Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Ngubuphi bufakazi lobusembhalweni lobukhombisa Jehova uneluvelo?

Ngesikhatsi ema-Israyeli atigcili eGibhithe, Nkulunkulu wakubona kukhatsateka kwabo futsi wabavela buhlungu. (Eks. 3:7; Isa. 63:9) Sakhiwe ngemfanekiso waNkulunkulu ngako natsi singabavela labanye. Jehova uyasihawukela ngisho nobe ngaletinye tikhatsi singativa singakufaneli kutsandvwa nguye.—wp18.3, emakh. 8-9.

Indlela Jesu bekashumayela ngayo yabasita njani bantfu kutsi bancobe kubandlululana?

EmaJuda lamanyenti angesikhatsi saJesu abebandlululana. Khristu wakhuluma ngekubaluleka kwekutfobeka futsi wakulahla kutigcabha ngenca yebuve. Wakhutsata balandzeli bakhe kutsi batsatse labanye njengabomnakabo.—w18.06, emakh. 9-10.

Yini lesiyifundzako ngekutsi Nkulunkulu angamvumeli Mosi kutsi angene eVeni Lesetsembiso?

Mosi bekanebuhlobo lobuhle naJehova. (Dut. 34:10) Nasekuyophela iminyaka lengu-40 asehlane, ema-Israyeli akhonona kwesibili afuna emanti. Nkulunkulu watjela Mosi kutsi akhulume nelidvwala. Kodvwa Mosi washaya lidvwala. Kungenteka Jehova wakwatela Mosi ngobe akazange alandzela ticondziso takhe noma ngenca yekutsi Mosi akazange alumikise kuNkulunkulu ludvumo ngenca yalesimangaliso. (Num. 20:6-12) Loko kusifundzisa kutsi kubalulekile kulalela Jehova kanye nekumnika ludvumo.—w18.07, emakh. 13-14.

Kungani kungaba liphutsa kwehlulela labanye ngalesikubonako?

Bantfu labanyenti bavame kwehlulela labanye ngenca yebuve, simo semnotfo, noma ngenca yeminyaka labanayo. Kubalulekile kutsi setame kubona labanye ngendlela Nkulunkulu lababona ngayo, singababandlululi! (Imis. 10:34, 35)—w18.08, emakh. 8-12.

EmaKhristu lasakhulile angabasita njani labanye?

UmKhristu losakhulile lotfole sabelo lesisha solo uligugu kuJehova futsi kunyenti langakwenta kute asite labanye. Angakhona kushumayela labanye, asite labapholile, achube tifundvo teliBhayibheli, aphindze andzise sikhatsi lasicitsa ashumayela.—w18.09, emakh. 8-11.

EmaKhristu anamaphi Emathulusi Ekufundzisa?

Kunemakhadi e-jw.org, kanye netimemo. Kuphindze kube nemapheshana lakhiwe kahle lasiphohlongo kanye ne-Sicongosekulindza ne-Phaphama! Kulamathulusi kuphindze kube netincwajana letimbalwa, tincwadzi letimbili lesifundzisa ngato, ema-video lamane lalusito; kufaka ekhatsi letsi Kungani Kufanele Sifundze LiBhayibheli?—w18.10, likh. 16.

EmaKhristu ‘angalitsenga kanjani’ liciniso, njengoba kusho Taga 23:23?

Asiyibhadali imali kuze sati liciniso. Nanobe kunjalo kufanele sicitse sikhatsi siphindze sitidzele kute silitfole.—w18.11, likh. 4.

Yini lesiyifundzako ngendlela Hoseya laphatsa ngayo Gomeri umkakhe?

Gomeri watiphatsa kabi ngekwelicasi kodvwa Hoseya wamcolela wangamdivosi. Nangabe umuntfu loshade nemKhristu atiphatsa kabi ngekwelicasi, lomKhristu angakhetsa kumcolela. Nangabe aya ecasini nalomlingani wakhe longakatsembeki, loko kungenta kubete sizatfu lesisekelwe emBhalweni sekudivosa.—w18.12, likh. 13.