1, 2. Kungani kukuhlakanipha kulalela uMdali wetfu nangabe sikhetsa imigomo lesitatibekela yona ekuphileni? (Buka titfombe letisekucaleni kwalesihloko.)

NANGABE usemusha, kungenteka utfole teluleko letinyenti mayelana nelikusasa lakho. Kungenteka bothishela, beluleki betemfundvo kanye nalabanye bakukhutsate kutsi uyotfola imfundvo lephakeme noma umsebenti loholela kakhulu. Noma kunjalo, Jehova ufuna wente lokwehluke kakhulu. Ufuna kutsi usebente ngekutikhandla esikolweni kute utfole umsebenti lotakusita ukhone kutiphilisa. (Khol. 3:23) Kepha nawuncuma kutsi yini lebalulekile ekuphileni kwakho, ukukhutsata kutsi ucondziswe timiso letifaka ekhatsi letikhuluma ngenjongo yakhe kanye netintfo lafuna sitente kulamalanga ekugcina.—Mat. 24:14.

² Hlale ukhumbula kutsi Jehova wati konkhe. Uyakwati lokutawenteka esikhatsini lesitako futsi uyati nekutsi lelive lelibi utalibhubhisa nini. (Isa. 46:10; Mat. 24:3, 36) Natsi usati kahle. Utati kahle netintfo letitasenta sijabule futsi senetiseke kanye netintfo letingasenta sidvumateke siphindze singasajabuli. Ngisho noma singatibona tinengcondvo teluleko talabanye, nangabe tingakasekelwa eBhayibhelini tisuke tite kuhlakanipha.—Taga 19:21.

3, 4. Kulalela seluleko lesibi kwaba namuphi umphumela ku-Adamu na-Eva kanye nasesitukulwaneni sabo?

³ Sekuphele sikhatsi lesidze bantfu baniketa labanye teluleko letimbi. Sathane nguye lowacala kuniketa bantfu seluleko lesibi. Watjela Eva kutsi yena na-Adamu bebangajabula nangabe batikhetsela bona indlela yekuphila. (Gen. 3:1-6) Sathane bekafuna kutizuzisa yena. Bekafuna mkutsi bo-Adamu na-Eva kanye netitukulwane tabo bakhonte yena kunekutsi bakhonte Nkulunkulu. Kodvwa kute Sathane lekabentela kona. NguJehova lembekabanikete konkhe lebebanako, bobabili bebatawukhona kulibatisana, bebanengadze lenhle lebekulikhaya labo, bebete sono futsi bebatawuphila phakadze.

⁴ Lokubuhlungu kutsi bo-Adamu na-Eva abazange bamlalele Nkulunkulu futsi bamshiya. Njengoba sati, umphumela waba buhlungu kakhulu. Njengembali lejutjwe esihlahleni, kancane kancane baguga futsi bafa. Nebantfwana babo baba nesono. (Rom. 5:12) Nanobe kunjalo, bantfu labanyenti abamkhonti Nkulunkulu. Bafuna kuphila ngendlela labayifunako. (Ef. 2:1-3) Umphumela waloko usikhombisa ngalokucacile kutsi, “kuhlakanipha kwemuntfu . . . kungeke kukusite, nangabe kucondzene nekumelana naSimakadze.”—Taga 21:30.

5. Yini Jehova lebeketsemba kutsi bantfu batayenta, futsi bakwenta yini loko?

⁵ Jehova bekati kutsi labanye bantfu lokufaka ekhatsi bantfu labasha labanyenti bebatamfuna futsi bamkhonte. (Hla. 103:17, 18; 110:3) Bantfu labanjalo baligugu kuye. Wena ungulomunye wabo yini? Nangabe kunjalo, asingabati kutsi uyakujabulela kuba netintfo letinhle lotiphiwa nguNkulunkulu letikwenta ujabule kakhulu. (Fundza Tihlabelelo 103:5; Taga 10:22) Njengoba sitawubona, letintfo letinhle tifaka ekhatsi imfundvo lenyenti levela kuNkulunkulu, kuba nebangani labalungile, kutibekela imigomo letakwenta ujabule kanye nenkhululeko sibili.

6. Kungani kufanele usinake sidzingo sakho sekuba nebuhlobo lobuhle naNkulunkulu, futsi yini Jehova layentako kute akunike lokudzingako?

⁶ Ngalokungafani netilwane, bantfu banesidzingo sekuba nebuhlobo lobuhle naNkulunkulu futsi nguye kuphela longasisita sente njalo. (Mat. 4:4) Nangabe silalela Nkulunkulu sitfola kuhlakanipha, kucondza kanye nenjabulo. Jesu watsi: “Bayajabula labo labanakisisa tintfo letiphatselene naNkulunkulu.” (Mat. 5:3) Nkulunkulu ukusita kutsi ube nebuhlobo lobuhle naye asebentisa liBhayibheli kanye nemfundvo lesilungiselelwa “sisebenti lesetsembekile nalesihlakaniphile.” (Mat. 24:45) Sikujabulela kakhulu lokudla lokunyenti Jehova lasilungiselela kona.—Isa. 65:13, 14.

7. Ngutiphi tinzuzo lesititfola ngekufundza ngaNkulunkulu?

⁷ Lemfundvo levela kuNkulunkulu itakwenta uhlakaniphe futsi ucabange kahle, loko kutakuvikela ngetindlela letinyenti. (Fundza Taga 2:10-14.) Nasi sibonelo, kuhlakanipha kanye nekucondza kungakusita ukhone kubona timfundziso letingemanga letifaka ekhatsi letsi kute uMdali. Kuyakuvikela emangeni latsi imali netintfo talelive kukwenta ujabule. Kuphindze kukusite ukhone kubona tifiso letimbi futsi ulwisane nato. Ngako chubeka ufuna kuhlakanipha kwaNkulunkulu kanye nekucondza futsi ukutsatse njengalokuligugu. Njengobe uchubeka ulwela kuba nalobuntfu, utawati kancono kutsi Jehova uyakutsandza futsi  ukufunela lokuncono kakhulu.—Hla. 34:8; Isa. 48:17, 18.

8. Kungani kufanele usondzele kuNkulunkulu nyalo, futsi loko kutakusita njani esikhatsini lesitako?

⁸ Ngekushesha, lonkhe live laSathane litawubhujiswa futsi nguJehova kuphela lotasivikela aphindze asinikete tintfo lesitidzingako, letifaka ekhatsi kudla. (Hab. 3:2, 12-19) Nyalo sikhatsi sekutsi usondzele kuBabe wakho losezulwini futsi umetsembe kakhulu. (2 Phet. 2:9) Nangabe wenta njalo, ngisho noma kungentekani utawutiva ngendlela umhlabeleli lativa ngayo nakatsi: “Emehlo ami ayawunamatsela kuSimakadze phakadze naphakadze. Yena ungasesandleni sami sangesekudla, ngiyawuhlala kuye ngitinte.”—Hla. 16:8.

9. (a) Ngekusho kwembhalo waJohane 6:44, yini Jehova layentako? (b) Yini leyehlukile nawucoca kwekucala ngca nemuntfu longuFakazi WaJehova?

⁹ Jehova udvonsela bantfu labamlalelako enhlanganweni yakhe, futsi ngemusa usondzeta bantfu labanetinhlitiyo letinhle ekukhonteni kweliciniso. (Fundza Johane 6:44.) Nangabe ucoca nemuntfu longasuye Fakazi kwekucala ngca, loko kusho kutsi sewuyamati yini loyo muntfu? Kungenteka usuke wati nje ligama lakhe nendlela labukeka ngayo kuphela. Kodvwa kwenteka lokwehlukile nangabe ucoca kwekucala ngca nemuntfu lowati Jehova futsi lomtsandzako. Ngisho noma loyo muntfu avela kulelinye live, awalesinye sive, akhuliswa ngendlela leyehlukile kuyakho, futsi anemasiko langafani newakho, kusuke kukunyenti kakhulu lokwatiko ngaye futsi naye kunyenti lakwatiko ngawe.

10, 11. Yini BoFakazi BaJehova labafana ngayo, futsi loku kusizuzisa njani?

¹⁰ Nawuhlangana naFakazi waJehova kwekucala, uvele wati kutsi tinyenti tintfo lenifana ngato. Nanobe nikhuluma tilwimi letehlukene, kodvwa uyati kutsi nonkhe nikhuluma lulwimi loluhlantekile. (Zef. 3:9) Loku kusho kutsi nobabili nikhonta Nkulunkulu, niphila ngetimiso letifanako tekutiphatsa futsi ninematsemba lafanako ngelikusasa. Loko kunenta kutsi netsembane futsi nihlale nibangani labakhulu.

¹¹ Nangabe ukhonta Jehova, ungaciniseka kutsi unebangani labahle. Uba nebangani emhlabeni wonkhe ngisho noma ungakase  ucoce nabo. Ucabanga kutsi ukhona yini lonebangani labanjalo kodvwa abe angasuye lomunye waBoFakazi BaJehova?

12. Ngumiphi imigomo yekukhonta Nkulunkulu longatibekela yona?

¹² Fundza Umshumayeli 11:9–12:1. Ikhona yini imigomo yekukhonta Nkulunkulu lotibekele yona futsi lotimisele kuyifeza? Kungenteka wetama kufundza emavesi latsite eliBhayibheli onkhe malanga, noma wetama kutfutfukisa likhono lakho lekushumayela nelekufundzisa. Utiva kanjani nangabe ubona imiphumela lejabulisako yemetamo yakho noma nangabe labanye bayibona futsi bakuncoma? Kuliciniso kutsi uyajabula ngaloko lokufezile ngobe usuke wenta loko Jehova lakufunako futsi ulingisa Jesu.—Hla. 40:8; Taga 27:11.

13. Kuncono ngani kukhonta Nkulunkulu kunekulwela kufeza imigomo yebantfu balelive?

¹³ Nangabe unaka umsebenti lowentela Jehova, utawujabula futsi utawuba nenjongo ekuphileni. Umphostoli Pawula watsi: “Banini ngulabacinile, labangeke banyakatiswe, nihlale ninalokunyenti kwekukwenta emsebentini weNkhosi, nati kutsi kutikhandla kwenu akusilo lite eNkhosini.” (1 Khor. 15:58) Bantfu abayitfoli injabulo sibili nangabe balwela kufeza imigomo yebantfu balelive njengekwakha imali lenyenti noma kuba ngumuntfu lodvumile. Ngisho noma bangaphumelela, abakutfoli kwenetiseka. (Luk. 9:25) Loko sikubona nasicabanga ngesibonelo seNkhosi Solomoni.—Rom. 15:4.

14. Yini longayifundza kulokwenteka kuSolomoni?

¹⁴ Solomoni bekangulenye yemadvodza labenjinge kakhulu futsi abedvumile, wakubona loko wase utsi: “Ngitatitika ngato tonkhe tinhlobo tenjabulo ngitsi ngiyatijabulisa, ngifuna kubona kutsi yini lenhle.” (Shu. 2:1-10) Wakha tindlu letinyenti, tingadze letinhle, tindzawo tekuphumula (parks) futsi bekanako konkhe labekufuna. Wajabula futsi wenetiseka yini? Nakabuka tonkhe tintfo labekanato watsi: “Wonkhe umshikashika nekukhandleka kwami bekulite . . . Kute lokwaba yinzuzo.” (Shu. 2:11) Loko kusifundzisa sifundvo lesibalulekile. Utasisebentisa yini?

15. Kubaluleke ngani kukholwa, futsi ngutiphi tinzuzo tekuba nekukholwa letichazwe kuTihlabelelo 32:8?

¹⁵ Bantfu labanyenti bafundza kabuhlungu ngenca yemiphumela lebuhlungu yemaphutsa labawentile ekuphileni. Jehova akafuni loko kwenteke kuwe. Ufuna umlalele, futsi ukwente lakushoko. Kudzingeka ube nekukholwa kute ulalele Nkulunkulu futsi angeke uze utisole ngaloko. Ecinisweni, Jehova akayuze alukhohlwe “lutsandvo lenibe nalo ngelibito lakhe.” (Heb. 6:10) Ngako timisele kucinisa kukholwa kwakho, loko kutakusita utibonele kutsi Babe wakho wasezulwini ukufisela lokuhle kodvwa.—Fundza Tihlabelelo 32:8.

16. Kubaluleke ngani kutsi siyitsandze inkhululeko futsi siyisebentise kahle?

¹⁶ Umphostoli Pawula watsi: “Lapho umoya waJehova ukhona khona, kuba nenkhululeko.” (2 Khor. 3:17) Jehova uyayitsandza inkhululeko, futsi wakudala ngendlela yekutsi nawe uyitsandze. Nobe kunjalo, ufuna kutsi usebentise inkhululeko yakho ngendlela letakuvikela. Kungenteka kunalabasha lobatiko lababuka titfombe letikhombisa kungcola, labatiphatsa kabi ngekwelicasi, labadlala imidlalo leyingoti, noma labasebentisa kabi tidzakamiva kanye netjwala. Kungenteka babonakala bajabula, kodvwa bavame kubhekana nemiphumela lebuhlungu. Lemiphumela ingafaka ekhatsi tifo, kuba  ngumlutsa, ngisho nekufa imbala. (Gal. 6:7, 8) Kuyacaca kutsi basuke batikhohlisa kutsi bakhululekile.—Thit. 3:3.

17, 18. (a) Kulalela Nkulunkulu kusikhulula njani? (b) Yini lesenta sitsi inkhululeko bo-Adamu na-Eva bebanayo ekucaleni beyiyinyenti kakhulu kwendlula bantfu labanayo lamuhla?

¹⁷ Bangakhi bantfu lobatiko labagulako ngenca yekutsi baphila ngetimiso letiseBhayibhelini? Nangabe silalela imiyalo yaNkulunkulu siba nemphilo lenhle kanye nenkhululeko sibili. (Hla. 19:7-11) Lokubaluleke kakhulu kutsi nangabe uyisebentisa kahle inkhululeko yakho ngekutsi ukhetse kuphila ngetimiso taNkulunkulu, usuke ukhombisa Nkulunkulu kanye nebatali bakho kutsi wetsembekile futsi nabangakuniketa inkhululeko leyengetiwe ungayisebentisa kahle. Nkulunkulu ufuna kuniketa tinceku takhe letetsembekile inkhululeko lephelele liBhayibheli leliyichaza ngekutsi ‘yinkhululeko lekhatimulako yebantfwana baNkulunkulu.’—Rom. 8:21.

¹⁸ Bo-Adamu na-Eva bebanekhululeko lephelele. Ensimini yase-Edeni, Nkulunkulu abebabekele umtsetfo munye nje kuphela. Bekatse bangasidli sitselo sesihlahla sekwati lokuhle nalokubi. (Gen. 2:9, 17) Lomtsetfo bewungabacindzeteli futsi ungabemuki inkhululeko. Loko sikubona nasicabanga ngemitsetfo leminyenti bantfu labacindzetela labanye kutsi bayati futsi bayilalele.

19. Yini Jehova naJesu labasifundzisa yona letasisita sikhululeke?

¹⁹ Indlela Jehova lasiphatsa ngayo njengobe sitinceku takhe ikhombisa kutsi uhlakaniphile. Esikhundleni sekutsi asinikete imitsetfo leminyenti, ngemusa usifundzisa kutsi siphile ngemtsetfo welutsandvo. Ufuna siphile ngetimiso takhe futsi sikwenyanye lokubi. (Rom. 12:9) ENshumayelweni yakhe yaseNtsabeni, Jesu wakhuluma ngesizatfu lesenta bantfu bente tintfo letimbi. (Mat. 5:27, 28) Emhlabeni lomusha, Jesu utawuchubeka asifundzisa kuze sibe bantfu labalungile futsi sibe nembono lofana newakhe ngetintfo letimbi njengobe ayiNkhosi yeMbuso waNkulunkulu. (Heb. 1:9) Utawuphindze ente imitimba kanye netingcondvo tetfu kutsi kube bete sono. Cabanga nje sewute sono futsi sewungasabhekani nemiphumela yaso lebuhlungu. Ekugcineni, utawuba ‘nenkhululeko lekhatimulako’ Jehova lakwetsembisa yona.

20. (a) Jehova uyisebentisa njani inkhululeko lanayo? (b) Kungakusita njani kumlingisa?

²⁰ Ngisho naseveni lelisha, inkhululeko yetfu itawuba nemincele. Kanjani? Kutawufanele sihlale simtsandza Nkulunkulu kanye nebantfu. Jehova usicela kutsi simlingise. Jehova unenkhululeko lephelele, kodvwa uvumela lutsandvo lumcondzise kuko konkhe lakwentako, lokufaka ekhatsi indlela lasiphatsa ngayo. (1 Joh. 4:7, 8) Ngako kunengcondvo kutsi nangabe sinelutsandvo lolufana nelwaNkulunkulu sitawukhululeka mbamba.

21. (a) Davide bekativa njani ngaJehova? (b) Sitawucoca ngani esihlokweni lesilandzelako?

²¹ Jehova uyakufundzisa ngaye, ukuphe bangani labahle, imigomo lemihle, litsemba lelihle lekutfola inkhululeko lephelele esikhatsini lesitako, kanye naletinye tintfo letinhle. Uyatijabulela yini tonkhe letibusiso Jehova lakuphe tona? (Hla. 103:5) Nangabe kunjalo, kungenteka utiva ngendlela Davide lativa ngayo nakasho emavi lakuTihlabelelo 16:11 latsi: “Uyawungifundzisa indlela yekuphila. Lapho kukhona khona wena kunekujabula lokuphelele. Esandleni sakho sangesekudla kunekujabula phakadze naphakadze.” Esihlokweni lesilandzelako sitawucoca ngalamanye emaciniso laligugu latfolakala kuTihlabelelo 16. Lamaciniso atakusita ubone tintfo letibalulekile naletenetisako ekuphileni.