Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Kute basite bantfwana babo babe nebuhlobo lobuhle naNkulunkulu, kungani batali lababakhoseli kufanele bacabangisise ngendzaba yelulwimi?

Bantfwana bangahle bafundze lulwimi lolukhulunywa kuleyondzawo nabasesikolweni noma nabahlangene nalabanye bantfu bakuleyondzawo. Kungaba lusito kutsi umntfwana ati tilwimi letinyenti. Batali kufanele bacabangisise kutsi bantfwana babo bawacondza ngaluphi lulwimi emaciniso futsi buhlobo babo naNkulunkulu butawutfutfuka yini nabaya ebandleni lelikhuluma lulwimi lwendzawo noma ebandleni lelikhuluma lulwimi lwabo. Batali labangemaKhristu babeka buhlobo bebantfwana babo naNkulunkulu kucala kunetintfo labatitsandzako.​—w17.05, emakh. 9-11.

Ngesikhatsi Jesu abuta Phetro kutsi: “Uyangitsandza yini kwendlula leti?” bekasho kutsini nakatsi “leti”? (Joh. 21:15)

Kubonakala ngatsi Jesu bekakhuluma ngetinhlanti lebetisedvute noma ngelibhizinisi lekudvweba. Ngemuva kwekuvuswa kwaJesu, Phetro wabuyela ebhizinisi lakhe lekudvweba tinhlanti. EmaKhristu kufanele atihlole kutsi awutsandza kakhulu yini umsebenti wawo wekutiphilisa.—w17.05, emakh. 22-23.

Kungani Abrahama acela umkakhe kutsi abotsi ungudzadzewabo? (Gen. 12:10-13)

Ecinisweni, vele Sara bekangudzadzewabo ngobe bebanababe munye. Kube Sara watsi abengumka-Abrahama, Abrahama abetawubulawa futsi loko bekutawuphazamisa luhla lwekutalwa kwaMesiya lobekatsenjiswe nguNkulunkulu.​—wp17.3, emakh. 14-15.

Nguyiphi indlela Elias Hutter labeyisebentisa kute asite bantfu labafuna kufundza siHebheru?

Bekafuna kutsi bafundzi bakhone kwehlukanisa ticu temagama esiHebheru labesetjentisiwe eBhayibhelini kunome ngusiphi sicalo noma sijobelelo. Ngako wabhala sicu seligama ngalinye asebentisa tinhlavu talo futsi wasebentisa tinhlavu temagama letinkhulu nakabhala ticalo netijobelelo. I-New World Translation of the Holy Scriptures—With References isebentisa indlela lefanako emibhalweni yangentasi.​—wp17.4, emakh. 11-12.

Ngutiphi tintfo umKhristu lokufanele acabange ngato nakafuna kuba nesibhamu kute ativikele kubantfu labangamhlasela?

Naku lokunye kwako: Kuphila kungcwele kuNkulunkulu. Jesu akazange atjele balandzeli bakhe kutsi babe netinkemba kute bativikele. (Luk. 22:36, 38) Kufanele sente tinkemba tetfu tibe ngemakhuba. Kuphila kubaluleke kakhulu kunetintfo lesinato. Siyabahlonipha bonembeza balabanye futsi sifuna kuba tibonelo. (2 Khor. 4:2)—w17.07, emakh. 31-32.

Kungani tindzaba letikuMatewu naLukha tichaza lokungafani mayelana nekuphila kwaJesu asemncane?

Incwadzi yaMatewu ikhuluma kakhulu ngaJosefa lokufaka ekhatsi lakwenta ngesikhatsi Mariya akhulelwe kanye nangemlayeto lovela kuNkulunkulu wekutsi abaleke eGibhithe futsi aphindze abuyele ngekuhamba kwesikhatsi. Incwadzi yaLukha yona ikhuluma ngalobekwentiwa nguMariya. Nasi sibonelo, ikhuluma ngekuvakashela kwakhe Elizabethe kanye naloko lakwenta ngesikhatsi Jesu asele ethempelini.—w17.08, likh. 32.

LiBhayibheli lisindze kutiphi tintfo?

Njengobe sikhatsi sichubeka, emagama laseBhayibhelini abengasasetjentiswa. Tingucuko letenteke kutepolitiki tiyishintjile indlela bantfu labakhuluma ngayo. Kukhona bantfu labebamelene nekuhunyushelwa kweliBhaybheli etilwimini letivamile.​—w17.09, emakh. 19-21.

Sinayo yini ingilosi lesigadzako?

Cha. Jesu watsi tingilosi tihlale tisembikwaNkulunkulu ngenca yebafundzi bakhe. (Mat. 18:10) Jesu bekangasho kutsi umuntfu ngamunye unengilosi yakhe lemgadzile, kunaloko bekatsi tingilosi tiyabavikela bafundzi bakhe.​—wp17.5, likh. 5.

Nguluphi luhlobo lwelutsandvo lolubaluleke kakhulu?

Lutsandvo lolusekelwe etimisweni a ga’pe ngilo lolubaluleke kakhulu. Lufaka ekhatsi imivelo kanye ne-kukhatsalelana. Lubonakala ngekubate bugovu kanye nangekwentela labanye tintfo letinhle.​—w17.10, likh. 7.