DIANA uneminyaka lengetulu kwa-80. Umyeni wakhe abenesifo lesiphatselene nengcondvo lokutsiwa yi-Alzheimer futsi wahlala ekhaya lalasebakhulile iminyaka letsite ngaphambi kwekutsi ashone. Kwaphindze kwadzingeka kutsi abhekane nekushonelwa ngemadvodzana akhe lamabili futsi abeketelele nesifo semdlavuza wemabele. Nobe kunjalo, emalunga elibandla laDiana atsi uhlala ajabulile nakambona eHholweni LeMbuso nobe ensimini.

John bekangumbonisi lojikeletako iminyaka lengetulu kwalengu-43. Bekawutsandza lomsebenti bekawenta futsi bewukuphila kwakhe. Nobe kunjalo, wawuyekela lomsebenti kuze anakekele sihlobo sakhe lesigulako, futsi nyalo ukhonta ebandleni lasekhaya. Labo labamatiko John batsi nabahlangana naye emhlanganweni wesigodzi noma wesifundza, babone ngatsi solo unjalo nje. Solo usejabulile.

Yini leyenta Diana naJohn bajabule? Kungenteka njani kutsi umuntfu locindzeteleke kakhulu emoyeni nasemtimbeni ajabule? Kungenteka njani kutsi umuntfu longasasenti sabelo lebekasitsandza achubeke ajabulile? LiBhayibheli lisenta sikucondzisise loku nalitsi: “Lolungile uyawujabula ngaSimakadze.” (Hla. 64:10) Leliciniso lelibalulekile singalicondzisisa nangabe sati kahle kutsi yini leyenta umuntfu ahlale ajabulile nalokungamenti ahlale ajabulile.

Wati kahle kutsi letinye tintfo tihlale tiyiletsa injabulo. Cabanga ngebantfu lababili labatsandzanako labashadako. Cabanga nangekuba ngumtali nobe kutfola sabelo lesivela kuNkulunkulu. Letintfo leti tiyamjabulisa umuntfu, kube kufanele, ngobe tivela kuJehova. Wasungula umshado futsi wabangela kutsi bantfu batalane. Nguye naloniketa bantfu tabelo ngelibandla lebuKhristu.—Gen. 2:18, 22; Hla. 127:3; 1 Thim. 3:1.

Nobe kunjalo, letinye tintfo letibangela umuntfu ajabule tingaba tesikhashana. Ngalokudzabukisako, umuntfu loshade naye angahle angetsembeki nobe afe. (Hez. 24:18; Hos. 3:1) Labanye bantfwana ababalaleli batali babo naNkulunkulu, mhlawumbe baze bayekeliswe kuba BoFakazi. Emadvodzana aSamuweli akazange akhonte Jehova ngendlela layemukelako, futsi tento taDavide tabangela kutsi ehlelwe yinhlekelele leyavela emndenini wakhe. (1 Sam. 8:1-3; 2 Sam. 12:11) Letintfo leti tenta umuntfu abe lusizi futsi acindzeteleke. Atiyiletsi injabulo.

 Ngendlela lefanako, tabelo letivela kuNkulunkulu nato tingahle tiphele, mhlawumbe ngenca yemphilo lebutsakatsaka, kunakekela umndeni, nobe tingucuko letenteka enhlanganweni yaNkulunkulu. Bantfu labanyenti labaphila ngaphansi kwaletingucuko bayavuma kutsi bayakukhumbula kwenetiseka umsebenti wabo lebewubaletsela kona.

Kumelula kubona kutsi ngekwelizinga lelitsite imitfombo lenjalo yenjabulo ingaba yesikhashana. Ngako, lukhona yini lolunye luhlobo lwenjabulo loluchubeka lukhona ngisho timo tingagucuka tibe timbi? Kufanele kube lukhona, ngobe Samuweli, Davide kanye nalabanye bachubeka bajabula ngesikhatsi babhekene nebumatima.

Jesu bekati kutsi iyini injabulo mbamba. Ngesikhatsi asaphila ezulwini, simo lebekaphila ngaphansi kwaso besisihle, futsi ngaso sonkhe sikhatsi ‘bekajabula embikwaJehova.’ (Taga 8:30) Kodvwa, ngesikhatsi alapha emhlabeni bekahle abhekana netimo letimatima kakhulu. Nobe kunjalo, Jesu abejabula ngekwenta intsandvo yaBabe wakhe. (Joh. 4:34) Kutsiwani ngebuhlungu labuva ema-aweni akhe ekugcina asaphila? Siyafundza: “Ngobe ngenca yenjabulo lebeyibekwe embikwakhe wabeketelela kufa elugodvweni.” (Heb. 12:2) Ngako-ke sinesizatfu lesihle sekucabanga ngetintfo letimbili Jesu lakhuluma ngato mayelana nenjabulo sibili.

Ngalelinye lilanga bafundzi baJesu labangu-70 bebabuya emsebentini wekushumayela. Bebajabule kakhulu ngobe bebente imisebenti yemandla, bakhipha ngisho nemadimoni. Jesu wabese utsi kubo: “Ningajatjuliswa kutsi emadimoni ayanilalela, kunaloko jabulani ngenca yekutsi emabito enu abhaliwe ezulwini.” (Luk. 10:1-9, 17, 20) Kuliciniso kutsi lobekubaluleke kakhulu kwendlula kujabulela umsebenti lokhetsekile bekukwemukelwa nguJehova. Yena utawubakhumbula bafundzi labetsembekile, lokuyintfo lokufanele isijabulise kakhulu.

Kulesinye simo Jesu abekhuluma nesicumbi sebantfu. Lomunye umfati longumJuda waveta indlela labetiva ngayo ngesikhatsi atsi make walomfundzisi lomuhle longuJesu kufanele kube uyajabula. Kodvwa Jesu wamlungisa, watsi: “Cha, bayajabula labo labeva livi laNkulunkulu futsi baligcine!” (Luk. 11:27, 28) Kuba ngumtali lonebantfwana  labakahle kuyintfo lejabulisako; kodvwa kuba nebuhlobo lobuhle naJehova ngenca yekutsi uyamlalela kusizatfu lesikhulu sekujabula.

Ecinisweni kuba nemuva wekutsi Jehova uyasemukela ngiko lokusenta sijabule kakhulu. Ngisho nobe kungajabulisi kubhekana nebumatima kodvwa abulishintji leliciniso. Ecinisweni nangabe sihlala setsembekile lapho sibhekene netinkinga, sitawujabula kakhulu. (Rom. 5:3-5) Ngetulu kwaloko, Jehova ubaniketa umoya wakhe labo labetsembele kuye, futsi injabulo ingulesinye setitselo tawo. (Gal. 5:22) Loku kusenta sibone kutsi kungani umbhalo weTihlabelelo 64:10 utsi: “Lolungile uyawujabula ngaSimakadze.”

Loko kuyakhombisa kutsi kungani Diana naJohn lokukhulunywe ngabo ekucaleni, bakhona kuhlala bajabulile ngesikhatsi babhekene netimo letimatima. Diana utsi: “Ngente Jehova waba siphephelo sami njengobe kwenta umntfwana kumtali wakhe.” Ubona njani kutsi Jehova uyamemukela? Utsi: “Ngiyabona kutsi Nkulunkulu ungibusise ngekutsi ngikhone kuchubeka ngishumayela njalo, futsi loko ngikwente ngijabulile.” John lowachubeka akhutsele emsebentini wekushumayela ngemuva kwekuyekela umsebenti wakhe lebekawutsandza wekujikeleta, uchaza loko lokwamsita kakhulu. Utsi: “Kusukela nga-1998 ngesikhatsi ngabelwa kutsi ngiyofundzisa eSikolweni Sekuceceshelwa Imisebenti YebuKhristu, ngibe nesikhatsi lesinyenti sekutifundzela liBhayibheli kunanini ngaphambili.” Nakakhulumela yena nemkakhe utsi: “Simo setfu sengcondvo ngekukhonta Jehova kuyo yonkhe leminyaka kunome ngabe ngusiphi sabelo lesisentile, kwente kutsi lolushintjo lungabi matima kakhulu. Loko sikwente ngaphandle kwekutisola.”

Nalabanye labanyenti bakubonile kuba liciniso kweTihlabelelo 64:10. Cabanga ngesibonelo salababili labashadene labakhonta eBethel yaseMelika iminyaka lengetulu kwalengu-30. Babese babelwa kutsi baye ensimini bayoba ngemahlahlandlela lakhetsekile. Bayavuma: “Kungekwemvelo kuva buhlungu nangabe ulahlekelwa yintfo letsite loyitsandzako, kodvwa angeke uchubeke uva buhlungu kuze kube phakadze.” Ngekushesha bahlanganyela nelibandla emsebentini wekushumayela. Lomndeni uyachubeka utsi: “Besitisho ngalokucondzile tintfo lesiticelako nasithantaza. Kubona imithantazo yetfu iphendvulwa kwasikhutsata futsi kwasijabulisa. Ngekushesha nje ngemuva kwekufika kwetfu, labanye ebandleni bacala kuba ngemahlahlandlela futsi sabusiswa ngekutfola tifundvo letimbili letitfutfukako.”

Kuyavunywa kutsi akusimelula ngaso sonkhe sikhatsi kuhlala ujabulile, futsi ngalesinye sikhatsi timo tiba matima. Kodvwa Jehova waphefumulela kutsi kubhalwe lamavi lasicinisekisako lesiwatfola kuTihlabelelo 64:10. Ngisho nobe sihle sidvumala, singaba nalo litsemba lekutsi labo labatibonakalisa ‘balungile’ ngekutsi bahlale betsembekile ngisho nobe timo tishintja ekuphileni kwabo, ‘bayawujabula ngaSimakadze.’ Ngetulu kwaloko, singakubuka ngalabovu kugcwaliseka kwesetsembiso saJehova ‘semazulu lamasha nemhlaba lomusha.’ Ngaleso sikhatsi sono sitawucedvwa nya. Bonkhe bantfu baNkulunkulu ‘batawujabula batfokote phakadze naphakadze’ ngaloko latakudala nalatabanika kona.—Isa. 65:17, 18.

Cabanga nje kutsi loku kuyawube kusho kutsini. Kuyawube kusho kutsi sitawube siphile saka futsi lilanga ngalinye sitawulicala sinemandla. Ngisho nobe esikhatsini lesendlulile sake seva buhlungu kakhulu, leyo nkhumbulo angeke ichubeke ikhona. Siyacinisekiswa kutsi “tintfo takadzeni tingeke tikhunjulwe, futsi tingeke tisabuya nasengcondvweni.” Simangaliso seluvuko sitawuphindze sisihlanganise nebantfu lesibatsandzako. Tigidzi letinyenti tebantfu titawutiva ngendlela batali bentfombatane leneminyaka lengu-12 labativa ngayo ngesikhatsi Jesu ayivusa. “Bonkhe lebebalapho bajabula kakhulu.” (Mak. 5:42) Ekugcineni wonkhe umuntfu losemhlabeni utawuba ‘ngulolungile’ ngemcondvo lophelele kuze kube phakadze, futsi ‘utawujabula ngaSimakadze.’