfo yaJehova kusincumo lesihle.”

⁵ Kuliciniso kutsi akusibo bantfu labasha kuphela lababhekana netinkinga. Ngisho nalabo lababhajatiswe sebabadzala babhekana netinkinga letinyenti letivivinya kukholwa kwabo. Kungaba tinkinga temshado, temphilo noma temsebenti. Kuliciniso kutsi wonkhe umuntfu, kungakhatsaliseki kutsi unganani utawubhekana netimo letivivinya kwetsembeka kwakhe kuJehova.​—Jak. 1:12-14.

6. (a) Kungani kutiniketela kwakho kuJehova kufanele kungashintji? (b) Yini lesingayifundza kuFiliphi 4:11-13?

⁶ Kuhlale sikhumbula kutsi setsembiso lesasenta kuJehova asigucuki, kutasenta kutsi sihlale setsembekile kuye ngisho noma singabhekana nasiphi simo. Loko kusho kutsi wetsembisa uMbusi wendzawo yonkhe kutsi utawuchubeka umkhonta ngisho noma bangani kanye nebatali bakho bangayekela kumkhonta. (Hla. 27:10) Kuto tonkhe timo longabhekana nato, Jehova angakusita akuphe emandla kute ukhone kuphila ngekuvumelana nekutiniketela kwakho.​—Fundza Filiphi 4:11-13.

7. Kusho kutsini kusebentela kusindziswa kwakho “ngekwesaba nangekutfutfumela”?

⁷ Jehova ufuna kutsi ube ngumngani wakhe. Kudzingeka wente imetamo kute ulondvolote lobungani uphindze usebentele kusindziswa kwakho. Ecinisweni Filiphi 2:12 utsi: “Chubekani nisebentela kusindziswa kwenu ngekwesaba nangekutfutfumela.” Lamavi akhombisa kutsi kudzingeka ucabangisise ngekutsi ungabulondvolota njani buhlobo bakho naJehova uphindze uhlale wetsembekile kuye ngisho noma ungahlangabetana natiphi tinkinga. Akukafaneli utetsembe ngalokwecile. Ngisho naletinye tinceku taNkulunkulu lesetimkhonte sikhatsi  lesidze take takhombisa kungetsembeki. Ngako yini longayenta kuze usebentele kusindziswa kwakho?

8. Kutichubela sifundvo seliBhayibheli kufaka ekhatsi ini, futsi kungani kubalulekile?

⁸ Kuba ngumngani waJehova kuhlanganisa kumlalela kanye nekukhuluma naye. Sifundvo seliBhayibheli lesitichubela sona siyindlela leyinhloko yekulalela Jehova. Loko kufaka ekhatsi kufundza kanye nekuzindla ngalesikufundza eBhayibheli nasetincwadzini letisekelwe kulo. Njengoba wenta loko, khumbula kutsi kudadisha liBhayibheli akufani nekudadisha noma nguyiphi incwadzi. Akufaneli kube ngazutsi ufundza nje kute uphase luhlolo esikolweni. Kudadisha lokuzuzisako kufana neluhambo lolukwenta ukhone kubona buntfu lobuhle baJehova. Loko kutakusita kutsi usondzele kuNkulunkulu futsi naye utawusondzela kuwe.—Jak. 4:8.

9. Ngumaphi emathuluzi lakusitile esifundvweni lotichubela sona?

⁹ Inhlangano yaJehova yente emathuluzi lamanyenti langakusita kutsi ube neluhlelo lwekudadisha loluphumelelako. Nasi sibonelo, sihloko lesitsi “Ukufunda Izindaba ZeBhayibheli” lesitfolakala ngephasi kwencenye letsi “Intsha” ku-jw.org, singakusita utfole tifundvo longatisebentisa letisetindzabeni teliBhayibheli. Ngetulu kwaloko, ku-jw. org kuphinze kube nemathuluzi ekudadisha encwadzi letsi “Lifundzisani Mbambambamba LiBhayibheli?” Lamathuluzi ekudadisha angakusita kutsi uciniseke ngetintfo lotikholelwako futsi ukhone kutichazela labanye. Letinye tindlela tekudadisha ungatitfola esihlokweni lesitsi “Intsha Iyabuza . . . Ngingakwenza Kanjani Ukufunda IBhayibheli Kujabulise?” lesitfolakala ku-Phaphama! ya-April 2009. Kudadisha kanye nekuzindla kunendzima lebalulekile nawusebentela kusindziswa kwakho.​—Fundza Tihlabelelo 119:105.

10. Kungani umthantazo ubalulekile kumKhristu lobhajatisiwe?

¹⁰ Njengoba kudadisha liBhayibheli kungulenye yetindlela lesilalela ngato Jehova, umthantazo uyindlela yekukhuluma naye. UmKhristu akukafaneli acabange kutsi umthantazo uyintfo lengakabaluleki noma uyintfo lesinika inhlanhla kuze sikhone kuphumelela etintfweni lesitentako. Kunaloko,  umthantazo uyindlela lesikhuluma ngayo neMdali wetfu. Jehova uyafuna kutsi ukhulume naye. (Fundza Filiphi 4:6.) Nangabe uhlangabetana nanoma nguluphi luhlobo lwekukhatsateka, liBhayibheli likukhutsata kutsi ‘ulahlele imitfwalo yakho kuSimakadze.’ (Hla. 55:22) Ukwetsemba mbamba yini loko? Kunetigidzi tebazalwane nabodzadze labangakucinisekisa kutsi loko kubasite mbamba, futsi nawe kungakusita!

11. Kungani kufanele uhlale umbonga Jehova?

¹¹ Umthantazo ukuniketa litfuba lekwenta lokungetulu kwekumane nje ucele lusito kuJehova. LiBhayibheli litsi: “Banini ngulababongako.” (Khol. 3:15) Ngaletinye tikhatsi, tinkinga lesinato tingasikhatsata kakhulu size singatinaki tibusiso letinyenti lesinato. Njalo ngelilanga, cabanga ngetibusiso letintsatfu lotitfolile. Thantaza kuJehova umbonge ngaleto tibusiso. Abigail loseminyakeni yekutfomba, lowabhajatiswa nakaneminyaka lengu-12, utsi: “Ngicabanga kutsi Jehova kufanele simbonge kakhulu kwendlula noma ngubani lomunye. Kufanele sihlale simbonga ngetipho lasipha tona.” Abigail uhlale atibuta kutsi: “Nangingavuka ekuseni nginaletintfo lengitibonge kuJehova kuphela, tingakhi tintfo lebengingaba nato?” *

12, 13. Kubaluleke ngani kutsi ucabange ngendlela lobubone ngayo buhle baJehova?

¹² INkhosi Davide leyasindza etinhlekeleleni letibuhlungu, yahlabela yatsi: “Ase ninambitse nibone kutsi Simakadze muhle unemusa! Ubusisiwe lowo lokhosela kuye!” (Hla. 34:8) Lamavi agcizelela kubaluleka kwekutibonela buhle baJehova. Nawufundza liBhayibheli kanye netincwadzi letisekelwe kulo uphindze uye nasemihlanganweni yebuKhristu, uyakhutsateka nawubona indlela Nkulunkulu lasite ngayo labanye kutsi bahlale betsembekile. Njengobe buhlobo bakho naNkulunkulu bukhula, kudzingeka ubone kutsi Jehova ukusita njani ekuphileni kwakho. Wena ububone njani buhle baJehova ekuphileni kwakho?

¹³ Onkhe emaKhristu abubonile buhle baJehova ngekutsi awameme kutsi asondzele kuye naseNdvodzaneni yakhe. Jesu watsi: “Kute umuntfu longeta kimi ngaphandle kwekutsi Babe longitfumile amdvonse.” (Joh. 6:44) Uyakholelwa yini kutsi loko kuyasebenta kuwe? Umuntfu lomusha angahle atsi, ‘Jehova wadvonsa batali bami, mine ngalandzela bona.’ Kodvwa ngesikhatsi utinikela kuJehova futsi ubhajatiswa, wakhombisa kutsi sewunebuhlobo lobuhle naye. Ecinisweni nyalo sewatiwa nguye. LiBhayibheli lisicinisekisa kutsi: “Nangabe umuntfu atsandza Nkulunkulu, yena watiwa nguNkulunkulu.” (1 Khor. 8:3) Ngaso sonkhe sikhatsi kufanele ukutsatse njengalokuligugu kuba senhlanganweni yaJehova.

14, 15. Umsebenti wekushumayela ungakusita njani kutsi ucinise kukholwa kwakho?

¹⁴ Lokunye longabona ngako kutsi Jehova muhle, yindlela lakusekela ngayo nawucocela labanye tintfo lotikholelwako. Loku ungakwenta nawusemsebentini wekushumayela ngisho noma usesikolweni. Labanye bakutfola kumatima kushumayela bantfu labafundza nabo esikolweni. Kungenteka uyasicondza sizatfu saloko. Usuke ungati kutsi batawenta njani nawubashumayela. Kungaba lukhuni kakhulu kucoca nelicembu lebantfu kunekucoca nemuntfu munye. Yini lengakusita?

¹⁵ Kwekucala, cabanga ngekutsi yini lekwenta uciniseke ngaloko lokukholelwako. Emathuluzi ekudadisha laku-jw.org ayatfolakala  yini ngelulwimi lwakho? Nangabe ungaciniseki, tinike sikhatsi sekuwabuka. Lamathuluzi entelwe kukusita kutsi ucabangisise ngaloko lokukholelwako, ngetizatfu tekutsi kungani ukukholelwa kanye nangekutsi ungabacocela njani labanye ngetintfo lotikholelwako. Nangabe uciniseka ngetintfo lotikholelwako futsi ulungiselele kahle, utawukhutsateka kutsi ukhulume ngaJehova.​—Jer. 20:8, 9.

16. Yini lengakusita uncobe kwesaba kukhuluma ngalokukholelwako?

¹⁶ Noma kunjalo, ungakutfola kumatima kukhuluma ngaloko lokukholelwako ngisho noma ulungiselele kahle. Lomunye dzadze loneminyaka lengu-18, lowabhajatiswa nakaneminyaka lengu-13 utsi: “Ngiyakwati loko lengikukholelwako, kepha ngaletinye tikhatsi kumatima kuchazela lomunye ngako.” Yini lemsita kutsi akhone kukhuluma ngaloko lakukholelwako? Utsi: “Ngetama kukhululeka. Bantfwana lengifundza nabo bativa bakhululekile ngekucoca ngetintfo labatentako, nami kufanele ngente lokufanako. Ngako ngivamise kucala ngekutsi, ‘Itolo ngesikhatsi ngifundzisa lomunye liBhayibheli . . . ’ Ngemuva kwaloko bese ngichubeka ngendzaba yami. Ngisho noma ngingakhulumi ngeliBhayibheli, labanye bese bafisa kwati kutsi ngenta njani nangifundzisa labanye. Ngaletinye tikhatsi baze babute nemibuto. Kuba melula kukhuluma ngeliBhayibheli nangabe ngihlale ngikwenta. Ngemuva kwaloko ngivame kutiva ngijabule kakhulu.”

17. Kuba nembono lokahle ngaloko lokukholelwako kungakusita njani kutsi ukhone kukucocela labanye?

¹⁷ Manyenti ematfuba ekutsi labanye bakulalele nangabe ubahlonipha futsi ukhombisa kutsi unendzaba nabo. Olivia loneminyaka lengu-17 futsi lowabhajatiswa angakefiki eminyakeni yekutfomba utsi: “Bengihlale ngesaba kutsi nangicoca nalabanye ngeliBhayibheli batawutsi ngikholwa kakhulu.” Kodvwa ngekuhamba kwesikhatsi wabese ucabanga ngendlela leyehlukile. Esikhundleni sekutsi avumele kwesaba kumehlule, Olivia watsi: “Bantfu labasha labanyenti kute labakwatiko ngaBoFakazi BaJehova. Ngitsi kuphela BoFakazi BaJehova lababatiko. Ngako indlela lesenta ngayo ngiyo letawuncuma kutsi batawusiphatsa njani. Nangabe sinemahloni noma sikutfola kumatima kukhuluma ngetintfo lesitikholelwako, bangahle bacabange kutsi asijabuli ngaloku lesingiko. Bangahle baphindze basiphatse kabi ngenca yekutsi asitetsembi. Noma kunjalo, manyenti ematfuba ekutsi basihloniphe nangabe sikhuluma ngekukhululeka futsi siciniseka ngaloko lesikukholelwako.”

18. Kufaka ekhatsi ini kusebentela kusindziswa kwakho?

¹⁸ Njengobe sesifundzile, kusebentela kusindziswa kwakho kungumsebenti lobaluleke kakhulu. Loku kufaka ekhatsi kufundza liVi laNkulunkulu uphindze uzindle ngalo, kuthantaza kuye futsi ucabange ngendlela Jehova lakubusise ngayo. Kwenta letintfo ngekutimisela kutawukhulisa kutetsemba kwakho njengobe unelilungelo lekuba ngumngani waJehova. Loko kutakukhutsata kutsi ukhulume nalabanye ngaloko lokukholelwako.​—Fundza Tihlabelelo 73:28.

19. Kungani imetamo loyentako yekusebentela kusindziswa kwakho ingasilo lite?

¹⁹ Jesu watsi: “Nangabe umuntfu afuna kungilandzela, akatidzele futsi avume kuhlushwa bese ungilandzela njalo.” (Mat. 16:24) Kuyacaca kutsi kuba ngumfundzi kufaka ekhatsi kutinikela nekubhajatiswa futsi loku kusifungo losentako njengemKhristu. Kuphindze kuvule litfuba lekutsi utfole tibusiso letinyenti nyalo kanye nasesikhatsini lesitako eveni lelisha laNkulunkulu. Ngako-ke unetizatfu letinyenti tekuchubeka usebentela kusindziswa kwakho!